WANGƆ 42
Tɛnɛ mɛ Ngbangɔ tɛnɛ mɛ ba dungɔ mɔdo na lingɔ libala nɛ?
Asambela mɛndɛ̃ ndo tɛnɛ ya ayɔ ya zo li libala ti nɛngɔ ya lo du na dengɔ bɛ. Ta bo azi zu mɛ li libala la na dengɔ bɛ ma, wa ta amɔdo zu nga la ndo du na sɔngɔ bɛ ma. Ngbangɔ tɛnɛ ya dungɔ mɔdo bere lingɔ libala du nzɔ̃ ye mɛ alo ka tɛ Nzapa.
1. Nzɔ̃ lo mɛ dungɔ mɔdo ndo hɛ̃ nɛ?
Ngbangɔ pa ya: “Se zo li libala ko, lo li nzɔ̃ni, wa se ta zo li nga libala ma ko, lo li nzɔ̃ni bwai.” (Di 1 Kɔrinto 7:32, 33, 38, NWT.) Nda mɛ Ngbangɔ pa ya dungɔ mɔdo du “nzɔ̃ni bwai” nɛ? Ta kokisangɔ gwɛ̃ tɛ kɔli bere tɛ wali ba amɔdo ma. Ni la ala lengbi ti lingɔ aye gba mɛ bɛ la ye. Ala lengbi ti gwengɔ pangɔ nzɔ̃ pa ka ndo bere ka kɔdɔrɔ mɛndɛ̃. Omɛ ɔ zu, ala lengbi ti salelangɔ ngoi tɛ la ti nɛngɔ ya ala ti na mangbi ti nzɔ̃ni na Yehova.
2. Nzɔ̃ lo mɛ lingɔ libala ndo hɛ̃ nɛ?
Kwɛ kɔi na dungɔ mɔdo, lingɔ libala ndo hɛ̃ nzɔ̃ lo. Ngbangɔ pa ya “azi sɛ ɔ zo kɔi.” (Mosakoli 4:9) A ndo du ngaso na ngoi mɛ azi mɛ li libala ndo tɔndɔ ndia ti Ngbangɔ. Azi mɛ li libala na landangɔ ndia tɛ leta ndo ko kapa ya, ala na hɛ̃ngbingɔ ndima nga na yengbingɔ. Ni la libala tɛ la ndo du ndo mɛ nzɔ̃ni ɔngɔ azi mɛ ta leta hĩnga libala tɛ la ma. Ni na dungɔ ndo ti nzɔ̃ni mɛ ayangambi bata na tɛrɛ la.
3. Yehova ndo ba libala ngasia?
Na ngoi mɛndó Yehova bombi kɔli na wali ti uzu kaya libala ko, lo tɛnɛndó ya: “Kɔli na ziangɔ to lo na ta lo, wa lo na ngbãngɔ ndoni kɔi na ya lo.” (Ebandeli 2:24) Yehova na gwɛ̃ ya kɔli na wali mɛ li libala ayengbi, adu ndoni kɔi ngoi zu mɛ ala na dungɔ lɛ ngɛ̃́. Yehova hɛ̃ lége ya libala kpi bo na ngoi mɛ zo kɔi ti kɔmbɛ. Na ya lo ti ngaso, Yehova zi lége hɛ̃ zo mɛ ta ti kɔmbɛ ma ya lo mu ekateli ti hongɔ libala bere ta lo ho ma. a (Matie 19:9) Ta Yehova ye ya wakristo du na wali bere kɔli gba ma.—1 Timɔte 3:2.
GI HĨNGANGƆ LO MƐNDƐ̃
Gi hĩngangɔ se mɛ mɔ lengbi ti dungɔ na dengɔ bɛ nga na se mɛ mɔ hɛ̃ Yehova dengɔ bɛ abɛse du ya mɔ mɔdo bere mɔ li libala.
4. Salela mɔdo tɛ mɔ na ndenge ti nzɔ̃ni
Yezo ndo hũndó dungɔ mɔdo ya adu ye mɛ lo ka tɛ Yehova. (Matie 19:11, 12) Di Matie 4:23, wa na pɛni hɛ̃ gbinya ti hũnda olo mɛ:
-
Ngasia ndó la Yezo salela mɔdo tɛ lo ti nɛngɔ ya ni li na kwa hɛ̃ To ni wa ni za nga na azi mɛndɛ̃ nɛ?
Wakristo lengbi ti dungɔ na dengɔ bɛ se du ya lo salela mɔdo tɛ lo nga ma se mɛndó Yezo li na ni. Ba VIDEO, wa na pɛni hɛ̃ gbinya ti hũnda olo mɛ.
-
Se ti nzɔ̃ni mɛ awakristo lengbi ti salelangɔ na mɔdo tɛ la nɛ?
Mɔ hĩnga ni?
Ta Ngbangɔ hɛ̃ bulu nvɛ̃ni mɛ zo lengbi ti lingɔ libala ma. Abɛse ngaso ko, ni tɛnɛ ya ale zo kũ tee lo ti “kɔli bere wali mɛ kpengba,” na lo mɛ ya ngoi mɛ zo dɛ palanga ko, lo lengbi ti dungɔ na gwɛ̃ ti tɛrɛ kpengbani, wa ni lengbi ti tongɔ lo ya lo mu ekateli ti siɔni.—1 Kɔrinto 7:36.
5. Pɔna zo mɛ mɔ ye dungɔ na lo na ndara
Pɔnangɔ zo mɛ mɔ ye dungɔ na lo adu kɔi ti ekateli ti ngbondoni ti ya dungɔ lɛ ngɛ̃́ tɛ zo. Di Matie 19:4-6, 9, wa na pɛni hɛ̃ gbinya ti hũnda olo mɛ:
-
Nda mɛ du nzɔ̃ni ya wakristo gbɔ̃ li lo uzu ti nɛngɔ ya lo li libala nɛ?
Ngbangɔ na zangɔ mɔ ya mɔ hĩnga seliye tɛ zo mɛ mɔ ye dungɔ na lo nzɔ̃ni. Omɛ du ngbondoni, du na wakristo mɛ ndo ye Yehova. b Di 1 Kɔrinto 7:39 nga na 2 Kɔrinto 6:14. wa na pɛni hɛ̃ gbinya ti ahũnda olo mɛ:
-
Nda mɛ ayɔ ya mɔ du na zo mɛ ndo vɔrɔ Yehova nɛ?
-
Yehova lengbi ti mangɔ tɛrɛ lo ngasia se wakristo mu ekateli ti dungɔ na zo mɛ ta lo ndo vɔrɔ lo ma nɛ?
Se agbe asa sɛ mɛ kɛsɛnɛ ndoni kɔi ya ala li kwa ko, ala zu sɛ na hũngɔ pɛnɔ. Kwɛ kɔi se wakristo du na zo mɛ ta lo ndo vɔrɔ Yehova ma ko, lo na tengbingɔ na pɛnɔ gba
6. Ba libala nga ma se mɛ Yehova ndo ba na ni
Ka Izraɛlɛ ti gã, akɔli ndo hondó libala na ndo lo mɛ azanga tina. Di Malaki 2:13, 14, 16, wa na pɛni hɛ̃ gbinya ti hũnda olo mɛ:
-
Nda mɛ Yehova kɛ̃ hongɔ libala na ndo lo mɛ zanga tina nɛ?
Se zo ti kɔmbɛ bere lo ho libala ko, fɔ̃ lo lengbi ti hũngɔ pɛnɔ na ayangambi
Ba VIDEO, wa na pɛni hɛ̃ gbinya ti hũ olo mɛ.
-
Se du ya mɔ du na zo mɛ ta lo ndo vɔrɔ Yehova ma, ye mɛ mɔ li ti nɛngɔ ya libala tɛ ĩ du na dengɔ bɛ nɛ?
7. Tɔndɔ ndia tɛ Yehova mɛ ba libala
Ando yɔ ge ge ge ti nɛngɔ ya zo tɔndɔ ndia tɛ Yehova mɛ ba libala. c Kanda Yehova ndo sulu azi ko la ndo tɔndɔ ndia tɛ lo. Ba VIDEO.
Di Aebreo 13:4, wa na pɛni hɛ̃ gbinya ti ahũnda olo mɛ:
-
Mɔ da bɛ mɔ ya, andia mɛ Yehova hɛ̃ mɛ ba libala du nzɔ̃ni? Na lo nɛ?
Kaya kɔdɔrɔ gba leta ndo yɔ ya azi su libala tɛ la kaya buku tɛ leta wa se ala ye hongɔ ni ko, ala ho nga ni ka gbɛlɛ leta. Di Tito 3:1, wa na pɛni hɛ̃ gbinya ti hũnda olo mɛ:
-
Se du ya mɔ li libala, leta hĩnga libala tɛ mɔ?
AZI MƐNDƐ̃ NDO HŨNDA YA: “Ayɔ bo ya kɔli na wali mɛ dungbi wɛ asu libala tɛ la kaya buku tɛ leta?”
-
Gbinya mɛ mɔ hɛ̃ nɛ?
NA NDUNU NI
Dungɔ mɔdo bere lingɔ libala adu nzɔ̃ ye mɛ alo ka tɛ Yehova. Abɛse du amɔdo bere azi mɛ li libala alengbi ti dungɔ na dengɔ bɛ se du ya ala zu tɔndɔ ndia tɛ Yehova.
Bozongeli
-
Ngasia la zo mɛ mɔdo lengbi ti salelangɔ mɔdo tɛ lo nzɔ̃ni nɛ?
-
Nda mɛ Ngbangɔ tɛnɛ ya ale zo du bo na zo mɛ ndo vɔrɔ Yehova nɛ?
-
Na bangɔ tɛnɛ mɛ Ngbangɔ tɛnɛ, ye mɛ lengbi ti lingɔ ya libala kpi nɛ?
AYE MƐNDƐ̃ MƐ MƆ LI
Lingɔ libala bo na zo mɛ “wakristo” alengbi na nɛ?
“Mituna ya batángi” (Linɔngi ti Sinzili ti 01/07/2004)
Ba video sɛ mɛ lengbi ti zangɔ mɔ ya mɔ mu ekateli ti nzɔ̃ni na ngoi mɛ mɔ ye lingɔ libala.
Ba nda mɛ nyita kɔli kɔi hũ ya ye mɛ Yehova hɛ̃ ni aɔ aye zu mɛ ni zia.
Uzu ti nɛngɔ ya mɔ ho libala bere mɔ kangbi na kɔ mɔ bere ya mɔ ye mɛ ayɔ ya mɔ gbɔ̃ li mɔ na ndo ni nɛ?
“Kumisá libala, ebongiseli oyo Nzambe atyá” (Linɔngi ti Sinzili ti 12/2018)
a Ba Kambisangɔ nda tɛnɛ ti 4 wa mɔ hĩnga ye mɛ li ya, kɔli na wali kangbi abɛse du ya ta zo kɔi ti kɔmbɛ ma.
b Kaya kɔdɔrɔ mɛndɛ̃ awa dũngɔ ayangambi la ndo pɔna zo mɛ nyi la lengbi ti dungɔ na lo. Se du ngaso ko, ayɔ ya ta awa dũngɔ ayamgambi mɛ ndo ye ayati la kpã bo lɛ la na gingɔ zo mɛ na faranga gba bere zo mɛ li kalasi gba bere zo mɛ ka ndasewa tɛ akota zi ma, kanda ale lo du zo mɛ ndo ye Yehova.
c Se du ya ta libala tɛ mɔ mangbi na ndia tɛ leta ma ko, mɔ lengbi ti pɔnangɔ bere mɔ zia lo bere ta mɔ zia lo ma.
