سبق نمبر 42
بائبل چ شادی کرن تے غیر شادیشُدہ رہن بارے کیہہ دَسیا گیا اے؟
کجھ لوک من دے نیں کہ اِک بندہ شادی کیتے بغیر خوش نئیں رہ سکدا۔ پر ایہہ ضروری نئیں کیونکہ بوہت سارے شادیشُدہ لوک خوش نئیں نیں جد کہ کئی غیر شادیشُدہ لوک اپنی زندگی توں خوش نیں۔ اصل چ بائبل دے مطابق شادی کرنا وی اِک نعمت اے تے غیرشادیشُدہ رہنا وی اِک نعمت اے۔
1. غیرشادیشُدہ رہن دے کجھ فائدے کیہڑے نیں؟
بائبل چ دَسیا گیا اے کہ جیہڑا شادی کردا اے اوہنوں فائدہ ہوندا اے پر جیہڑا شادی نئیں کردا اوہنوں بوہتا فائدہ ہوندا اے۔ (1-کُرنتھیوں 7:32، 33، 38 نُوں پڑھو۔) شادی نہ کرن والے بندے نُوں بوہتا فائدہ کیویں ہوندا اے؟ اوہنوں ایس گل دی فکر نئیں ہوندی کہ اوہنے اپنے خاوند یاں بیوی دِیاں لوڑاں نُوں پورا کرنا اے۔ ایسے لئی اوہدے کول کسے ویائےورے بندے نالوں بوہتی آزادی ہوندی اے۔ اوہ فرق فرق طریقیاں نال خدا دی خدمت کر سکدا اے۔ مثال لئی، اوہ کسے ہور علاقے چ جا کے مُنادی کر سکدا اے۔ تے سب توں ودھ کے اوہدے کول یہوواہ خدا نال اپنی دوستی نُوں ہور پکا کرن لئی بوہتا وقت ہوندا اے۔
2. قانونی طور تے شادی کرن دے کجھ فائدے کیہڑے نیں؟
شادی کرن دے وی کجھ فائدے نیں۔ بائبل چ دَسیا گیا اے کہ اِک نالوں دو بہتر ہوندے نیں۔ (واعظ 4:9) ایہہ گل خاص کر کے اوہناں شادیشُدہ لوکاں تے لاگو ہوندی اے جیہڑے پاک کلام دے اصولاں مطابق زندگی گزار دے نیں۔ قانونی طور تے شادی کرن والے لوک اِک دُوجے نال وعدہ کردے نیں کہ اوہ اپنی ساری زندگی اِک دُوجے نُوں پیار کرن گے، اِک دُوجے دی عزت کرن گے تے اِک دُوجے دی قدر کرن گے۔ ایس لئی اوہناں دا رشتہ زیادہ مضبوط تے خوشگوار ہوندا اے جد کہ شادی دے بغیر کٹھے رہن والے لوکاں دا رشتہ ایہو جیہا نئیں ہوندا۔ نالے شادیشُدہ لوکاں دے بچے وی اِک چنگے تے محفوظ ماحول چ پل دے نیں۔
3. شادی بارے یہوواہ دی سوچ کیہہ اے؟
جدوں یہوواہ نے آدم تے حوا نُوں شادی دے بندھن چ بنھیا تے اوہنے کہیا کہ مرد اپنے ماں پیو نُوں چھڈے گا تے اپنی بیوی نال رہوے گا۔ (پیدایش 2:24) یہوواہ چاہندا اے کہ میاں بیوی اپنی ساری زندگی اِک دُوجے نُوں پیار کرن تے کدی وَکھ نہ ہون۔ اوہنے دَسیا اے کہ میاں بیوی چ طلاق صرف اِک ای وجہ توں ہو سکدی اے تے اوہ وجہ اے زِناکاری۔ جے میاں بیوی وچوں کوئی اِک زِنا کردا اے تے اوہدا ساتھی طلاق لے سکدا اے۔ a (متی 19:9) ایہدے علاوہ یہوواہ کسے مرد یاں عورت نُوں اِک توں زیادہ شادیاں کرن دی اجازت وی نئیں دیندا۔—1-تیمُتھیُس 3:2۔
ہور سوچوچار لئی
بھانویں تُسی شادیشُدہ ہے وو یاں نئیں، سکھو کہ تُسی آپ کیویں خوش رہ سکدے او تے یہوواہ نُوں کیویں خوش کر سکدے او۔
4. غیر شادیشُدہ رہن دی نعمت نُوں چنگی طرحاں استمال کرو
یسوع مسیح دی نظر چ غیر شادیشُدہ رہنا اِک نعمت سی۔ (متی 19:11، 12) متی 4:23 نُوں پڑھو تے فیر ایس سوال تے گل بات کرو:
-
یسوع مسیح وی غیر شادیشُدہ سی، اوہنے ایس نعمت نُوں اپنے باپ دی تے دُوجیاں دی خدمت کرن لئی کیویں استمال کیتا؟
اَج وی مسیحی یسوع وانگوں غیر شادیشُدہ رہن دی نعمت توں خوشی حاصل کر سکدے نیں۔ ویڈیو چلاؤ تے فیر ایس سوال تے گل بات کرو:
-
مسیحی غیر شادیشُدہ رہن دی نعمت نُوں کیویں استمال کر سکدے نیں تے ایہدے توں اوہناں نُوں کیہڑے فائدے ہون گے؟
کیہہ توانوں پتہ اے؟
بائبل چ ایہہ نئیں دَسیا گیا کہ اِک بندے نُوں کیہڑی عمر چ شادی کرنی چاہی دی اے۔ پر ایہدے چ ایہہ ضرور دَسیا گیا اے کہ شادی اوہ عمر لنگھن دے بعد کرنی چاہی دی اے جدوں جوانی دِیاں خواہشاں زوراں تے ہوندیاں نیں کیونکہ ایہناں خواہشاں دی وجہ توں اِک نوجوان لئی سمجھداری نال فیصلہ کرنا مشکل ہو جاندا اے۔—1-کُرنتھیوں 7:36۔
5. اپنا ساتھی سوچ سمجھ کے چُنو
شادی لئی اپنا ساتھی چُننا زندگی دا اِک بوہت اہم فیصلہ ہوندا اے۔ متی 19:4-6، 9 نُوں پڑھو تے فیر ایس سوال تے گل بات کرو:
-
اِک مسیحی نُوں شادی دا فیصلہ جلدبازی چ کیوں نئیں کرنا چاہی دا؟
بائبل ایہہ جانن چ تواڈی مدد کر سکدی اے کہ توانوں اوس بندے چ کیہڑیاں گلاں ویکھنیاں چاہی دِیاں نیں جدے نال تُسی شادی کرنا چاہندے او۔ سب توں خاص گل جیہڑی توانوں ویکھنی چاہی دی اے اوہ ایہہ وے کہ کیہہ اوہ بندہ یہوواہ نُوں پیار کردا اے۔ b 1-کُرنتھیوں 7:39 تے 2-کُرنتھیوں 6:14 نُوں پڑھو۔ فیر ایہناں سوالاں تے گل بات کرو:
-
اِک مسیحی نُوں صرف اپنے ہمایمان نال ای شادی کیوں کرنی چاہی دی اے؟
-
جے اَسی یہوواہ نُوں پیار نہ کرن والے کسے بندے نال شادی کرنے آں تے یہوواہ نُوں کیہو جیہا لگدا اے؟
6. شادی بارے یہوواہ ورگی سوچ رکھو
پرانے زمانے چ کجھ خودغرض اِسرائیلی مرد چھوٹیاں چھوٹیاں گلاں تے وی اپنیاں بیویاں نُوں طلاق دے دیندے سن۔ ملاکی 2:13، 14، 16 نُوں پڑھو تے فیر ایس سوال تے گل بات کرو:
-
یہوواہ نُوں ناجائز طلاق توں نفرت کیوں اے؟
ویڈیو چلاؤ تے فیر ایس سوال تے گل بات کرو:
-
جے تواڈا ساتھی یہوواہ دی عبادت نئیں کردا تے فیر وی تُسی اپنی شادی نُوں کامیاب بنان لئی کیہہ کر سکدے او؟
7. شادی لئی یہوواہ دے معیاراں تے عمل کرو
یہوواہ نے شادی لئی جیہڑے معیار قائم کیتے نیں اوہناں تے عمل کرن لئی سانوں بڑی کوشش کرنی پے سکدی اے۔ c پر جیہڑے لوک اِنج کردے نیں یہوواہ اوہناں نُوں بڑیاں برکتاں دیندا اے۔ ویڈیو چلاؤ۔
عبرانیوں 13:4 نُوں پڑھو تے فیر ایہناں سوالاں تے گل بات کرو:
-
تواڈے خیال چ کیہہ شادی لئی یہوواہ دے معیار صحی نیں؟ جے ہاں تے کیوں؟ جے نئیں تے کیوں نئیں؟
یہوواہ چاہندا اے کہ جدوں کسے مسیحی دی شادی ہوئے تے اوہ اوہنوں رجسٹر کرائے تے جے کسے مسیحی دی طلاق ہو جائے تے اوہ اوہنوں وی رجسٹر کرائے۔ بوہت سارے مُلکاں چ اِنج کرنا قانونی طور تے لازمی اے۔ طِطُس 3:1 نُوں پڑھو تے فیر ایس سوال تے گل بات کرو:
-
جے تُسی شادیشُدہ او تے کیہہ تواڈی شادی قانونی طور تے رجسٹر ہوئی اے؟
شاید کوئی پچھے: ”شادی کرن دی کیہہ لوڑ اے؟ کیہہ اِک جوڑا اُنج ای کٹھا نئیں رہ سکدا؟“
-
تُسی ایس سوال دا کیہہ جواب دَوو گے؟
خلاصہ
شادی کرنا یاں شادی دے بغیر رہنا دونویں یہوواہ وَلّوں نعمتاں نیں۔ دونواں صورتاں چ جے تُسی یہوواہ دے معیاراں مطابق زندگی گزارو گے تے تُسی خوش تے مطمئن رہوو گے۔
دہرائی
-
اِک بندہ غیر شادیشُدہ رہن دی نعمت نُوں چنگی طرحاں کیویں استمال کر سکدا اے؟
-
بائبل چ ایہہ کیوں کہیا گیا اے کہ اِک مسیحی نُوں صرف اپنے ہمایمان نال ای شادی کرنی چاہی دی اے؟
-
طلاق دی اِکو اِک جائز وجہ کیہڑی اے؟
ہور جانن لئی
ایس مضمون چ پڑھو کہ صرف خداوند چ شادی کرن دا کیہہ مطلب اے۔
ایس ویڈیو چ دو چھوٹیاں چھوٹیاں ویڈیوز نیں جنہاں دے ذریعے تُسی سکھو گے کہ تُسی شادی دے بارے صحی فیصلہ کیویں کر سکدے او۔
ایس ویڈیو چ ویکھو کہ اِک بندے نُوں ایہہ کیوں لگدا سی کہ جو کجھ اوہنے چھڈیا، یہوواہ نے اوہنوں اوس توں ودھ کے دِتا اے۔
مینوں امید سی کہ اوہ پاک کلام دی تلیم قبول کر لے گی (56:1)
ایس مضمون چ پڑھو کہ طلاق لین یاں اپنے شوہر یاں بیوی توں علیٰحدہ ہون توں پہلاں کیہڑیاں گلاں تے سوچوچار کرنا ضروری اے۔
a ایہہ جانن لئی کہ زِناکاری دے علاوہ ہور کیہڑیاں گلاں نیں جنہاں دی وجہ توں شاید اِک مسیحی اپنے شوہر یاں بیوی توں الگ ہون دا فیصلہ کرے، کتاب دے آخر چ نکتہ نمبر 4 نُوں ویکھو۔
b کجھ مُلکاں چ ماں پیو آپ اپنے بچیاں لئی رشتے پسند کردے نیں۔ ایس صورت چ ماں پیو نُوں سب تُوں پہلاں پیسے یاں حیثیت تے توجہ دین دی بجائے ایہہ ویکھنا چاہی دا اے کہ جنہوں اوہ اپنی دھی یاں پُتر لئی ویکھ رہے نیں کیہہ اوہ یہوواہ نُوں پیار کردا اے۔
c جے تُسی شادی دے بغیر کسے نال رہ رہے او تے اوہدے نال شادی کرنا یاں اوہنوں چھڈنا تواڈا اپنا فیصلہ اے۔