ISIFUNDO 42
IBhayibhili Lithini Ngokutshada Lokuhlala Ungatshadanga?
Abanye abantu bathi ukutshada yikho okwenza umuntu athokoze. Kodwa iqiniso yikuthi ayisibo bonke abatshadileyo abathokozayo futhi ayisibo bonke abakhethe ukuhlala bengatshadanga abangathokoziyo. IBhayibhili litshengisa ukuthi kokubili ukutshada lokuhlala ungatshadanga yizipho ezivela kuJehova.
1. Kunceda ngani ukuhlala ungatshadanga?
IBhayibhili lithi: “Otshadayo wenza kuhle, kodwa ohlala engatshadanga wenza kuhle kakhulu.” (Bala u-1 Khorinte 7:32, 33, 38.) Kutshoni ukuthi umuntu ohlala engatshadanga “wenza kuhle kakhulu”? UmKhristu okhetha ukuhlala engatshadanga kalamthwalo onjengowomuntu otshadileyo, owokunakekela omunye wakhe. Ulenkululeko ethe xaxa yokwenza okunengi ekukhonzeni uJehova. Ngokwesibonelo, kulula ukuthi athuthele kwelinye ilizwe ukuze ayetshumayela khona njalo ulesikhathi esinengi sokuqinisa ubungane bakhe loJehova.
2. Kunceda ngani ukutshada ngokusemthethweni?
Ukutshada lakho kuyanceda. IBhayibhili lithi “ababili bangcono kuloyedwa.” (UmTshumayeli 4:9) Amazwi la aliqiniso ikakhulu kwabatshadileyo abasebenzisa izimiso eziseBhayibhilini. Phela ukutshada ngokusemthethweni kwenza indoda lomkayo bazimisele ukuqhubeka bethandana, behloniphana futhi beqakathekisana. Kanti njalo kwenza bathembane kakhulu, okuyinto engaba nzima kulabo abahlala ndawonye bengatshadanga. Ukutshada kunceda lokuthi abazali bakhulise abantwababo bendawonye futhi lokhu kwenza abantwana bakhule behlalisekile.
3. UJehova uthini ngokutshada?
Ngesikhathi uJehova ehlanganisa u-Adamu lo-Eva wathi: “Indoda izatshiya uyise lonina inamathele kumkayo.” (UGenesisi 2:24) UJehova ufuna indoda lomkayo abatshadileyo bathandane futhi bahlale ndawonye okwempilo yabo yonke. Uthi bangadivosa kuphela nxa omunye wabo efebile futhi lowo owonelweyo nguye olelungelo lokukhetha ukuthi uzadivosa yini loba hatshi. a (UMathewu 19:9) UJehova kafuni ukuthi amaKhristu eqiniso athathe isithembo.—1 KuThimothi 3:2.
GEBHA UJULE
Engxenyeni le uzabona ukuthi ungamthokozisa njani uJehova kungelani lokuthi utshadile kumbe awutshadanga.
4. Sisebenzise kuhle isipho sokuhlala ungatshadanga
UJesu wathi ukungatshadi yisipho. (UMathewu 19:11, 12) Bala uMathewu 4:23 beselixoxa ngombuzo lo:
-
UJesu wasisebenzisa njani isipho sokungatshadi?
AmaKhristu akhetha ukuhlala engatshadanga angalingisela uJesu ngokusisebenzisa kuhle isipho lesi. Bukelani IVIDIYO beselixoxa ngombuzo olandelayo.
-
AmaKhristu akhetha ukuhlala engatshadanga angasisebenzisa njani isipho lesi?
Ubukwazi yini?
IBhayibhili alitsho ukuthi umuntu kumele atshade eseleminyaka emingaki. Kodwa lithi kumele atshade nxa “sekwedlule isikhathi lapho imizwa yakhe yobutsha elamandla khona.” Lesi yisikhathi lapho isifiso sokuya emacansini esilamandla kakhulu emuntwini osakhulayo futhi kubanzima ukuthi akhethe kuhle.—1 KwabaseKhorinte 7:36.
5. Khetha kuhle umuntu wokutshada laye
Ukukhetha umuntu wokutshada laye yisinqumo esiqakatheke kakhulu. Bala uMathewu 19:4-6, 9 beselixoxa ngombuzo lo:
-
Kungani kungamelanga umKhristu ajahe ukutshada?
IBhayibhili lilamacebo azakunceda ukuthi ukhethe kuhle umuntu wokutshada laye. Okuqakatheke kakhulu yikuthi ukhethe umuntu othanda uJehova. b Bala u-1 Khorinte 7:39 lo-2 Khorinte 6:14 beselixoxa ngemibuzo le:
-
Kungani kumele utshade lomuntu okhonza uJehova njengawe?
-
Ubona angani uJehova uzwa njani nxa ungatshada lomuntu ongamkhonziyo?
Nxa kungabotshwa inyamazana ezitshiyeneyo ejogweni linye, zombili zidonsa nzima. LomKhristu otshada lomuntu ongakhonzi uJehova uba lenhlupho ezinengi kakhulu
6. Qakathekisa umtshado njengoJehova
Amanye amadoda ako-Israyeli ayetshiya omkawo ngezizatho ezingatsho lutho. Bala uMalaki 2:13, 14, 16 beselixoxa ngombuzo olandelayo:
-
Kungani uJehova ekuzonda ukuthi abatshadileyo badivose kungelasizatho esivela eBhayibhilini?
Ukufeba lokudivosa kuzwisa abantwana lalowo otshade laye ubuhlungu
Bukelani IVIDIYO beselixoxa ngombuzo olandelayo.
-
Kuyini ongakwenza ukuze lihlale lithokoza lanxa utshade lomuntu ongakhonzi uJehova?
7. Sebenzisa izimiso ezivela kuJehova
Zimisele ukusebenzisa izimiso ezivela kuJehova emulini yakho. c Ungenza njalo uJehova uzakubusisa. Bukelani IVIDIYO.
Bala uHebheru 13:4 beselixoxa ngemibuzo le:
-
Ubona angani imithetho kaJehova emayelana lokutshada iyanceda yini? Kungani usitsho njalo?
Emazweni amanengi ohulumende bakhangelele ukuthi abantu batshade ngokusemthethweni futhi badivose ngokusemthethweni. UJehova ukhangelele ukuthi amaKhristu eqiniso ayilandele imithetho le. Bala uThithusi 3:1 beselixoxa ngombuzo olandelayo:
-
Litshade ngokusemthethweni yini?
NXA OMUNYE ANGATHI: “Ukutshada akuqakathekanga, abantu bangazihlalela bonke nxa bethandana.”
-
Ungamphendula usithini umuntu otshonjalo?
ISIFINQO
Ukutshada lokuhlala ungatshadanga yizipho ezivela kuJehova. Kokubili kungenza sithokoze nxa silandela okufunwa nguJehova.
Ufundeni?
-
Umuntu okhetha ukuhlala engatshadanga angasisebenzisa njani isipho sokungatshadi?
-
Kungani iBhayibhili lisithi umKhristu kumele atshade lomuntu okhonza uJehova kuphela?
-
IBhayibhili lithi yisiphi isizatho esingenza abatshadileyo badivose?
THOLA OKUNENGI
Bala isihloko lesi uzwe ukuthi kutshoni ukutshada ‘eNkosini’ kuphela.
Bukela ividiyo le ukuze ubone ukuthi ungakulungiselela njani ukutshada.
Bukela ividiyo le uzwe ukuthi omunye umzalwane watshiyani ukuze akhonze uJehova.
Bala uzwe ukuthi kuyini okumele umuntu acabange ngakho nxa efuna ukudivosa kumbe ukwehlukana lomkakhe okwesikhathi esithile.
“Kuhloniphe ‘Lokho UNkulunkulu Asekuhlanganisile’” (INqabayokulinda, December 2018)
a Bala Amabala Asekucineni 4 ukuze uthole okunengi ngokwehlukana okwesikhatshana nxa kungela ofebileyo.
b Kwezinye indawo abazali yibo abakhethayo ukuthi umntanabo uzatshada lobani. Endaweni ezinjalo abazali kumele bakhangele ukuthi lowomuntu uyamthanda yini uJehova, hatshi ukuthi ulemali kumbe ukuthi uyini emphakathini.
c Nxa uhlala lomuntu othandana laye kodwa lingatshadanga ngokusemthethweni, kukuwe ukuthi uzakhetha ukwehlukana laye yini kumbe ukutshada laye.
Nanku Okunye
IMIBUZO EJAYELE UKUBUZWA NGABANTU
OFakazi BakaJehova Babafundisa Njani Abantu IBhayibhili?
Uhlelo lokufunda iBhayibhili laboFakazi bakaJehova ngolwamahala njalo ukhululekile ukusebenzisa iBhayibhili olijayeleyo kanye lokunxusa izihlobo labangane ukuthi labo bafunde lindawonye.
