KAPITE 42
Kotea Te Manatu ʼa Te Tohi-Tapu Ki Te Nofo Selipatea Mo Te ʼOhoana?
ʼI ʼihi agaʼi fenua, ʼe manatu te hahaʼi ʼe tonu ke natou ʼohoana ke natou fiafia. Kae ʼe ʼi ai ʼihi hahaʼi kua ʼohoana ʼe natou mamahi kae ʼe fiafia ʼihi selipatea. ʼE ui ʼi te Tohi-Tapu ko te nofo selipatea mo te ʼohoana ʼe ko he ʼu meʼa ʼofa ʼaia ʼe lua mai te ʼAtua.
1. Kotea te ʼu lelei ʼo te nofo selipatea?
ʼE ui fenei ʼi te Tohi-Tapu: “Ko ʼae ʼe ʼohoana ʼe ina fai he tonu ʼe lelei, kaʼe ko ʼae ʼe mole ʼohoana ʼe ina fai he tonu ʼe lelei age.” (Lau ia 1 Kolonito 7:32, 33, 38.) He koʼe ʼe ui ko he tahi ʼe selipatea ʼe ina fai he tonu ʼe “lelei age”? Koteʼuhi ʼe mole hona ʼu maʼua fakafamili. ʼE mole hona ʼohoana koia ʼe lahi age tona ʼateaina. ʼE feala ke lahi age tona temi ʼi tana tauhi kia Sehova. Ohage la, ʼe feala ke alu ʼo tala te logo lelei ʼi he tahi age fenua. Koia, ʼe lahi age te temi ʼae ʼe maʼu e he selipatea ke fakaovi ai kia Sehova.
2. Kotea te ʼu lelei ʼo te ʼohoana?
ʼE ʼi ai te ʼu lelei ʼo te ʼohoana ohage pe ko te nofo selipatea. ʼE ui ʼi te Tohi-Tapu “ʼe lelei age te toko lua ʼi he toko tahi.” (Ekelesiasi 4:9) ʼE moʼoni te faʼahi ʼaia moka maʼuliʼi e te taumatuʼa te ʼu pelesepeto Fakatohi-tapu. ʼE fakapapau e te tagata mo te fafine ʼohoana ke nā feʼofaʼofani pea mo fefakaʼapaʼapaʼaki. Koia, ʼe malohi age ai tanā fefalalaʼaki ʼo mole hage ko he foʼi toko lua ʼe maʼuli fakatahi kae heʼeki ʼohoana. Pea ka ʼohoana he taumatuʼa ʼe toe tokoni ki te maʼuli lelei ʼo ʼanā fanau.
3. Kotea te manatu ʼa Sehova ki te ʼohoana?
ʼI te fakatapuʼi e Sehova ia te ʼuluaki taumatuʼa, neʼe ina ui fenei: “ʼE mavae anai te tagata mai tana tamai pea mo tana faʼe pea ʼe pipiki anai ki tona ʼohoana.” (Senesi 2:24) ʼE loto e Sehova ke feʼofaʼofani ia te tagata mo te fafine ʼohoana pea ke nā maʼuli fakatahi ʼo kaku ki te mate. ʼE ina fakagafua pe te mavete moka ʼe tono he tahi ia naua. ʼE tuku e Sehova kia ia ʼae neʼe mole agahala ke ina filifili pe ʼe nā mavete anai. a (Mateo 19:9) ʼE mole tali e Sehova ke ʼohoana te kau Kilisitiano mo he ʼu fafine ʼe tokolahi.—1 Timoteo 3:2.
TA FAKALOLOTO
Ta vakaʼi pe ʼe maʼu feafeaʼi e te kau selipatea mo natou ʼae kua ʼohoana ia te fiafia pea ʼe feafeaʼi hanatou fakafiafiaʼi ia Sehova.
4. Fakaʼaogaʼi lelei te meʼa ʼofa ʼae ko te selipatea
Neʼe mahino kia Sesu ko te nofo selipatea ʼe ko he meʼa ʼofa. (Mateo 19:11, 12) Lau ia Mateo 4:23, pea fai te fehuʼi ʼaeni:
-
Neʼe fakaʼaogaʼi feafeaʼi e Sesu te meʼa ʼofa ʼae ko te selipatea ʼi tana tauhi ki tana Tamai pea mo tokoni ki ʼihi?
ʼE feala ki he tehina peʼe ko he tuagaʼane ke fiafia ʼi tana nofo selipatea, ohage ko Sesu. Vakaʼi te ʼATA VITEO, pea fai te fehuʼi ʼae ʼe hoa mai.
-
Kotea te ʼu gaue ʼe feala ke fai e te kau selipatea?
Kua ke ilo’i koa?
ʼE mole fakaha ʼi te Tohi-Tapu te taʼu ʼae ke ke ʼohoana ai. Kae ʼe fakalotomalohiʼi ʼi ai te kau tupulaga ke natou talitali ʼo kaku ki tanatou ‘kua fakalaka ʼi tonatou temi tupulaga,’ te temi ʼae ʼe malohi ai te ʼu holi ki te ʼu felaveʼi fakasino. Pea ʼe faigataʼa ai tanatou toʼo ni tonu fakapotopoto.—1 Kolonito 7:36.
5. Filifili lelei tou ʼohoana
Ko te filifili ʼo hokita ʼohoana ʼe ko he tonu maʼuhiga ʼe kita fai ʼi tokita maʼuli. Lau ia Mateo 19:4-6, 9, pea fai te fehuʼi ʼaeni:
-
He koʼe ʼe tonu ki he tehina peʼe ko he tuagaʼane ke fakakaukau lelei ʼi muʼa ʼo tana ʼohoana?
ʼE tokoni atu te Tohi-Tapu ke ke iloʼi te ʼu kalitate ʼe ke kumi ʼi he tahi ʼe ke fia ʼohoana mo ia. Kae ko te faʼahi ʼae ʼe maʼuhiga ʼe ʼofa ia ia ʼaia kia Sehova. b Lau ia 1 Kolonito 7:39 mo 2 Kolonito 6:14. Pea fai te ʼu fehuʼi ʼaeni:
-
He koʼe ʼe tonu ke tou ʼohoana pe mo he tahi ʼe tauhi kia Sehova?
-
Fakafuafua age muʼa koe ʼe filifili e he tehina peʼe ko he tuagaʼane ke ʼohoana mo he tahi ʼe mole tauhi kia Sehova. ʼI tau manatu la, kotea ʼae ʼe logoʼi e Sehova?
Kapau ʼe tou fakatahiʼi he ʼu manu kehekehe ʼe lua, ʼe nā mamahi toko lua anai. Pea ʼe toe feia pe moka tou ʼohoana mo he tahi ʼe mole tauhi kia Sehova, ʼe tou tau anai mo ni fihifihia
6. Ke ke maʼu te faʼahiga manatu ʼa Sehova ki te ʼohoana
ʼI te temi muʼa, neʼe mavete ʼihi tagata mo ʼonatou ʼohoana he neʼe natou manatu pe kia natou totonu. Lau ia Malakia 2:13, 14, 16, pea fai te fehuʼi ʼaeni:
-
He koʼe ʼe fehiʼa ia Sehova moka tou mavete ʼuhi ko ni meʼa laulaunoa?
Kapau ʼe tono he tahi ʼi te taumatuʼa pea mo mavete, ʼe fakatupu mamahi ki te famili
Vakaʼi te ʼATA VITEO, pea fai te fehuʼi ʼae ʼe hoa mai.
-
Kapau kua ke ʼohoana mo he tahi ʼe mole tauhi kia Sehova, kotea ʼe feala ke ke fai ke fiafia tokolua maʼuli fakataumatuʼa?
7. Fakalogo ki te ʼu lao ʼa Sehova ki te nofo ʼohoana
ʼI ʼihi temi, ʼe ʼaoga ke tou fai ni faiga malohi ke tou fakalogo ki te ʼu lao ʼa Sehova ʼo ʼuhiga mo te ʼohoana. c Kae ʼe tapuakinaʼi e Sehova ia ia ʼae ʼe fakalogo. Vakaʼi te ʼATA VITEO.
Lau ia Hepeleo 13:4, pea fai te ʼu fehuʼi ʼaeni:
-
ʼE fakapotopoto koa te ʼu lao ʼa Sehova ʼo ʼuhiga mo te ʼohoana? He koʼe ʼe ke ui te faʼahi ʼaia?
ʼE lahi te ʼu fenua ʼe fakamaʼua ai e te puleʼaga ke tohi e te hahaʼi ʼonatou ʼaho ʼohoana pea mo tanatou kua mavete. Koia, ʼe loto e Sehova ke fakalogo te kau Kilisitiano ki te ʼu lao ʼaia. Lau ia Tito 3:1 pea fai te fehuʼi ʼaeni:
-
Kapau kua ke ʼohoana, kua ke vakaʼi koa pe kua fakamoʼoni ʼi te puleʼaga tokolua ʼohoana?
ʼE UI ʼE ʼIHI: “Kotea te ʼuhiga ʼo te ʼohoana, ʼe lelei pe tamaua nonofo feia?”
-
Kotea anai tau tali?
MANATU TAFITO
Ko te nofo selipatea mo te ʼohoana ʼe ko he ʼu meʼa ʼofa mai ia Sehova. ʼE fiafia te kau selipatea mo natou ʼae kua ohoana mo kapau ʼe natou fakalogo ki te ʼu pelesepeto ʼa Sehova.
Fehuʼi Fakamanatu
-
ʼE fakaʼaogaʼi lelei feafeaʼi e he tahi ia tona temi selipatea?
-
He koʼe ʼe ui ʼi te Tohi-Tapu ke tou ʼohoana pe mo he tahi ʼe tauhi kia Sehova?
-
Kotea te tupuʼaga pe ʼe tahi ʼi te Tohi-Tapu ʼe gafua ai te mavete?
TE TAHI ʼU MANATU
Kotea te fakaʼuhiga ʼo te ui ʼae ke tou ‘ʼohoana ʼi te ʼAliki pe’?
“Te ʼu Fehu’i ʼa Te Kau Lautohi” (Ko Te Tule Leʼo ʼaho 1 ʼo Sulio 2004)
He ʼu tokoni lelei ki te faifakatahi mo te ʼohoana ʼe maʼu ʼi he ʼata viteo ʼe koga lua.
Neʼe tapuakinaʼi feafeaʼi e Sehova he tehina neʼe ina fai he ʼu tonu ʼe lelei?
Kotea ʼe tonu ke tou fakakaukau ki ai ʼi muʼa ʼo hatatou mavete peʼe tahi nofo?
“Tou Fakaʼapaʼapa Ki ‘Te Meʼa ʼAe Neʼe Fakatahiʼi e Te ʼAtua’” (Ko Te Tule Leʼo ʼo Tesepeli 2018)
a Vakaʼi te Fakamahino 4 ʼae ʼe talanoa ki te ʼu tupuʼaga ʼe gafua ai te tahi nofo logo la neʼe mole tono he tahi ia naua.
b ʼI ʼihi agaʼi fenua, ʼe ko te ʼu matuʼā ʼae ʼe nā filifili te ʼohoana ʼo hanā tama peʼe taʼahine. ʼI te aluʼaga ʼaia, kapau ko he ʼu matuʼā ʼofa ʼe nā kumi muʼa anai pe ʼe ʼofa ia ia ʼaia ka ina ʼohoanaʼi tanā fanau ia Sehova. Kae ʼe mole nā kumi anai pe ʼe paʼaga mo maʼu tuʼulaga.
c Kapau ʼe ke maʼuli mo he tahi kae heʼeki koulua ʼohoana, ʼe ʼa koe te filifili pe ʼe ke veteki peʼe kolua olo ʼo ʼohoana.