Itshi Biblia Yana Zuela mu Ndaga Yatadila Gukhala Undumbu nu Ulo?
LONGO DIA 42
Itshi Biblia Yana Zuela mu Ndaga Yatadila Gukhala Undumbu nu Ulo?
Mu mafundo ako, athu ana tangiza egi muthu gajiyilego gukhala nu gusuanguluga gula udi undumbu. Uvi, ishigo ngenyi, handaga ishigo mukotelesa egi athu agasue adi mu ulo ana khala nu gusuanguluga, nga ndo athu agasue adi undumbu ana khala mu lamba. Ndaga ya giamatshidia idi egi, Biblia yana zuela egi gukhala undumbu nga mu ulo idi khapho dia Nzambi.
1. Gubonga gutshi muthu wajiya guheta gula udi undumbu?
Biblia yana zuela egi: “Gula muthu wahaga, watshita muabonga. Uvi gula muthu gahagelego, watshita muabonga gubalega.” (Tanga 1 Kolinto 7:32, 33, 38.) Mu luholo lutshi muthu udi undumbu wana tshita “muabonga gubalega”? Muklisto udi undumbu gana gudisagesago mukunda nu gutagenesa nzala ya mukaji’enji nga ya mulumi’enji. Uvi, wana khala nu tangua diavula dia gutshita gima giatshigina muene. Ha gufezegesa, ako ana gudihana muavula mu mudimo wa Yehowa gifua guya mu gifutshi giko ha gulongesa lukuma luabonga. Ajiya gubalegesa matangua avula ha gukolesa ufuta wawo nu Yehowa.
2. Gubonga gutshi muthu wajiya guheta gula waya mu ulo mu luholo luabonga?
Ulo nu gukhala undumbu guana bata gubonga guavula. Biblia yana zuela egi: ‘Gukhala athu muyadi gudi guabonga gubalega muthu mumoshi.’ (Mulongeshi 4:9) Yana khala diago ngenyi gudi Aklisto anyi ana tumagela mikhuala ya Biblia mu ulo wawo. Athu anyi adizudile gale mu ulo gutuama dia leta ana gudilaya egi mbaadizumba nu mbaadinemesa. Ngenyi, ana khala diago muabonga, mu ubambi gubalega athu anyi ana jinga hamoshi uvi khenji adizudilego. Ulo wana guakuatesa nji ha gusasa ana mu luholo luabonga.
3. Luholo lutshi Yehowa wana tadila ulo?
Tangua Yehowa walondele ulo wa thomo, wazuelele egi: “Yala mbawubemba sh’enji nu gin’enji, mbawudibungisa nu makaji’enji.” (Gisendeselo 2:24) Yehowa wana tshigina egi yala nu mukhetu adizumbe nu akhale ya gujinginyina mu ulo wawo monyo wawo wagasue. Wana hana njila egi yala nu mukhetu ashiye ulo phamba gula muthu mumoshi mukatshi diawo watshita uthambi. Ngenyi, Yehowa wana hana muthu munu gakalegelego uthambi njila ya guzula desizio dia gushiya ulo a nga ndo. (Matayo 19:9) Yehowa gana tshigina ndo egi Aklisto azule khongo.—1 Timote 3:2.
TUKAMBE GUJIYA NDAGA JIAVULA
Tala luholo wajiya gukhala nu gusuanguluga nu luholo wajiya gusuanguluisa Yehowa, ikhale udi undumbu nga udi mu ulo.
4. Kalegela undumbu waye mu luholo luabonga
Yesu wakhalele mutadila undumbu gifua khapho. (Matayo 19:11, 12) Tanga Matayo 4:23, gungima zuelelenu muhu owu:
• Luholo lutshi Yesu wakalegele undumbu wenji ha gukalegela Sh’enji mudimo nu ha gukuatesa athu ako?
Aklisto nji ajiya gukalegela undumbu wawo gifua Yesu. Tala VIDEO, gungima zuelelenu muhu owu walandula.
VIDEO: Aklisto a Gujinginyina adi Undumbu (3:11)
• Mu maluholo atshi Aklisto ajiya gukalegela undumbu wawo ha gukhala nu gusuanguluga?
Wana guyijiya ba?
Biblia yana hana ndo guvula gua ivo wajiya gukhala nayo ha guya mu ulo. Uvi, yana monesa egi muthu udi naye gunengena uu nu tangua mbadibalegesa muene “sungi ya ulenge”; handaga mu tangua diene nzala ya gubungisa muila yana khala yakola nu yajiya gutshita egi gatombigo mu luholo luabonga muthu gadi naye gudizula n’enji mu ulo.—1 Kolinto 7:36.
5. Tomba nu gutema guagasue muthu mudi naye gudizula n’enji mu ulo
Gutomba muthu mudi naye gudizula n’enji mu ulo gudi mukatshi dia ba desizio abalega ndando wajiya guzula. Tanga Matayo 19:4-6, 9, gungima zuelelenu muhu owu:
• Mukunda natshi Muklisto gashigo naye gububula ha gudizula nu muthu mumoshi ngenyi mu ulo?
Biblia yajiya gugukuatesa ha gujiya makalegelo ajiya gutshita egi muthu akhale yala nga mukhetu wabonga mu ulo. Ndaga ya gubalega ndando idi egi, udi naye gukamba muthu wana zumba Yehowa. b Tanga 1 Kolinto 7:39 nu 2 Kolinto 6:14. Gungima zuelelenu mihu eyi:
• Mukunda natshi tudi naye gudizula mu ulo phamba nu Muklisto?
• Udi mutangiza egi Yehowa wajiya gudivua gikuatshi gula wadizula mu ulo nu muthu yonu ganago gumuzumba?
6. Khala mutadila ulo gifua luholo Yehowa wana guwutadila
Gu Isalele ikulu, mala ako akhalele mubemba akaji’awo nga gushigo nu mulonga wakoma. Tanga Malaki 2:13, 14, 16, gungima zuelelenu muhu owu:
• Mukunda natshi Yehowa wana tuna gushiya ulo mu luholo luabola?
Tala VIDEO, gungima zuelelenu muhu owu walandula.
VIDEO: Ulo udi Naye Gukhala Mayilago (4:30)
• Itshi wajiya gutshita ha gukhala nu gusuanguluga mu ulo gula wadizudile nu muthu munu gana kombelela ndo Yehowa?
7. Landula mikhuala ya Yehowa yatadila ulo
Yajiya gukhala lamba ha gutumagela mikhuala ya Yehowa yatadila ulo. c Uvi Yehowa wana kuatesa athu anyi ana tshita ngolo. Tala VIDEO.
VIDEO: Wajiya Gunemesa Mikhuala ya Yehowa mu Ndaga Yatadila Ulo (4:14)
Tanga Hebelu 13:4, gungima zuelelenu mihu eyi:
• Udi mutangiza egi mikhuala ya Yehowa mu ndaga yatadila ulo idi yabonga ba? Mukunda natshi wazuela ngenyi?
Yehowa wana tshigina egi Aklisto azule mikanda ya ulo nga ya gushiya ulo, gifua luholo mafumu a leta a ifutshi yavula ana toga. Tanga Tito 3:1, gungima zuelelenu muhu owu:
• Gula muadizudile gale mu ulo, muasonegesele gale ulo wenu gudi mafumu a leta ba?
ATHU AKO AJIYA GUHULA EGI: “Mukunda natshi gudizula mu ulo? Yala nu mukhetu ajiya gawo gujinga hamoshi ngatshima adizudilego.
• Mvutu itshi wajiya guhana?
/NDAGA WALONGUGA
Gukhala undumbu nga mu ulo idi khapho dia Yehowa. Athu adi undumbu nu anyi adizudile gale mu ulo ajiya gukhala nu gusuanguluga gula adi mutshita gutshigina gua Yehowa.
Mihu ya Guvutugila
• Luholo lutshi muthu wajiya gukalegela undumbu wenji mu luholo luabonga?
• Mukunda natshi Biblia yana zuela egi tudi naye gudizula mu ulo phamba nu Muklisto?
• Biblia yana monesa egi athu ajiya gushiya ulo phamba mukunda nu ndaga itshi?
Longo edi diahua mu lusugu lua: __________
Desizio Ngazula
◼ Gula khenji tuasonegeselego ulo wetu gudi leta, tudi naye gutshita yagasue ha guwusonegesa.
◼ Desizio Diko: __________
NDAGA JIKO JIA NDANDO
Guhaga ‘phamba mulandudi wa Fumu’ gudi mukotelesa itshi?
“Questions des lecteurs” (Inzo Yaleha ya Mutaledi ya 1 Juillet 2004 ya français)
Tala itshinyi mbadi ya video inyi yajiya gugukuatesa ha guzula ba desizio abonga mu ndaga yatadila gutomba muthu wajiya gudizula n’enji mu ulo.
Gudilondega Mukunda nu Ulo (11:53)
Tala mukunda natshi phangi mumoshi wa yala wakotelesele egi ima yamuhanele Yehowa idi nu ndando yavula gubalega inyi yabembele muene.
Ngakhalele Gudifelela egi Mona Mukhetu Muene Mbawutshigina Giamatshidia (1:56)
Itshi muthu adi naye gutshita gula udi mutshigina gushiya ulo nga gudikhapha nu mulumi’enji nga mukaji’enji?
“Honore ‘ce que Dieu a uni’” (Inzo Yaleha ya Mutaledi ya Decembre 2018 ya français)
[Mbimbi Goshi’a Diyiji]
a Tala Malongo a Gisugishilo 4 mukunda nu ndaga yatadila gudikhapha mu ulo gula uthambi wakalegewe ndo.
b Mu kutime jiko, mvuaji jiana tombela an’awo muthu ya gudizula n’enji mu ulo. Gula idi ngenyi, mvuaji jishigo naye guhata makuta nga gutala fami ya muthu muene, uvi adi naye gutala gula yala muene nga mukhetu muene wana zumba Yehowa.
c Gula wana jinga nu muthu mumoshi uvi khenji muadihagelego n’enji, aye hakhaye udi naye guzula desizio dia guzoga nga dia gudizula n’enji.
