NGUDO 42
Bivhili I Ri Mini Nga Ha U Vha Mbinganoni Na U Sa Vha Mbinganoni?
Kha dziṅwe mvelele, vhathu vha humbula uri muthu a nga si takale arali a siho mbinganoni. Fhedzi a si uri vhathu vhoṱhe vha re mbinganoni vho takala nahone a si uri vhoṱhe vha siho mbinganoni a vho ngo takala. Zwi re zwone ndi uri u vha mbinganoni na u sa vha mbinganoni ndi zwifhiwa zwine zwa vhuyedza zwi bvaho kha Yehova.
1. Ndi dzifhio mbuyelo dza u sa vha mbinganoni?
Bivhili i ri: “Ane a vhinga u a vhuyelwa, fhedzi ane a si vhinge u vhuyelwa zwihulu.” (Vhalani 1 Vhakorinta 7:32, 33, 38.) Muthu a siho mbinganoni u “vhuyelwa” hani “zwihulu”? Vhakriste vha siho mbinganoni a vha na vhuḓifhinduleli ha u ṱhogomela mufarisi wa mbingano. Nga zwenezwo, vha na mbofholowo yo engedzeaho. Sa tsumbo, vhaṅwe vha a kona u ita zwo engedzeaho mushumoni wa Yehova, u fana na u dalela maṅwe mashango u itela u ḓivhadza mafhungo maḓifha. Tsha ndeme vhukuma ndi uri vha a kona u fhedza tshifhinga tsho engedzeaho vha tshi khou khwaṱhisa vhushaka havho na Yehova.
2. Ndi dzifhio mbuyelo dza u vhingana nga lwa mulayo?
Samusi u sa vha mbinganoni zwi tshi vhuyedza, na u vha mbinganoni zwi a vhuyedza. Bivhili i ri: “Vhathu vhavhili vha khwine u fhira muthihi.” (Muhuweleli 4:9) Zwenezwi ndi ngoho, zwihuluhulu kha Vhakriste vhane vha shumisa vhulivhisi vhu re Bivhilini mbinganoni dzavho. Vhathu vho vhinganaho nga lwa mulayo, vha vha vho fhulufhedzisana uri vha ḓo dzula vha tshi funana, u ṱhonifhana na u dzhielana nṱha. Nga zwenezwo, vha pfa vho tsireledzea u fhira vhathu vhane vha dzula vhoṱhe vha songo vhingana. U vhingana zwi dovha zwa ita uri na vhana vha ḓipfe vho tsireledzea.
3. Yehova u dzhia hani mbingano?
Musi Yehova a tshi ita mbingano ya u thoma, o ri: “Munna [u] ḓo sia khotsi awe na mme awe a nambatela mufumakadzi wawe, vha vha ṋama nthihi.” (Genesi 2:24) Yehova u ṱoḓa uri munna na mufumakadzi vha funane, vha dzule vhoṱhe u vhuya u swika muthihi wavho a tshi lovha. U tendela vhavhingani vha tshi ṱalana arali muṅwe wavho o ḓifara luvhi nga zwa vhudzekani. Kha honoho vhuimo, Yehova u tendela mufarisi a si na mulandu a tshi ita phetho ya uri u ṱoḓa u ṱala kana hai. a (Mateo 19:9) Yehova u ṱoḓa Vhakriste vha tshi vha na mufarisi muthihi wa mbingano.—1 Timotheo 3:2.
GUDANI ZWO ENGEDZEAHO
Gudani uri ni nga takala hani na u takadza Yehova, hu sa londwi uri ni mbinganoni kana a ni ho mbinganoni.
4. Shumisani zwavhuḓi tshifhiwa tsha u sa vha mbinganoni
Yesu o vha a tshi dzhia u sa vha mbinganoni hu tshifhiwa. (Mateo 19:11, 12) Vhalani Mateo 4:23, ni kone u fhindula mbudziso i tevhelaho:
-
Yesu o shumisa hani tshifhiwa tsha u sa vha mbinganoni u itela u shumela Khotsi awe na u thusa vhaṅwe?
Vhakriste vha siho mbinganoni vha a takala musi vha tshi shumisa tshifhiwa tshavho u fana na Yesu. Ṱalelani VIDIO, ni kone u fhindula mbudziso i tevhelaho.
-
Vhakriste vha siho mbinganoni vha nga shumisa hani u sa vha havho mbinganoni nga nḓila i vhuyedzaho?
Naa no vha ni tshi zwi ḓivha?
Bivhili a i ambi uri muthu u fanela u vhinga kana u vhingwa e na miṅwaha mingana. Fhedzi i ṱuṱuwedza uri muthu a thome a fhire “miṅwaha ya vhuswa.” Musi muthu a sa athu fhira miṅwaha ya vhuswa, zwi nga konḓa uri a ite phetho ya vhuṱali.—1 Vhakorinta 7:36.
5. Khethani mufarisi wa mbingano nga vhuṱali
U khetha mufarisi wa mbingano ndi iṅwe ya phetho dza ndeme dzine na ḓo dzi ita vhutshiloni. Vhalani Mateo 19:4-6, 9, ni kone u fhindula mbudziso i tevhelaho:
-
Ndi ngani Mukriste a tshi tea u thoma a humbulisisa zwavhuḓi a sa athu khetha mufarisi wa mbingano?
Bivhili i nga ni thusa uri ni ḓivhe uri ndi zwithu zwifhio zwine zwa ita uri muthu a vhe mufarisi wavhuḓi wa mbingano. Tsha ndeme vhukuma ndi u ṱoḓa mufarisi ane a funa Yehova. b Vhalani 1 Vhakorinta 7:39 na 2 Vhakorinta 6:14. Ni kone u fhindula mbudziso dzi tevhelaho:
-
Ndi ngani ri songo tea u vhingana na muthu ane a si vhe Mukriste nga riṋe?
-
Ni vhona u nga Yehova a nga ḓipfa hani arali ra vhingana na muthu a sa funi Yehova?
Arali zwipuka zwo fhambanaho nga maanḓa zwi tshi khou kokodza dzhogo nthihi, zwi ḓo vhaisala. Zwi ḓo tou ralo arali Mukriste a vhingana na muthu ane a si vhe mutendi ngae. Vha ḓo vha na thaidzo nnzhi.
6. Dzhiani mbingano nga nḓila ine Yehova a i dzhia ngayo
Tshifhingani tsha kale Isiraele, vhaṅwe vhanna vho vha vha tshi ṱala vhafumakadzi vhavho nga zwiitisi zwi sa pfali. Vhalani Maḽeaxi 2:13, 14, 16, ni kone u fhindula mbudziso i tevhelaho:
-
Ndi ngani Yehova a tshi zwi vhenga musi vhathu vha tshi ṱalana nga nṱhani ha zwiitisi zwi siho Bivhilini?
U ḓifara luvhi nga zwa vhudzekani na ṱhalano zwi vhaisa mufarisi a si na mulandu na vhana
Ṱalelani VIDIO, ni kone u fhindula mbudziso i tevhelaho.
-
Arali no vhingana na muthu a sa funi Yehova, ni nga ita mini uri mbingano ya vhoiwe i takadze?
7. Tevhedzani milayo ya Yehova ya mbingano
Muthu a nga tea u shuma nga maanḓa uri a tevhedze milayo ya Yehova ya mbingano. c Fhedzi Yehova u fhaṱutshedza vhane vha ita nga u ralo. Ṱalelani VIDIO.
Vhalani Vhahevheru 13:4, ni kone u fhindula mbudziso dzi tevhelaho:
-
Naa ni vhona u nga milayo ya Yehova ya mbingano i a pfala? Ndi ngani ni tshi ralo?
Yehova u ṱoḓa Vhakriste vha tshi ṅwalisa mbingano dzavho nga lwa mulayo na u ṅwalisa musi vha tshi ṱalana. Kha mashango manzhi, mivhuso i ṱoḓa vhathu vha tshi ṅwalisa mbingano dzavho nga lwa mulayo na uri vha mulayo vha zwi ḓivhe musi vha tshi ṱalana. Vhalani Tito 3:1, ni kone u fhindula mbudziso i tevhelaho:
-
Arali ni mbinganoni, naa ni na vhuṱanzi ha uri mbingano yaṋu i a ḓivhiwa mulayoni?
MUṄWE MUTHU A NGA VHUDZISA URI: “Ndi ngani vhathu vha tshi tea u vhingana nga lwa mulayo? A si khwiṋe vha sokou dzula vhoṱhe?”
-
Inwi ni nga ri mini?
NO GUDA MINI?
U vha mbinganoni na u sa vha mbinganoni ndi zwifhiwa zwi bvaho kha Yehova. Vhathu vha re mbinganoni na vha siho mbinganoni vha nga takala na u fushea arali vha tshi tshila u tendelana na zwine Yehova a zwi ṱoḓa.
Ni Kha Ḓi Zwi Humbula?
-
Muthu a siho mbinganoni a nga shumisa hani zwavhuḓi u sa vha hawe mbinganoni?
-
Ndi ngani Bivhili i tshi amba uri Mukriste ho ngo tea u vhingana na muthu ane a si vhe Mukriste ngae?
-
Bivhili i amba uri ndi tshifhio tshiitisi tshithihi fhedzi tsha u ṱalana?
WANANI ZWO ENGEDZEAHO
Zwi amba mini u vhinga kana u vhingwa “fhedzi Murenani”?
Ṱalelani vidio mbili dzine dza ḓo ni thusa u ita phetho dza vhuṱali nga ha mafhungo a u pfana (u funana) na muṅwe muthu na nga ha mbingano.
Gudani uri ndi ngani muṅwe munna a tshi vhona uri zwe Yehova a mu ṋea zwone zwi fhira kule zwe a xelelwa ngazwo.
Ndi zwifhio zwine muthu a tea u thoma a humbulisisa nga hazwo musi a sa athu ṱalana kana u fhandekana na mufarisi wawe?
“Dzhielani Nṱha ‘Zwo Vhofhekanywaho Nga Mudzimu’” (Tshiingamo, December 2018)
a Vhalani Mafhungo O Engedzeaho 4 ane a amba nga ha u fhandekana musi hu si na o ḓifaraho luvhi nga zwa vhudzekani.
b Kha dziṅwe mvelele, vhabebi ndi vhone vhane vha khethela ṅwana wavho mufarisi wa mbingano. Kha honoho vhuimo, vhabebi vha re na lufuno a vha sedzi tshelede kana vhuimo ha onoyo muthu musi vha tshi khethela ṅwana wavho mufarisi wa mbingano, fhedzi vha sedza arali onoyo muthu a tshi funa Yehova.
c Arali ni tshi khou dzula na muthu we na si vhingane nae, ni fanela u ita phetho ya u vhingana nae kana u mu ṱutshela.
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
