TLAMACHTILI 42
¿Tlake kiniljuia Biblia katli mosenkajtokej uan katli nojua ayamo?
Ipan se keskij altepemej, maseualmej moiljuiaj tlaj kinekij yolpakisej moneki mosiuajtisej o monamiktisej. Maske kiampa moiljuiaj, amo nochi katli mosenkajtokej yolpakij, uan amo nochi katli itstokej ininselti mokuesouaj. Biblia kiijtoua kuali kema se akajya mosenkaua o itstok iselti.
1. ¿Tlake sekinok tlamantli uelij kichiuaj katli amo mosenkajtokej?
Biblia kiijtoua: “Maske katli mosenkaua kichiua tlen kuali, nojua tlauel kuali tlaj se akajya amo mosenkaua” (xijpoua 1 Corintios 7:32, 33; 7:38, TNM). ¿Tlake kiijtosneki “katli amo mosenkaua nojua tlauel kuali tlen kichiuas”? Kiijtosneki Cristo itokilijkauaj katli amo mosenkajtokej amo tlauel motekipachouaj pampa amo moneki kimokuitlauisej ininueue o ininsiua. Yeka, inijuantij uelij kichiuaj miak tlamantli. Sekij tlauel yolpakij pampa amo ouij kimatij yasej tlajtolmoyauatij ipan seyok altepetl. Uan nojkia pampa itstokej ininselti kipiaj tonali uan nopa kinpaleuia nojua kuali ma mouampojchiuakaj iuaya Jehová.
2. ¿Kenijkatsa kinpaleuia kema se tlakatl uan se siuatl moamasenkauaj?
Katli mosenkajtokej nojkia kinpaleuia ipan se keski tlamantli, sanse kej katli itstokej ininselti. Biblia kiijtoua: “Achi más kuali kema omej [...] tekitij sansejko uan axtekiti setsi iselti” (Eclesiastés 4:9). Kiampa pano kema katli mosenkajtokej kichiuaj ipan ininnemilis tlen Biblia kiijtoua. Se tlakatl uan se siuatl katli moamasenkauaj kiijtouaj nochipa moiknelisej, motlepanitasej uan momokuitlauisej ika tlaiknelili. Uan nopa kinpaleuia ma motemachikaj nochipa itstosej sansejko uan amo kiampa kiyolmatiskiaj tlaj san mosansejkotiliskiaj. Nojkia, ininkoneuaj motemachiaj inintatauaj nochipa itstosej sansejko.
3. ¿Kenijkatsa kinita Jehová katli mosenkajtokej?
Jehová kichijki Adán uan Eva ma itstokaj sansejko, kiniljuik: “Se tlakatl kikauas itata uan inana para mosejkotilis iuaya isiua” (Génesis 2:24). Jehová kineki katli mosenkajtokej ma moiknelikaj uan nochipa ma itstokaj sansejko. Uan kiijtoua uelis kiixpolosej nopa amatl kampa nesi mosenkajtokej tlaj se tlen inijuantij motekas iuaya seyok. Kema kiampa pano, san katli kiixpanokej uelis kitlapejpenis tlaj kiixpolos nopa amatl kampa nesi mosenkajtokej (Mateo 19:9). a Jehová kineki itekipanojkauaj ma kipiakaj san setsi ininsiua o ininueue (1 Timoteo 3:2).
KUALI XIMOMACHTI
Ma tikitakaj tlake mitspaleuis tiyolpakis uan tijyolpakiltis Jehová maske timosenkajtok o nojua tiitstok moselti.
4. Tlaj amo timosenkajtok uelis tijchiuas miak tlamantli
Jesús kiijtok tlauel kipatiitayaya itstos iselti pampa amo mosenkajtoya (Mateo 19:11, 12). Xijpouakaj Mateo 4:23 uan xijnankilikaj ni tlajtlanili:
-
¿Kenijkatsa kipaleuik Jesús pampa amo mosenkajtoya tlauel ma kitekipano iTata uan ma kinpaleui sekinok?
Cristo itokilijkauaj katli amo mosenkajtokej uelis yolpakisej tlaj kichiuasej kej Jesús. Xikitakaj nopa VIDEO uan xijnankilikaj ni tlajtlanili:
-
¿Tlake tlamantli uelis kichiuasej Cristo itokilijkauaj katli amo mosenkajtokej?
¿Tijmajtoya?
Maske Biblia amo kiijtoua keski xiuitl moneki kipias se akajya katli kineki mosenkauas, kena kiijtoua uelis mosenkauas kema ya kuali tlalnamiktok. Kiampa moneki kichiuas pampa kema se akajya ayamo kuali tlalnamiki, tlauel kiyoltilana motekas iuaya se akajya, yeka ouij kimati kuali kitlapejpenis tlen kichiuas (1 Corintios 7:36).
5. Kuali xijtlapejpeni iuaya ajkia timosiuajtis o timonamiktis
Moneki kuali timoiljuis iuaya ajkia timosiuajtis o timonamiktis, pampa nopa eli se tlamantli tlen tlauel ipati. Xijpouakaj Mateo 19:4-6, 9 uan xijnankilikaj ni tlajtlanili:
-
Tlaj se Cristo itokilijka kineki mosenkauas, ¿kenke achtoui moneki kuali moiljuis tlen kichiuas?
Biblia mitspaleuis tijmatis tlake kuajkuali tlamantli moneki kinextis katli iuaya tijneki timosenkauas. Xijtemo se akajya katli kiiknelia Jehová. b Xijpouakaj 1 Corintios 7:39 uan 2 Corintios 6:14. Teipa xijnankilikaj ni tlajtlanili:
-
Tlaj se Cristo itokilijka kineki mosenkauas, ¿kenke moneki kitlapejpenis se akajya katli nojkia kitekipanoua Jehová?
-
¿Kenijkatsa timoiljuia kiyolmatis Jehová tlaj timosenkauas iuaya se akajya katli amo kiiknelia?
Tlaj kinkauasej ma tekitikaj sansejko omej tlapialmej katli amo sanse elij, tlauel tlaijiyouisej. Nojkia kiampa pano kema se Cristo itokilijka mosenkaua iuaya se akajya katli amo kiiknelia Jehová, pampa kipiaj miak kuesoli.
6. Xijpatiita pampa timosenkajtok sanse kej Jehová kipatiita
Uejkajkia, israeleuanij kiixpolouayayaj nopa amatl kampa nesiyaya mosenkajtoyaj pampa san kinekiyayaj kichiuasej tlen inijuantij kinpaktiyaya. Xijpouakaj Malaquías 2:13, 14, 16 uan xijnankilikaj ni tlajtlanili:
-
¿Kenke Jehová amo kineki se akajya ma kiixpolo nopa amatl kampa nesi mosenkajtok tlaj amo kiixpanotok tlen Biblia kiijtoua?
Kema se akajya moteka iuaya seyok o kiixpoloua nopa amatl kampa nesi mosenkajtok, tlauel kiyolkokoua inamik uan nojkia kinyolkokoua ikoneuaj.
Xikitakaj nopa VIDEO uan xijnankilikaj ni tlajtlanili:
-
Tlaj moueue o mosiua amo kitekipanoua Jehová, ¿tlake uelis tijchiuas tlaj tijneki tiyolpakis iuaya?
7. Xijchiua tlen Jehová kinnauatia ma kichiuakaj katli kinekij mosenkauasej
Maske sekij ouij kimatij kineltokasej tlen Jehová kinnauatia ma kichiuakaj katli kinekij mosiuajtisej o monamiktisej, c ya kinteochiua katli kichiuaj kampeka kineltokasej. Xikitakaj nopa VIDEO.
Xijpouakaj Hebreos 13:4 uan xijnankilikaj ni tlajtlanili:
-
¿Timoiljuia Jehová kinamiki ma techiljui kenijkatsa kineki ma monejnemiltikaj katli mosenkajtokej? ¿Kenke kiampa timoiljuia?
Jehová kineki itekipanojkauaj ma kipiakaj nopa amatl kampa nesi mosenkajtokej o ma kiixpolokaj nopa amatl kema ayokmo itstokej sansejko, pampa ipan miak altepemej tekichiuanij kiampa kinekij ma kichiuakaj. Xijpouakaj Tito 3:1 uan xijnankilikaj ni tlajtlanili:
-
Tlaj tijpia moueue o mosiua, ¿timoamasenkajtok ininixpa tekichiuanij?
TLEN SEKINOK KIIJTOUAJ: “Amo moneki nimoamasenkauas ininixpa tekichiuanij”.
-
¿Kenijkatsa titlanankiliskia?
TLEN TIMOMACHTIJKEJ
Jehová kuali kinita katli mosenkauaj uan nojkia katli itstokej ininselti. Uan inijuantij uelis yolpakisej tlaj kichiuasej tlen Jehová kipaktia.
¿Tlake tijyekok?
-
¿Tlake tlamantli uelis kichiuasej katli amo mosenkajtokej?
-
¿Kenke Biblia kiijtoua Cristo itokilijkauaj san moneki mosenkauasej iuaya se akajya katli nojkia kitekipanoua Jehová?
-
¿Kema kiijtoua Biblia uelis kiixpolosej nopa amatl kampa nesi mosenkajtokej?
NOJKIA XIKITA NI
¿Tlake kiijtosneki timosenkauas iuaya se akajya katli “nojkia kineltoka toueyiTeko”?
“Tlen maseualmej kinekij kimatisej” (Tlen Tematiltia, julio 1, 2004)
Xikita ome videos kampa nesij moixtokaj uan kenijkatsa uelis mokualchijchiuasej katli kinekij mosiuajtisej o monamiktisej, nopa mitspaleuis kuali tijtlapejpenis tlen tijchiuas.
¿Kenijkatsa uelis timokualchijchiuas tlaj tijneki timosiuajtis o timonamiktis? (11:53)
Xikita kenke se toikni kiijtoua maske monejki kikauas se keski tlamantli, nama Jehová tlauel kiteochijtok.
¿Tlake tlamantli moneki kiilnamiktos se Cristo itokilijka uan kiampa amo kinekis kiixpolos nopa amatl kampa nesi mosenkajtok o kikauas inamik?
“Ma tijpatiitakaj ‘tlen toTeko Dios kinsejkotilijtok’” (Tlen Tematiltia, diciembre 2018)
a Ipan nota 4 tijpantis sekinok tlamachtili kampa kiijtoua tlaj katli mosenkajtokej uelis mokauasej maske se tlen inijuantij amo motejki iuaya seyok.
b Ipan se keskij altepemej, tetajmej kitlapejpeniaj iuaya ajkia mosenkauas inintelpoka o ininichpoka. Kema tetajmej kiampa kichiuaj, kiitaj tlaj katli iuaya mosenkauas inintelpoka o ininichpoka kiiknelia Jehová uan amo tlaj kipia tomij o amo.
c Tlaj amo timosenkajtok iuaya katli tiitstok, ta moselti moneki tijtlapejpenis tlaj timoamasenkauas o tlaj ayokmo tiitstos iuaya.
Tlen nojkia mitspaktis tikitas
TLEN KINEKIJ KIMATISEJ
¿Kenijkatsa Jehová itlajtoltemakauaj tlamachtiaj ika Biblia?
Kema Jehová itlajtoltemakauaj mitsmachtisej ika Biblia amo mitsinamasej uan uelis tijtekiuis Biblia tlen ta tijnekis. Nojkia uelis tikintlaneuis sekinok kej mochampoyouaj o mouampoyouaj.
