LESON 42
Ino ma Raha Volan̈iny Baiboly Momba Fidokoan̈a Tsy Manambady Ndreky Vadian̈a?
Amy tany sasany, olo mivolan̈a fa tsy ho sambatra olo izikoa tsy manambady. Fa tsy olo jiaby manambady zay sambatra aby, avio tsy olo jiaby selibatera koa tsy sambatra. Koran̈iny Baiboly fa samy kadô baka amy Jehovah fidokoan̈a tsy manambady ndreky vadian̈a io.
1. Ino aby hatsaran̈a azonolo tsy manambady?
Baiboly mivolan̈a: “Man̈ano ny tsara lan̈iany manambady, fa han̈ano ny tsaratsaranizen̈y ndraiky lan̈iany midoko tsy manambady.” (Vakia 1 Korintianina 7:32, 33, 38.) Nan̈ino ma olo tsy manambady ‘man̈ano ny tsaratsarany olo manambady’? Olo selibatera tsy mikarakara vady, ke iro libra mare. Ohatra, sasany amindro mety mandeha mifindra antany hafa, mitory vaovao tsara an̈y. Fa an̈abony raha jiaby, iro manan̈a fotoan̈a tsarabe hifandraisan̈a marikitry amy Jehovah.
2. Ino mahatsara olo manambady vita soratra arapanjakan̈a?
Karaha ataonolo tsy manambady fo, mahazo hatsaran̈a miavaka koa olo manambady. Baiboly mivolan̈a fa “tsara aroe toizay araiky.” (Mpitoriteny 4:9) Ten̈a marin̈y raha zen̈y sirto aminolo man̈araka toro lalan̈a Baiboly momba vadian̈a. Olo vita soratra arapanjakan̈a man̈ano voady fa ho tia vady, han̈aja vady ndreky hifankatia fo. Milamin̈y sain̈indro, fa tsy karaha olo fivadiany tsy vita mariazy. Mahatsiaro sambatra koa tsaiky, izikoa babany ndreky reniny mitarimy izy.
3. Karakory fahitavany Jehovah vadian̈a io?
Jehovah koa fa namoron̈o vadian̈anolo voanalohany, izy nivolan̈a: “Lelahy hiala babany ndreky reniny, baka io hitambatra amy vadiny.” (Genesisy 2:24) Tiany Jehovah izikoa olo fivadiany hifankatia ndreky tsy hisaraka, iro koa samy mbala velon̈o. Fijangajangan̈a zaraiky fo antony imboany isarahan̈a. Ke izikoa misy araiky amindro misengy, Jehovah man̈omba vady araiky tsy diso hanapakevitry hisaraka na tsy hisaraka. a (Matio 19:9) Jehovah tsy man̈omba Kristianin̈y hanambady maro.—1 Timoty 3:2.
ALEVA ONON̈O
Diniha fa mety ho sambatra ndreky hamparavoravo Jehovah fo anao, ndray manambady, ndray tsy manambady.
4. Anao koa tsy manambady, ampiasà tsarabe kadô nazonao io
Fidokoan̈a tsy manambady io ho Jesosy kadô. (Matio 19:11, 12) Vakia Matio 4:23, avio iaraha dinihin̈y fan̈ontanian̈a ty:
-
Akory nampiasany Jesosy fidokoany tsy manambady io nanompoan̈a Zan̈ahary ndreky nan̈ampian̈a olo?
Kristianin̈y tsy manambady afaka ho ravoravo izikoa man̈ano karaha nataony Jesosy in̈y. Alifasa VIDEO io, avio iaraha dinihin̈y fan̈ontanian̈a ambany io.
-
Akory fomba tsara hampiasany Kristianin̈y fidokoan̈a tsy manambady?
Asa mba hainao?
Baiboly tsy mivolan̈a firy taon̈o olo farany hely mandeha manambady. Ndray zen̈y, Baiboly mandrisiky olo hiambin̈y hely efa “tsy tanora loatra,” tsy amy fotoan̈any izy tihan̈ano firaisan̈a mare in̈y, fa lera izy efa mahay mangala fanapahankevitry mety tsarabe.—1 Korintianina 7:36.
5. Fidiana tsara olo hataonao vady
Fifidianan̈a vady zen̈y an̈isany fanapahankevitry ten̈a maventy amy fiain̈ana. Vakia Matio 19:4-6, 9, avio iaraha dinihin̈y fan̈ontanian̈a ty:
-
Nan̈ino Kristianin̈y tsy tokony ho mekimeky hanambady?
Baiboly afaka man̈ampy anao hahay ino aby toetry mila zahanao aminolo hataonao vady. An̈abony raha jiaby, mizahava olo tia Jehovah. b Vakia 1 Korintianina 7:39 ndreky 2 Korintianina 6:14, avio iaraha dinihin̈y fan̈ontanian̈a aby ty:
-
Nan̈ino ma olo manompo Jehovah fo tokony hatao vady?
-
Aminao, akory mety fahitany Jehovah olo manambady olo tsy manompo izy?
Izikoa biby aroe tsy mitovy atao lazioga araiky, hijaly iro roe. Karaha zen̈y Kristianin̈y araiky izikoa manambady olo tsy manompo Jehovah, ho tojy problemo maro koa izy
6. Ataova mitovy amy fahitany Jehovah vadian̈a io koa fahitanao izio
Tamindro Israely taloha tan̈y, fitiavanten̈a nahavy olo nisarabady. Vakia Malakia 2:13, 14, 16, avio iaraha dinihin̈y fan̈ontanian̈a ty:
-
Nan̈ino halany Jehovah olo misarabady nohony antony tsy mifan̈araka amy Baiboly?
Mampijaly vady ndreky tsaiky fijangajangan̈a ndreky fisarahan̈a io
Alifasa VIDEO io, avio iaraha dinihin̈y fan̈ontanian̈a ambany io.
-
Izikoa tsy manompo Jehovah vadinao, akory hahavy anao hanan̈a tokantran̈o sambatra?
7. Areha an̈atiny tokantran̈onao fitsipikiny Jehovah
Mila mifen̈y mare olo araiky baka hahavita han̈araka fitsipikiny Jehovah an̈atiny tokantran̈onany. c Jehovah mitahy lan̈iany olo man̈ano karaha zen̈y. Alifasa VIDEO io.
Vakia Hebreo 13:4, avio iaraha dinihin̈y fan̈ontanian̈a ty:
-
Fahitanao izy, ten̈a rariny ma fitsipikiny Jehovah momba vadian̈a io? Nan̈ino?
Jehovah mandrisiky Kristianin̈y jiaby hanoratra aradalàn̈a vadian̈andro na fisarahan̈andro, mifan̈araka amy lalàn̈a amy tany misy iro. Vakia Titosy 3:1, avio iaraha dinihin̈y fan̈ontanian̈a ty:
-
Izikoa anao manambady, asa mba efa voasoratra aradalàn̈a vadian̈anaro?
IZIKOA MISY OLO MAN̈ONTANY ANAO: “Ino ma raha ilan̈a mariazy zen̈y? Ino ma problemo izikoa olo aroe fankatia man̈ano tran̈o araiky?”
-
Akory hevitrinao?
INO RAHA NIANARANAO TATO?
Fidokoan̈a tsy manambady ndreky vadian̈a io samy kadô baka amy Jehovah. Samy afaka ho ravoravo ndreky ho afapo olo, izikoa man̈ano sitrapony Jehovah.
Fan̈ontanian̈a Fameren̈ana
-
Akory hahavy olo tsy manambady ho sambatra fo?
-
Nan̈ino Baiboly mandrisiky olo hanambady amy Tompo fo?
-
Ino antony araiky koran̈iny Baiboly ahafahan̈a misarabady?
ZAHAVA
Ino ma dikany manambady ‘amy Tompo fo’ zen̈y?
“Fan̈ontanian̈any Pamaky” (Tilikambo Fiambesan̈a 1 Zie 2004)
Zahava video fohiky aroe natambatra araiky ty, han̈ampy anao han̈ano fanapahankevitry tsara momba fiarahan̈a alohany mariazy ndreky mariazy.
Zahava nan̈ino rahalahy araiky nahatsapa fa izy mira nahazo raha valera mare.
Zaho Nan̈anten̈a fa Izy Mbala Hanjary Vavolombelon̈o Jehovah (1:56)
Ino raha sasany mila dinihinolo araiky alohany izy hanapakevitry hisintaka na hisaraka?
“Hajà Olo ‘Natambatra Zan̈ahary Lazioga Araiky’” (Tilikambo Fiambesan̈a Desambra 2018)
a Zahava Fan̈azavan̈a 4 man̈azava momba olo miala vady, izikoa tsisy fijangajangan̈a.
b Amy tany sasany, raimandreny mifidy vadiny zanakandro. Izikoa zen̈y ny raha misy, fitiavan̈a Jehovah raha voanalohany tokony hizahavany raimandreny fa tsy tokony ho vola ndreky harian̈a.
c Izikoa vadian̈anao mbala tsy aradalàn̈a, fanapahankevitrinao manokana na anao hisaraka na han̈ano mariazy.
Mety ho Tianao Koa
RAHA MATETIKY AN̈ONTANIANOLO
Karakory ma Atao Mianatra Baiboly Zen̈y?
Tsy man̈efa mianatra Baiboly amy Vavolombelon̈o Jehovah. Mety tahominao miaraka mianatra aminao koa havanao ndreky kamaradinao. Lera anao mianatra, anao afaka mampiasa zay fandikanteniny Baiboly tianao.
