HAAPIIRAA 42
Eaha ta te Bibilia e parau ra no nia i te faaea-taa-noa-raa e te faaipoiporaa?
I te tahi mau fenua, te tiaturi ra te mau taata e oaoa te hoê taata i te taime noa oia e faaipoipo ai. E ere râ pauroa te feia faaipoipo i te mea oaoa e e ere atoa pauroa te feia taa noa aita e oaoa ra. Mea papu, te faahiti ra te Bibilia i te faaea-taa-noa-raa e te faaipoiporaa ei ô no ǒ mai ia Iehova ra.
1. Eaha te tahi mau haamaitairaa ia faaea taa noa?
Te parau ra te Bibilia: “Ia faaipoipo te hoê taata, mea maitai. Ia faaea taa noa râ, mea maitai aˈe ïa.” (A taio i te Korinetia 1, 7:32, 33, 38.) I roto i teihea tupuraa mea “maitai aˈe” te faaea taa noa? Aita te mau Kerisetiano faaea taa noa e haapeapea no te mau hinaaro o te hoê apiti, mea vata aˈe ratou. Te horoa rahi ra vetahi no Iehova, ei hiˈoraa, e rave ratou i te tahi mau mea anaanatae mau mai te revaraa i te tahi atu fenua no te poro i te parau apî oaoa. Hau atu i te reira, mea rahi to ratou taime no te faafatata ˈtu ia Iehova.
2. Eaha te tahi mau haamaitairaa ia faaipoipo i mua i te ture?
Mai te faaea-taa-noa-raa, e haamaitairaa atoa to te faaipoiporaa. Te parau ra te Bibilia “mea maitai aˈe e piti i hoê noa.” (Koheleta 4:9) Mea papu iho â te reira no te mau Kerisetiano o te faaohipa ra i te mau faaueraa tumu Bibilia i roto i to ratou faaipoiporaa. E euhe te feia faaipoipo i mua i te ture i te here, faatura e poihere te tahi i te tahi. Pinepine, e itehia te hau i rotopu i te feia faaipoipo i te tahi atu feia e faaea fare ra aita i faaipoipohia. E ite-atoa-hia te hau i rotopu i te mau tamarii.
3. Eaha to Iehova manaˈo no nia i te faaipoiporaa?
I to Iehova faatupuraa i te faaipoiporaa matamua, ua parau oia: “No reira te hoê tane e faarue ai i to ˈna metua tane e to ˈna metua vahine, a ati atu ai i ta ˈna vahine faaipoipo.” (Genese 2:24) Te hinaaro ra Iehova ia here te hoê tane i ta ˈna vahine te tahi i te tahi e ia faaea noa raua i te roaraa o to raua oraraa. E farii oia i te faataaraa i te taime noa a faaturi ai te hoê hoa faaipoipo. I roto i teie tupuraa e horoa Iehova i te hoa hapa ore te tiaraa no te faaoti e faataa a anei oia. (Mataio 19:9) Eita Iehova e farii ia faaipoipo te mau Kerisetiano i e rave rahi apiti.—Timoteo 1, 3:2.
A FAAHOHONU ATU Â
A haapii nafea oe e oaoa ˈi e e faaoaoa ˈi ia Iehova noa ˈtu te faaea taa noa ra oe aore ra ua faaipoipo oe.
4. A faaohipa maitai i te ô o te faaea-taa-noa-raa
E ô te faaea-taa-noa-raa no Iesu. (Mataio 19:11, 12) A taio i te Mataio 4:23, e a aparau i teie uiraa:
-
Nafea Iesu i te faaohiparaa i te ô o te faaea-taa-noa-raa no te tavini i to ˈna Metua e no te tauturu ia vetahi ê?
E nehenehe te mau Kerisetiano e oaoa ia faaohipa ratou i te faaea-taa-noa-raa mai ia Iesu. A pata i te VIDEO, e a aparau i te uiraa i muri nei.
-
Mea nafea te mau Kerisetiano e nehenehe ai e faaohipa maitai i to ratou faaea-taa-noa-raa?
Ua ite anei oe?
Aita te Bibilia e horoa ra i te hoê faito matahiti tano no te faaipoiporaa. Te faaitoito râ te reira i te hoê taata ia tiai ia “mairi anaˈe to ˈna taurearearaa mai te umoa tiare i uaa ra,” e taime hoi te reira e puai ai te hinaaro e taati e mea fifi no te hoê taurearea ia rave i te hoê faaotiraa paari.—Korinetia 1, 7:36.
5. A maiti i to oe apiti ma te paari
Te maitiraa i to oe apiti, hoê ïa o te mau faaotiraa faufaa roa ta oe e rave. A taio i te Mataio 19:4-6, 9, e a aparau i teie uiraa:
-
No te aha eiaha te hoê Kerisetiano ia ru no te faaipoipo?
E nehenehe te Bibilia e tauturu ia oe ia imi i te hoê hoa faaipoipo. Te mea faufaa roa, ia imi i te hoê hoa faaipoipo o te here ra ia Iehova. b A taio i te Korinetia 1, 7:39 e te Korinetia 2, 6:14. E a aparau i teie mau uiraa:
-
No te aha ia faaipoipo noa tatou i te hoê Kerisetiano?
-
No oe, eaha to Iehova huru ia faaipoipo tatou i te hoê taata aita e here ra ia ˈna?
Mai te peu e piti animara mea taa ê raua e ua tuuhia te zugo i nia i to raua afii e mauiui raua. Hoê â huru no te hoê Kerisetiano o te faaipoipo i te hoê taata aita e here ra ia Iehova e ite raua i te mau fifi e rave rahi
6. A hiˈo i te faaipoiporaa mai ia Iehova
I Iseraela i tahito ra, ua faataa vetahi mau tane i ta ratou mau vahine no te mau tumu miimii. A taio i te Malaki 2:13, 14, 16, e a aparau i teie uiraa:
-
No te aha mea hae na Iehova i te hoê faataaraa tano ore?
E haamauiui te faaturiraa e te faataaraa i te hoa hapa ore e te mau tamarii
A pata i te VIDEO, e a aparau i te uiraa i muri nei.
-
Mai te peu ua faaipoipo oe i te hoê taata aita e here ra ia Iehova, eaha ta oe e nehenehe e rave ia manuïa to oe faaipoiporaa?
7. A faaohipa i ta Iehova mau ture aveia no nia i te faaipoiporaa
E titauhia paha i te hoê taata ia rave i te mau tutavaraa rahi no te faaohipa i ta Iehova mau ture aveia no nia i te faaipoiporaa. c E haamaitai Iehova i te feia e na reira. A pata i te VIDEO.
A taio i te Hebera 13:4, e a aparau i teie mau uiraa:
-
No oe, mea tano anei ta Iehova mau ture aveia no nia i te faaipoiporaa? No te aha oia aore ra no te aha aita?
Te titau ra Iehova i te mau Kerisetiano ia tapao i to ratou faaipoiporaa e faataaraa no te mea i roto i te rahiraa o te mau fenua, na te feia mana e haapao i te reira. A taio i te Tito 3:1, e a aparau i teie uiraa:
-
Mai te peu ua faaipoipo oe, ua papu anei ia oe e ua faaipoipo oe i mua i te ture?
E ANI PAHA VETAHI: “No te aha e faaipoipo ai? Aita anei e nehenehe e faaea fare noa?”
-
Nafea oe e pahono ai?
HAAPOTORAA
E ô te faaea-taa-noa-raa e te faaipoiporaa no ǒ mai ia Iehova ra. E nehenehe na ô e piti e horoa mai i te oaoa e te mauruuru, ia tuea râ i te hinaaro o Iehova.
Haamanaˈoraa
-
E nafea te hoê taata e nehenehe ai e faaohipa i to ˈna faaea-taa-noa-raa?
-
No te aha te Bibilia e parau ai ia faaipoipo noa i te hoê Kerisetiano?
-
Eaha ta te Bibilia e parau ra no te tumu hoê roa no te faataaraa?
HIˈOPOA
Eaha te auraa ia faaipoipo ‘i roto noa i te Fatu’?
A hiˈo na video e piti o te tauturu ia oe ia rave i te hoê faaotiraa tano no nia i te haamatauraa e te faaipoiporaa.
A haapii no te aha te hoê taeae i parau ai mea rahi aˈe ta Iehova i horoa mai ia faaauhia i ta ˈu i vaiiho.
Eaha te tahi mau mea e titauhia i te hoê taata ia feruri hou oia a manaˈo ai i te faataaraa aore ra faataa-ê-raa?
“A faatura i te faaipoiporaa mai ta te Atua e ani ra” (Te Pare Tiairaa Titema 2018)
a A hiˈo i te faataaraa hau 4 no nia i te faataa-ê-raa aita anaˈe e faaturiraa.
b I te tahi mau fenua, na te mau metua e maiti i te hoê hoa faaipoipo no ta ratou mau tamaroa aore ra tamahine. Mai te peu tera iho â, e maiti na mua ratou i te hoa faaipoipo o te here ra ia Iehova eiaha râ no te moni aore ra te tiaraa.
c Mai te peu te ora ra oe e te hoê taata aita orua i faaipoipohia, te faaotiraa e faarue aore ra e faaipoipo ia ˈna, na oe iho e faaoti i te reira.
E au atoa outou . . .
UIRAA A TE TAATA
Eaha te ravehia i te hoê haapiiraa Bibilia pûpûhia na te mau Ite no Iehova?
Maoti teie aparauraa Bibilia tamoni ore pûpûhia na te mau Ite no Iehova, nehenehe outou e faaohipa i ta outou iho Bibilia. A titau atoa mai i to outou utuafare aore ra hoa.
