LEKCIJA 42
Keren le Jehovaske radišagos – slobodna the solacharde
Varekaj paťan, hoj o manuša našťi en čačes bachtale dokana na solacharen. Aľe na savore, so hine solacharde, hine bachtale a na savore, so hine slobodna, cerpinen. E Biblija phenel, hoj hino lačho te ačhel slobodno a tiš te džal andro manželstvo.
1) So lačho oda anel oleske, so hino slobodno?
E Biblija phenel: „Oda, ko džal andro manželstvo, kerel mištes, aľe oda, ko ačhel slobodno, kerel feder.“ (Pregen 1. Korinťanom 7:32, 33, 38) Andre soste slobodno „kerel feder“? Nane les ajci pro šero, bo pes na mušinel te starinel pal oda, so kampel la romňake, le romeske. Hin les phuterdo drom. Šaj kerel buter predal o Jehovas abo šaj džal andre aver phuv te vakerel pal o lačho hiros. Šaj peske buter študinel, kaj leskero kamiben kijo Jehovas te barol.
2) So lačho oda anel oleske, so hino solachardo?
The o solacharde zadživen andro dživipen but lačho. E Biblija phenel: „Duje dženenge hin feder sar jekheske.“ (Kazateľ 4:9) Mek feder lenge ela akor, te soduj džene dživen avka sar kamel o Jehovas. Ola, so solacharen, den lav, hoj peske presikavena kamiben, paťiv a hoj pes jekh pal aver starinena. Paľis na darana, hoj jekh avres omukhena sar ola, so dživen peha ča kavka. The o čhave pes andre kajsi fameľija feder bararena avri.
3) So o Jehovas phenel olenge, so hine solacharde?
Paš oda, sar o Jehovas sphandľa perše romes la romňaha, phenďa: „O murš omukhela le dades the la da a ľikerela pes peskera romňatar.“ (1. Mojžišova 2:24) O Jehovas kamel le romestar the la romňatar, kaj pes rado te dikhen a kaj peha te ačhen dokana dživena. O Jehovas domukhel o rozvod ča akor, te jekh lendar kerďa lubipen. Te bi pes ada ačhiľahas, o Jehovas mukhel pre koda, kaske sas kerdo pre choľi, či dela rozvod abo na. a (Matúš 19:9) O Jehovas le kresťanenge na domukhel te dživel buter romňenca abo romenca. (1. Timotejovi 3:2)
DODŽAN TUT BUTER
Kana šaj en bachtale o slobodna the ola, so hine solacharde? Kana o Jehovas ela andre lende barikano?
4) Ňič oleha na našaves, te sal slobodno!
O Ježiš phenďa, hoj hino lačho te el slobodno. (Matúš 19:11, 12) Pregen Matúš 4:23 a paľis vakeren jekhetane:
-
Sar o Ježiš oleha sar služinelas sikaďa, hoj hino lačho te el slobodno?
O kresťana, so hine slobodna, šaj radisaľon la buťatar predal o Del avka sar o Ježiš. Mukh o VIDEJO a paľis vakeren jekhetane.
-
So igen šukar keren ola slobodna kresťana?
Džanehas?
E Biblija na phenel, andre save berša hin lačhes te džal romeste, romňake. Aľe phenel le ternenge, hoj hin lačhes te užarel, dokana lenge na predžana „ola terňipnaskere berša“. Oda hin berša, sar hin le ternen seksualna tužbi zoraleder sar e goďi. (1. Korinťanom 7:36)
5) Goďaverones tuke kide avri tire romes tira romňa
Maškar oda nekbareder, so andro dživipen kereha, hin, te kidel avri, ko ela tiro rom, romňi. Pregen Matúš 19:4–6, 9 a paľis vakeren jekhetane:
-
Soske bi majinelas o kresťanos mištes te rozmišľinel, kas peske lela?
E Biblija vakerel pal soste šaj sprindžares, hoj vareko ela lačho rom, lačhi romňi. Aľe nekbareder hin, či oda dženo kamel le Jehovas. b Pregen 1. Korinťanom 7:39 the 2. Korinťanom 6:14 a paľis vakeren jekhetane:
-
Soske kampel te lel ča varekas, ko hino čačikano kresťanos?
-
Pal tiro, sar ela le Jehovaske, te bi iľalas varekas, ko le Jehovas na kamel?
Te bi phandľamas jekhetane zvjerata, so hine jekh avrestar zoraleder, cerpindehas. Avka isto, te peske o kresťanos lela varekas, ko na služinel le Jehovaske, perela andro bare pharipena
6) Dikh pro manželstvo sar o Jehovas
Andre phurikaňi doba varesave židovika murša dikhenas ča pre peste a denas rozvod peskere romňenca, bo lengere romňa predal lende imar na sas lačhe. Pregen Malachiáš 2:13, 14, 16 a paľis vakeren jekhetane:
-
Soske o Jehovas našťi avri ačhel, te vareko del rozvod ča kavka?
O rozvod the o lubipen kerel bari dukh oleske, ko nane vinovato the le čhavenge
Mukh o VIDEJO a paľis vakeren jekhetane.
-
Te tiro rom, abo tiri romňi na služinel le Jehovaske, so šaj keres, kaj peske te dživen šukares?
7) Šun le Jehovaskere lava!
Varekana hin igen pharo te šunel a te kerel pal oda, so o Jehovas phenel pal o manželstvo. c Aľe o Jehovas dela baro lačhipen olen, so les šunen. Mukh o VIDEJO.
Pregen Hebrejom 13:4 a paľis vakeren jekhetane:
-
So phenes, del pes te doľikerel oda, so o Jehovas phenel pal o manželstvo? Soske?
O Jehovas užarel, hoj o kresťanos te el solachardo (veraduno), abo rozvedzimen pal o zakoni andre phuv, kaj dživel. Pregen Títovi 3:1 a paľis vakeren jekhetane:
-
Te sal solachardo (veraduno), hin tut pre oda papiris?
VAREKO ŠAJ PHUČEL: „Pre soste kampel papiris, te pes rado dikhas?“
-
So bi pre kada phenehas?
SO SIKHĽIĽAM
Hin lačho te el slobodno a tiš hin lačho te el solachardo. Soduj anena baro radišagos the smirom pro jilo, te dživeha predal o Jehovas.
So bi phenehas
-
So lačho predal o Jehovas šaj keren slobodna?
-
Soske e Biblija phenel, hoj kampel te lel ča varekas, ko hino čačikano kresťanos?
-
Ča kana e Biblija domukhel o rozvod?
DIKH TUKE BUTER
S’oda hin te lel varekas „ča andro Raj“?
Dikh duj videji pal oda, sar tuke goďaverones šaj kides avri, kaha phireha a solachareha.
Dikh tuke, soske jekh phral phenel, hoj o lačhipen le Jehovastar hino bareder sar oda, so našaďa.
Pregen tuke, pal soste kampel te rozmišľinel varekaske sigeder, sar dela rozvod abo džala het le romestar la romňatar.
„Maj v úcte to, ‚čo Boh spriahol‘“ (Strážna veža z decembra 2018)
a Dikh poznamka 4 pal oda, kana e romňi abo o rom šaj džan pestar het, the te ňiko lendar na kerďa o lubipen.
b Varekaj hin avka, hoj e daj o dad kiden avri le čhaske abo la čhake, kas peske lena. Te hin oda avka the paš tumende, lačhi e daj o dad pro peršo na dikhen či hin ole čhas abo kola čha o love, abo andal savi fajta hin, aľe či dživel avka sar kamel o Jehovas.
c Te varekaha džives a mek na san solacharde, hin pre tute, či les abo la mukheha abo či solachareha.
Dikh the pre ada
SO O MANUŠA KAMEN TE DŽANEL
So oda hin te sikhľol la Biblijatar?
Te kavka sikhľona la Biblijatar le Jehovaskere svedkenca, šaj genen andal e Biblija, savi tumen kamen. Šaj vičinen la fajta, le kamaraten abo kas kamen.
