SAMBIRO 42
Kasi Baibolo Likuti Wuli pa Nkhani ya Kunjira mu Nthengwa Panji Yayi?
Mu vigaŵa vinyake, ŵanthu ŵakugomezga kuti munthu wangaŵa wakukondwa pekha para watora panji kutengwa. Unenesko ngwakuti ni mabanja ghose yayi agho ghakukondwa, kweniso ni wose yayi awo ŵandatore panji kutengwa ŵakukondwa. Baibolo likuti kunjira mu nthengwa panji kuleka, vyose ni vyawanangwa.
1. Kasi awo ŵandatore panji kutengwa ŵakusanga vitumbiko wuli?
Baibolo likuti: “Uyo wanjira mu nthengwa wachita makora, kweni uyo wandanjire mu nthengwa wachita makora chomene.” (Ŵazgani 1 Ŵakorinte 7:32, 33, 38.) Chifukwa wuli uyo wandanjire mu nthengwa “wachita makora chomene”? Awo ŵandatore panji kutengwa ŵalije nyengo yakutangwanikira kuti ŵapwelelere munyawo wa mu nthengwa. Ŵakuŵa na wanangwa unandi. Mwachiyelezgero, ŵanyake ŵakusazgirako uteŵeti wawo nga kusamukira ku malo uko kukukhumbikwa ŵapharazgi ŵanandi. Kweni chikuru chomene ntchakuti ŵakuŵa na nyengo yinandi yakukhozgera ubwezi wawo na Yehova.
2. Kasi pakuŵa uwemi wuli para munthu watora panji kutengwa mwakuyana na dango?
Awo ŵali mu nthengwa nawo, ŵakusanga vitumbiko vinandi nga umo vikuŵira na awo ŵandatore panji kutengwa. Baibolo likuti “ŵaŵiri ŵakuluska yumoza.” (Mupharazgi 4:9) Kweni ŵekha awo ŵakulondezga fundo za mu Baibolo mu nthengwa zawo ndiwo ŵakusanga vitumbiko ivi. Ŵanthu awo ŵatorana mwakuyana na dango ŵakulayizgana kuti ŵazamutemwana, kuchindikana, kweniso kuti ŵazamukondwa na munyawo wa mu nthengwa. Ŵanthu awo ŵatorana mwakuyana na dango ŵakujipulika kuti mbakuvikilirika kuluska awo ŵakukhalira waka lumoza uku ŵandatorane. Kweniso nthengwa ni malo ghakuvikilirika ghakuleleramo ŵana.
3. Kasi Yehova wakuyiwona wuli nthengwa?
Apo Yehova wakambiskanga nthengwa yakwamba wakati: “Mwanalume walekenge awiske na anyina na kubatikana na muwoli wake.” (Genizesi 2:24) Yehova wakukhumba kuti mfumu na muwoli ŵatemwanenge na kukhalira lumoza umoyo wawo wose. Iyo wakuzomerezga kuti ŵakutorana ŵangalekana pekha para munyake wachita uleŵi. Para munyake mu nthengwa wachita uleŵi, uyo wabudilika wangasankha kumazga nthengwa panji kumugowokera munyake. a (Mateyu 19:9) Yehova wakuzomerezga yayi kuti Ŵakhristu ŵatorenge mitala.—1 Timote 3:2.
MANYANI VINANDI
Wonani ivyo mungachita kuti muŵe ŵakukondwa kweniso kuti mukondweske Yehova kwali muli pa nthengwa panji yayi.
4. Gwiliskirani ntchito mwamahara chawanangwa cha kuleka kutora panji kutengwa
Yesu wakawonanga kuti kuleka kunjira mu nthengwa ntchawanangwa. (Mateyu 19:11, 12) Ŵazgani Mateyu 4:23, kufuma apo dumbiskanani fumbo ili:
-
Kasi Yesu wakagwiliskira wuli ntchito chawanangwa cha kuleka kunjira mu nthengwa kuti wateŵetere Adada ŵake kweniso kovwira ŵanthu?
Ŵakhristu ŵambura kutora panji kutengwa nawo ŵangakondwa na chawanangwa chawo nga umo wakachitira Yesu. Wonelerani VIDIYO, kufuma apo dumbiskanani fumbo ili.
-
Kasi Ŵakhristu ŵangagwiliskira wuli ntchito chawanangwa cha kuleka kutora panji kutengwa?
Kasi mukumanya?
Baibolo likuyowoyapo yayi vyaka ivyo munthu wanganjilira mu nthengwa. Kweni likuti munthu wanganjira mu nthengwa “para wajumpha pa uwukirano,” nyengo iyo makhumbiro ghakugonana ghakuŵa ghankhongono chomene ndipo ghangapangiska munthu kuti waleke kusankha vinthu mwamahara.—1 Ŵakorinte 7:36.
5. Sankhani mwamahara munthu wakutorana nayo
Kusankha munthu wakutorana nayo, ntchimoza mwa vinthu vyakuzirwa chomene pa umoyo winu. Ŵazgani Mateyu 19:4-6, 9, kufuma apo dumbiskanani fumbo ili:
-
Chifukwa wuli Mkhristu wakwenera yayi kuchimbilira kutora panji kutengwa?
Baibolo lingamovwirani kuti mumanye nkharo ya munthu uyo mukukhumba kutorana nayo. Chakuzirwa chomene ntchakuti mukwenera kusanga munthu uyo wakutemwa Yehova. b Ŵazgani 1 Ŵakorinte 7:39 na 2 Ŵakorinte 6:14. Kufuma apo dumbiskanani mafumbo agha:
-
Chifukwa wuli tikwenera kutora panji kutengwa mu Fumu pera?
-
Kasi mukuwona kuti Yehova wangajipulika wuli para tatorana na munthu uyo wakusopa iyo yayi?
Usange nyama zakupambana ŵazikakilira ku joko limoza zose zikusuzgika. Mwakuyana waka, para Mkhristu watorana na munthu uyo ni Kaboni yayi, wakusangana na masuzgo ghanandi
6. Muwonenge nthengwa nga umo Yehova wakuyiwonera
Mu nyengo ya Ŵaisrayeli, ŵanyake ŵakalekanga ŵawoli ŵawo pa vifukwa vyambura kupulikikwa. Ŵazgani Malaki 2:13, 14, 16, kufuma apo dumbiskanani fumbo ili:
-
Chifukwa wuli Yehova wakutinkha kumazga nthengwa kwambura vifukwa vya mu Baibolo?
Uleŵi kweniso kupatana kukupangiska kuti munyake wa mu nthengwa kweniso ŵana ŵasangane na masuzgo ghanandi
Wonelerani VIDIYO, kufuma apo dumbiskanani fumbo ili.
-
Usange muli kutorana na munthu uyo ni Kaboni yayi, kasi mungachita wuli kuti mukondwenge mu nthengwa yinu?
7. Londezgani fundo za Yehova mu nthengwa yinu
Munthu wakwenera kufwilirapo kuti walondezgenge fundo za Yehova zakukhwaskana na nthengwa. c Yehova wakutumbika chomene wose awo ŵakulondezga fundo zake. Wonelerani VIDIYO.
Ŵazgani Ŵahebere 13:4, kufuma apo dumbiskanani mafumbo agha:
-
Kasi mukuwona kuti fundo za Yehova pa nkhani ya nthengwa ni zakovwira? Chifukwa wuli?
Yehova wakukhumba Ŵakhristu ŵalembeskenge ku boma nthengwa zawo kweniso para ŵakumazga nthengwa ŵakwenera kuluta ku khoti. Ŵazgani Tito 3:1, kufuma apo dumbiskanani fumbo ili:
-
Para muli pa nthengwa, kasi muli kulembeska nthengwa yinu ku boma?
ŴANYAKE ŴANGAFUMBA KUTI: “Chifukwa wuli nkhwenera kutora panji kutengwa? Asi ŵanthu ŵangakhalira lumoza nangauli ŵandatorane?”
-
Kasi mungazgora wuli?
MWAKUDUMURA
Kunjira mu nthengwa panji kuleka kunjira mu nthengwa, vyose ni vyawanangwa vyakufuma kwa Yehova. Waliyose, kwali wali pa nthengwa panji yayi, wangaŵa na umoyo wakukhorweska kweniso wakukondwa, chikuru wakulondezga fundo za Yehova.
Kuweleramo
-
Kasi munthu wangagwiliskira wuli ntchito mwamahara chawanangwa cha kuleka kunjira mu nthengwa?
-
Chifukwa wuli Baibolo likuti tikwenera kutora panji kutengwa mu Fumu pera?
-
Kasi Baibolo likuti ntchivichi icho chingamazga nthengwa?
SANGANI FUNDO ZAKUSAZGIKIRA
Kasi kutora panji kutengwa “mu Fumu pera” chikung’anamurachi?
“Mafumbo Ghakufumira ku Ŵaŵazgi” (Gongwe la Mulinda, Julayi 1, 2004)
Wonelerani mavidiyo ghatatu agho ghangamovwirani kuti musankhe mwamahara munthu wakutorana nayo.
Wonani umo mubali munyake wakakondwera wati wamanya kuti ivyo Yehova wakamupa ndivyo ni vyakuzirwa chomene kuluska ivyo wakavileka.
Kasi ni vinthu wuli ivyo munthu wakwenera kughanaghanirapo pambere wandamazge nthengwa panji kupatukana?
“Chindikani ‘Icho Chiuta Wagumanya Pamoza’” (Gongwe la Mulinda, Disembala 2018)
a Wonani Mazgu Ghakuumaliro 4 kuti mumanye ivyo Baibolo likuyowoya pa nkhani ya kupatukana para munyake wandachite uleŵi.
b Mu vigaŵa vinyake, ŵapapi ndiwo ŵakusankhira ŵana ŵawo munthu wakuti ŵatorane nayo. Usange ndimo viliri ku chigaŵa chinu, ŵapapi ŵakwenera kusankhira mwana wawo munthu chifukwa cha usambazi panji vinthu ivyo wali navyo yayi, kweni ŵakwenera kusankha munthu uyo wakutemwa Yehova.
c Usange munthu wakukhalira lumoza na mwanakazi panji mwanalume uyo ŵandatorane, wangasankha yekha kumutora panji yayi.
Panji Mungatemwa Kuŵerengaso Nkhani Izi
IVYO ŴANTHU ŴAKUTEMWA KUFUMBA
Kasi Kosi ya Kusambira Baibolo ya Ŵakaboni ŵa Yehova Ni Vichi?
Apo mukusambira Baibolo munthowa yakudumbiskana na Ŵakaboni ŵa Yehova, mungagwiliskira ntchito Baibolo lililose ilo mwakhumba. Fwatukani kuchemerako banja linu panji ŵabwezi ŵinu.
