LECCIÓN 42
Keʼe ndachro Biblia de thi ni xra jeʼo te ko de thi tutheʼeni
Ngai inchi rajna, chujni xraxauna ke para rucheeni chunda ke tsutheʼeni. Aro jiʼa kain ni tutheʼe cheena ko jiʼa kain ni jeʼo te cheʼana. Thi ndua yaa ke Biblia ndachro ke thi xra jeʼuni tateni o thi tutheʼeni, yui jiʼi naa juajni.
1. Kekaa thi jian thiaʼo are xra jeʼuni tateni
Biblia ndachro: “Thi tutheʼe jian ncheʼe, aro thi tutheʼa icha jian ncheʼe” (tsjeʼe 1 Corintios 7:32, 33, 38). Keʼe ruchro ke icha jian ncheʼe chujni ke tutheʼa. Ni cristiano ke xra jeʼo te chundaʼa ke tsana juachjaun para rutsjeʼena ixi tatiteena o naniteena. Mexinxin icha tsje tiempo chundana ixi dantuʼa tsje xrá ncheʼena. Para inchina, icha chrjuin tunuʼena nchesayeʼena Jehová ixi nchao sathjina inaa rajna dikauna juajna jian. Ko thi icha renthe chunda ni xra jeʼo te yaa ke chundana icha tsje tiempo para sinchesujina thi jian xrakauna Jehová.
2. Kekaa thi jian thiaʼo are tutheʼeni
Xrajuʼo ke thi jeʼo tateni, thi tutheʼeni kai thiaʼo tsje thi jian. Biblia ndachro ke “icha jian are yuuna ke are nakuana” (Eclesiastés 4:9). Ko jiʼi jaan jaña jixin ko icha si thi ni tekaʼo chuo dithikauna thi ndua ke tjago Biblia. Thi ni tutheʼe ndache chuuna ke ruthjueʼe chuuna, sincherenthe chuuna ko sayakuʼen chuuna. Mexinxin ni teʼi icha chunthia chuuna ke thi ni jañaunka tekaʼo chuo. Ko, xeʼen ni tekaʼo chuo icha jian dangi xan.
3. Keʼe xraxaun Jehová de thi tutheʼeni
Are Jehová juinchetheʼe ni juinchechjian saʼo, ndachro: “Xii tasachrjendeʼe ndudee ko janee” ko “tasekaʼo chriʼi” (Génesis 2:24). Jehová rinao ke tatita ko nanita ruthjueʼe chuuna ko tasekaʼo chuuna asta are tase̱ʼena. Ko juʼo dajun juachaxin ke sachrjendeʼe chuuna, si naa de jeʼena dejuakaʼo inaa ni jiʼa ni jikaʼo. Si jaña tuʼen, Dio tanchrjanda ke tatita o nanita ke juincheyeʼena tsincheʼe a tasachrjendeʼe ni jikaʼo (Mateo 19:9). a Jehová tanchrjandaʼa ke ni cristiano sekaʼuna icha de naa chujni (1 Timoteo 3:2).
TANGI ICHA
Rutsjeʼená keʼe nchao sincheʼe, si xra jaʼo riʼi o ukuthaʼa, para ruchaʼa ko sincheʼe ke Jehová ruchee.
4. Si xra jaʼo riʼi nchegunda jian juajni jiʼi
Para Jesús, thi xra jeʼuni teni yaa naa juajni (Mateo 19:11, 12). Tsjeʼera Mateo 4:23 ko tjaura de jiʼi:
-
Kekaa nchao bancheʼe Jesús ixi jeʼo beʼe.
Ni cristiano ke xra jeʼo te nchao ndakua sinchegundana juajni ke chundana xraa juincheʼe Jesús. Tsjeʼera VIDEO ko tjaura de jiʼi:
-
Kekaa nchao sincheʼe ni xra jeʼo te.
A benuʼan
Biblia ndachruʼa kieʼen nano chunda ke sinchexethjani para ke unchao tsutheʼeni. Aro, jaan ndachro ke usathuja thi diʼin “la flor de la juventud”, ixi chritaʼa jiʼi are icha tunsuji deseo sexual ke ncheʼe ke i ndakuaʼa ncheʼeni (1 Corintios 7:36).
5. Dekincheʼe jian ni segarikuʼo
Thi tsincheʼeni kensen sekaʼuni yaa naa de thi icha renthe tsincheʼeni. Tsjeʼera Mateo 19:4-6, 9 ko tjaura de jiʼi:
-
Unda naa ni cristiano chunda ke ruxraxaun jian thi sincheʼe saʼo de tsutheʼe.
Biblia nchao tsengijnantha sekunuʼan keʼe cualidad chunda ke tsjago ni tatita ko ni nanita. Aro thi icha renthe, dekjee naa chujni ke thjueʼe Jehová. b Tsjeʼera 1 Corintios 7:39 ko 2 Corintios 6:14. Kuthejan tjaura de jiʼi:
-
Si naa ni cristiano rinao tsutheʼe, unda anto renthe ke sekaʼo naa ni dithikaun Dio kai.
-
Si sekaʼo naa ni thjueʼa Jehová, kexrein tsunuʼen jeʼe Ndo.
Si ngangiʼi naa yunta ruxrangiʼina naa uxinthaa ko naa ulucho, yuiba anto sinchechrjen chuba. Xrajuʼo tuʼen ngai naa ni cristiano ke dekaʼo naa ni nchesayeʼa Jehová, sechunda anto tsje chijni.
6. Dencherenthe thi tutheʼeni jaña xraa Jehová
Are saʼo ngai rajna Israel, inchina tabagachrjendeʼena naniteena juʼo ixi i bajinauʼana ruekaʼuna. Tsjeʼera Malaquías 2:13, 14, 16 ko tjaura de jiʼi:
-
Unda dingakuʼen Jehová ke tasachrjendeʼe chuuna juʼo ixi kexeuka chijni ko jiʼa ixi thi ndachro Biblia.
Thi ncheyeʼe chuuna ko thi tadachrjendeʼe chuuna jiʼi ncheniʼi thi ni juincheyeʼena ko kai chjan.
Tsjeʼera VIDEO ko tjaura de jiʼi:
-
Si suixin rekuʼo naa ni tangiʼa de Jehová, keʼe nchao sincheʼentha para ke chrjuin sinthekuʼo chuuntha.
7. Degithikaun thi thetuʼan Jehová para ni tekaʼo chuo
Inchina anto tángi tunuʼena sithikauna thi thetuʼan Jehová para ni tekaʼo chuo. c Aro Jehová nchenchaun ni asta nuinka ncheʼe dithikaun. Tsjeʼera VIDEO.
Tsjeʼera Hebreos 13:4 ko tjaura de jiʼi:
-
A dendachro suixin ke thi thetuʼan Jehová de thi tutheʼeni jaan nchao sincheʼeni. Unda jaña dexraxaun.
Jehová chuʼen ke ni nchexree santsjena xruun are kutheʼena ko si sachrjendeʼe chuuna kai, ixi jiʼi naa xruun legal ke danchia xi nchixin. Tsjeʼera Tito 3:1 ko tjaura de jiʼi:
-
Si suixin ubekuthaʼa, a ko jaan tentha registrado ngai xi nchixin.
THI DANCHANGI INCHINA: “Para ke unda tsutheʼeni. Keʼe sinthagunda xrun yaa”.
-
Keʼe ruegatheʼe suixin.
THI KUANGINÁ
Thi tutheʼeni ko thi xra jeʼuni teni yaa inchi juajni ke thixin de Jehová. Si xra jaʼuna tená o ukuthaana nchao chrjuin sunthechuna ko ruchaana sunthuʼuna ínchi rinao Ndo Dio.
A xraxaun thi kuangi
-
Kexrein nchao sinchegunda ni xra jeʼo te juajni jiʼi.
-
Unda ndachro Biblia ke ni cristiano chunda ke tsutheʼena ngai naa ni nchesayeʼe Jehová kai.
-
Ínchi ndachro Biblia, juʼo kesa are nchao sachrjendeʼe chuo ni dikutheʼe.
THJEE ICHA
Keʼe ruchro tsutheʼeni juʼo ngai “naa ni dithikaun ngai Dio”.
“Preguntas de los lectores” (La Atalaya, 1 de julio de 2004)
Detsjeʼe keʼe nchao sekengijna para ndakua sekincheʼe kensen segarikuʼo.
Detsjeʼe unda naa thi chuuná kunuʼen ke Jehová chjee naa thi icha renthe ke thi takuinthuʼe.
Keʼe chunda ke ruxraxaun naa ni cristiano ke rinao tasachrjendeʼe o tatsinthuʼe ni jikaʼo.
“Honremos ʼlo que Dios ha unidoʼ” (La Atalaya, diciembre de 2018)
b Ngai inchi rajna, ni ndudaʼa ni thincheʼe kensen sekaʼo xeʼena. Si jaña sexin, ni ndudaʼa ke nchesayeʼe Jehová tsjeʼena saʼo si chujni jiʼi thjueʼe Jehová. Para jeʼena jiʼi icha renthe ke si chunda tsje tumi.
c Si suixin jañao tekuʼo chuuntha, suixin sekincheʼe a sekuthaʼa o tasekinthuʼe chuuntha.
