CIIYO 42
Ncinzi Bbaibbele Ncolyaamba Kujatikizya Kutakwata Akutakwatwa Alimwi Acikwati?
Mumasena amwi, bantu bayeeya kuti muntu takonzyi kukkomana ccita buyo kuti wakwata naa kukwatwa. Nokuba boobo, tabali boonse bali mucikwati bakkomene alimwi tabali boonse ibatakwete naa kukwatwa ibatakkomene. Masimpe ngakuti Bbaibbele lyaamba kutakwata naa kutakwatwa alimwi acikwati kuti nzipego.
1. Mbubotu nzi bujanika akaambo kakutakwata naa kutakwatwa?
Ibbaibbele lyaamba kuti: “Kufwumbwa uukwata ucita kabotu, pele kufwumbwa uutakwati ucita kabotu kwiinda.” (Amubale 1 Bakorinto 7:32, 33, 38.) Ino muunzila nzi muntu uutakwete naa kukwatwa ‘mwacita kabotu kwiinda’? Banakristo batakwete naa kukwatwa tabayandiki kulanganya nzyayandika ngobakwetene limwi. Aboobo balaangulukide kapati. Mucikozyanyo, ibamwi balakonzya kuyungizya mulimo wabo munzila zinji zikkomanisya, mbuli kuunka kucisi cimbi naa kubusena bumbi kuyookambauka makani mabotu. Kwiinda zyoonse, balakonzya kuba aciindi cinji cakuyumya cilongwe cabo a Jehova.
2. Mbubotu nzi bujanika mukuba mucikwati camumulawo?
Cikwati, mbubonya mbuli kutakwata alimwi akutakwatwa, cileta zilongezyo zilibedelede. Bbaibbele lyaamba kuti “bobilo bali kabotu kwiinda omwe.” (Mukambausi 4:9) Makani aaya ngamasimpe ikapati ku Banakristo bakasimpe ibatobela njiisyo zyamu Bbaibbele mucikwati cabo. Bantu ibakwatana mumulawo balasyomezyanya kuti banooyandana, kulemekana alimwi akubikkilana maano. Aboobo kanji-kanji balimvwa kukwabililwa kwiinda banabukwetene ibaile kukkala buyo antoomwe. Alimwi abana babo balimvwa kukwabililwa kapati.
3. Ino Jehova ucibona buti cikwati?
Ciindi Jehova naakatalisya cikwati cakusaanguna, wakaamba kuti: “Mwaalumi uyoosiya bausyi abanyina akukakatila kumukaintu wakwe.” (Matalikilo 2:24) Jehova uyanda kuti mulumi amukaintu kabayandana alimwi akukakatila kuli umwi amweenzinyina kufwumbwa buyo kuti kabacipona. Ulazumizya kulekana lilikke buyo ikuti naa umwi wacita bumambe. Mubukkale buli boobu, Jehova ulapa coolwe kuli yooyo uusyomeka cakusala naa ulayanda kuti balekane naa pe. a (Matayo 19:9) Jehova tazumizyi maali akati ka Banakristo.—1 Timoteyo 3:2.
AMWIIYE ZINJI
Amwiiye mbomukonzya kukkomana akumukkomanisya Jehova kufwumbwa naa tamukwete naa kukwatwa alimwi naa mulikwete naa kukwatwa.
4. Amucibelesye kabotu cipego cakutakwata naa kutakwatwa
Jesu wakali kubona kutakwata naa kutakwatwa kuti ncipego. (Matayo 19:11, 12) Amubale Matayo 4:23, akubandika mubuzyo ooyu:
-
Mbuti Jesu mbwaakacibelesya cipego cakutakwata kutegwa abelekele Bausyi akugwasya bamwi?
Banakristo balakonzya kukkomana kubelesya cipego eeci mbubonya mbwaakacita Jesu. Atweebelele VIDIYO, akubandika mubuzyo uutobela.
-
Ino muunzila nzi zigwasya Banakristo mobakonzya kucibelesya cipego cabo cakutakwata naa kutakwatwa?
Sena Mulizyi?
Bbaibbele talyaambi ciimo cini muntu nayelede kukwata naa kukwatwa. Nokuba boobo, likulwaizya muntu kulindila kusikila ‘wainda aciimo cakukubuka,’ iciindi luunyaunya lwabukubusi nolukonzya kunyonganya mukubusi kusala cabusongo.—1 Bakorinto 7:36.
5. Amusale kabotu muntu wakukwatana limwi
Kusala muntu wakukwatana limwi ncimwi cazyakusala ziyandika kapati ncomweelede kucita. Amubale Matayo 19:4-6, 9, akubandika mubuzyo ooyu:
-
Nkaambo nzi Munakristo ncateelede kufwambaana kunjila mucikwati?
Bbaibbele lilakonzya kumugwasya kuzyiba nzyomweelede kulanga kumuntu ngomuyanda kukwatana limwi. Kwiinda zyoonse, amuyandaule muntu uumuyanda kapati Jehova. b Amubale 1 Bakorinto 7:39 alimwi a 2 Bakorinto 6:14. Mpoonya mubandike mibuzyo iitobela:
-
Nkaambo nzi ncotweelede kukwatana buyo a Munakristoma?
-
Ino muyeeya kuti Jehova inga walimvwa buti ikuti twasala kukwatana amuntu uutamuyandi?
Kuti naa banyama bobile baindene kapati babopwa naa kupopwa, boonse balakonzya kupenga. Mbubwenya buyo, kuti Munakristo wakwatana amuntu uutasyomi, bayooba amapenzi manji
6. Cikwati amucibone mbwacibona Jehova
Mu Israyeli yansiku, bamaalumi bamwi bakali kuleka bamakaintu babo akaambo katwaambo tutayi koomoonga. Amubale Malaki 2:13, 14, 16, akubandika mubuzyo ooyu:
-
Nkaambo nzi Jehova ncakusulide kulekana?
Bumambe akulekana zipenzya ngomukwetene limwi alimwi abana
Atweebelele Vidiyo, akubandika mubuzyo uutobela.
-
Ikuti kamukwetene amuntu uutasyomi, ncinzi ncomukonzya kucita kutegwa cikwati canu cizwidilile?
7. Amutobele zyeelelo zya Jehova kujatikizya cikwati
Muntu inga wayandika kusolekesya kapati kutobela zyeelelo zya Jehova mucikwati. c Pele Jehova ulabalongezya aabo bacita boobo. Atweebelele Vidiyo.
Amubale Bahebrayo 13:4, akubandika mibuzyo eeyi:
-
Sena muyeeya kuti zyeelelo zya Jehova kujatikizya cikwati zilaminya? Nkaambo nzi?
Jehova uyanda kuti Banakristo kabalembya zikwati zyabo alimwi akucita oobo kuti naa balekana, mbwaanga mumasi manji makani aaya ayendelezyegwa amfwulumende. Amubale Tito 3:1, akubandika mubuzyo ooyu:
-
Kuti naa mulikwete naa kukwatwa, sena muli masimpe kuti cikwati canu cakalembesyegwa mumulawo kumfwulumende?
UMWI INGA WABUZYA KUTI: “Nkaambo nzi ncokuyandika kukwatana buya mumulawo? Sena musankwa amusimbi inga kabatakkali buyo antoomwe?”
-
Ino inga mwaingula buti?
MUBUFWAAFWI
Kutakwata naa kutakwatwa alimwi acikwati nzipego kuzwa kuli Jehova. Aabo ibali mubukkale boonse bobilo oobu, balakonzya kukkomana akukkutila ikuti kabapona kweelana akuyanda kwa Jehova.
Ncinzi Ncomwaiya?
-
Mbuti muntu mbwakonzya kucibelesya kabotu cipego cakutakwata naa kutakwatwa?
-
Nkaambo nzi Bbaibbele ncolyaamba kuti tweelede kukwatana buyo a Munakristoma?
-
Nkaambo nzi kalikke kamu Magwalo ikazumizya kulekana?
AMUZYIBE ZINJI
Ino kukwata naa kukwatwa “buyo mu Mwami” caamba nzi?
Amweebelele mavidiyo obilo aakonzya kumugwasya kusala kabotu muntu wakweebana limwi alimwi akukwatana limwi.
Amubone cakapa mukwesu umwi kulimvwa kuti zintu nzyaamucitila Jehova zilainda kapati aali zyeezyo nzyaakasiya walo.
Ino nzintu nzi muntu nzyayelede kulanga-langa katanasala kuti balekane naa kwaandaana amuntu ngobakwetene limwi?
“Amubulemeke Bubambe Bwa Leza Bwalukwatano” (Ngazi Yamulindizi, December 2018)
a Amubone Bupanduluzi Buyungizyidwe 4 kujatikizya kwaandaana kuti naa kunyina bumambe ibwakacitwa.
b Mumasena amwi, bazyali mbobasalila bana babo muntu wakukwatana limwi. Kuti kacili boobo, bazyali basiluyando beelede kusaanguna kulanga-langa naa muntu ooyo ulamuyanda Jehova ikutali kubikkila maano kumali naa mpuwo njajisi.
c Kuti naa mukkala amuntu ngomutakwetene limwi, kufwumbwa naa inga mwamusiya naa kukwatana anguwe, aaya makani aakulisalila.
Andiza Inga Mwaakkomanina Ayaaya
MIBUZYO IIVWULA KUBUZYIGWA
Ino Ndwiiyo Nzi Lwamu Bbaibbele Ndobapa Bakamboni ba Jehova?
Mulakonzya kubelesya Bbaibbele lili lyoonse nomwiiya mupulogilamu iitabbadelelwi ya Bakamboni ba Jehova. Amwaanguluke kutamba bamukwasyi wanu boonse naa balongwe.
