IREN MEHN KASUKUHL 42
Dahme Paipel Mahsaniheki Duwen Kiripw oh Pwopwoud?
Nan ekei tiahk, aramas akan kin kamehlele ma aramas emen sohte pwopwoud, e sohte pahn kak peren. Ahpw kaidehn me pwopwoud koaros kin peren oh kaidehn me kiripw koaros kin nsensuwed. Paipel mahsanih me kiripw de pwopwoud wia kisakis kei sang Siohwa.
1. Ia ekei kamwahupen sohte pwopwoud?
Paipel mahsanih: “Mehmen me pwopwoudida pahn mwahu, ahpw mehmen me sohte pwopwoudida pahn mwahusang.” (Wadek 1 Korint 7:32, 33, 38.) Ni soangen ahl dah kan me emen me sohte pwopwoud “pahn mwahusang” me pwopwoudida? Kristian kiripw men sohte anahne apwalih eh pwoud. Kahrehda, e ahneki saledek laud. Karasepe, ekei irail kak kalaudehla ar doadoahk en kalohk ni soangen ahl kaperen kan, me duwehte seiloakla nan ehu sahpw tohrohr pwehn kalohki rongamwahwo. Ahpw me keieu kesempwal, re kak doadoahngki ahnsou laud en karanihala Siohwa.
2. Ia ekei kamwahupen pwopwoud ni pwung?
Duwehte kiripw, mie kamwahupen pwopwoud. Paipel mahsanih me “riemen mwahusang emente.” (Eklesiasdes 4:9) Met mehlel ong Kristian kan me kin doadoahngki kaweid en Paipel nan ar pwopwoud. Pwopwoud kan me wiahda kisinlikoun pwopwoud inoukihda ira en kin ahnsou koaros limpoakpene, wahupene oh kesempwalki emenemen. Met kin kalapw imwikihla nsenamwahu laudsang irail kan me kin mihmihpene ahpw sohte kapwopwoudla. Oh seri kan sohte pahn pil perki mehkot.
3. Ia sapwellimen Siohwa madamadau duwen pwopwoud?
Ni ahnsou me Siohwa ketin wia tepin kapwopwoudo, e ketin mahsanih: ‘Ohl emen pahn mweisang seme oh ine oh ehuiong [“patehng,” NW] eh pwoud.’ (Senesis 2:24) Siohwa ketin kupwurki ohl emen oh lih emen me pwopwoud ira en limpoakpene oh mihmihpene erein ara mour. E ketin mweidada mweipeseng en wiawi ihte ma emen rehra wiahda dipen kamwahl. Nan soangen ahnsowo, me sohte wiahda dihpo ahneki pwuhng en pilada ma e pahn mweisang eh pwoudo de soh. a (Madiu 19:9) Siohwa sohte ketin mweidohng Kristian kan ren pwoudiki lih de ohl tohtohsang emen.—1 Timoty 3:2.
KALAUDEHLA OMW ESE MET
Sukuhlki ia duwen omw kak nsenamwahu oh kaperenda kupwuren Siohwa, mehnda ma ke kiripw de pwopwoud.
4. Isaneki kisakis en sohte pwopwoud
Sises kin ketin medewe me sohte pwopwoud wia kisakis ehu. (Madiu 19:11, 12) Wadek Madiu 4:23, oh mwuri koasoiapene peidek wet:
-
Ia duwen Sises eh ketin doadoahngki kisakis en sohte pwopwoud pwehn papah Semeo oh sewese meteikan?
Kristian kan me sohte pwopwoud kak diar peren ni ar doadoahngki ar mour duwehte Sises. Kilang KISIN KASDO, oh mwuri koasoiapene peidek wet.
-
Soahng mwahu dah kan me Kristian kan me sohte pwopwoud kak wia?
Ke ese met?
Paipel sohte mahsanih sounpar depe me konehng emen en pwopwoudida. Ahpw, e kin kangoange me pwulopwul men en awih lao e “dauliher ahnsoun pwulopwul,” ahnsou me ineng kehlail en wia nsenen pwopwoud kak kasapwungehla eh pilipil mwahu kan.—1 Korint 7:36.
5. Pilada omw pwoud ni loalokong
Ehu pilipil me keieu kesempwal me ke pahn wiahda iei pilada omw pwoud. Wadek Madiu 19:4-6, 9, oh mwuri koasoiapene peidek wet:
-
Dahme kahrehda Kristian men en dehr mwadang en pwopwoudida?
Paipel kak seweseiuk ken ese soangen aramas dah me ke pahn pwoudiki. Ahpw me keieu kesempwal, rapahki omw pwoud me poakohng Siohwa. b Wadek 1 Korint 7:39 oh 2 Korint 6:14. Mwuri koasoiapene peidek pwukat:
-
Dahme kahrehda kitail en pwoudikihte iangatail Kristian?
-
Ia omw madamadau duwen sapwellimen Siohwa pepehm ma kitail pilada en pwoudiki emen me sohte poakohng Ih?
Ma mahn riemen me uhdahn wekpeseng mi pahn mehn wisik ehu, ira pahn lokolok. Pil duwehte, Kristian men me pwoudiki emen me sohte poakohng Siohwa pahn kin ahneki kahpwal tohto
6. Ahneki sapwellimen Siohwa madamadau duwen pwopwoud
Mahso nan Israel, ekei ohl akan kin mweisang ar pwoud pwehki kahrepe roporop kan. Wadek Malakai 2:13, 14, 16, oh mwuri koasoiapene peidek wet:
-
Dahme kahrehda Siohwa ketin kalahdeki mweipeseng kan me sohte pidada kamwahl?
Kamwahl oh mweipeseng kin kamedekihala me sohte dipadao oh seri kan
Kilang KISIN KASDO, oh mwuri koasoiapene peidek wet.
-
Ma omw pwoud sohte kin poakohng Siohwa, dahme ke kak wia pwe omw mouren pwopwoud en nsenamwahu?
7. Doadoahngki koasoandi en Siohwa kan me pid pwopwoud
Aramas emen mwein pahn anahne nantihong doadoahngki sapwellimen Siohwa koasoandi kan me pid pwopwoud. c Ahpw Siohwa kin ketin kapaia irail kan me kin wia met. Kilang KISIN KASDO.
Wadek Ipru 13:4, oh mwuri koasoiapene peidek pwukat:
-
Ke medewe me sapwellimen Siohwa koasoandi kan me pid pwopwoud kin pwung? Dahme kahrehda, de dahme sohki?
Siohwa ketin kupwurki Kristian kan en wiahda kisinlikoun pwopwoud oh mweipeseng. Pali laud en koperment kan kin anahne aramas akan ren wia met. Wadek Taitus 3:1, oh mwuri koasoiapene peidek wet:
-
Ma ke pwopwoud, ke wiadahr noumw kisinlikoun pwopwoud?
MA EMEN IDEK: “I anahne kapwopwoudla? Se sou kak mihmihpenete?”
-
Ia duwen omw pahn sapeng?
DAHME KE SUKUHLKIER
Kiripw oh pwopwoud wia kisakis kei sang Siohwa. Aramas kiripw oh pwopwoud koaros kak nsenamwahu ma e kin mour pahrekiong kupwuren Siohwa.
Kousapahl
-
Dahme aramas emen kak isaneki ni eh sohte pwopwoud?
-
Dahme kahrehda Paipel mahsanih kitail en pwoudikihte iangatail Kristian?
-
Paipel mahsanih me mweipeseng kak wiawi ni kahrepe ehute, dahieu mwo?
PIL TEHK
Ia wehwehn pwoudikihte me “kin idawehn Kauno”?
Kilang kasdo mwotomwot riau me kak seweseiuk en wiahda pilipil mwahu duwen date oh pwopwoud.
Kilang dahme kahrehda emen brother pehm me dahme Siohwa ketikihong ih kesempwalsang dahme e pwilikihdi.
Dahme aramas emen anahne tehk mwohn eh medewe en mweisang de tohrohrasang eh pwoud?
“Wauneki ‘Dahme Koht Ketin Kapatapene’” (Kahn Iroir, December 2018)
b Nan ekei tiahk, pahpa oh nohno kan me kin pilada en neirail seri kan pwoud. Ma ih duwen met, pahpa nohno limpoak kan sohte kin medewe mahs ma aramaso naineki mwohni de ahneki mwar laud, ahpw re kin tehk ma e kin poakohng Siohwa de soh.
c Ma ke kin mi rehn aramas emen me kumwa sohte kapwopwoud, ke pahn anahne pein pilada ma ke pahn kohkohsang de pwoudkihla.
