ROMNHORÉ 42
E marĩ Ropotoꞌwai mreme te tinha ĩmro ré norĩ höimanadzém na duré ĩmroꞌõ norĩ höimanadzém na.
Nimahã dahöimanadzém norĩ ꞌremhã niꞌwam norĩ te rotsaꞌrata dzaꞌra damro waptsi dza dama ĩrobdze na hã. Tane nherẽ, e aihĩni ĩmro ré norĩ ma robdze ti. Mare di. Duré e aihĩni ĩmroꞌõ norĩ ma robdzei õ di. Mare di. Tô tsena Ropotoꞌwai mreme te tinha ĩmro ré norĩ höimanadzé hã duré ĩmroꞌõ norĩ höimanadzé hã marĩ ĩwẽ na Jeová hawimhã.
1. E marĩ ĩwẽ ĩmroꞌõ höimanadzém na.
Ropotoꞌwai mreme te tinha: ‘[Niꞌwam norĩ] ꞌre mro dzaꞌra mono wamhã, ĩwẽ tsi te dza tô te te ꞌre ꞌmanharĩ dzaꞌra. Duré ꞌre mro dzaꞌra mono õ wamhã, ĩwẽ uptabi tsi te dza tô te te ꞌre ꞌmanharĩ dzaꞌra.’ (Tsõré na 1 Coríntios 7:32, 33, 38.) E marĩ wa, ĩmroꞌõ hã ‘ĩwẽ uptabi tsi te dza tô te te ꞌre ꞌmanharĩ.’ Mroꞌõ wa, Jesus dzadawa dzamarĩꞌwa ĩmroꞌõ norĩ hötöꞌö dzaꞌra õ di damro wi tsô ĩrowaptöꞌö dzém na hã. Taha wa, marĩ ahö na tsima ĩwẽ na te natsi ꞌre höimana dzaꞌra. Ãma ĩtsimiré, ãté tsada hã tinhibödö danhipai u te te uprotsi dzaꞌra da Jeová ma romhuri na, ãté aꞌö ĩwairébé na daro ĩhöiba amoi u roꞌmahörö wẽ na te te dama roꞌmahörö dzaꞌra da, duré danhipai u bödö ahö na te tãma ꞌre höimana dzaꞌra Jeová tẽme te te tsina rotété dzaꞌra da.
2. E marĩ wa, wẽ di datsina damro wamhã ĩꞌuptabi na dama ĩpire norĩ nhimiroꞌmadöꞌö na.
Ĩmro ré höimanadzé, ĩmroꞌõ höimanadzé me wẽ di. Ropotoꞌwai mreme te tinha “maparane mitsi nhipai u ĩwẽ” na. (Eclesiastes 4:9 TNM) Tahã tô tsena te natsi watobro Jesus dzadawa dzamarĩꞌwa norĩ dzô Ropotoꞌwai mreme nhimiroti te te tsadawa dzamarĩ dzaꞌra wamhã datsina damro ꞌremhã. Aibö duré piꞌõ tsina mro dzahuré wamhã ĩꞌuptabi na dama ĩpire norĩ nhimiroti nhimiroꞌmadöꞌö na hã, te tsima tsina ropitsutu dzahuré tsitsawi dzahuré da, tsiwadzéb dzahuré da, duré tsimidzawi na tsiꞌmadöꞌö dzahuré da. Taha wa, rowẽ na umnhatsi tsina te natsi ꞌre höimana dzaꞌra tsina mro ãna taré tsiré ꞌre ĩhöimana dzaꞌra mono norĩ nhipai u. Ãne mono hã, ĩꞌra norĩ hã te duré romharé na ꞌre höimana dzaꞌra.
3. E niha Jeová te rotsaꞌrata datsina damro na hã.
Jeová te te ꞌmanharĩ wamhã datsina damrodzé ĩmorĩꞌrada, õ hã te tinha: ‘Ãne wa, te dza aibö, timama tina me te te ꞌre rẽme dzahuré, timro me tsi, tsina tsihöiba tsitom haré ꞌre höimana dzahuré mono da oto.’ (Gênesis 2:24) Jeová te tsima wẽ aibö timro me tsitsawi petse dzahuré da, duré tsiré ꞌre höimana dzahuré mono da höibaré höimana dzahuré ré. Jeová te dza tsaꞌré tsirẽme dzahuré da aibö niwamhã piꞌõ niꞌwa aimawi na tsiptsaihuri waptsi. (Mateus 19:9) Ãne wamhã, Jeová te tsaꞌré damro te te ĩꞌupaiꞌõi ma te te pitsutu da dza te te rẽme dzô. a Jeová ma ĩböiꞌõ Jesus dzadawa dzamarĩꞌwa daꞌãma mro wamhã mitsi nhipai u. — 1 Timóteo 3:2.
WAIHUꞌU DURÉ
Te dza ĩꞌmadö e niha ĩmroꞌõ norĩ duré ĩmro ré norĩ robdze na te dza ꞌre höimana dzaꞌra Jeová ma te te rowẽ dzaꞌra tsina.
4. E niha ĩmroꞌõ norĩ te dza tihöimanadzém na tsima rowẽ dzaꞌra.
Jesus ma hã ĩmroꞌõ höimanadzé marĩ ĩwẽ uptabi. (Mateus 19:11, 12) Atsiré tsõré aba Mateus 4:23. Taha parimhã atsima robdzanhamri aba ãhã dadzadanharĩ ãma piꞌrebamhã:
-
E niha Jesus ĩmroꞌõ na ma tô te te timama ma ꞌre romhuri duré ma tô te te ꞌre dapawapto.
Jesus dzadawa dzamarĩꞌwa ĩmroꞌõ norĩ te dza tsima rowẽ dzaꞌra Jesus te te tsidzutsi dzaꞌra wamhã. ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ ãma piꞌrebamhã.
-
E niha Jesus dzadawa dzamarĩꞌwa ĩmroꞌõ norĩ te dza tsima rowẽ dzaꞌra tihöimanadzém na.
E ma tô ĩwaihu.
Ropotoꞌwai mreme te te watsuꞌu õ di ãma ĩwahu niꞌwa daꞌãma ĩmro da hã. Tadzahã te tinha ꞌre danhimipari mono da “dahöiba prédu wab da”. E marĩ wa. Ĩhöibaté nhimirotsaꞌrada datsina dahöimana na hã tsiptete di duré tahã ãté te dza tiwi roꞌwaꞌrutu tsimidzaꞌretse na te te pitsutu wẽ tõ da. — 1 Coríntios 7:36 TNM.
5. Aimro pitsutu wẽ na
Damro pitsudu marĩ ĩpire uptabi dahöimanadzém na. Atsiré tsõré aba Mateus 19:4-6, 9. Taha parimhã atsima robdzanhamri aba ãhã dadzadanharĩ ãma piꞌrebamhã:
-
E marĩ wa, Jesus dzadawa dzamarĩꞌwa mro tsuꞌu õ di dza te te ãma rotsaꞌrata wẽ ãna.
Ropotoꞌwai mreme te dza aipawapto waihuꞌu da e niha damro wẽ höimanadzé ĩtsarina pitsutu wẽ da. Uburé nhipai u tsô airĩtĩ niꞌwa Jeová dzawiꞌwa dzô. b Atsiré tsõré aba 1 Coríntios 7:39 duré 2 Coríntios 6:14. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
-
E marĩ wa, wa dza ãma wamro dzaꞌra ni niꞌwa Jeová ma te te ĩromhuri ãma.
-
Aima hã, e niha Jeová te aré tihöiba wamro dzaꞌra ꞌwaꞌöhã niꞌwa te te ĩtsawi õ ãma.
Maparane abadze aimawi petse höibato te te romhuri dzahuré wamhã te dza robdzépata dzahuré. Ãne duré Jesus dzadawa dzamarĩꞌwa mro wamhã Jeová dzawiꞌõꞌwa na te dza duré robdzépata dzaꞌẽtẽ.
6. Datsina damro ãma rotsaꞌrata Jeová te te ĩrotsaꞌrata ne
Duréihã niꞌwam norĩ aibö Ropotoꞌwa nhibꞌaꞌuwẽ norĩ ꞌremhã te aré natsi rẽme dzaꞌra timro taré te te tsima ĩwẽdzéb dzarina. Atsiré tsõré aba Malaquias 2:13, 14, 16 TNM. Taha parimhã atsima robdzanhamri aba ãhã dadzadanharĩ ãma piꞌrebamhã:
-
Niꞌwam norĩ te rẽme dzaꞌra timro daꞌãma tsiptsaihuri õ nherẽ. E marĩ wa tahã Jeová ma ꞌru ti.
Daꞌãma danhiptsaihuri duré datsirẽmedzéb uꞌöbö damro te te ĩꞌupaiꞌõ duré daꞌra norĩ te dza robdzépata dzaꞌẽtẽ dzaꞌra.
ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ ãma piꞌrebamhã.
-
Aimro hã Jeová ma te te romhuri õ nherẽ, e marĩ te dza ĩꞌmanha taha nherẽ robdze na ꞌre aihöimana aba mono da.
7. Tsadawa dzamarĩ Jeová nhimiroti datsina damro na hã
Niꞌwa ãté te dza tsiwatsutu petse Jeová nhimiroti dzarina datsina damro na hã ꞌre höimana mono da. c Tadzahã Jeová te dza tinhopru ãne te te ĩꞌmanharĩ dzaꞌra norĩ ma. ꞌMadöꞌö aba ĨROPODO.
Atsiré tsõré aba Hebreus 13:4. Taha parimhã atsima robdzanhamri aba ãhã dadzadanharĩ ãma piꞌrebamhã:
-
Aima hã, e tsada hã ꞌre dahöimana mono da hã Jeová nhimiroti dzarina datsina damro na hã. E marĩ wa, ãne te ĩrotsaꞌra.
Daro ĩꞌahö norĩ ãma dama ĩpire norĩ te dama ꞌru dzaꞌra datsitsihötö dzaꞌra da datsina damro dzaꞌra wamhã niwamhã datsirẽme dzaꞌra wamhã. Jeová te tsima wẽ Jesus dzadawa dzamarĩꞌwa norĩ ta norĩ nhimiroti te te tsadawa dzamarĩ dzaꞌra da. Atsiré tsõré aba Tito 3:1. Taha parimhã atsima robdzanhamri aba ãhã dadzadanharĩ ãma piꞌrebamhã:
-
Aimro ĩré wamhã e a norĩ waꞌwa hã, ma tô ĩꞌuptabi na atsina aimro waꞌwa dama ĩpire norĩ nhimiroꞌmadöꞌö na.
NIꞌWA TE TE ATSADANHARĨ WAMHÃ BÉTÉ: “E marĩ da datsina damro dama ĩpire norĩ nhimiroꞌmadöꞌö na hã.”
-
E niha te aré ĩtsadaꞌö.
ĨWAIHUꞌUDZÉ HÃ
Ĩmro ré norĩ höimanadzé hã duré ĩmroꞌõ norĩ höimanadzé hã marĩ ĩwẽ Jeová hawimhã. Ĩmroꞌõ norĩ duré ĩmro ré norĩ robdze na te dza ꞌre höimana dzaꞌra Jeová te te tsima ĩwẽdzéb dzarina ꞌre höimana dzaꞌra mono wamhã.
Ãma aipoꞌre puꞌu
-
E niha ĩmroꞌõ hã tihöimanadzém na te dza tsima rowẽ.
-
E marĩ wa, Ropotoꞌwai mreme te tinha wamro dzaꞌra da Jeová ma romhuriꞌwa na tsi.
-
Ropotoꞌwai mreme dzarina, e niwaptsi ĩbö aibö duré piꞌõ tsirẽme dzahuré da.
TSÔ AIRĨTĨ DURÉ
E marĩ te watsuꞌu ‘ĩtsadzeiꞌwa na’ tsi datsina damro.
“Ĩtsõréꞌwa nhimidzadanharĩ norĩ” (Roꞌmadöꞌöꞌwa, 1.° julho na, 2004 na)
ꞌMadöꞌö maparane ĩropodo te te ĩꞌaipawaptob dzahuré da pitsutu wẽ da datsiwẽ ãma duré datsina damro ãma.
ꞌMadöꞌö e marĩ wa, watsitsãnawã te rotsaꞌrata Jeová te te tãma ĩtsõmridzé hã te te ĩrẽme nhipai u ĩwẽ na.
Wa tô aré rotsaꞌrata ĩ̱tsiwẽ hã Jeová aré te te ĩtsawi na hã (1:56)
Niꞌwa te te rotsaꞌrata wamhã timro te te rẽme da e marĩ na ĩwana te dza atãma rotsaꞌrata.
‘Wadzé na Ropotoꞌwa ‘te te ꞌre ĩdaꞌahöibato’ mono hã’ (Roꞌmadöꞌöꞌwa, dezembro 2018 na)
a ꞌMadöꞌö Ãma ĩrowatsuꞌudzé 4 waihuꞌu da datsiwi datsiꞌré na hã daꞌãma danhiptsaihuri õ wamhã.
b Nimahã dahöimanadzé norĩ ꞌremhã damama duré dana te natsi pitsutu dzaꞌra tiꞌra norĩ mro. Ãne wamhã, damama duré dana ĩtsimidzawi petse dzaꞌra tsô rĩtĩ dzaꞌra õ di dza niꞌwa ĩtsibro petse dzô tsi niwamhã dama ĩpire dzô tsi tiꞌra ãma ĩmro da hã. Taha upana te dza tsô tirĩtĩ dzaꞌra Jeová dzawi petse ꞌwa dzô.
c Aimro me ꞌre aihöimana mono wamhã ĩꞌuptabi na atsina aimro aba õ nherẽ dama ĩpire norĩ nhimiroꞌmadöꞌö na, atsiꞌuihö na te dza ĩpitsu dza ãma aimro dzô niwamhã dza rẽme dzô.
