ƐZUKOALƐDEƐ 42
Duzu A Baebolo Ne Ka Ye Wɔ Belazinlililɛ Nee Agyalɛ Nwo A?
Wɔ amaamuo bie mɔ anu, menli die di kɛ kyesɛ awie gya na ɔ nye alie. Noko, tɛ agyalɛma kɔsɔɔti a anye die a, yɛɛ tɛ menli mɔɔ ɛtɛgyale la amuala a anye ɛnlie a. Nɔhalɛ nu, Baebolo ne ka belazinlililɛ nee agyalɛ nwo edwɛkɛ kɛ bɛle ahyɛlɛdeɛ.
1. Awie ɛtɛgyale a nvasoɛ boni mɔ a wɔ zo a?
Baebolo ne ka kɛ: ‘Mɔɔ kɛgya la yɛ ye boɛ, noko mɔɔ ɛngya la yɛ ye boɛ tɛla ye.’ (Kenga 1 Kɔlentema 7:32, 33, 38.) Adenle boni azo a awie mɔɔ ɛtɛgyale la “yɛ ye boɛ tɛla ye” a? Kilisienema mɔɔ bɛtɛgyale la ɛndwenle kunli anzɛɛ yelɛ ngyianlɛ nwo. Ɛhye ati, bɛlɛ fanwodi dɔɔnwo. Kɛ neazo la, bie mɔ kola tɛlɛ bɛ ɛzonlenlɛ gyima ne anu wɔ ndenle dɔɔnwo mɔɔ yɛ anyelielɛ la azo, le kɛ bɛtu adenle bɛkɔbɔ edwɛkpa ne nolo wɔ maanle gyɛne zo. Mɔɔ hyia kpalɛ la, bɛnyia mekɛ dɔɔnwo bɛbikye Gyihova.
2. Ɛdua mɛla adenle zo ɛgya a nvasoɛ boni mɔ a wɔ zo a?
Agyalɛ le kɛ belazinlililɛ la, nvasoɛ wɔ zo. Baebolo ne ka kɛ “menli nwiɔ le kpalɛ tɛla sonla ko.” (Nolobɔvo 4:9) Ɛhye le nɔhalɛ bɔkɔɔ wɔ Kilisienema mɔɔ fa Baebolo ngyinlazo di gyima la agyalɛ nu. Menli nwiɔ mɔɔ kɛlua mɛla adenle zo kɛgya la anu ko biala bɔ ɛwɔkɛ kɛ ɔbahulo ɔ gɔnwo, yeabu ye na yeanlea ye boɛ. Ɛhye ati, ɔmaa bɛta bɛte nganeɛ kɛ bɛlɛ banebɔlɛ bɛtɛla menli nwiɔ mɔɔ de ala na bɛtɛgyale la. Eza agyalɛ maa ngakula mɔɔ bɛkɛwo bɛ la nyia banebɔlɛ kpalɛ.
3. Kɛzi Gyihova bu agyalɛ ɛ?
Mekɛ mɔɔ Gyihova hyehyɛle agyalɛ ne mɔɔ limoa la, ɔhanle kɛ: “Nrenyia bagyakyi ye papa nee ye mame na yeahɔbeta ɔ ye anwo.” (Gyɛnɛsese 2:24) Gyihova kpondɛ kɛ kunli nee yelɛ kulo bɛ nwo na bɛbɔ nu bɛtɛnla wɔ mekɛ ala mɔɔ bɛde aze la. Mekɛ mɔɔ bɛ nuhua ko kɛzɛkye agyalɛ la ala a ɔmaa ewolebɔlɛ nwo adenle a. Saa ɔba ye zɔ a, Gyihova maa nuhua ne mɔɔ ɛtɛsɛkyele agyalɛ la adenle maa ɔsi kpɔkɛ kɛ ɔbadɛnla nwo anzɛɛ ɔbabɔ ewole. a (Mateyu 19:9) Gyihova ɛnlie ɛndo nu kɛ Kilisienema kɛgya mraalɛ anzɛɛ mrenyia dɔɔnwo.—1 Timote 3:2.
SUKOA DƆƆNWO
Sukoa kɛzi ɛ nye bahola alie—na wɔamaa Gyihova anye alie—wɔ mekɛ mɔɔ wɔgya anzɛɛ ɛtɛgyale la.
4. Fa belazinlililɛ ahyɛlɛdeɛ ne di gyima kpalɛ
Gyisɛse bule belazinlililɛ kɛ ɔle ahyɛlɛdeɛ. (Mateyu 19:11, 12) Kenga Mateyu 4:23, na akee bɛzuzu kpuya ɛhye anwo:
-
Kɛzi Gyisɛse vale ye belazinlililɛ ahyɛlɛdeɛ ne zonlenle ɔ Ze na ɔboale awie mɔ ɛ?
Kilisienema mɔɔ bɛtɛgyale la bahola ava bɛ mekɛ ali gyima kɛ mɔɔ Gyisɛse yɛle la amaa bɛ nye alie. Ye VIDIO ne, na akee bɛzuzu kpuya ɛhye anwo.
-
Ndenle mgbalɛ boni mɔ a Kilisienema mɔɔ bɛtɛgyale la bahola alua zo ava bɛ mekɛ ali gyima kpalɛ a?
Asoo ɛze?
Baebolo ne ɛngile ɛvolɛ mɔɔ awie di a ɔwɔ kɛ ɔgya a. Noko ɔtu ahenle folɛ kɛ ɔhendɛ ɔhɔdwu mekɛ mɔɔ “ɔnle kakula,” mɔɔ nla nwo atiakunluwɔzo ne anu yɛ se na ɔbahola yeamaa yeazi kpɔkɛ mɔɔ ɛnle kpalɛ la.—1 Kɔlentema 7:36.
5. Kpondɛ awie mɔɔ ɛbagya ye la nrɛlɛbɛ nu
Awie mɔɔ ɛbagya ye la a le kpɔkɛ mɔɔ hyia kpalɛ mɔɔ ɔwɔ kɛ ɛsi la anu ko a. Kenga Mateyu 19:4-6, 9, na akee bɛzuzu kpuya ɛhye anwo:
-
Duzu ati a ɔnle kɛ Kilisienenli pele ɔ nwo kɔ agyalɛ a?
Baebolo ne bahola aboa wɔ yeamaa wɔanwu mɔɔ ɔwɔ kɛ ɛnea wɔ awie mɔɔ ɛbagya ye la anwo. Mɔɔ hyia kpalɛ la a le kɛ ɛbakpondɛ awie mɔɔ kulo Gyihova la. b Kenga 1 Kɔlentema 7:39 yɛɛ 2 Kɔlentema 6:14. Akee bɛzuzu kpuya ɛhye mɔ anwo:
-
Duzu ati a yɛ gɔnwo Kilisienenli ala a ɔwɔ kɛ yɛgya ye a?
-
Saa yɛgya awie mɔɔ ɛngulo Gyihova a, ɛnea a kɛzi ɔbade nganeɛ wɔ nwo ɛ?
Saa bɛfa gyɛnvayile bɛto nane nwiɔ mɔɔ asolo biala la akɔme zo a, bɛbanwu amaneɛ. Zɔhane ala a Kilisienenli gya awie mɔɔ ɛnle diedinli la a ɔbayia ngyegyelɛ dɔɔnwo a
6. Bu agyalɛ kɛ mɔɔ Gyihova bu ye la
Wɔ tete Yizilayɛ, mrenyia bie mɔ luale angomedi adenle zo bɔle bɛ ye mɔ ewole. Kenga Malakae 2:13, 14, 16, na akee bɛzuzu kpuya ɛhye anwo:
-
Duzu ati a Gyihova kyi ewolebɔlɛ mɔɔ ɛnle ye adenle zo la ɛ?
Agyalɛzɛkyelɛ nee ewolebɔlɛ maa nuhua ne mɔɔ ɛtɛsɛkyele agyalɛ la nee ngakula ne mɔ nwu amaneɛ
Ye VIDIO ne, na akee bɛzuzu kpuya ɛhye anwo.
-
Saa awie mɔɔ ɛgya ye la ɛnle diedinli a, duzu a ɛbahola wɔayɛ amaa anyelielɛ ara wɔ agyalɛ ne anu a?
7. Fa Gyihova agyalɛ nwo ngyinlazo ne di gyima
Ɔwɔ kɛ awie bɔ mɔdenle amaa yeava Gyihova agyalɛ nwo ngyinlazo ne yeali gyima. c Noko Gyihova yila bɛdabɛ mɔɔ bɛyɛ zɔ la. Ye VIDIO ne.
Kenga Hibuluma 13:4, na akee bɛzuzu kpuya ɛhye mɔ anwo:
-
Ɛnea a ndelebɛbo wɔ Gyihova agyalɛ nwo ngyinlazo ne mɔ anu ɔ? Duzu ati ɔ?
Gyihova kpondɛ kɛ Kilisienema yɛ bɛ agyalɛ nee bɛ ewolebɔlɛ nwo ngɛlata, ɔluakɛ wɔ maanle dɔɔnwo anu arane mɛla kile kɛ ɔwɔ kɛ bɛyɛ zɔ. Kenga Taetɛse 3:1, na akee bɛzuzu kpuya ɛhye anwo:
-
Saa wɔgya a, ɛdie ɛdi kɛ arane die wɔ agyalɛ ne to nu wɔ mɛla adenle zo ɔ?
BIE A AWIE BABIZA KƐ: “Duzu ati a ɔwɔ kɛ megya a? Menli nwiɔ ɛngola ɛndɛnla mɔɔ bɛtɛgyale ɔ?”
-
Kɛzi ɛbaye ɔ nloa ɛ?
EDWƐKƐ TITILI
Belazinlililɛ nee agyalɛ le ahyɛlɛdeɛ mɔɔ vi Gyihova ɛkɛ. Saa yɛfa nuhua ko biala yɛyɛ Gyihova ɛhulolɛdeɛ a ɔkola ɔmaa yɛ nye die na yɛ kunlu dwo yɛ nwo.
Ndinu
-
Kɛ ɔkɛyɛ na awie ava mekɛ mɔɔ ɔtɛgyale la ali gyima kpalɛ ɛ?
-
Duzu ati a Baebolo ne se yɛ gɔnwo Kilisienenli ala a yɛgya ye a?
-
Duzu ala a Baebolo ne se yɛkola yɛgyinla zo yɛbɔ ewole a?
KPONDƐ DƆƆNWO
Duzu a “Awulae anu ala” mɔɔ awie gya la kile a?
“Kpuya Mɔɔ Vi Kengavolɛma Ɛkɛ” (Ɛzinzalɛ Arane, July 1, 2004)
Nea vidio nwiɔ mɔɔ bahola aboa wɔ yeamaa wɔazi kpɔkɛ kpalɛ wɔ mekɛ mɔɔ ɛ nee awie ɛlɛtu kɛ bɛgya yɛɛ agyalɛ nwo la.
Nea deɛmɔti adiema nrenyia bie te nganeɛ kɛ Gyihova ɛmaa yenyia debie mɔɔ sonle bolɛ kpalɛ tɛla debie biala mɔɔ yeva yebɔ afɔle la.
Ninyɛne mɔɔ ɔwɔ kɛ awie dimoa dwenle nwo kolaa na yeazuzu ewolebɔlɛ anzɛɛ agyalɛ nu ɛtetelɛ nwo la bie mɔ a le boni?
“Di ‘Mɔɔ Nyamenle Ɛha Ɛbɔ Nu La’ Eni” (Ɛzinzalɛ Arane, December 2018)
a Nea mɔɔ Awieleɛdwɛkɛ 4 ka ye wɔ agyalɛ nu ɛtetelɛ nwo wɔ mekɛ mɔɔ bɛ nuhua ko ɛtɛsɛkyele agyalɛ la.
b Wɔ amaamuo bie mɔ anu, awovolɛ a kpondɛ awie mɔɔ bɛ ra nrenyia anzɛɛ bɛ ra raalɛ bagya ye a. Ɛleka mɔɔ bɛyɛ ye zɔ la, awovolɛ mɔɔ lɛ ɛlɔlɛ la dimoa suzu nwo nea kɛ ahenle kulo Gyihova a, na tɛ ye ezukoa anzɛɛ gyinlabelɛ mɔɔ ɔlɛ la ɔ.
c Saa ɛ nee awie de na bɛtɛgyale a, saa ɛbagyakyi ye o, ɛbagya ye o, ɔle ɛ ti anwo kpɔkɛzilɛ.
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
