YOOSOMA 42
Biibiliya Onihimya Exeeni sa Ohithela ni Othela?
Ilapo sikina, atthu anuupuwela wira mutthu onihakalala paahi akhala wira oothela wala ootheliwa. Masi eyo khahiyo ekeekhai. Maana khahiyo wira atthu otheene athenle anoohakalala, nave khahiyo wira atthu otheene oohithela aahiiso oohitheliwa khanihakalala. Biibiliya onihimya wira othela aahiiso ohithela soovaha sa Yehova.
1. Mireerelo xeeni aniphwanya aya atthu oohithela?
Biibiliya onihimya wira: “Ole onithela onniira etthu yooreera, masi ole ohinithela, onniira etthu yootepa oreera”. (Mmusome 1 aKorinto 7:32, 33, 38.) Mwa inamuna xeeni mutthu oohithela aahiiso oohitheliwa “oniira awe etthu yootepa oreera?” Makristau oohithela aahiiso oohitheliwa, khanixanka mwaha wa itthu sa ole athelanne aya. Nto awo anikhala ootaphuwa. Nave awo pooti ottottela mureerelo okathi owo yincereryaka muteko aya woolaleerya, woonasa wene athaamelaka mapuro oothowa anamalaleerya wira yalaleyeke ihapari sooreera sa Omwene. Ohiya-vo, awo annikhalana okathi munceene wira alipihe waataana waya ni Yehova.
2. Mireerelo xeeni aniphwanya aya ale anlepiha ekasamento aya?
Othela aahiiso ohitheliwa wookhalana mireerelo saya. Masi Biibiliya onihimya wira “halali okhala atthu anli ovikana okhala mmosa pahi”. (Musuweli 4:9) Eyo ekeekhai, maana makristau oothela aneettela miruku sa mBiibiliyani, anniphwanya mireerelo sinceene. Okathi mulopwana ni muthiyana anlepiha aya ekasamento aya, awo annileiheryana ophentana, ottittimihana ni okhapelelana mukina ni mukhwaawe. Nave eyo ennaakupaliha wira anookhalaka mahiku otheene hoothe waavikana ale ahilepinhe ekasamento aya. Nave-tho, eyo ennaakhaliherya waahuwa saana anaaya.
3. Yehova onoonela sai ekasamento?
Yehova tokumihenrye ekasamento. Okathi wa ekasamento yoopacerya, owo aahimmye so: “Tivó mulopwana onahiyawe atithi awe n’ame awe, anakhala vamosá ni mwar’awe”. (Maphattuwelo 2:24) Yehova oniphavela wira mulopwana oothela ni muthiyana ootheliwa, aphentaneke ni akhaleke hoothe okumi aya wootheene. Owo onnimweemererya mulopwana oothela aahiiso muthiyana ootheliwa omwalana akhala wira ooraruweliwa. Okathi owo, Yehova onnimweemererya ole oraruweliwe othanla omwalana aahiiso omulevelela. a (Nwehe enoota) (Matheyo 19:9) Yehova khoneemererya waatteya, eyo piiyo, okhalana athiyana anivikana mmosa aahiiso alopwana onivikana mmosa.—1 Timootheyo 3:2.
MWIIXUTTE ITTHU SIKINA
Nwehe moota atthu oothela aahiiso oohithela akhanle aya oohakalala ni omusiveliha Yehova.
4. Atthu oohithela anrowa orumeela sai okumi aya?
Yesu aanivaha efaita othela wala ohitheliwa. (Matheyo 19:11, 12) Mmusome Matheyo 4:23, nuumala-vo mwaakhule makoho anittharelana:
-
Okhala wira Yesu khaathenle, aarumeelale sai okumi awe wira omurumeele Tiithi awe ni waakhaliherya atthu akina?
Makristau oohithela aahiiso oohitheliwa anoowerya otthara ntakiheryo na Yesu. Nwehe EVIIDIYU, nuumala-vo mwaakhule nikoho.
-
Mwa inamuna xeeni mukristau oohithela aahiiso oohitheliwa onrowa awe orumeela okumi awe wira incererye muteko oninvarela awe Yehova?
Niireke mwaanisuwela?
Biibiliya khonihimya iyaakha mutthu onireerela awe othela aahiiso otheliwa. Masi onnaatumererya makristau olipelela “ovira iyaakha sa omiravo” ohinatthi othela aahiiso otheliwae. Mwaha woowi okathi owo mutthu onimakela wuupuwela orupihana paahi, nto eyo pooti omwiiriha opaka yoothanla yoohiloka.—1 aKorinto 7:36.
5. Mmuthanleke mwa miruku ole munrowa anyu othelana
Omuthanla mutthu onrowa awe othelana, yoothanla yuulupale mutthu onipaka awe. Mmusome Matheyo 19:4-6, 9, nuumala-vo mwaakhule nikoho ninttharelana:
-
Xeeni mukristau ohinreerela awe othela aahiiso otheliwa ohuupuwenle oratteene?
Biibiliya onimookhaliheryani osuwela itthu sinimwiiriha mutthu okhala mulopwana oothela ooloka ni muthiyana otheliwa ooloka. Masi etthu yuulupale tiila: Mutthu owo ohaana omphenta vanceene Yehova. b (Nwehe enoota) Mmusome 1 aKorinto 7:39 ni 2 aKorinto 6:14. Nuumala-vo, mwaakhule makoho anittharelana:
-
Xeeni vari aya vooloka othelana ni mutthu onimurumeela Yehova?
-
Yehova aarowa woonela sai akhala wira moomuthela aahiiso mootheliwa ni mutthu ohinimurumeela Yehova?
Akhala wira inama piili sa munnuwelo woovirikana sinnitthukweleliwa wira sivareke muteko hoothe, soopiili sinoohaawa. Mwa enamuna emosaru, akhala wira mukristau onnithelana ni mutthu ohinimurumeela Yehova, owo onookhalana mixankiho sinceene
6. Mukhalaneke moonelo mmosaru wa Yehova voohimya sa ekasamento
Khalai, alopwana akina yaanimwalana ni axaaraya mwaha wa mathowa oohiloka. Mmusome Malakhiya 2:13, 14, 16, nuumala-vo mwaakhule nikoho ninttharelana:
-
Xeeni Yehova oninyokha awe omwalana nihikhanle nthowa na mBiibiliyani?
Oraruwa ni omwalana onnaaphwanyiha mixankiho sinceene anamwane ni mutthu ole oraruweliwe
Nwehe EVIIDIYU, nuumala-vo mwaakhule nikoho.
-
Akhala wira muthelanne ni mutthu ohinimurumeela Yehova, etthu xeeni munireerela anyu opaka wira mukhalane ekasamento yoohakalala?
7. Mweetteleke malakiheryo a Yehova a ekasamento
Woonasa wene, mutthu ohaana wiimananiha weettela malakiheryo a Yehova a ekasamento. c (Nwehe enoota) Nto Yehova onnireeliha wiimananiha wa mutthu owo. Nwehe EVIIDIYU.
Mmusome aHeeberi 13:4, nuumala-vo mwaakhule makoho anittharelana:
-
Munoonela sai, niireke vanniweryaneya weettela malamulo a Yehova a ekasamento? Mwaha wa xeeni?
Yehova oniphavela wira ale anithelana alepiheke ekasamento aya. Nave akhala wira anoomwalana, ahaana waanulari aahiiso ottipiha ekasamento eyo. Nto Yehova oniphavela wira makristau eekeekhai yiiweleleke malamulo awo. Mmusome Tito 3:1, nuumala-vo mwaakhule nikoho ninttharelana:
-
Akhala wira moothela, niireke yookhala etthu enookupalihani wira othelana wanyu oheemereriwa ni kuvernu?
ATTHU AKINA POOTI WOOKOHANI WIRA: “Etthu xeeni eniwiirihani olepiha ekasamento anyu? Niireke ti vootakhala okhala hoothe muhilepinhe ekasamento?”
-
Mwaarowa owaakhula sai?
IPONTO SUULUPALE
Othela aahiiso ohithela soovaha sinikhuma wa Yehova. Atthu athenle ni ale ahithenle anoowerya ohakalala akhala wira anoopaka ele Yehova oniphavela awe.
Wuuluula
-
Ale ahithenle ni ale ahitheliwe, anrowa orumeela sai okumi aya?
-
Xeeni Biibiliya onihimya awe wira nihaana othelana paahi ni mutthu onimurumeela Yehova?
-
Nthowa xeeni nimosa Biibiliya onimweemererya awe mutthu omwalana ni ole othelanne awe?
NWEHE ITTHU SIKINA
Onitaphulela exeeni ‘othelana mwa Apwiya paahi?’
“Makoho Anikohiwa ni Ale Anisoma Irevista Sahu” (Owehaweha, 1 a Julyo, 2004)
Nwehe iviidiyu tthaaru saamukhaani sinrowa wookhaliheryani opaka yoothanla yooloka akhala wira munnuupuwela onamorari ni othela aahiiso otheliwa.
Malakiheryo Anivahiwa Aya Ale Anuupuwela Othela Wala Otheliwa (17:05)
Nwehe etthu yaamukupaliha munna mmosa wira Yehova onvaha etthu yoolokexa ovikana itthu aahiyale awe.
Akhala wira mutthu onuupuwela omwalana aahiiso ovalaana, itthu xeeni onireerela awe wuupuwela?
Muttittimiheke Ele “Muluku Ephitanyalyawe” (Owehaweha, Dezembro 2018)
b Ilapo sikina, anamuyari annimuthanlela mwanaya mutthu onrowa awe othelana. Ikwaha sinceene, anamuyari oophenta annimuthanla mutthu onimurumeela Yehova, ohiya mwaha wa musurukhu, okhulupale aahiiso miritti orina awe.
c Akhala wira munikhala ni mutthu muhilepihanne anyu ekasamento, omuhiya aahiiso olepiha ekasamento anyu, eyo yoothanla anyu.
