42 KAQ YACHAKUNËKIPAQ
¿Bibliachöqa ima nintaq soltëru këpaq y casädu këpaq?
Wakinkunaqa pensayan casakur-raq kushishqa kayänampaq kaqtam. Peru manam llapan casädukunatsu kushishqa kawayan, y manam llapan soltërukunatsu llakishqa sientikuyan. Bibliachöqa nin soltëru kë y casädu këpis Jehoväpa bendicionnin kanqantam.
1 KAQ: ¿Imanötan soltëru këqa yanapakun?
Bibliachömi kënö nin: ‘Casakoqqa allitam ruran, peru mana casakoqqa mas allitaran ruran’ (leyi 1 Corintius 7:32, 33, 38). “Mana casakoqqa mas allitaran ruran” nirqa, ¿ima nitataq munëkan? Musyanqantsiknöpis, soltërukunaqa pitapis manteniyänampaq o atiendiyänampaq mana yarpachakurmi imëkachöpis mas yanapakuyta puëdiyan. Tsëmi wakinkunaqa Diospita yachatsikuyänampaq juk markakunaman ëwayan, y tiempunkunapis masmi kan Jehoväpita mas yachakuyänampaq.
2 KAQ: ¿Imanötan casädu këqa yanapakun?
Casädu këpis soltëru kënöllam yanapakun. Tsëmi Bibliachö kënö nin: “Japallankunalla kayanqampitaqa ishkaq kayanqan[mi] mas alli” (Eclesiastes 4:9). Peru tsënöqa kayan Bibliachö ninqankunata cäsukurmi. Casakoqkunaqa casakuyanqan junaqmi äninakuyan kuyanakuyänampaq, respetanakuyänampaq y cuidanakuyänampaq. Tsënö äninakushqa karmi pëkunaqa kushishqa kawakuyan, y manam yarpachakuyantsu mana casakurlla juntu kawakoqkunanöqa. Y casädu kayaptinqa wamrankunapis segürum sientikuyanqa.
3 KAQ: ¿Ima nintan Jehoväqa casädu vïdapaq?
Adantawan Ëvata casaratsirmi Jehovä Diosqa kënö nirqan: “Tsëmi ollquqa papäninta y mamäninta dejanqa, y warminwan juntakanqa” (Genesis 2:24). Jehoväqa munan casädukunaqa kuyanakuyänanta y imëyaqpis juntu kawakuyänantam. Divorciakuytaqa puëdiyan majan jukwan engañashqa kaptinllam, peru tsënö cäsu kaptinqa divorciakuyänampaq o mana divorciakuyänampaq kaqtaqa mana culpayoq kaqmi decidinan (Mateu 19:9). a Jehoväqa munan sirweqninkuna juk majayoqlla kayänantam (1 Timoteu 3:2).
MASLLA YACHAKUSHUN
Soltëru kar o casädu karpis kushishqa kanëkipaq y ruranqëkikunawan Jehoväta kushitsinëkipaqmi yachakushun.
4 KAQ: Soltëru kanqëkita alli provechë
Jesuspaqqa soltëru kanqan juk bendicionmi karqan (Mateu 19:11, 12). Leyiyë Mateu 4:23 ima ninqanta y këpaq parlayë:
-
Soltëru kanqanqa, ¿imanötan Jesusta yanaparqan Jehoväta mas sirwinampaq y jukkunata yanapanampaq?
Soltërukunaqa Jesusnöllam Jehoväta sirwir kushishqa këta puëdiyan. VIDEUTA rikäyë y këpaq parlayë:
-
Soltëru wawqikuna y panikunaqa, ¿imanötan soltëru kayanqanta alli provechayanman?
¿Musyarqëkiku?
Bibliachöqa manam nintsu ëka watayoq këkar casakuyänampaq kaqta. Peru ninmi ‘wëta cuenta jövin kënin pasarishqanchöraq casakuyänampaq’. Tsënö nirqa parlëkan warmipis o ollqupis piwampis oqllanakuyta alläpa munayanqan pasarishqanchöraq casakuyänampaqmi (1 Corintius 7:36).
5 KAQ: Piwan casakunëkipaq kaqtaqa alliraqmi pensanëki
Pipis casakuyta munarqa alliraqmi pensanan piwan casakunampaq kaqta. Leyiyë Mateu 19:4-6, 9 ima ninqanta y këpaq parlayë:
-
¿Imanirtan casakuyta munaqkunaqa manaraq casakur alliraq pensayänan?
Casakuyta munaptikiqa, Bibliachö consëjukunam yanapashunki imanö warmita o ollquta ashinëkipaq kaqta musyanëkipaq. Casakurqa Jehoväta sirweqllawanmi casakunëki. b Leyiyë 1 Corintius 7:39 y 2 Corintius 6:14 ima ninqanta y këkunapaq parlayë:
-
Jehoväta sirweqkunaqa, ¿imanirtan Jehoväta sirweq mayinkunallawan casakuyanman?
-
¿Imanöraq Jehovä sientikun sirweqninkuna pëta mana sirweqkunawan casakuyaptin?
Juk törutawan ashnuta yügushqaqa, yanapanakuyta mana puëdirmi ishkankuna sufriyanqa. Tsënöllam Jehoväta mana sirweqwan casakoq kaqqa imëka problëmakunapa pasanqa.
6 KAQ: Casädu këta Jehovänö valorashun
Unë witsanqa, wakin israelïtakunaqa pöcu cäsullapitam warminkunapita divorciakuyaq. Leyiyë Malaquïas 2:13, 14, 16 ima ninqanta y këpaq parlayë:
-
¿Imatataq Jehovä nin majan mana engañëkaptin divorciakoqkunapaq?
Juk ollqu warminta engañaptin y divorciakuptinqa warminwan wamrankunam alläpa sufriyan.
VIDEUTA rikäyë y këpaq parlayë:
-
Jehoväta majëki mana sirwiptimpis, ¿imatataq rurankiman kushishqa kawakuyänëkipaq?
7 KAQ: Casädukuna, Jehovä mandakunqankunata cäsukuyë
Wakin casädukunapaqqa Jehovä mandakunqanta cäsukuyänan manam fäciltsu. c Peru Jehovä munanqannö kawakurqa kushishqam kayanqa. VIDEUTA rikäyë.
Leyiyë Hebrëus 13:4 ima ninqanta y këpaq parlayë:
-
Casädukunapaq Jehovä mandakunqanqa, ¿difïcil cumplitsuraq? ¿Imanirtan tsënö pensanki?
Jehoväqa munan autoridäkuna dispuniyanqannö sirweqninkuna civilpa casakuyänantam, y divorciakurpis autoridäkunachömi papelta rurayänan. Leyiyë Tïtu 3:1 ima ninqanta y këpaq parlayë:
-
Casakushqana karqa, ¿autoridäkuna niyanqannöku llapan documentukunata casakunëkipaq rurarqunki?
WAKIN IMATA TAPUMANQANTSIK: “¿Imanirtan casakunäraq? ¿Majäwanqa mana casakurpis manaku kawaküman?”.
-
Tsënö tapuyäshuptikiqa, ¿imataraq ninkiman?
KËTAM YACHAKURQUNKI
Soltëru kë y casädu këpis Jehoväpa bendicionninmi. Tsëmi soltëru o casädu karpis Jehovä munanqannö kawarqa kushishqa kanki.
¿Yarpankiku?
-
Soltërukunaqa, ¿imanötan alli provechayanman soltëru kayanqanta?
-
¿Imanirtan Bibliachöqa nin Jehoväpa sirweqninkunaqa Jehoväta sirweq mayinkunallawan casakuyänampaq?
-
¿Ima cäsullachö divorciakuyänampaq kaqtataq Bibliachöqa nin?
MASTA YACHAKUY
¿Ima ninantan “Señorta sirweqllawan” casakuy ninanqa?
Casakuyta munaptiki alli decidinëkipaq ima yanapashunëkipaq kaqta rikë.
Jehoväta sirwinampaq llapan dejanqankunapitapis mas bendicionkunata juk nuna chaskinqanta rikë.
Jehoväpa sirweqninkunaqa divorciakuyta o majampita rakikëta munarqa, ¿imatataq cuentachö katsiyänan?
“Dios patsätsinqan casädu kawakïta respetashun” (Täpakoq, diciembri 2018)
a Majankuna jukwan mana engañaptimpis ima cäsukunachö rakikëta puëdiyanqanta musyanëkipaq “Maslla entiendinëkipaq” neqchö 4 kaqta leyi.
b Wakin nacionkunachöqa teytakunam wamrankuna piwan casakunampaq kaqta decidiyan. Jehoväta kuyaq teytakunaqa, Jehoväta kuyaqkunallawan wamrankuna casakuyänantam munayan.
c Manaraq casakushqa këkar piwampis juntuna kawarqa, kikikim decidinëki casakunëkipaq o rakikänëkipaqpis.
