LECCIÓN 42
¿Ndáaña káʼa̱n Biblia xa̱ʼa̱ na̱ íyo kúa̱an ta saátu xa̱ʼa̱ na̱ ti̱ndaʼa̱?
Ku̱a̱ʼání na̱ yiví ndákanixi̱nína ña̱ va̱ʼa si̱í kooyó xíniñúʼu tindaʼa̱yó. Soo su̱ví ndiʼi na̱ ti̱ndaʼa̱ si̱í íyona ta ni su̱ví ndiʼi na̱ kúa̱an va̱ása si̱í íyona, saáchi ña̱ Biblia káchiña ni íyo kúa̱anyó a ni xa̱a̱ ti̱ndaʼa̱yó iin ña̱ ta̱xi Jehová kúú ña̱yóʼo.
1. ¿Ndáaña va̱ʼa ndákiʼinyó xa̱ʼa̱ ña̱ íyo kúa̱anyó?
Ña̱ Biblia káchiña: “Na̱ tíndaʼa̱ va̱ʼava kéʼéna, soo va̱ʼaníka kéʼé na̱ va̱ása tíndaʼa̱” (kaʼvi 1 Corintios 7:32, 33, 38). ¿Ndáaña kúni̱ kachi ña̱ va̱ʼaníka kéʼé iin na̱ yiví tá va̱ása tíndaʼa̱na? Na̱ kúa̱an na̱ ndásakáʼnu Ndióxi̱ va̱ása ndíʼi̱ví-inina xa̱ʼa̱ yiína á ñá síʼína, xa̱ʼa̱ ña̱kán ku̱a̱ʼáka ña̱ʼa kivi keʼéna. Tá kúú, ña̱ ku̱ʼu̱nna inka ñuu ña̱ va̱ʼa ku̱a̱ʼáka kachíñuna nu̱ú Jehová ta saátu ña̱ natúʼunna xa̱ʼa̱ra. Ta inka ña̱ va̱ʼaní kúú, ña̱ kivi kuniñúʼuna ku̱a̱ʼáka tiempona ña̱ va̱ʼa xa̱a̱na viíka kutáʼanna xíʼin Jehová.
2. ¿Ndáaña va̱ʼa ndákiʼin na̱ ti̱ndaʼa̱ va̱ʼa?
Íyo ña̱ va̱ʼa ndákiʼin na̱ kúa̱an ta saátu na̱ ti̱ndaʼa̱. Ña̱ Biblia káchiña ña̱ “va̱ʼaníka u̱vi̱na nu̱úka iinlána” (Eclesiastés 4:9). Ta na̱ káʼa̱n ña̱yóʼo xa̱ʼa̱ kúú na̱ xa̱a̱ ti̱ndaʼa̱ ta kéʼéna ña̱ káʼa̱n Biblia. Na̱ yiví na̱ xa̱a̱ ti̱ndaʼa̱ va̱ʼa, kíndo̱ona ña̱ kuʼvi̱-inina kuni táʼanna, ixato̱ʼó táʼanna ta kundaa táʼanna. Xa̱ʼa̱ ña̱kán, va̱ása yíʼvina sandákoo táʼanna nda̱a̱ táki̱ʼva kéʼé na̱ yiví na̱ va̱ása nítindaʼa̱ va̱ʼa. Ta na̱ xa̱a̱ ti̱ndaʼa̱ va̱ʼa, chíndeétáʼanña xíʼinna ña̱ kuaʼnu va̱ʼa se̱ʼena.
3. ¿Ndáaña ndákanixi̱ní Jehová xa̱ʼa̱ ña̱ tíndaʼa̱na?
Tá sa̱tíndaʼa̱ Jehová na̱ nu̱ú na̱kuva̱ʼa, ni̱ka̱ʼa̱nra ña̱yóʼo: “Xa̱ʼa̱ ña̱yóʼo ta̱a sandákoora yivára xíʼin siʼíra, ta ndakutáʼanra xíʼin ñá síʼira” (Génesis 2:24). Jehová kúni̱ra ña̱ na̱ xa̱a̱ ti̱ndaʼa̱ ná kuʼvi̱-inina kunitáʼanna ta ndiʼi tiempo ná kutáʼanna ña̱ koona nu̱ú ñuʼú yóʼo. Iinlá xa̱ʼa̱ ña̱ kivi sandákoo táʼanna kúú tá iin na̱yóʼo ni̱ki̱si̱na xíʼin inkana. Soo táxi Ndióxi̱, na̱ kǒo ku̱a̱chi kúúmií kúú na̱ ná ndaka̱xin á sandákoo táʼanna á va̱ása (Mateo 19:9). a Jehová va̱ása táxira na̱ ndásakáʼnu miíra ná kuumiína ku̱a̱ʼá ñá síʼína á yiína (1 Timoteo 3:2).
NÁ SAKUAʼAKAYÓ XA̱ʼA̱ÑA
Ná kotoyó ndáaña kivi keʼún ni íyo kúa̱ún á ni xa̱a̱ ti̱ndaʼún ña̱ kivi koo si̱íún ta saátu sakúsi̱íún-ini Jehová.
4. Vií kuniñúʼún tiempo ña̱ kúa̱ún
Nu̱ú ta̱ Jesús iin ña̱ va̱ʼaní kúú ña̱ koo kúa̱anna (Mateo 19:11, 12). Kaʼvindó Mateo 4:23 ta ka̱ʼa̱nndó xa̱ʼa̱ ña̱yóʼo:
-
¿Ndáa ki̱ʼva vií xi̱niñúʼu ta̱ Jesús ña̱ ni̱xi̱yo kúa̱anra ña̱ ka̱chíñura nu̱ú yivára ta saátu ña̱ chi̱ndeétáʼanra xíʼin inkana?
Na̱ kúa̱an na̱ ndásakáʼnu Ndióxi̱ kivi koo si̱ína tá vií ná kuniñúʼuna tiempona, nda̱a̱ táki̱ʼva ke̱ʼé ta̱ Jesús. Kotondó VIDEO ta ka̱ʼa̱nndó xa̱ʼa̱ ña̱yóʼo:
-
¿Ndáa ki̱ʼva viíní kuniñúʼu na̱ kúa̱an na̱ ndásakáʼnu Ndióxi̱ tiempona?
¿Á xa̱a̱ xíni̱ún xa̱ʼa̱ ña̱yóʼo?
Ña̱ Biblia va̱ása káʼa̱nña nda̱saa ku̱i̱ya̱ xíniñúʼu kuumií iin na̱ yiví ña̱ va̱ʼa tindaʼa̱na. Soo káʼa̱nña ña̱ va̱ʼaní tá ná tindaʼa̱na tá va̱ása válíkana, chi tá válína saá kúú ña̱ ndeéníka kúni̱na ku̱su̱nna xíʼin inkana ta xa̱ʼa̱ ña̱yóʼo va̱ása vií koo ña̱ ndaka̱xinna keʼéna (1 Corintios 7:36).
5. Vií va̱ʼa ndaka̱xiún na̱ tindaʼa̱ xíʼún
Ña̱ ndaka̱xinna na̱ tindaʼa̱ xíʼinna iin ña̱ ndáyáʼviní kúú ña̱yóʼo. Kaʼvindó Mateo 19:4-6, 9 ta ka̱ʼa̱nndó xa̱ʼa̱ ña̱yóʼo:
-
¿Nda̱chun xíniñúʼu viíní ndakanixi̱ní na̱ ndásakáʼnu Ndióxi̱ xa̱ʼa̱ ña̱ tindaʼa̱na?
Ña̱ Biblia kivi chindeétáʼanña xíʼún ña̱ va̱ʼa kunda̱a̱-iniún ndáaña va̱ʼa xíniñúʼu kuumií na̱ tindaʼa̱ xíʼún. Mií ña̱ ndáyáʼvika xíniñúʼu keʼéna kúú ña̱ kuʼvi̱-inina kunina Jehová. b Kaʼvindó 1 Corintios 7:39 xíʼin 2 Corintios 6:14. Ta ka̱ʼa̱nndó xa̱ʼa̱ ña̱yóʼo:
-
Tá iin na̱ ndásakáʼnu Ndióxi̱ kúni̱na tindaʼa̱na, ¿nda̱chun xíniñúʼu ndaka̱xinna iin na̱ inkáchi ndásakáʼnu Ndióxi̱ xíʼinna?
-
Tá ná tindaʼa̱na xíʼin iin na̱ va̱ása kúʼvi̱-ini xíni Jehová, ¿ndáaña kundoʼora?
Tá su̱ví inkáchi íyo kití tí ñúʼu ti̱xin iin yugo, xo̱ʼvi̱ u̱vi̱ saárí. Ki̱ʼva saá íyoña, tá iin na̱ ndásakáʼnu Ndióxi̱ tíndaʼa̱na xíʼin iin na̱ va̱ása kúʼvi̱-ini xíni Jehová kixiní tu̱ndóʼo nu̱úna.
6. Koto ña̱ tíndaʼa̱na nda̱a̱ táki̱ʼva xíto Jehová ña̱yóʼo
Na̱ ñuu Israel na̱ ni̱xi̱yo tá ya̱chi̱ xi̱sandákoona ñá síʼina xa̱ʼa̱ ña̱ kúni̱ miína. Kaʼvindó Malaquías 2:13, 14, 16 ta ka̱ʼa̱nndó xa̱ʼa̱ ña̱yóʼo:
-
¿Nda̱chun sáa̱ní Jehová tá iinna sándakoo ndaʼa̱na ñá síʼina xa̱ʼa̱ ña̱ kúni̱ miína?
Na̱ kísi̱ xíʼin na̱ kǒo níti̱ndaʼa̱ xíʼinna ta saátu na̱ sándiʼi-xa̱ʼa̱ ña̱ ti̱ndaʼa̱na sáxo̱ʼvi̱nína na̱ va̱ása níki̱ʼvi ku̱a̱chi ta saátu se̱ʼena.
Kotondó VIDEO ta ka̱ʼa̱nndó xa̱ʼa̱ ña̱yóʼo:
-
Tá na̱ ti̱ndaʼa̱ xíʼún va̱ása kúʼvi̱-inina xínina Jehová, ¿ndáaña kivi keʼún ña̱ va̱ʼa si̱í koondó?
7. Kuniso̱ʼo ña̱ káʼa̱n Jehová xa̱ʼa̱ na̱ ti̱ndaʼa̱
Savana kivi ixayo̱ʼvi̱ña xíʼinna keʼéna ña̱ káʼa̱n Jehová xa̱ʼa̱ na̱ ti̱ndaʼa̱. c Soo táxira bendición ndaʼa̱ na̱ chíka̱a̱ní ndeé ña̱ keʼéna ña̱yóʼo. Kotondó VIDEO.
Kaʼvindó Hebreos 13:4 ta ka̱ʼa̱nndó xa̱ʼa̱ ña̱yóʼo:
-
¿Á ndákanixi̱níún ña̱ káʼa̱n Jehová xa̱ʼa̱ na̱ ti̱ndaʼa̱ iin ña̱ va̱ʼa kúúña? ¿Nda̱chun ndákanixi̱níún saá?
Jehová kúni̱ra ndiʼi na̱ ndásakáʼnu miíra ná kuumiína iin tutu ña̱ ti̱ndaʼa̱na á ña̱ sa̱ndákoo táʼanna, saáchi na̱ chíñu káʼa̱nna ña̱ ná keʼéna ña̱yóʼo. Kaʼvindó Tito 3:1 ta ka̱ʼa̱nndó xa̱ʼa̱ ña̱yóʼo:
-
Ta miíún tá xa̱a̱ ti̱ndaʼún, ¿á kúúmiíún tutu xa̱ʼa̱ ña̱yóʼo ta á xíni̱ na̱ chíñu xa̱ʼa̱ña?
ÑA̱ NDÁKA̱TU̱ʼUN SAVA NA̱ YIVÍ: “¿Nda̱chun xíniñúʼu tindaʼa̱ va̱ʼavíyó nu̱ú na̱ chíñu? ¿Á ndáyáʼviví kuumiíyó iin tutu xa̱ʼa̱ ña̱ ti̱ndaʼa̱yó?”.
-
¿Ndáaña ndakuiún?
ÑA̱ XA̱A̱ SA̱KUAʼAYÓ
Ña̱ koo kúa̱anyó ta saátu ña̱ tindaʼa̱yó iin ña̱ táxi Jehová kúúña. Ni kúa̱anyó á ni xa̱a̱ ti̱ndaʼa̱yó kivi si̱íní kooyó tá kéʼéyó ña̱ káʼa̱n Ndióxi̱ xíʼinyó.
Ná ndakaʼányó xa̱ʼa̱ ña̱yóʼo
-
¿Ndáa ki̱ʼva vií kuniñúʼu na̱ kúa̱an tiempona?
-
¿Nda̱chun káʼa̱n Biblia ña̱ va̱ása xíniñúʼu tindaʼa̱ na̱ ndásakáʼnu Ndióxi̱ xíʼin na̱ va̱ása ndásakáʼnura?
-
Nda̱a̱ táki̱ʼva káchi Biblia, ¿ndáa xa̱ʼa̱ kúú ña̱ kivi sandákoo táʼanna?
NANDUKÚKA XA̱ʼA̱ÑA
¿Ndáaña kúni̱ kachi ña̱ tindaʼa̱na xíʼin na̱ ndásakáʼnu Ndióxi̱?
“Pregunta ña̱ kéʼé na̱ káʼvi tutu yóʼo” (La Atalaya, 1 tí julio ku̱i̱ya̱ 2004)
Koto u̱vi̱ ña̱ʼa ña̱ káʼa̱n xa̱ʼa̱ na̱ kúú novio ta saátu na̱ xa̱a̱ ti̱ndaʼa̱ ña̱ kivi chindeétáʼan xíʼún ña̱ vií koo ña̱ ndaka̱xiún keʼún.
Koto nda̱chun kándíxa iin ta̱ hermano ña̱ va̱ʼaníka ña̱ ta̱xi Jehová ndaʼa̱ra nu̱úka ña̱ sa̱ndákoora.
Tá na̱ ndásakáʼnu Ndióxi̱ ndákanixi̱nína ña̱ sandíʼi-xa̱ʼa̱na ña̱ ti̱ndaʼa̱na á ña̱ sandákoo táʼanna, ¿ndáaña xíniñúʼu kiʼinna kuenta xíʼin?
a Nu̱ú nota 4 ndani̱ʼíkaún ña̱ káʼa̱n xa̱ʼa̱ ña̱ sandákoo táʼanna (soo tá kǒo níki̱ʼvina ku̱a̱chi xíʼin inkana).
b Sava ñuu yivá na̱ va̱lí kúú na̱ ndáka̱xin ndáana tindaʼa̱ xíʼin se̱ʼena. Ta yivá na̱ va̱lí yóʼo ndáka̱xinna iin na̱ ndixa kúʼvi̱-inina xíni Jehová ña̱ tindaʼa̱na xíʼin se̱ʼena. Ta ña̱yóʼo kúú ña̱ ndáyáʼvika nu̱úka kúúmiína xu̱ʼún á va̱ása.
c Tá íyoún xíʼin iin na̱ ta̱ʼán tindaʼa̱ va̱ʼún xíʼin, miíún kúú na̱ ndaka̱xin á tindaʼún xíʼinna á va̱ása tindaʼa̱ va̱ʼún xíʼinna.
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
