42 YACHACHIKUY
¿Imaninmi Biblia casarakuymanta soltero kaymantapas?
Wakin llaqtakunapi runakunaq nisqanman jinaqa casarakuspallas pipas kusisqa kanman. Ichaqa manan llapa casarasqakunachu kusisqaqa kausanku nitaq llapa solterokunachu llakisqa kausanku. Bibliaq nisqanman jinaqa soltero kaypas casado kaypas Diospa regalonmi.
1. ¿Imakunapin solterolla kay allin kanman?
Biblian nin: “Pipas casarakuqqa allintan ruwashan, mana casarakuqmi ichaqa aswan allintaraq ruwashan”, nispa (leey 1 Corintios 7:32, 33, 38). ¿Imaninantan nishan: “Mana casarakuqmi ichaqa aswan allintaraq ruwashan”, nisqanwan? Diosta serviq solteropas solterapas manan imaynachus kashan esposa otaq qosa chaykunapichu piensashan. Paykunaqa imaymanamantan libre kashanku, chaymi paykunapaqqa fácil maypipas Diosta serviyqa. Paykunamanta wakinqa maypichus Diosmanta willaqkuna necesitakun chay llaqtakunaman iman astakunku. Chaymantapas, paykunaqa aswan tiempoyoqmi kanku astawan Diosta reqsinankupaq, paywan allin amigontin kanankupaqpas.
2. ¿Imakunapin casarasqa kay allin kanman?
Imaynan soltero kayqa allin, chhaynan casarasqa kaypas allinllataq. Bibliapunin nin: “Juj runallamantaqa iskaymi aswan allinqa”, nispa (Eclesiastés 4:9). Diospa kamachikuyninman jina kausaq casarasqakunan astawanqa kusisqa kausanku. Casarasqa warmi-qhariqa casarakusqanku p’unchaypin juj promesata ruwanku, munanakuspa respetanakuspa sumaqta tiyanankupaq. Piwanpas casarakuspa tiyayqa manan igualchu mana casarakuspalla tiyaywanqa. Casado kausay ukhupin wawakunapas tayta-mamanpa yanapasqan sumaqta wiñanku.
3. ¿Imaninmi Jehová Dios casado kausaymanta?
Adantawan Evatawan casarachispan Jehová Diosqa nirqan: “Chayraykun qhariqa taytantapas mamantapas saqepunqa, jinaspa esposanman jujllachakapunqa”, nispa (Génesis 2:24). Jehová Diosqa munan casarasqakuna kausananku p’unchaykama munanakuspa sumaqta tiyanankutan. Jujninku piwanpas pantallaqtinmi divorciakuytaqa atinkuman. Mayqenchá traicionasqa karqan paymi chaytaqa qhawarinan (Mateo 19:9). a Chaymantapas, Jehová Diosqa manan munanchu mayqen serviqninpas askha warmiyoq askha qhariyoqpas kanantaqa (1 Timoteo 3:2).
ASTAWAN YACHASUNCHIS
Kaypin astawan yachasun imatas ruwawaq casadoña solteroña kaspapas kusisqa kanaykipaq chayta, imaynatas Jehová Diosta kusichiwaq chaytapas.
4. ¿Imakunatan solterokunapas solterakunapas ruwankuman?
Jesuspaqqa soltero kayqa juj regalo jinan karqan (Mateo 19:11, 12). Leeychis Mateo 4:23 textota, jinaspa jamuq tapuyman jina parlariychis:
-
Jesusqa solterollan karqan, ¿ima ruwaykunamanmi pay masta tiemponta qorqan?
Diosta serviq solterokuna Jesús jina Diospa munaynin ruwayman tiempota qonqaku chayqa, kusikuytan tarinqaku. VIDEOTA qhawaychis, jinaspa jamuq tapuyman jina parlariychis:
-
¿Imakunatan solterokuna ruwankuman soltero kashaspa?
¿Yacharqankichu?
Bibliaqa manan ninchu jayk’a watayoq kashaspas casarakuna chaytaqa. Ichaqa pipas “nishu waynallaraq kanman chayqa” chhikantan suyarinan. Wayna watakunapiqa sasan cuerpota kamachiy, yuyay tutayaqtinmi waynapas sipaspas juchapi ima tarikunman (1 Corintios 7:36).
5. Allinta ajllakuy piwanchus casarakunki chayta
Piwanchus casarakunki chaytaqa allintan ajllakunayki, allin yuyaywanmi chaytaqa ruwana. Leeychis Mateo 19:4-6, 9 textota, jinaspa jamuq tapuyman jina parlariychis:
-
¿Imaraykun juj cristiano allintaraq piensaykunan piwanchus casarakunqa chayta?
Biblian yanapasunki juj allin qosata otaq allin esposata tarinaykipaq. Ichaqa Jehová Diosta munakuq runatan ajllakunayki. b Leeychis 1 Corintios 7:39; 2 Corintios 6:14 textokunata, jinaspa jamuq tapuykunaman jina parlariychis:
-
Mayqen iñiqpas casarakuyta munan chayqa, ¿imaraykun juj iñiqmasita ajllakunan casarakunanpaq?
-
Jehová Diosta mana munakuq runawan casarakuwaq chayqa, ¿imaynatan Jehová Dios chayta qhawarinman?
Iskay clase animalkunata llank’anankupaq churakunman chayqa iskayninkun sufrinkuman. Chhaynatan sufrillanmantaq juj cristiano Diospi mana iñiqwan casarakunman chayqa.
6. Jehová Dios jina casado kausayta qhawariy
Ñaupa tiempopi wakin Israel runakunaqa imaña karuq chaypas t’aqakuqkupachan esposankumanta. Leeychis Malaquías 2:13, 14, 16 textota, jinaspa jamuq tapuyman jina parlariychis:
-
Yachasqanchis jina, Bibliapiqa willashanmi ima kallaqtinsi divorciakuna chayta. ¿Imaynatan Jehová Dios qhawarin chayta mana kasukuspa ima jawallapas divorciakuqkunata?
Jujwan pantaypas t’aqanakapuypas nishu llakikuytan familiaman wawakunamanpas apamun.
VIDEOTA qhawaychis, jinaspa jamuq tapuyman jina parlariychis:
-
Manaña qosayki otaq esposayki Jehová Diosta servinchu chaypas, ¿imatan ruwawaq sumaqta kausanaykichispaq?
7. Jehová Diospa kamachikuyninkunata kasukuychis
Wakin casarasqakunaqa sasapaq jinan qhawarinku Jehová Diospa churasqan kamachikuykunata. c Ichaqa sichus kasukunankupaq kallpachakunqaku chayqa Diosqa bendecinqan paykunata. VIDEOTA qhawaychis.
Leeychis Hebreos 13:4 textota, jinaspa jamuq tapuyman jina parlariychis:
-
Imaniwaqmi, ¿allinchu icha sasa junt’aychu casarasqakunapaq Jehová Diospa churasqan kamachikuykuna? ¿Imaraykutaq chhaynata ninki?
Casarakuspapas, casado kashaspa jujpaqkama t’aqakuyta munaspapas autoridadkunaq nisqanman jinan chaykunataqa ruwana, chaytan Jehová Diosqa munan. Leeychis Tito 3:1 textota, jinaspa jamuq tapuyman jina parlariychis:
-
¿Personaykiri casarasqachu kashanki? ¿Autoridadkunaq nisqanman jinachu casarakurqanki?
WAKIN RUNAKUNAN NINKU: “Allintan noqaykuqa entiendenakuyku, ¿imapaqñataq papelpiraqri casarakuyman?”, nispa.
-
Personaykiri, ¿imaninkitaq?
IMATAN YACHAMURQANCHIS
Soltero kaypas casado kaypas Jehová Diospa regalonmi. Casadoña kaspapas solteroña kaspapas Jehová Diospa nisqanman jina kausasunchis chayqa kusisqan kasun.
Yuyarisun
-
¿Imakunatan solterokuna ruwayta atinkuman solterollaraq kashaspa?
-
¿Imaraykun Jehová Dios serviqninkunata kamachin iñiqmasillankuwan casarakunankupaq?
-
Bibliaq nisqanman jinaqa, ¿imaraykullan pipas divorciakuyta atinman?
ASTAWAN YACHANAYKIPAQ
¿Iman “Señorllapi” casarakuy? Chayta astawan yachanaykipaq leey kay qelqata.
¿Imakunatan ruwanayki sichus casarakuyta munashanki chay? Astawan yachanaykipaq qhaway kaypi videokunata.
Jehová Diosta kasukuyqa imamantapas aswan allinmi, chaytan juj hermano allinta entienderqan, chaytan willakushan kay videopi.
¿Imatan juj cristiano ruwanan manaraq divorciakuypi t’aqakuypipas piensashaspa?
“Diospa jujllachasqantaqa respetananchismi” (Qhawaq, 2018 watapi diciembre killa)
a 4 willakuypin astawan yachanki imaninsi Jehová Dios mana pantay jucha kaqtin t’aqanakuymanta chayta.
b Wakin llaqtapiqa tayta-mamakunan wawankupaq parejata ajllapunku. Chhayna llaqtapi tiyaq Diosta serviq tayta-mamakunaqa manan qolqeyoqchus kanku ima familiamantachus kanku chaytachu mastaqa qhawananku, aswanmi Dios sonqo runata ajllananku.
c Mana casarakuspalla tiyashanki chayqa qanmantan kanqa casarakunkichus icha t’aqakapunkichus chayqa.
Astawan yachanaykipaq
SAPA KUTILLA TAPUKUSQANKU
¿Imaynatan Jehová Diospa testigonkuna Bibliamanta yachachinku?
Jehová Diospa testigonkunawan Bibliata estudiaspaqa, munasqayki Bibliawanmi estudiawaq. Chaymantapas llapa familiaykita amigoykikunata iman invitawaq. Chayqa manan qolqepaqchu.
