FAKAAKOAGA 42
Ko e Heigoa ne Talahau he Tohi Tapu ke he Nofo Tokotaha mo e Fakamauaga?
He falu aga fakamotu, talitonu e tau tagata kua nakai fiafia e tagata ato faitaane po ke faihoana. Ka e nakai fiafia oti e tau tagata ne faitaane mo e faihoana ti nakai fiafia oti e tau tagata nonofo tokotaha. Ko e tala mooli he Tohi Tapu ko e nofo tokotaha mo e fakamauaga ko e tau mena fakaalofa.
1. Ko e heigoa e falu aoga he nofo tokotaha?
Pehē e Tohi Tapu: “Ko ia kua fakafaitane . . . kua mitaki . . . ka ko ia kua nakai fakafaitane a ia kua mua e mitaki.” (Totou 1 Korinito 7:32, 33, 38.) He tau puhala fe “kua mua e mitaki” he tagata nofo tokotaha? Ko e tau Kerisiano nonofo tokotaha kua nakai fai hoa mau ke leveki. Ti lahi e atāina ha lautolu. Ma e fakatai, falu kua fakalahi e fekafekauaga he tau puhala ofoofogia, he o atu ke he falu motu ke fakamatala e tala mitaki. Mua atu, lahi e magaaho ha lautolu ke fakatata ki a Iehova.
2. Ko e heigoa falu aoga he tohi matafakatufono e fakamauaga?
Ko e fakamauaga, tuga ni e nofo tokotaha, kua uho lahi. Talahau he Tohi Tapu “kua mua he mitaki e tokoua ke he tokotaha.” (Fakamatalaaga 4:9) Mooli e mena nei ke he tau Kerisiano kua fakagahua e tau matapatu fakaakoaga he Tohi Tapu ke he fakamauaga ha laua. Ko e tau hoa kua matafakatufono e fakamauaga kua taute e maveheaga ke fakaalofa, fakalilifu, mo e fakahelehele he taha e taha. Ko e fua, kua logona hifo e laua e haohao mitaki ka e nakai tuga e hoa kua nonofo tokoua ka e nakai mau. Ti foaki he fakamauaga e fakavēaga mauokafua ke feaki e magafaoa.
3. Fēfē e onoonoaga ha Iehova ke he fakamauaga?
Magaaho ne fakatū e Iehova e fakamauaga fakamua, pehē a ia: “Ke toka ai he tane hana matua tane mo e hana matua fifine, ka e pipiki ke he hana hoana.” (Kenese 2:24) Manako a Iehova ke he taane mo e hoana ke fefakaalofaaki mo e fepipikiaki he momoui a laua. Fakaatā ni e ia e tau vevehe ka agahala e hoa he faivao. He tuaga ia, foaki e Iehova e tonuhia ke he hoa ne nakai agahala ke fifili ke tau vevehe po ke nakai. a (Mataio 19:9) Nakai talia e Iehova ke mau loga e tau Kerisiano.—1 Timoteo 3:2.
KUMIKUMI FAKAHOKULO
Fakaako a koe ke fiafia mo e fakafiafia a Iehova he nofo tokotaha po ke mau a koe.
4. Fakaaoga fakamitaki e mena fakaalofa he nofo tokotaha
Onoono a Iesu ke he nofo tokotaha ko e mena fakaalofa. (Mataio 19:11, 12) Totou Mataio 4:23, ti tutala ke he hūhū nei:
-
Fakaaoga fēfē e Iesu e mena fakaalofa he nofo tokotaha ke fekafekau ke he Matua haana mo e lagomatai e falu?
Fiafia e tau Kerisiano ke fakaaoga e nofo tokotaha ha lautolu tuga ne taute e Iesu. Tā e VITIŌ, ti tutala ke he hūhū nā.
-
Ko e heigoa e tau fua mitaki ka fakaaoga he tau Kerisiano he nonofo tokotaha?
Iloa nakai e koe?
Nakai kotofa he Tohi Tapu e magaaho ke mau ai. Ka e fakamafana he Tohi Tapu e tagata ke fakatali ato “lahi tuai a ia,” ko e magaaho kua mole e tau logonaaga malolō he mahani fakataane mo e fifine ka fakatauhele e fifiliaga he fuata.—1 Korinito 7:36.
5. Fifili fakamitaki e hoa haau
Ko e fifili he hoa haau ko e taha he tau fifiliaga ne mua e aoga ke taute e koe. Totou Mataio 19:4-6, 9, ti tutala ke he hūhū nei:
-
Ko e ha kua nakai lata e Kerisiano ke fakatepetepe ke mau?
Lagomatai he Tohi Tapu a koe ke iloa e tau mahani ne manako a koe he hoa mau. Mua atu, kumi e hoa mau kua fakaalofa mooli ki a Iehova. b Totou 1 Korinito 7:39 mo e 2 Korinito 6:14. Ti tutala ke he tau hūhū nei:
-
Ko e ha kua lata a tautolu ke mau ni e matakainaga Kerisiano?
-
Fēfē e manatu haau ke he logonaaga ha Iehova he mau mo e tagata ne nakai fakaalofa ki a Ia?
Ka ua e manu kehekehe ne hahamo fakalataha, to mamahi a laua. Pihia foki, ko e Kerisiano ne mau ke he tagata ne nakai tua to loga e lekua
6. Onoono ke he fakamauaga tuga he manatu ha Iehova
I Isaraela i tuai, tau vevehe he falu taane e tau hoana ha lautolu ha ko e tau manako lotokai. Totou Malaki 2:13, 14, 16, ti tutala ke he hūhū nei:
-
Ko e ha ne vihiatia e Iehova e tau vevehe kua nakai fakafili tonu?
Ko e faivao mo e tau vevehe to fakamamahi e hoa nakai agahala mo e tau fanau
Tā e VITIŌ, ti tutala ke he hūhū nā.
-
Ka mau a koe ke he tagata ne nakai tua, ko e heigoa ka taute e koe ke kautū e fakamauaga haau?
7. Fakagahua e tau tuaga ha Iehova he fakamauaga
Lata e tagata ke eketaha fakalahi ke fakagahua e tau tuaga ha Iehova ke he fakamauaga. c Ka e fakamonuina e Iehova a lautolu ne taute pihia. Tā e VITIŌ.
Totou Heperu 13:4, ti tutala ke he tau hūhū nei:
-
Manatu nakai a koe ko e tau tuaga ha Iehova ke he fakamauaga kua tonu? Ko e ha ne manatu pihia a koe, po ke ko e ha ne nakai manatu pihia a koe?
Amanaki a Iehova ke he tau Kerisiano ke tohi matafakatufono e tau fakamauaga mo e tau vevehe, ha kua laulahi he tau motu kua poaki ke tohi matafakatufono ai. Totou Tito 3:1, ti tutala ke he hūhū nei:
-
Ka mau a koe, iloa mooli nakai e koe kua tohi matafakatufono e fakamauaga haau?
KA HŪHŪ TAHA TAGATA: “Ko e mau he ha? Ai kia maeke e hoa ke nonofo tokoua ka e nakai mau?”
-
To fēfē e tali haau?
MANATU KATOA
Ko e nofo tokotaha mo e fakamauaga ko e tau mena fakaalofa ha Iehova. Maeke he tau mena ua nei ke moua e fiafia mo e makona ka momoui fakatatau mo e finagalo ha Iehova.
Liu Fakamanatu
-
Fakaaoga fakamitaki fēfē he tagata e nofo tokotaha haana?
-
Ko e ha ne talahau he Tohi Tapu ke mau ni ke he matakainaga Kerisiano?
-
Ko e heigoa ni e kakano ne fakaatā he Tohi Tapu e tau vevehe?
KUMI FOKI
Ko e heigoa e kakano ke mau ni “kia lata mo e Iki”?
“Tau Hūhū Mai he Tau Tagata Totou” (Ko e Kolo Toko, Iulai 1, 2004)
Kitekite ke he ua e vala he vitiō ka lagomatai a koe ke taute e tau fifiliaga mitaki ke he fakatū kapitiga mo e fakamauaga.
Fakaako ke he taha matakainaga taane ne logona hifo kua mua atu e mena ne foaki e Iehova ki a ia ke he ha mena ne toka hifo e ia.
Ko e heigoa falu mena kua lata e tagata ke manamanatu fakamua to tau vevehe po ke nonofo kehekehe?
“Fakalilifu e Tuaga kua ‘Fakalataha he Atua’” (Ko e Kolo Toko, Tesemo 2018)
a Kikite e Tala he Matahiku 4 ke he nonofo kehekehe ka e nakai putoia e faivao.
b He falu aga fakamotu, fifili he tau matua e hoa mau ma e tama taane po ke tama fifine ha laua. Kaeke kua pihia, ko e tau matua fakahelehele kua nakai manamanatu fakamua a laua ke he tau tupe po ke matahigoa he hoa ka mau, ka ko e fakaalofa haana ki a Iehova.
c Ka nofo a koe mo e taha tagata ka e nakaila mau, ko e toka po ke mau e koe e tagata ia, ko e fifiliaga ni haau.
Liga Manako Foki a Koe
TAU HŪHŪ MAHANI MAU
Ko e Heigoa e Fakaakoaga Tohi Tapu ne Foaki he Tau Fakamoli a Iehova?
He fakaholoaga fetutalaaki ne foaki he Tau Fakamoli a Iehova kua nakai totogi, maeke a koe ke fakaaoga ha Tohi Tapu. Atāina ke uiina e magafaoa katoa po ke tau kapitiga ke fakalataha mo koe.
