THUTO 42
Beibele e re Botša Eng ka go Nyala le go se Nyale?
Ditšong tše dingwe, batho ba nagana gore motho o swanetše go nyala goba go nyalwa e le gore a thabe. Eupša ga se gore batho ka moka bao ba nyetšego ba thabile. Le gona ga se gore batho ka moka bao ba sego ba nyala ga se ba thaba. Beibele e re go nyala le go se nyale, ke dimpho tše dibotse tšeo di tšwago go Jehofa.
1. Ke dilo dife tšeo batho bao ba sa nyalago ba ka kgonago go di dira?
Beibele e re: ‘Motho yo a nyetšego o dira gabotse, eupša yo a sa nyalego o tla dira gakaone.’ (Bala 1 Bakorinthe 7:32, 33, 38.) Lengwalo le le ra gore’ng ge le re motho yo a sego a nyala o ‘dira gakaone’? Batho bao ba sego ba nyala ga ba tshwenyege ka go hlokomela balekane. Ka gona, ba ba le nako e ntši. Ka mohlala, ba bangwe ba kgona go dira dilo tše di kgahlišago tša go swana le go yo bolela ditaba tše dibotse dinageng tše dingwe. E bile ba fetša nako e ntši ba tiiša segwera sa bona le Jehofa.
2. Ke dilo dife tše dibotse tšeo batho bao ba nyalanego ka molao ba di thabelago?
Batho bao ba nyetšego le bona, go na le dilo tše dibotse tšeo ba di thabelago. Beibele e re: “Ba babedi ba phala o tee.” (Mmoledi 4:9) Mantšu a ke a nnete, kudukudu ge Bakriste ba diriša melao ya Beibele lenyalong la bona. Monna le mosadi bao ba nyalanego ka molao, ba tshepišana gore ba tlo dula ba ratana, ba hlomphana le go hlokomelana. Ka baka leo, ba ipshina ka lenyalo kudu go feta batho bao ba dulago ka moka ba se ba nyalana ka molao. E bile ba kgona le go godiša bana ba bona gabotse.
3. Jehofa o re’ng ka lenyalo?
Ge Jehofa a be a nyadiša batho ba babedi ba mathomo, o ile a re: “[Monna o tla] tlogela tatagwe le mmagwe, a kgomarela mosadi wa gagwe.” (Genesi 2:24) Jehofa o nyaka gore monna le mosadi ba ratane le go dula ka moka ge ba sa dutše ba phela. Jehofa o dumelela gore banyalani ba hlalane ge feela yo mongwe wa bona a dirile bootswa. Mo tabeng ye, o dumelela molekane yo a se nago molato go kgetha ge e ba a nyaka go hlala, goba go lebalela molekane wa gagwe. a (Mateo 19:9) Jehofa ga a dumelele Bakriste gore ba nyale segadikane, goba go nyala basadi ba go feta o tee. E bile ga a nyake gore mosadi a nyalwe ke banna ba go feta o tee.—1 Timotheo 3:2.
ITHUTE KA MO GO TSENELETŠEGO
Ekwa gore o ka dira eng gore o thabe, le gore o thabiše Jehofa ge o nyetše le ge o se wa nyala.
4. Diriša mpho ya go se nyale gabotse
Jesu o be a tšea go se nyale e le mpho. (Mateo 19:11, 12) Balang Mateo 4:23, gomme le boledišaneng ka potšišo e latelago:
-
Jesu o ile a diriša bjang mpho ya go se nyale gore a hlankele Jehofa le go thuša batho ba bangwe?
Bakriste bao ba sego ba nyala le bona ba ka ekiša Jesu, e bile seo se tlo ba dira gore ba thabe. Bapalang BIDIO ye, gomme le boledišaneng ka potšišo e latelago:
-
Ke dilo dife tšeo di kgahlišago tšeo Bakriste bao ba sego ba nyala ba ka di dirago?
Na o be o tseba?
Beibele ga e re botše gore motho o swanetše go nyala a na le mengwaga e mekae. Eupša e re eletša gore motho a nyale ge a šetše a “fetile lebaka la bofsa,” e lego nako yeo mofsa a sa laolwago ke dikganyogo tša thobalano e bile di ka mo dirago gore a se dire diphetho tše dibotse.—1 Bakorinthe 7:36.
5. Kgetha molekane gabotse
Go kgetha motho yo o tlago go nyalana le yena ke phetho e bohlokwa kudu. Balang Mateo 19:4-6, 9, gomme le boledišaneng ka potšišo e latelago:
-
Ke ka baka la’ng Mokriste a se a swanela go kitimela go nyala?
Beibele e ka go thuša go tseba gore o ka kgetha motho wa mohuta mang ge o nyaka go nyala. Selo se bohlokwa kudu ke gore o nyalane le motho yo a ratago Jehofa. b Balang 1 Bakorinthe 7:39 le 2 Bakorinthe 6:14, gomme le boledišaneng ka dipotšišo tše di latelago:
-
Ke ka baka la’ng re swanetše go nyalana feela le Mokristegotee le rena?
-
O nagana gore Jehofa o tla ikwa bjang ge re kgetha go nyalana le motho yo a sa mo ratego?
Ge e ba diphoofolo tše pedi tša go se swane di pannwe ka moka di tlo gobala. Ka mo go swanago, motho yo e lego Hlatse ya Jehofa ge a ka nyalana le motho yo e sego Hlatse, o tlo ba le mathata a mantši
6. Hlompha lenyalo go swana le Jehofa
Mehleng ya Baisiraele banna ba bangwe ba be ba hlala basadi ba bona ka mabaka a go se kwagale. Balang Maleaki 2:13, 14, 16, gomme le boledišaneng ka potšišo e latelago:
-
Ke ka baka la’ng Jehofa a sa nyake batho ba hlalana ka ntle le lebaka leo le kwagalago la ka Beibeleng?
Ge molekane yo mongwe a ka dira bootswa goba a hlala, molekane wa gagwe le bana ba gagwe ba tlo kwa bohloko kudu
Bapalang BIDIO ye, gomme le boledišaneng ka potšišo e latelago:
-
Ge e ba motho yo o nyalanego le yena a sa hlankele Jehofa, o ka dira’ng gore le ipshine ka lenyalo la lena?
7. Ekwa melao ya Jehofa ya mabapi le lenyalo
Go ka nyakega gore motho a šome ka thata e le gore a kwe melao ya Jehofa ya mabapi le lenyalo. c Ge a ka ekwa, Jehofa o tlo mo šegofatša. Bapalang BIDIO ye.
Balang Baheberu 13:4, gomme le boledišaneng ka dipotšišo tše di latelago:
-
Na o nagana gore melao ya Jehofa ya mabapi le lenyalo e a re gatelela? Go re’ng o re’alo?
Jehofa o nyaka gore Bakriste ba nyalane ka molao e bile ba hlalane ka molao, ka ge dinageng tše dintši mmušo o nyaka gore ba dire bjalo. Balang Tito 3:1, gomme le boledišaneng ka potšišo e latelago:
-
Ge e ba o nyetše, na o netefaditše gore lenyalo la gago le ngwadišitšwe ka molao?
MOTHO YO MONGWE A KA GO BOTŠIŠA GORE: “Bothata ke’ng ge batho ba dula ka moka ba se ba nyalana?”
-
Wena o ka ba araba bjang?
O ITHUTILE ENG?
Go nyala le go se nyale ke dimpho tšeo di tšwago go Jehofa. Batho bao ba nyetšego le bao ba sego ba nyala ka moka ba ka ipshina ka bophelo, ge feela ba phela ka melao ya Jehofa.
Dipotšišo
-
Motho yo a sego a nyala a ka diriša bjang nako ya gagwe gabotse?
-
Ke ka baka la’ng Beibele e re re nyalane feela le Bakristegotee le rena?
-
Ke lebaka lefe letee la ka Beibeleng leo le dumelelago batho gore ba ka hlalana?
ITHUTE KA MO GO OKETŠEGILEGO
Go ‘nyala feela Moreneng’ go bolela eng?
“Dipotšišo tše Tšwago go Babadi” (Morokami wa July 1, 2004.)
Bogela dibidio tše pedi tšeo di ka go thušago go dira diphetho tše dibotse ditabeng tša go ratana le tša lenyalo.
Ekwa gore ke ka baka la eng ngwanabo rena yo mongwe a bona dilo tšeo Jehofa a mo filego tšona e le tše dintši go feta tšeo a di tlogetšego.
Motho o swanetše go nagana ka dilo dife pele a ka hlala goba go arogana le molekane wa gagwe?
Hlompha “se Modimo a se Tlemagantšego Jokong” (Morokami wa December 2018.)
a Bona Tlhaloso 4 go kwa gore Beibele e reng ge banyalani ba arogana le ge go se na molekane yo a dirilego bootswa.
b Ditšong tše dingwe, batswadi ba kgethela ngwana wa bona motho yo a tlago go nyalana le yena. Batswadi bao ba ratago ngwana wa bona ge ba mo kgethela motho yo a tlago go nyalana le yena, ba swanetše go lebelela gore motho yoo o rata Jehofa, e sego gore o na le tšhelete e ntši goba maemo.
c Ge e ba o dula le motho yo o sego wa nyalana le yena, o ka kgetha gore o a mo tlogela goba o a mo nyala.
You May Also Like
DIPOTŠIŠO TŠEO DI BOTŠIŠWAGO KUDU
Thuto ya Beibele ke Eng?
Hwetša dikarabo tša dipotšišo tša mabapi le thuto ya rena ya mahala ya Beibele.
