YACHANA PARTI 42
Bibliaga cazaranamanda imatata nin
Maican runaguna yuyanaun, cushi causangahua huarmita o carita apinalla man nisha. Pero mana huin cariyuc huarmiyucchu cushi anaun. Chasnallata, mana huin musuguna o solteragunachu llaquirisha causanaun. Bibliaga nin, cazarashca ana, musu o soltera anaga Dios cumbirashca man.
1. Imahuata cari illac o huarmi illac ana ali an
Bibliaga nin: “Maican runa apishaga alita ran, maicanga mana apishahuas mas alita ran” (1 Corintios 7:32, 33, 38ta leipai). Imahuata Bibliaga nin, cari illac o huarmi illac causashahuas “mas alita ran” nisha. Musu o solteragunaga, carita o huarmita cuirangahua mana yapacta yuyarinaunzhu. Chiraicu, lugar causanata ushanaun. Maicangunaga Jehovata masta sirvinata ushanaun. Shuc partima risha Bibliamanda predicanata ushanaun. Chasnallata, musuguna o solteraguna Jehovahuan ali amigo tucungahua mas timputa charinaun.
2. Imahuata cazarashca ana ali an
Musu o solteraguna shinallata, cazarashcagunahuas cushi causanata ushanaun. Bibliaga nin, “sapalla causana randiga ishcaipura causana mas ali an” (Eclesiastes 4:9). Caiga sirtu man. Biblia nishcata casuc cazarashcaguna mas cushi causanaun. Registro Civilbi cazaraccunaga, pariumanda llaquinacusha, respetanacusha, llaquihuan cuiranacusha causangahua, paiguna nishcata pactachinaun. Chiraicu, ali cazarashcagunaga mana dsaslla ichunacunata munanaun. Randi, llutarishalla causaccunaga ichunacunaunllami. Chasnallata, yaya mama cazarashca aillu ucuibi causac huahuagunaga, cungailla, cushilla huiñangauna.
3. Jehovaga cazaranamanda imatata yuyan
Jehovaga, Adan y Evata cazarachiushcaibi, casna nisha rimara: “Shuc runa paihua yayatas mamatas saquisha paihua huarmihuan llutaringa” (Mateo 19:5). Jehovaga munanmi, carindi huarmindi pariumanda llaquinacusha causanata. Cazarashca cari, cazarashca huarmi, shuc huarmihuan o shuc carihuan ranacushca acpi, Bibliaga ichunacunata ushanguichi nin. Diosca, mana culpayuc carita o huarmita, ichunacunata o mana ichunacunata canllata anllai nin (Mateo 19:9). a Jehovaga ishcai carita, ishcai huarmita apisha causanataga mana gustanzhu (1 Timoteo 3:2).
CAIMANDA MASTA YACHAI
Cazarashca, musu o soltera asha, ñucanchi cushi angahua, Jehovatas cushiyachingahua, imata rana ashcata ricushun.
4. Carita o huarmita mana apisha causac runagunaga alita rasha causanata ushanaun
Jesusraicu, huarmi illac cari illac causanaga Dios cumbirashca mara (Mateo 19:11, 12). Mateo 4:23ta leichi, huasha cai tapuimanda cuintanacuichi:
-
Jesusca huarmi illac ashcamanda, imashinata paiba Yayata sirvisha, shuccunata masta yanapanata ushara.
Jesus rashca shina, mana huarmiyuccuna, mana cariyuccuna, Jehovata sirvisha cushi causanaun. VIDEOTA ricuichi, huasha cai tapuimanda cuintanacuichi:
-
Musu o solteragunaga, imashinata Jehovata masta sirvinata ushanaun.
Yacharanguichu
Bibliaibiga cazarangahua masna huatata charina ashcata mana ninzhu. Randi, rucu musu, rucu soltera tucushcai cazaranata nin. Yapacta maltahuaguna, nusparisha huarmita o carita apishaga, mana alitachu rangauna (1 Corintios 7:36).
5. Ali huarmita ali carita ricusha api
Maican runahuan cazarangaraushaga alita ricusha apina angui. Mateo 19:4-6, 9ta leichi, huasha cai tapuimanda cuintanacuichi:
-
Imahuata Jehovata sirvic runaga mana cazaraushallata alita yuyarina an.
Bibliaga ali cari ali huarmi ima tunu runa ashcata yachachitucungui. Chasnallata, Jehovata sirvina munac runata mascai. b 1 Corintios 7:39 y 2 Corintios 6:14ta leichi, huasha cai tapuigunamanda cuintanacuichi:
-
Shuc Diosta sirvic runa cazaranata munashaga, imahuata pai quirishcallatata quiric runahuan cazarana an.
-
Shuc runa Jehovata mana llaquic runahuan cazaracpi, Jehovaga imasashi sintiringa.
6. Cazaranataga Jehova ricushca shina ricui
Callari timpuibi, maican israelitaguna yangamanda huarmihuan ichunacuclla anaura. Malaquias 2:13, 14, 16ta leichi, huasha cai tapuimanda cuintanacuichi:
-
Jehovaga yangamanda ichunacunata imahuata millan.
VIDEOTA ricuichi, huasha cai tapuimanda cuintanacuichi:
-
Can mana Jehovata sirvic carihuan o huarmihuan cazarashca ashaga, cushi causangahua imatata ranata ushangui.
7. Cazarashca ashaga Jehova mandashcata casui
Jehova cazarashcagunata mandashcata pactachinaga maicangunaraicu sinzhi man. c Chasna acpihuas, pai nishcata pactachiccunata Jehova bendicianmi. VIDEOTA ricuichi.
Hebreos 13:4ta leichi, huasha cai tapuimanda cuintanacuichi:
-
Jehova cazarashcagunaraicu nishcaga pactachibaglla chan. Imahuata casna yuyangui.
Jehovaga munanmi, cazarangahua o divorciaringahua papelta alichinauchun nisha. Caran llactaibi gobiernogunaga, Registro Civilbi cazarangahua o divorciaringahua papelta alichinauchun nisha rimanaun. Tito 3:1ta leichi, huasha cai tapuimanda cuintanacuichi:
-
Can cazarashca ashaga, Registro Civilbi apuguna ñaupacpi cazarashca quillcata charinguichu.
MAICANGUNAGA CASNAMI TAPUNAUN: “Imahuata Registro Civilbi cazarana an. Cazarashca papelta sirtuchu minishtinchi”.
-
Canga imatata ninguima.
IMATA YACHASHCANGUI
Musu, soltera o cazarashca anaga Jehova cumbirashca man. Cazarashcagunahuas, musu o solteragunahuas, Jehova mandashcata pactachisha cushilla causanata ushanaun.
Yachashcata cuintai
-
Jesusta caticcuna, huarmita o carita mana apishaga, imashinata Jehovata masta sirvina ushanaun.
-
Bibliaga imahuata nin, Diosta sirvic runa pai quirishcallatata quiric runahuan cazarana ashcata.
-
Biblia nishca shina, ima tucushata ichunacunata ushanaun.
CANLLATA MASTA YACHAI
Imahuata “Jesusta quiricpuralla” cazarana anchi.
Mana cazaraushallata alita rangahua shuc videota ricui.
Jehovata sirvingahua, shuc huauqui tucui pai charishcata huashama saquira. Jehova imashina paita bendiciashcata yachai.
Shuc cristianoga chara mana ichunacushallata imatata yuyarina an.
“Dios llutachishcata balichishun’” (La Atalaya, diciembre de 2018)
b Maican llactagunaibiga, yayagunami ninaun, churiguna o ushiguna pihuan cazarana ashcata. Ali yayagunaga chi cari chi huarmi Jehovata llaquishcata punda ricuna manaun. Paigunaraicuga, Jehovata llaquina, cullqui o ima charishcagunamandas mas yali balin.
c Can mana cazarasha, llutarishalla causaushaga, cazarana ashcata o ichunacuna ashcata canllata anllana angui.