LECCIÓN 42
¿Biblia solterogunamunda y cazaranamunda imadadi yachachin?
Huaquin gentegunaga, solo cazarashmi feliz causai pudingui nin. Pero na tucui cazarashcagunallu alli causan, shinalladi na tucui solterogunallu triste causan. Pero Bibliaga soltero o casado ganaga Diosbu valishca regalo gashcadami nin.
1. ¿Solterogunaga imadadi ashtaun rrurrai pudin?
Bibliaga: “Cazarajpish allidami rrurrajun, shinalladi na cazarajpish ashtaun allidami rrurrajun” nin (1 Corintios 7:32, 33, 38-da liyi). ¿Imamundadi na cazarajpish “ashtaun allida rrurrajun”? nin. Diosda sirvij solterogunaga paigunabu cusamunda o huarmimundaga na preocuparinallu gan. Chaimundami, Jehová Diosda sirvingabu más tiempoda charin. Por ejemplo, huaquingunaga Diosbu Gobiernomunda alli noticiagunada predicangabumi cutishuj lugargunamun rrin. Solterogunaga Jehová Diosun alli amigo tucungabumi tiempoda alli utilizan.
2. ¿Legalmente casado ganaga imashinadi ayudan?
Casadogunaga solteroguna shina, ashca beneficiogunadami charin. Bibliaga “sapalla ganabu rrandiga ishquindi ganami ashtaun alli gan” nin (Eclesiastés 4:9). Caidaga Bibliabi mandashca shina causaj casadogunami fajtachin. Legalmente casadogunaga juyanada, respetanada y rrandi rrandi cuidanadami promitinajushca. Chaimunda unión libre causajgunaun comparajpiga legalmente cazarashcagunaga ashtaun seguromi sintirin. Shinalladi, legalmente casadogunami huahuagunamun alli y seguro causaida cun.
3. ¿Jehová Diosga casadogunamundaga imadadi yuyan?
Jehová Dios punta matrimonioda callarichishaga, cashnami nirca: “Jariga paibu taitamamada saquishmi paibu huarmiun tandanajunga” (Génesis 2:24). Jehová Diosga cusahuarmi huañunagama juyash tandalla causallunmi munan. Solo cusa o huarmi huainayajpi divorciallunmi saquin. Shina gajpiga, Taita Diosmi culpada na charij cusa o huarmi divorciarinada o na divorciarinada agllallun saquin (Mateo 19:9). a Jehová Dios paida sirvijgunadaga shuj personallaun cazarallunmi mandan (1 Timoteo 3:2).
CAI TEMAMUNDA MÁS YACHASHUNCHI
Soltero o casado gashash imashina feliz causai pudishcada, shinalladi imashina Jehová Diosda contentachi pudishcadami yachashun.
4. Soltero gash Jehová Diosda ashtaun sirvi
Jesusbuga soltero ganaga, shuj bendición o Diosbu valishca regalomi garca (Mateo 19:11, 12). Mateo 4:23-da liyish, chaimunda parrlaichi:
-
¿Jesús soltero gashaga imashinadi paibu Taitada sirvingabu y cutishujgunada ayudangabu tiempodaga alli aprovecharca?
Diosda sirvij solterogunaga, Jesús shinalladi Taita Diosda sirvinabi ocuparishmi paigunabu soltero causaida alli aprovechanajunga. VIDEODA rricush caimunda parrlaichi:
-
¿Diosda sirvij solterogunaga imashinadi paigunabu tiempodaga alli aprovechan?
¿Yacharcanguillu?
Mashna huatagunada charish cazaranadaga, Bibliaga na ninllu. Shinash “na yalli huambra gash” cazarana gashcadami nin, porque joven gash relaciones sexualesda charina munaiguna demas fuerte gajpimi na alli yuyash cazarai pudin (1 Corintios 7:36).
5. Piun cazaranada alli agllai
Canbu causaibi piun cazaranada agllanaga shuj importante decisionmi gan. Mateo 19:4-6, 9-da liyish, chaimunda parrlaichi:
-
¿Imamundadi Diosda sirvijgunaga narij cazarashti alli yuyana gan?
Bibliami shuj alli cusa o alli huarmi ima cualidadgunada charishcada rricullun ayudanga. Ashtaun, Jehová Diosda tucui shungun juyajtami mascana gangui. b 1 Corintios 7:39 y 2 Corintios 6:14-da liyi. Jipaga chaimunda parrlaichi:
-
Diosda sirvij cazarasha nishaga, ¿imamundadi pai shina Diosda sirvijhuan cazarana gan?
-
Jehová Diosda na juyajhuan cazarajpiga, ¿paiga imashinadi sintiringa?
Shuj mismo yugobi ishqui diferente animalgunada churajpiga ishquindilladimi sufringa. Shinalladi Diosda sirvij, Diosda na sirvijhuan cazarashaga ashca problemagunadami charinga.
6. Matrimonioda Jehová Dios rricushca shina rricui
Ñaupa tiempobi Israel llactabiga, huaquingunaga paigunallabi yuyashcamundami paigunabu huarmimunda divorciarinajurca. Malaquías 2:13, 14, 16-da liyish, chaimunda parrlaichi:
-
Jehová Diosga deganamunda divorciarijtaga ¿imamundadi odian?
Huainayana y divorciarinaga paibu parejada y huahuagunadashmi ashcada llaquichin.
VIDEODA rricush caimunda parrlaichi:
-
Can Jehová Diosda na sirvijhuan cazarashca gashaga, ¿matrimoniobi alli causangabuga imadadi rrurranguimun?
7. Jehová Dios casadogunamun cushca consejogunada cazui
Huaquingunabuga Jehová Dios casadogunamun cushca consejogunada cazunaga shinchimi ganga. c Pero paida cazungabu esforzarijgunadami bendician. VIDEODA rricui.
Hebreos 13:4-da liyish, chaimunda parrlaichi:
-
¿Matrimoniomunda Dios cushca leyguna alli gashcadallu yuyangui? ¿Imamundadi shina yuyangui?
Jehová Diosga matrimonioda y divorcioda legalmente registrachillunmi munan, chaiga mundo enterobimi legal gan. Tito 3:1-da liyish, chaimunda parrlaichi:
-
Can casado gashaga, ¿canbu matrimonio legalmente registrado gashcadallu cringui?
HUAQUINGUNAGA CASHNAMI TAPUN: “¿Degana imabu cazarasha? ¿Cazarangabu papelbi firmanallu importante gan?”.
-
¿Canga imadadi contestanguimun?
RESUMEN
Soltero y casado ganaga Jehová Diosbu regalomi gan. Solteroguna o casadoguna gashash, Jehová Diosbu mandashcagunada cazushmi de verdad felices causai pudishun.
Repaso
-
¿Soltero causaidaga imashinadi alli aprovechai pudinchi?
-
¿Bibliaga imamundadi Jehová Diosda sirvijpura cazarallun nin?
-
Bibliabi yachachishca shinaga, ¿casadogunaga imamundadi divorciari pudin?
ASHTAUN YACHAI
¿“Cristianogunallaun” cazarasha nishaga imadadi nisha nin?
“Preguntas de los lectores” (La Atalaya, 1 de julio de 2004)
Alli decisiongunada agllangabu noviogunamunda y casadogunamunda ishqui ejemplogunada rricui.
Shuj huauquiga Diosda sirvingabumi paibu punta causaida huashamun saquirca, Jehová Dios imamunda paida bendiciashcada seguro gashcada yachai.
Diosda sirvijgunaga narij divorciarish o partirishmi, ¿imadadi alli yuyana gan?
“Honremos ‘lo que Dios ha unido’” (La Atalaya, diciembre de 2018)
a Huainayana juchabi na urmashca gajpi separarinada o na separarinadaga nota 4-bimi ashtaun informacionda taringui.
b Huaquin llactagunabiga, taitamamagunami paigunabu churi o ushushi piun cazaranada agllan. Shina gajpiga, taitamamagunami cazaragrij Jehová Diosda juyashcada o na juyashcada alli rricuna gan. Paigunabuga Diosda sirvinami ashtaun importante gana gan.
c Can unión libre causajushaga cazaranada o partirinadaga canlladimi agllana gangui.
