OCIPAMA 42
Nye Embimbiliya li Popia Catiamẽla Kuava ka va Kuelele Kuenda Kolohueli?
Ovituwa viapata amue, vi longisa omanu okuti vana ka va kuelele ka va pondola oku kuata esanju. Ocili okuti, omanu vana va kuela havosiko va kuete esanju kuenda vana ka va kuelele havosiko va sumua. Pole, Embimbiliya li tukula ekalo lia vana ka va kuelele kuenda ekalo liava va kuela ndolombanjaile.
1. Api amue pokati kasumũlũho oku kala omanu ka va kuelele?
Embimbiliya liti: “Wosi o kuela o linga ciwa, puãi, wosi ka kuela o linga eci ca velapo.” (Tanga 1 Va Korindo 7:32, 33, 38.) Omunu ka kuelele o “velapo” ndati? Akristão vana ka va kuelele, ka va kuete ocikele coku tata asukila ohueli yimue. Olonjanja vialua, ovo va kuete elianjo lialua. Ndeci, vamue va vokiya upange va lingila Yehova lonjila yi vetiya, poku linga ovongende oku ka kundila olondaka viwa kolonepa vikuavo. Handi vali, ovo va pesela otembo yalua koku pamisa ukamba wavo la Yehova.
2. Api amue pokati kasumũlũho oku tokekisa olohuela?
Ekalo liava va kuela kuenda ekalo liava ka va kuelele, li nena asumũlũho alikasi. Embimbiliya li popia hati: “Vavali va velapo okuti umosi o sule.” (Ukundi 4:9) Eci ci tiamisiwila vali calua Kakristão vana va kapako olonumbi Viembimbiliya volohuela. Vana va tokekisa olohuela, va linga ohuminyo yoku lisola, oku li sumbila kuenda oku li tata ciwa pokati. Kuenje otembo yosi va liyeva okuti, va kolapo osimbu okuti, vana va kasi ño kumosi pole, ka va tokekisile olohuela, ka va kolelepo. Oku tokekisa olohuela, ociseveto cimue ca pama cecelela oku tekula epata.
3. Yehova o tenda ndati olohuela?
Eci Yehova a sokiya olohuela viatete, wa popia hati: ‘Ulume o ka siapo isiaye la inaye kuenda o ka likakatela kukãi waye.’ (Efetikilo 2:24) Yehova o yongola okuti, ulume lukãi va lisola loku likuata omunga osimbu va kasi lomuenyo. Yehova ecelela lika oku linyãla nda umue pokati kolohueli wa linga ukahokolo. Kocitangi eci, Yehova eca omoko yoku nõla kohueli yina va lueyela nda yi linyãla, ale sio. a (Mateo 19:9) Yehova ka ecelela okuti, Akristão va kuela oluvale.—1 Timoteo 3:2.
LILONGISA ONDONGOSI
Lilongisa ndomo o kuata esanju —ndomo o sanjuisa Yehova— ci kaile okuti kua kuelele ale wa kuela.
4. Talavaya ciwa lombanjaile yoku kala omunu ka kuelele
Yesu wa tendele oku kala omunu ka kuelele ndombanjaile yimue. (Mateo 19:11, 12) Tanga Mateo 4:23, noke konomuisa epulilo li kuãimo:
-
Yesu wa talavaya ndati lombanjaile yoku kala omunu ka kuelele oco a vumbe Isiaye loku kuatisa omanu vakuavo?
Akristão va pondola oku sanjukila ekalo liavo lioku kala omanu ka va kuelele ndeci Yesu a linga. Tala OVIDEO, noke konomuisa epulilo li kuãimo.
-
Akristão ka va kuelele, va pondola oku talavaya ndati lekalo liavo lioku kala omanu ka va kuelele?
Wa ci kũlĩha?
Embimbiliya ka li tukula anyamo a sokamo a ecelela omunu oku kuela. Pole, li vetiya oku kevelela toke eci a “pitahãla vumalẽhe” okuti, otembo yina oloñeyi vialua vioku lipekela vi kokela umalẽhe oku nõla onjila ka ya sungulukile.—1 Va Korindo 7:36.
5. Nõla lolondunge omunu o kuela laye
Oku nõla omunu o kuela laye, onjila yimue yi kuete esilivilo lialua komuenyo. Tanga Mateo 19:4-6, 9, noke konomuisa epulilo li kuãimo:
-
Momo lie Ukristão ka sukilila oku nõla lonjanga omunu a kuela laye?
Embimbiliya li pondola oku ku kuatisa oku kũlĩha ovituwa viomunu uwa o yongola oku kuela laye. Ocina ca velapo, oku nõla omunu una o sole Yehova. b Tanga 1 Va Korindo 7:39 kuenda 2 Va Korindo 6:14. Noke konomuisa apulilo a kuãimo:
-
Momo lie tu sukilila oku kuela lika lomunu umue okuti Ukristão?
-
Kocisimĩlo cove, Yehova o liyeva ndati nda tu nõla omunu umue ka sole Yehova?
Ovinyama vivali via litepa calua nda vi kapiwa kokanga yimuamue, vi tala ohali. Cimuamue haico, nda Ukristão umue o kuela lomunu ka sole Yehova, va ka kuata ovitangi vialua
6. Tenda olohuela ndeci Yehova a vi tenda
Ko Isareli yosimbu, alume vamue va enda oku linyãla lakãi vavo omo liasunga ka a silivila. Tanga Malakiya 2:13, 14, 16, noke konomuisa epulilo li kuãimo:
-
Momo lie Yehova a suvukila oku linyãla lonjila ka yi taviwa Lembimbiliya?
Ukahokolo kuenda oku linyãla, vi kokela ohali yalua ohueli ka yi kuete eko kuenda omãla
Tala OVIDEO, noke konomuisa epulilo li kuãimo.
-
Nda wa kuela lomunu umue ka sole Yehova, nye o sukila oku linga oco o kuate esanju volohuela?
7. Kapako olonumbi via Yehova viatiamẽla kolohuela
Omunu umue o sukila oku likolisilako calua, oco a kapeko olonumbi via Yehova viatiamẽla kolohuela. c Kuenje Yehova o sumũlũisa vana va ci linga. Tala OVIDEO..
Tanga Va Heveru 13:4, noke konomuisa apulilo a kuãimo:
-
O sima okuti olonumbi via Yehova viatiamẽla kolohuela, via sunguluka? Momo lie?
Yehova o lavoka okuti, Akristão va lisonehisa kolombiali poku kuela kuenda poku linyãla. Momo kolofeka vialua olombiali vi kisika okuti, omanu va ci linga. Tanga Tito 3:1, noke konomuisa epulilo li kuãimo:
-
Nda wuhueli, wa kolela okuti olohuela viove via tokekisiwa loku taviwa lombiali?
UMUE PAMUE O PULA: “Momo lie oku tokekisa olohuela ku sukiliwila? Ulume lukãi ka va tokekisile olohuela ka citava hẽ okuti va kala kumosi?”
-
Nda wa tambulula ndati?
NYE WA LILONGISA?
Ekalo liava ka va kuelele lava va kuela, olombanjaile via tunda ku Yehova. Ci kaile vana va kuela, ale vana ka va kuelele, va pondola oku kuata esanju nda va linga ovina vi likuata locipango ca Yehova.
Oku Pitulula
-
Omunu ka kuelele o pondola oku talavaya ndati ciwa lekalo liaye?
-
Momo lie Embimbiliya li popela okuti tu sukila oku kuela lika lomunu una okuti Ukristão?
-
Esunga lipi Embimbiliya li lekisa okuti, olio lika li ecelela oku linyãla?
OCO O KŨLĨHE OVINA VIKUAVO
Oku kuela “lika vu Ñala” ci lomboloka nye?
“Apulilo a Lingiwa la Vakuakutanga” (Utala Wondavululi 1 Wevambi Linene 2004)
Tala olovideo vivali vitito viovindekaise vi ku kuatisa oku nõla onjila yiwa yatiamẽla koku namũlala kuenda kolohuela.
Lilongisa esunga lieci manji umue a li yevela okuti, ovina Yehova o wĩha via velapo calua, vina eye a siapo vi sule.
Vipi ovina vimue omunu a sukila oku kũlĩhĩsa osimbu ka linyãlele, ale oku litepa?
“Sumbila Eci ‘ca Tokekisa Suku’” (Utala Wondavululi wa Cembanima 2018)
a Tala Etosi 4 kesulilo catiamẽla koku litepa nda ka mua kongelele ukahokolo.
b Ovituwa viapata amue vi lekisa okuti, olonjali ovio vi nõla omunu o kuela lomõlavo ulume, ale ukãi. Konepa eyi, olonjali vakuacisola, ka vi tiamisila lika utima koku konomuisa nda omunu va yongola o kuete olombongo vialua, ale wa tanga calua. Pole, vi kũlĩhĩsa nda omunu waco o sole Yehova.
c Nda o kasi lomunu umue okuti ka wa tokekisili olohuela, ove o kuete omoko yoku nõla nda o siapo omunu waco, ale vu tokekisa olohuela.
Ove o ka ci Sola
APULILO A SIATA
Elilongiso Liembimbiliya li Lingiwa Lolombangi Via Yehova li Lomboloka Nye?
Lekuatiso lielilongiso li lingiwa ocali Lolombangi Via Yehova, o pondola oku kuama Lembimbiliya liosi o yongola. Lianja poku laleka epata liove liosi ale akamba vove, oco vu lilongisili kumosi.
