LES 42
San Bijbel e taki fu sma di trow èn fu sma di no trow?
Na ini son kulturu sma e bribi taki soso te wan sma trow a o de koloku. Toku wi e si taki son sma di trow no de koloku. Na a tra sei yu abi sma di de koloku, aladi den no trow. Bijbel e sori taki te wan sma trow, dan dati bun. Ma efu wan sma no trow, dan dati srefi bun.
1. Sortu wini a abi te yu no trow?
Bijbel e taki: „A sma di trow, e du bun, ma a sma di no trow, o du moro bun.” (Leisi 1 Korentesma 7:32, 33, 38.) Fu san ede Bijbel e taki dati sma di no trow e „du moro bun”? Sma di no trow no abi a frantwortu fu sorgu wan trowpatna. Dati meki den abi moro ten fu du sani gi Yehovah. Fu eksempre, sonwan fu den froisi go na wan tra presi fu yepi nanga a preikiwroko. Ma san moro prenspari na taki den abi moro ten fu du sani di o yepi den fu tron bun mati fu Yehovah.
2. Sortu wini a abi te yu trow?
Te wan sma trow, dan dati srefi e tyari wini kon. Bijbel e taki dati „tu sma moro bun leki wán” (Preikiman 4:9). A sani disi de so, spesrutu te wan trowpaar e du san Bijbel e taki. Sma di trow pramisi fu lobi makandra, fu lespeki makandra èn fu sorgu makandra. A sani disi e meki taki den no e frede taki den o prati fu pikinpikin sani ede. Wan tra sani na taki a trowlibi na wan bun seti fu kweki pikin.
3. Fa Yehovah e si a trowlibi?
Di Yehovah trow a fosi man nanga uma, a taki: ’Wan man o gowe libi en papa nanga en mama èn a o tai hori na en wefi’ (Genesis 2:24). Yehovah wani taki wan man nanga wan uma di trow lobi makandra èn taki den tan nanga makandra den heri libi langa. A trow kan broko soso te wan fu den waka gi a trawan. Efu wan sma en trowpatna waka gi en, dan Yehovah e gi en a reti fu bosroiti efu a o broko a trow (Mateyus 19:9). a Yehovah no feni en bun te wan sma abi moro leki wán trowpatna.—1 Timoteyus 3:2.
SORTU TRA SANI YU KAN LERI?
Wi o si fa sma di trow èn sma di no trow kan de koloku èn fa den kan meki Yehovah prisiri.
4. Gebroiki yu ten bun te yu no trow
Yesus ben sabi taki sma di no trow kan du furu gi Yehovah (Mateyus 19:11, 12). Leisi Mateyus 4:23 èn taki fu na aksi disi:
-
Yesus no ben trow. Fa a ben gebroiki en ten?
Neleki Yesus, Kresten di no trow kan gebroiki den ten fu du moro gi Yehovah. Disi o gi den furu prisiri. Prei a FELEM èn taki fu na aksi disi:
-
Fa sma di no trow kan gebroiki den ten na wan bun fasi?
Yu ben sabi a sani disi?
Bijbel no e taki o owru wan sma musu de fosi a man trow. Ma a e sori taki wan sma di wani trow ’no musu yongu tumusi’. Te wan sma yongu, dan den seksfiri fu en tranga èn dati kan meki en muilek gi en fu teki koni bosroiti.—1 Korentesma 7:36.
5. Luku bun nanga suma yu e trow
Wan fu den moro prenspari bosroiti di yu o teki na fu luku nanga suma yu o trow. Leisi Mateyus 19:4-6, 9 èn taki fu na aksi disi:
-
Fu san ede wan Kresten musu denki bun fosi a trow?
Bijbel kan yepi yu fu sabi sortu fasi wan bun trowpatna musu abi. Ma a moro prenspari sani na taki a sma musu lobi Yehovah. b Leisi 1 Korentesma 7:39 nanga 2 Korentesma 6:14. Baka dati taki fu den aksi disi:
-
Fu san ede wi musu trow soso nanga wan sma di e dini Yehovah?
-
Fa yu denki taki Yehovah o firi efu yu trow nanga wan sma di no lobi en?
Efu den poti tu difrenti meti na ondro a srefi tyatyari, dan den o pina. Na so a de tu taki efu wan Kresten e trow nanga wan sma di no e dini Yehovah, dan a o kisi furu problema
6. Si a trowlibi leki fa Yehovah e si en
Na ini Israel fu owruten, son man ben broko trow fu pikinpikin sani ede. Leisi Maleaki 2:13, 14, 16 èn taki fu na aksi disi:
-
Fu san ede Yehovah no lobi en te sma e broko trow aladi a patna fu den no du hurudu?
Te wan sma e waka gi en trowpatna èn a e broko trow, dan a e du wan hati sani nanga en patna èn nanga den pikin fu en
Prei a FELEM èn taki fu na aksi disi:
-
Efu yu trow nanga wan sma di no e dini Yehovah, dan san kan yepi yu fu abi wan bun trowlibi?
7. Hori yusrefi na den wet di Yehovah meki gi a trowlibi
Kande wan sma o abi fu tyari kenki kon fu gi yesi na den wet di Yehovah meki gi a trowlibi. c Ma Yehovah o blesi en te a du dati. Prei a FELEM.
Leisi Hebrewsma 13:4 èn taki fu den aksi disi:
-
Yu denki taki wi man hori wisrefi na den wet di Yehovah meki gi a trowlibi? Fu san ede yu taki dati?
Yehovah wani taki Kresten musu meki lanti sabi te den trow noso te den broko trow, fu di na ini furu kondre lanti e aksi dati fu sma. Leisi Titus 3:1 èn taki fu na aksi disi:
-
Efu yu trow, a trow fu yu skrifi na lantibuku?
WAN SMA KAN AKSI YU: „Fu san ede sma musu trow? Den kan libi nanga makandra tòk?”
-
Fa yu ben o piki a sma?
SAN YU LERI?
Solanga yu e libi soleki fa Yehovah wani, yu o de koloku awinsi yu trow noso awinsi yu no trow.
Fa yu ben o piki den aksi disi?
-
Fa wan sma di no trow kan gebroiki en ten bun?
-
Fu san ede Bijbel e taki dati wi musu trow soso nanga wan sma di e dini Yehovah?
-
Te wi luku san Bijbel e taki, dan san na a wan-enkri reide fu san ede sma mag broko trow?
TRA SANI DI YU KAN LUKU
San a wani taki fu trow „soso nanga wan sma di de wan bakaman fu Masra”?
Luku tu syatu felem di o yepi yu fu teki bun bosroiti te yu wani trow.
Na ini a felem disi yu o si fu san ede wan brada feni taki den sani di Yehovah gi en warti moro den sani di a libi na baka.
San wan sma musu hori na prakseri fosi a prati noso a broko trow?
„Lespeki a trowlibi di Gado seti” (A Waktitoren, december 2018)
a Na ini „Ete wan tu sani 4” yu kan leisi fu san ede son sma e bosroiti fu prati aladi den trowpatna no waka gi den.
b Na ini son kulturu na a papa nanga a mama e suku wan trowpatna gi a pikin fu den. Te dati de so, dan a moro prenspari sani no musu de a moni noso a posisi di a sma abi. Ma den musu luku efu a sma lobi Yehovah.
c Efu yu e libi nanga wan sma, ma unu no trow, dan yusrefi musu bosroiti efu yu o trow nanga a sma noso efu yu o gowe libi en.
