CIJIJO 42
Bhaibheri Rinonangenyi ngo Pamusoro po Kucadha no Kutama Kucadha?
Mundharaudha jimweni, vandhu vazinji vanorangarira kuti vanozova vakadakara kudari vakacadha. Asi, asipi vese vakacadha vanomudakaro, nee asipizve vese vacizivi kucadha vacina mudakaro. Zvokadi ngo zvokuti, Bhaibheri rinonanga kuti kucadha no kutama kucadha izvipo zvinovha kuna Jehovha.
1. Ngojapi muviyo jimweni jiripo ngo kutama kucadha?
Bhaibheri rinoti: “Wiya anocadha anoita zvakanaka, asi wiya anotama kucadha anozoita zvakanaka maningi.” (Verenganyi 1 Vakorinte 7:32, 33, 38.) Kuitisa kudini wiya acizivi kucadha anoita “zvakanaka maningi”? Makristu acizivi kucadha aaneseki ngo zvinodiwa zvo mukaji kana mwamuna. Ivona vanoita zvavanoda. Inga muezaniso, vangashandisa nguva yavo kuti vaite zvizinji mubasa rokucumaera, kangaije kutoenda kunyika imweni kocumaera masoko akanaka. Kusiyapo izvo, ivona vano mukuvo wakawanda kuti vakhwedere phedo na Jehovha.
2. Ngojapi muviyo jinovepo kudari tikatarisa mucadho?
Kucadha no kutama kucadha, zvese zvinomuviyo. Bhaibheri rinoti, “vari nane vaviri, kupinda umwe.” (Mucumaeri 4:9) Izvi ndizvonadi, maningi-ningi kuno Makristu ayani anoshandisa ndhungamiriro jo Bhaibheri pa mucadho. Kudari mwanarume no mwanakaji vakatarisa mucadho, ivona vanonga veciita mbhiko yokuti, vanozodisana, kureremejana no kukorondhana. Izvo zvinovaita kuti vave vakangwaririka, zviro zvokuti vaya vacizivi kutarisa mucadho avana. Kutarisa mucadho kunoita kuti vana vajizwe vakangwaririka.
3. Ngoapi mavonero a Jehovha ngo pamusoro po mucadho?
Jehovha paakabatanija mucadho wokutanga, iyena wakati: “Mwanarume anozosia baba na mai vake wozobatana no mukaji wake.” (Genesi 2:24) Jehovha anoda kuti mukaji no mwamuna vadisane no kugara vese pamukuvo wese wovanonga vecipona. Iyena anotendera kuti varambane kudari mwamuna kana mukaji akaita upombo. Pa mugariro wakadaro, Jehovha anopa mukana kuna wiya acizivi kuita upombo kuti akhete ega kuti anoda kurambana kana kuti aadi. a (Mateu 19:9) Jehovha anoda kuti Mukristu ave no mukaji umwe kana mwamuna umwe basi.—1 Timoti 3:2.
NASANYI KUPSAKISISA
Vonanyi kuti vacizivi kucadha no vakacadha vangaitisa kudini kuti vave vakadakara no kudakajisa Jehovha.
4. Zvingaithwa ngo vacizivi kucadha kuti vashandise ushoni upenyu hwavo
Jesu waivona kutama kucadha inga cipo caushoni maningi. (Mateu 19:11, 12) Verenganyi Mateu 4:23, perapo bhuisananyi ngo muvhunjo unotevera:
-
Jesu wakashandisisa kudini cipo caainga naco cokutama kucadha kuti ashandire Babake no kubesera vamweni?
Makristu acizivi kucadha angatevejeravo muezaniso wa Jesu. Rijanyi VHIDHIYO, perapo bhuisananyi ngo muvhunjo unotevera.
-
Mukristu acizivi kucadha angashandisisa kudini rusujunuko hwake kuti ashandire Jehovha?
Imwimwi maizviziva?
Bhaibheri arinangi kuti mundhu anodikana kucadha anomakore akati kuti. Asi, Bhaibheri rinovangisa kuti mundhu anoda kucadha anodikana kuvetera mbhera apindirije “makore o kuaruka.” Ngokuti pa makore aya, cido cokuda kuita zvoruvatano cinonga cakavanga maningi, zvoita kuti mundhu apose kusana waanoda kurovorana naye.—1 Vakorinte 7:36.
5. Nasanyi kusana wamunoda kurovorana naye
Kusana wokurovorana naye ndicimwe co cisungo cinosisira maningi mu upenyu. Verenganyi Mateu 19:4-6, 9, perapo bhuisananyi ngo muvhunjo unotevera:
-
Ngenyi Mukristu aadikani kukasikira kucadha?
Bhaibheri rinomubesera kuziva kuti ngojapi mugariro ja mungapsaka ku mwamuna kana mukaji. Asi zvinosisira maningi pa zvese, ngo zvokuti iyena ade Jehovha. b Verenganyi 1 Vakorinte 7:39 na 2 Vakorinte 6:14. Perapo bhuisananyi ngo muvhunjo jinotevera:
-
Ngenyi tinodikana kucadha no mundhu anoshandiravo Jehovha?
-
Munorangarira kuti Jehovha waizojizwa kudini kudari tikacadha no mundhu acikamushandiri?
Zvinyama zviviri zvakasiyana zvikadihwa pakanga yondhoyo, izvona zvinotambujika. Munjira yakafanana, Mukristu kudari akacadha no mundhu acikashandiri Jehovha iyena anowanana no zvineso
6. Ivanyi no mavonero a Jehovha ngo pamusoro po mucadho
Munguva yo Vaiziraeri, vanarume vamweni vairamba vakaji vavo pacina thangwe riri rese. Verenganyi Malakia 2:13, 14, 16, perapo bhuisananyi ngo muvhunjo unotevera:
-
Ngenyi Jehovha anonyenya kurambana ngo zviro zvicikanangwi mu Bhaibheri?
Upombo no kurambana kunoviisa zvineso zvakakura maningi ku mundhu acizivi waro kuita upombo no kuno vana
Rijanyi VHIDHIYO, perapo bhuisananyi ngo muvhunjo unotevera.
-
Kudari makacadha no mundhu acikashandiri Jehovha, ngozvapi zvamungaita kuti muve no mucadho unodakajisa?
7. Shandisanyi zvinonanga Jehovha ngo pamusoro po mucadho
Vandhu vamweni vangatodikana kuvangisira kuti vashandise ndhungamiriro jo Bhaibheri ngo pamusoro po mucadho. c Asi Jehovha anokomborera vaya vanovangisira. Rijanyi VHIDHIYO.
Verenganyi Vahebheru 13:4, perapo bhuisananyi ngo muvhunjo jinotevera:
-
Munorangarira kuti zvinokwanisika kushandisa zvinonanga Jehovha ngo pamusoro po mucadho? Ngenyi?
Mu nyika jimweni utongi unonanga kuti vandhu vanodikana kwenda kotarisa pa vanocadha, kana kuti pavanorambana vanodikana kopfujurisa mucadho wavo. Jehovha anovetera kuti Makristu azwire mutemo jondhojo. Verenganyi Tito 3:1, perapo bhuisananyi ngo muvhunjo jinotevera:
-
Kudari imwimwi muri mwamuna kana mukaji, muno cokwadi cokuti mucadho wenyu wakataririswa? Kana unozivikana ngo utongi here?
VANDHU VAMWENI VANGAMUVHUNJISA KUDARI: “Ngenyi ndinodikana kotarisa? Azviiti hazvo kugara no mundhuwo ndicizivi kotarisa?”
-
Imwimwi maizomudavirisa kudini?
ZVOTAJIJA
Kucadha no kutama kucadha izvipo zvinovha kuna Jehovha. Vakacadha no vacizivi kucadha, vangava no mudakaro mu upenyu kudari vakapona mukuzwirana no zvinoda Jehovha.
Kuhwirijira
-
Mundhu acizivi kucadha angashandisisa kudini nguva yaanayo ngo njira yakanaka?
-
Ngenyi Bhaibheri rinonanga kuti tinodikana kucadha no mundhu anoshandira Jehovha?
-
Ngorapi thangwe rinowanika mu Bhaibheri rinotendera kuti mundhu arambane?
ZIVANYI ZVIMWENI
Zvinoda kurevenyi kucadha basi muna “Mambo”?
“Mibvunzo Inobva Kuvaverengi” (Murindiri, No. 1 wa Julho wo 2004, Cishona)
Vonanyi vhidhiyo mbiri doko jingamubesera kuti muteme civaringo cakanaka pamunoda kunamorari no kucadha.
Vonanyi kuti ngenyi hama imweni inorangarira kuti Jehovha wakaipa zviro zvakanaka maningi kupinda zvayakasiya sure.
Kudari mundhu ecirangarira kurambana kana kuparajana, ngozvapi zviro zvaanodikana kusotesesa?
“Reremejanyi ‘Bzakabatanijwa ndi Mwari’” (Murindiri, wa Dezembro wo 2018)
a Vonanyi Masoko Okupejisira 4 kuti muzive ngo pamusoro po kuparajana kudari pacina waita upombo.
b Mundharaundha jimweni, vabari ndivona vanosana kuti mwana wavo anodikana kurovora kana kurovohwa ndiyani. Pa mugariro uwu, vabari vanorudo vanodikana kusotesesa kuti mundhuwo anoda Jehovha kana kuti haiwa. Kuciripi kusota kuti ano mare kana kuti wakajija maningi.
c Kudari muri kugara no mundhu mucizivi kutarisa mucadho naye, kurambana naye kana kotarisa naye icisungo cenyu.
