DYONDZO 42
Bibele Yi Ri Yini Hi Ku Nga Ngheneli Vukati Ni Ku Byi Nghenela?
Eka mindhavuko yin’wana, vanhu va tshemba leswaku munhu a nge tsaki loko a nga nghenelanga vukati. Kambe, a hi vanhu hinkwavo lava ngheneleke vukati lava tsakeke naswona a hi vanhu hinkwavo lava nga nghenelangiki vukati va nga tsakangiki. Bibele yi vula leswaku ku nga ngheneli vukati ni ku byi nghenela i tinyiko.
1. Hi byihi vuyelo bya ku nga ngheneli vukati?
Bibele yi ri: “Loyi a tekaka kumbe ku tekiwa u endla kahle, kambe loyi a tshamaka a ri yexe u endla kahle ngopfu.” (Hlaya 1 Vakorinto 7:32, 33, 38.) Munhu loyi a nga nghenelangiki vukati a nga “endla kahle” hi ndlela yihi? Vakreste lava nga nghenelangiki vukati a va boheki ku khathalela nuna kumbe nsati hikuva vo va voxe. Hikwalaho ka sweswo, va ni tshunxeko wo tala. Hi xikombiso, van’wana va kota ku tirhela Yehovha hilaha ku engetelekeke, va nga ha endla swilo leswi tsakisaka swo tanihi ku ya etikweni rin’wana va ya chumayela mahungu lamanene. Xa nkoka swinene, va ni nkarhi wo tala wo tiyisa vuxaka bya vona na Yehovha.
2. Hi byihi vuyelo bya ku tekana hi nawu?
Ku nghenela vukati swa vuyerisa hi ndlela yo hlawuleka, ku fana ni ku nga byi ngheneli. Bibele yi vula leswaku “vambirhi va antswa ku tlula un’we.” (Eklesiasta 4:9) Leswi swi tano ngopfungopfu eka Vakreste lava tirhisaka misinya ya milawu ya Bibele evukatini bya vona. Vanhu lava tekanaka hi nawu va endla xitshembiso xa leswaku va ta rhandzana mikarhi hinkwayo, va xiximana ni ku hlayisana. Hikwalaho ka sweswo, mikarhi yo tala va titwa va sirhelelekile swinene ku tlula vanhu lava tshamaka swin’we va nga tekananga ximfumo. Naswona vana va vanhu lava tekaneke hi nawu va titwa va sirhelelekile swinene.
3. Yehovha u byi teka njhani vukati?
Loko Yehovha a sungula vukati byo sungula u te: “Wanuna [u] ta siya tata wakwe ni mana wakwe kutani a namarhela nsati wakwe.” (Genesa 2:24) Yehovha u lava nuna ni nsati va rhandzana naswona va tshama swin’we vutomi bya vona hinkwabyo. U pfumela leswaku va nga dlaya vukati ntsena loko un’wana eka vona a endle vuoswi. Exiyin’weni xo tano, Yehovha u pfumelela munghana wa vukati loyi a nga riki na nandzu ku tiendlela xiboho xa loko a ta dlaya vukati. a (Matewu 19:9) Yehovha a nga va pfumeleli Vakreste ku va ni munghana wa vukati wo tlula un’we.—1 Timotiya 3:2.
ANAKANYISISA
Twana ndlela leyi u nga tsakaka ha yona u tlhela u tsakisa Yehovha, hambi u nghenele vukati kumbe a wu byi nghenelanga.
4. Yi tirhise kahle nyiko ya ku nga ngheneli vukati
Yesu a a teka ku nga ngheneli vukati ku ri nyiko. (Matewu 19:11, 12) Hlaya Matewu 4:23, ivi mi bula hi xivutiso lexi:
-
Yesu u yi tirhise njhani nyiko ya ku tshama a nga tekanga leswaku a tirhela Tata wakwe ni ku pfuna van’wana?
Vakreste lava nga nghenelangiki vukati va nga swi kota ku tiphina hi vutomi ku fana na Yesu. Tlanga VHIDIYO, ivi mi bula hi xivutiso lexi landzelaka.
-
Vakreste lava nga nghenelangiki vukati va nga yi tirhisa njhani nyiko ya vona hi ndlela leyinene?
Xana a wu swi tiva?
Bibele a yi vuli leswaku vanhu va fanele va nghenela vukati loko va ri ni malembe mangani. Hambiswiritano, yi khutaza munhu leswaku a rindza kukondza a “kule ku ringana,” hikuva hi nkarhi wolowo u kota ku endla swiboho swa vutlhari a nga susumetiwi hi ku navela ka timhaka ta masangu.—1 Vakorinto 7:36.
5. N’wi hlawule hi vutlhari munhu loyi u lavaka ku tekana na yena
Ku hlawula munhu loyi u nga ta tekana na yena i xin’wana xa swiboho swa nkoka leswi u nga ta swi endla evuton’wini. Hlaya Matewu 19:4-6, 9, ivi mi bula hi xivutiso lexi:
-
Hikwalaho ka yini Mukreste a nga fanelanga a tsutsumela ku nghenela vukati?
Bibele yi nga ku pfuna ku tiva leswi u nga swi langutaka eka munhu loyi u lavaka ku tekana na yena. Xa nkoka swinene, lava munhu loyi a rhandzaka Yehovha. b Hlaya 1 Vakorinto 7:39 na 2 Vakorinto 6:14. Endzhaku mi bula hi swivutiso leswi:
-
Hikwalaho ka yini hi fanele hi tekana ni Mukrestekulorhi ntsena?
-
U ehleketa leswaku Yehovha u titwa njhani loko hi tekana ni munhu loyi a nga N’wi rhandziki?
Loko swifuwo swimbirhi leswi nga faniki swi paniwe swin’we, swi ta xaniseka. Hilaha ku fanaka, Mukreste loyi a tekanaka ni munhu loyi a nga rhandziki Yehovha u ta va ni swiphiqo swo tala
6. Vana ni langutelo ro fana ni ra Yehovha hi vukati
Le Israyele wa khale, vavanuna van’wana a va tshika vasati va vona hi swivangelo leswi nga twaliki. Hlaya Malakiya 2:13, 14, 16, ivi mi bula hi xivutiso lexi:
-
Hikwalaho ka yini Yehovha a venga ku dlaya vukati hi swivangelo leswi nga seketeliki hi Bibele?
Vuoswi ni ku dlaya vukati swi vavisa munghana wa vukati la nga riki na nandzu ku katsa ni vana
Tlanga VHIDIYO, ivi mi bula hi xivutiso lexi landzelaka.
-
Loko u tekane na munhu loyi a nga rhandziki Yehovha, u nga endla yini leswaku mi tsaka evukatini?
7. Tirhisa milawu leyi Yehovha a yi vekeleke vatekani
Swi nga ha lava leswaku munhu a endla matshalatshala lamakulu leswaku a tirhisa milawu leyi Yehovha a yi vekeleke vatekani. c Kambe Yehovha wa va katekisa lava yi tirhisaka. Tlanga VHIDIYO.
Hlaya Vaheveru 13:4, ivi mi bula hi swivutiso leswi:
-
U vona onge milawu ya Yehovha ya vukati ya tika? Hikwalaho ka yini u vula tano?
Yehovha u lava leswaku Vakreste va tsarisa vukati bya vona eka mfumo loko va byi sungula ni loko va byi dlaya, swi tano ni le matikweni yo tala, vanhu va fanele va tsarisa vukati bya vona byi va enawini loko va byi sungula ni loko va byi dlaya. Hlaya Tito 3:1, ivi mi bula hi xivutiso lexi:
-
Loko u tekile kumbe u tekiwile, xana wa tiyiseka leswaku vukati bya n’wina bya tiveka eka mfumo?
UN’WANA A NGA HA KU VUTISA A KU: “Swo boha mi tekana ximfumo ke? A swi koteki leswaku mi tshama swin’we mi nga tekananga?”
-
A wu ta n’wi hlamula njhani?
NKATSAKANYO
Ku nga ngheneli vukati ni ku byi nghenela i tinyiko leti humaka eka Yehovha. Vanhu lava nga nghenelangiki vukati ni lava byi ngheneleke va nga tsaka va tlhela va eneriseka loko va hanya hi ku pfumelelana ni ku rhandza ka Yehovha.
Mpfuxeto
-
Munhu a nga yi tirhisa njhani nyiko yakwe ya ku nga ngheneli vukati hi ndlela leyinene?
-
Hikwalaho ka yini Bibele yi vula leswaku hi fanele hi tekana ni Vakrestekulorhi ntsena?
-
Hi xihi xivangelo xin’we ntsena xa le Matsalweni xo dlaya vukati?
KUMA LESWI ENGETELEKEKE
Swi vula yini ku teka kumbe ku tekiwa “eHosini ntsena”?
Hlalela tivhidiyo timbirhi leti nga ku pfunaka ku endla swiboho leswinene mayelana ni ku rhandzana ni ku nghenela vukati.
Twana lexi endlaka makwerhu un’wana a vona leswaku leswi Yehovha a n’wi nyikeke swona i swa nkoka swinene ku tlula hinkwaswo leswi a swi tshikeke.
Hi swihi swilo swin’wana leswi munhu a faneleke a swi kambisisa loko a nga si ehleketa hi ku dlaya vukati kumbe ku hambana ni munhu loyi a tekaneke na yena?
“Xixima ‘Leswi Xikwembu Xi Swi Paneke Swin’we’” (Xihondzo xo Rindza, December 2018)
a Vona Nhlamuselo 4 leyi hlamuselaka hi swilo leswi nga endlaka vatekani va hambana ku nga ri hi xivangelo xa vuoswi.
b Eka mindhavuko yin’wana, vatswari va hlawulela n’wana wa vona wa jaha makoti kumbe wa nhwanyana mukon’wana. Exiyin’weni xo tano, vatswari lava nga ni rirhandzu va rhanga va lavisisa loko a rhandza Yehovha, hayi loko a ri ni mali kumbe a ri ni xikhundlha xo karhi.
c Loko u tshama ni munhu loyi mi nga tekanangiki ximfumo, swi le ka wena leswaku wa n’wi tshika kumbe mi tekana ximfumo.
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
