YOOSOMA 42
Eheeni Biblya onhimaawe voohima sa othela naari ohithela?
Mapuro makina, atthu anuupuwela weera mutthu onhakalala athelavale. Mene khaiyono weera atthu ootheene athenle anoohakalala ni tho khaiyono ootheene yaale ahithenle toohihakalala. Mweekhaikhai, Biblya onnuuluma sa makhalelo a ekumi ya atthu oothela ni ale oohithela, onhima weera yoovaha ya Yehova.
1. Mutthu oohithela onkhalano mireerelo heeni?
Biblya oneera: “Yole onamuthela virgo [mwali] awe siso tho onnèra phama opwaha ole ohinamuthela.” (Mmusome 1 Akorinto 7:32, 33, 38.) Moota heeni mutthu oohithela ‘onimpwahaawe mutthu oothela’? Akristu oohithela khanxupeya ni makhalelo aiyaya naari amwaaraya. Mwa yeeyo, awo aakhalano otaphuwa otokotoko. Awo pooti ovarihela muteko ehuhu aya weera elaleere vantxipale naari weetta ekwaha erowaka elapo ekina weera yalaleere mitthenka sooreera. Opwaha mwa sootheene awo aakhalano ehuhu yintxipale weera emwaattamele Yehova.
2. Moone itthu sinkhumelela vaavo mutthu onlepihaawe ntheli?
Ekumi yaanamathelana ni ale ahithenle yookhalano mireerelo saya. Biblya oneera “okhala atthu eli ti worera opwaha okhala mutthu mekhaiye.” (Koheleti 4:9) Eyo ekhaikhai otepaxa wene, makristu ale anvarela muteko miruku sa mBiblyani woohima sa ntheli. Vaavo mulopwana ni muthiyana onlepihaawe ntheli vapapheloni, awo annaakhulela nivarihano ni annalaiherana osivelana mukina ni mukhwaawe. Mene ennalaiherana tho ottittimihana ni okosoopana mukina ni mukhwaawe. Mweekhaikhai etthu eyo ennavaha oovareleleya waapwaha atthu ale ankhala vamoha ehithelanne. Ni ntheli ninnakhala noovareleleya weera naahuwe anamwane.
3. Yehova okhalanne moonelo heeni woohima sa ntheli?
Vaavo Yehova aapankaawe ntheli noopatxera owo aahaaleela weera: “Timwemmo mulopwana onkelawe waahiya aTith’awe ni amay’awe wera aphitane ni mwariye ni oweli aya eni ekhale erutthu emosaru.” (Ephattuwelo 2:24) Yehova ontthuna weera mulopwana ni muthiyana esivelaneke ehuhu yootheene vaavo ankaphilaaya. Owo onaakhulela omwalana paahi wakhala weera mulopwana naari muthiyana ooraruwa. a (Matheyo 19:9) Mwa yeeyo, Yehova onnanvaha eparakha yoothanla yoole oraruweliwe othanla waari weera anoomwalana kapena hooye. Yehova khanaakhulela waatteya, naari neere, khammwaakhulela mulopwana ookhalano athiyana eeli, naari muthiyana ookhalano alopwana eeli.—1 Timotheyo 3:2.
WEERA MUXUTTERE SINTXIPALE
Muxuttere moota wookhalano ohakalala—ni moota woomuhakalaliha Yehova—mureene muttiye naari oothela.
4. Moota heeni attiye eneeraaya evarele muteko ekumi aya?
Vamaithoni va Yesu okhala muttiye yaari etthu yooreera. (Matheyo 19:11, 12) Mmusome Matheyo 4:23. Avinyaka mutthekule ni ipontu sinttharelana:
-
Moota heeni Yesu aavarenlaawe muteko ehuhu awe mwaha woohithela weera anvarele muteko Tiithi awe ni waakhavihera atthu akina?
Akristu attiye pooti opaka etthu emoharu apankaawe Yesu. Moone EVIIDIYU. Avinyaka mutthekule ni ipontu sinttharelana..
-
Moota heeni mukristu onrowaawe ovarela muteko ehuhu awe mwaha wookhala muttiye weera akhaleno ekumi yoohakalaliha mmutekoni mwa Yehova?
Nyuwo mwaasuwela?
Biblya khanhima iyaakha soophwanelela weera mutthu athele naari atheliwe. Mene owo onnooperera weera mutthu aweherereke “ovira iyaakha sa omiravo, mwaha weera” ti ehuhu eene yeeyo, nyuupuwelo voohima sa okonihana sinkhalaaya sootepa wunnuwa. Etthu eyo, pooti omweeriha mutthu opaka yoothanla moowaakuveya, mwaha wa nyuupuwelo iyo.—1 Akorinto 7:36.
5. Mwaatthunaka othela naari otheliwa mmuthanle nnene yoole muntthunaanyu othelanano
Omuthanla mutthu muneeraanyu muthelane yoothanla yootepa otthuneya mweekumini. Mmusome Matheyo 19:4-6, 9. Avinyaka mutthekule ni epontu enttharelana:
-
Mwaha wa heeni makristu ahintthuneyaaya waakuvela othela naari otheliwa?
Biblya onimookhaviherani osuwela mikhalelo muneeraanyu mwaaseke wa mulopwana naari wa muthiyana. Mene etthu yootepa otthuneya eri yooweera mutthu owo amusiveleke Yehova. b Mmusome 1 Akorinto 7:39 ni 2 Akorinto 6:14. Avinyaka mutthekule ni ipontu sinttharelana:
-
Mwaha wa heeni oraaya wootthuneya othelana ni mutthu ommusivela naari oninvarela muteko Yehova?
-
Yehova onkela woonela hayi wakhala weera nnoothelana ni mutthu ohinanvarela muteko naari ohimmussivela Yehova?
Wakhala weera axinama eeli oovirikana aateexihiwa muritti vamoha, ooweliaya anoohaawa. Emoha-moharu wakhala weera mukristu onthelana ni mutthu ohimmusivela Yehova onookhalano-tho maxupo
6. Mukhaleno moonelo mmoha wa Yehova voohima sa ntheli
Khalayi, alopwana akina a nloko na ana a Israeli yannamwalana ni asaaraya mwaha wa mathowa oonanara. Mmusome Malakhiya 2:13, 14, 16. Avinyaka mutthekule ni epontu enttharelana.
-
Mwaha wa heeni Yehova omunanaraaya omwalana ohinvarihana ni Biblya?
Oraruwa ni omwalana onnakumihera masooso wa mutthu oraruweliwe ni anamwane awe
Moone EVIIDIYU. Avinyaka mutthekule ni epontu enttharelana.
-
Wakhala weera nyuwo muthelanne ni mutthu ohimmusivela naari ohininvarela Yehova, eheeni muneeraanyu mpake weera ntheli nanyu nikhale noohakalala?
7. Nvariheleke muteko ele Yehova onhimaawe woohima sa ntheli
Pooti weera mutthu onnatthuneya wiilipihera weera avarele miruku sa Yehova woohima sa ntheli. c Mene Yehova onnaareeliha ale anipaka eyo. Moone EVIIDIYU.
Mmusome Aheberi 13:4. Avinyaka mutthekule ni ipontu sinttharelana:
-
Wa moonelo anyu, vannareerela ovarela muteko ele Yehova onhimaawe woohima sa ntheli? Mwaha wa heeni?
Ilapo sintxipale, anamalamulela annawooperera atthu aya weera elepiheke ntheli naya, ni-tho yaamwalanaka etxipiheke ntheli nno. Yehova onweherera weera makristu yiiweleleke malamulo awo. Mmusome Tito 3:1. Avinyaka mutthekule ni epontu enttharelana:
-
Wakhala weera moothela, neereke munnaroromela weera ntheli nanyu noolepihiwa moovarihana ni nlamulo?
WAKHALA WEERA MUTTHU OHOOKOHANI: “Etthu heeni enweerihani olepiha ntheli nanyu? Neereke khonkwana okhala vamoha woohilepiha ntheli?”
-
Mwaarowa omwaakhula hayi?
NYAHA SOOTTHUNEYA
Ekumi yaale athelanne ni ale ari attiye yoovaha ya Muluku. Attiye ni ale athelanne, pooti ophwanya oohakalala yakhalakaru moovarihana ni yootthuna ya Yehova.
Wuuluula
-
Moota heeni muttiye onkelaawe ovarela muteko nnene okumi awe?
-
Mwaha wa heeni Biblya onhimaawe weera nthelaneke ni mutthu paahi ommusivela Yehova?
-
Mukhalelo moota heeni Biblya onnaakhulelaawe omwalana?
WEERA MUSUWELE ITTHU SINTXIPALE
Entaphulela heeni “othela mwa Apwiya”?
“Makoho empakiwa ni ale ansoma irevista sahu” (A Sentinela, a 1.º a Julho a 2004)
Moone iviidiyu piili ikhaanini seiyo sinkela wookhaviherani opaka soothanla sooreera woohima sa otthomerana ni othelana.
Moone mwaha wa heeni munna onnaawe weera Yehova onvaha itthu sootthuneya opwaha iye ohiñyaawe muttuli.
Wakhala weera mutthu onuupuwela omwalana naari wiitthuuwelana, itthu heeni aneeraawe uupuwelekek?
“Muttittimiheke, ele ‘Muluku otthunkaawe vamoha’” (A Sentinela, a Dezembro a 2018)
a Moone Mwiiwexexe nnene 4 weera musuwele woohima sa omwalana vaavo mutthu onraruwaawe.
b Mapuro makina asitiithi tanaathanla ale eneera ethelane ni anamwanaaya. Yootthuna ya asitiithi a nsivelo eri yooweera anamwanaaya ethelane ni mutthu ommusivela Yehova, ohiya musurukhu, naari oreera wa mutthu.
c Wakhala weera nyuwo munkhala vamoha ni mulopwana naari muthiyana muhilepinhene ntheli nanyu, onnitthuneya weera mulipihe ntheli nanyu. Mene olepiha ntheli etthu munreerelaanyu opaka.
