LIJIGANYO 42
Yajikusasala Baibulo Pakwamba ya Ŵanganalombela Soni Ŵali Paulombela
Mu madela gane, ŵandu akusakulupilila kuti mundu nganaŵa asangalele naga nganalombela kapena kulombedwa. Kusala yisyene ngaŵa kuti wosope ŵali paulombela ni ŵakusasangalala, soni ngaŵa kuti wosope ŵanganaŵa paulombela akusaŵa ŵangasangalala. Baibulo jikusasala kuti kuŵa paulombela kapena iyayi yili yindu yambone yatupele Yehofa.
1. Ana kuŵa mundu jwangalombela kwana umbone wamtuli?
Baibulo jikusati: “Mundu jwalombele atesile chenene, nambo jwanganalombela atesile chenene mnope.” (Aŵalanje 1 Akolinto 7:32, 33, 38, NWT.) Ana mundu jwanganaŵa paulombela akusaŵa kuti “atesile chenene mnope” chamtuli? Ŵandu ŵanganaŵa paulombela ŵangakolaga udindo wekulungwa wakwasamalila ŵane. Chamti myoyo jemanjaji akusatenda yejinji mwagopoka. Mwachisyasyo, ŵane akusakolaga yakutenda yejinji pakumtumichila Yehofa. Jemanjaji mpaka ajawule m’yilambo yine kulalichila ngani syambone. Kupunda yosope jemanjaji akusakolaga ndaŵi jejinji jakulimbisya unasi wawo ni Yehofa.
2. Ana pakusaŵa umbone wamtuli naga ŵandu alombene mwalilamusi?
Nombe nawo ulombela wana umbone wakwe. Baibulo jikusati, “kuli kwambone kutama ŵandu ŵaŵili kulekangana ni kutama jikape.” (Jwakulalichila 4:9) Mwamti ŵalombane ŵakusakamulichisyaga masengo mfundo sya m’Baibulo mu ulombela wawo ni ŵakusapata umbonewu. Ŵandu ŵalombene mwalilamusi akusasimichisya kuti chachinonyelana, kuchimbichisyana soni kusamalilana. Yeleyi yikusakamuchisya kuti ulombela wawo uŵe ŵakulimba kulekangana ni ŵalombene mwangakuya lilamusi. Soni yeleyi yikusakamuchisya kuti ŵanache asangalaleje ni chikamuchisyo cha achinangolo ŵawo.
3. Ana nganisyo sya Yehofa pakwamba ya ulombela sili syamtuli?
Yehofa paŵatandisyaga ulombela wandanda jwasasile kuti: “Jwamlume akusatyokaga kwa babagwe ni mamagwe ni kuja kulumbikana ni ŵamkwakwe.” (Genesesi 2:24) Yehofa akusasaka kuti ŵalombane anonyelaneje soni atameje yalumo kwa umi wawo wosope. Nambope jwalakwe akusakunda kumasya ulombela naga jwine atesile chikululu. Payitendekwe yeleyi, Yehofa akusamkundaga mundu jwangalemwajo kusagula kumasya kapena iyayi. a (Mateyu 19:9) Konjechesya pelepa, Yehofa jwangasaka kuti Aklistu alombeleje mitala.—1 Timoteo 3:2.
KULIJIGANYA YEJINJI
Alijiganye yampaka atende kuti aŵe ŵakusangalala soni kuti amsangalasyeje Yehofa chinga nganalombela kapena alombele.
4. Ŵandu ŵanganalombela akamulichisyeje masengo ndaŵi mwalunda
Yesu ŵawuwonaga ungalombela wakwe kuŵa upile wakutyochela kwa Mlungu. (Mateyu 19:11, 12) Aŵalanje Mateyu 4:23, kaneko akambilane chiwusyo achi:
-
Pakuŵa Yesu jwaliji jwangalombela ana jwalakwe jwatesile yamtuli pakwatumichila Atati ŵakwe soni kwakamuchisya ŵane?
Aklistu ŵanganalombela mpaka aŵe ŵakusangalala mpela muyaŵelele ni Yesu. Alolele FIDIYO, kaneko akambilane chiwusyo achi.
-
Ana ni yindu yambone yapi yampaka atende Aklistu ŵangalombela?
Ana akumanyilila?
Baibulo jangasalaga yaka yakusosekwa mundu kwinjila mwiŵasa. Nambope jikumsalimbikasyaga mundu kwembecheya mpaka “ali apundile pamangwakwe unyamata.” Pandaŵiji yikusaŵa yakusawusya kusagula yindu mwalunda ligongo lyakuti akusakolaga mtima wakumbila mnope yakutamila malo gamo.—1 Akolinto 7:36, NWT.
5. Asaguleje mwalunda jwakusaka kulombana najo
Kusagula mundu jwakulombana najo jili ngani jekulungwa jakusosekwa kujiganichisya chenene. Aŵalanje Mateyu 19:4-6, 9, kaneko akambilane chiwusyo achi:
-
Ana ligongo chichi Mklistu ngakusosekwa kuwutuchila kulombela kapena kulombedwa?
Baibulo mpaka jakamuchisye kumanyilila ndamo syakusosekwa kuwungunya kwa mundu jwakusaka kulombana najo. Chindu chakusosekwa mnope chili chakuti awungunyeje mundu jwakusamnonyelaga Yehofa. b Aŵalanje 1 Akolinto 7:39 soni 2 Akolinto 6:14. Kaneko akambilane yiwusyo ayi:
-
Ligongo chichi tukusosekwa kulombana ni Mklistu mjetu?
-
Ana Yehofa mpaka apikane uli naga jwine akulombana ni mundu jwangamnonyela Yehofajo?
Naga yinyama yakulekangana yikukamula masengo pampepe ali ayitaŵilile likongwa, yikusalagaga. Myoyosoni Mklistu jwasagwile kulombana ni mundu jwangakulupilila chachisimana ni yakusawusya yejinji
6. Akoleje nganisyo sya Yehofa pangani ja ulombela
Kalakala ku Isalaeli, achalume ŵane ŵamasyaga ulombela pamagongo gangapikanika. Aŵalanje Malaki 2:13, 14, 16, kaneko akambilane chiwusyo achi:
-
Ana ligongo chichi Yehofa akusaŵengana ni kumasya ulombela pamagongo gangapikanika?
Chikululu soni kumasya ulombela yikusatendekasya kuti jwanganalemwa jula soni ŵanache alajeje nganisyo
Alolele FIDIYO, kaneko akambilane chiwusyo achi.
-
Naga alombene ni mundu jwangakulupilila, ana mpaka atende yamtuli kuti aŵeje ŵakusangalala mu ulombelawo?
7. Akuyeje malamusi ga Yehofa mu ulombela
Pakusasosekwa kulimbichila kuti mundu akuyeje malamusi ga Yehofa mu ulombela. c Nambo Yehofa akusiŵapaga upile ŵandu ŵakusakuyaga malamusi gakwe. Alolele FIDIYO.
Aŵalanje Ahebeli 13:4, kaneko akambilane yiwusyo ayi:
-
Ana akuganisya kuti malamusi ga Yehofa gakwayana ni ulombela gali gakamuchisya? Asale ligongo lyakwe.
Yehofa akusasaka kuti Aklistu akalembesye ulombela soni naga ukumala, akafufutisye ku boma. Yeleyi yili myoyo ligongo lyakuti maboma gejinji gakusasaka kuti ŵandu akuyeje yeleyi. Aŵalanje Tito 3:1, kaneko akambilane chiwusyo achi:
-
Naga ali ŵalombele, ana ulombela wawo ŵalembesye ku boma?
JWINE MPAKA ŴAWUSYE KUTI: “Pangali ligongo lyakuŵela paulombela. Ana pana chakusawusya chilichose naga ŵandu akutama yalumo ngalombana?”
-
Ana mpaka ajanje chamtuli?
YALIJIGANYISYE
Kuŵa paulombela kapena iyayi yili yindu yambone yatupele Yehofa. Ŵalombele kapena ŵangalombela wosopeŵa mpaka aŵe ŵakusangalala soni ŵakwikutila naga akusatenda yindu mwakamulana ni yakusasaka Yehofa.
Yiwusyo Yakuwilisya
-
Ana mundu jwanganalombela mpaka akamulichisyeje masengo chamtuli ndaŵi jakwe mwalunda?
-
Ligongo chichi tukusosekwa kulombana ni Mklistu mjetu?
-
Ana Baibulo jikusasala ligongo lyapi lyakumachisya ulombela?
YAKULINGA YINESONI
Ana kulombela mwa “Ambuje” kukusagopolela chichi?
“Yiwusyo Yakutyochela kwa Ŵakuŵalanga” (Sanja ja Mlonda, Julayi 1, 2004)
Alolele tumafidiyo tutatu twampaka twakamuchisye kusagula chenene mundu jwakusaka kuŵa najo pa chitomelo soni paulombela.
Alijiganye yayamkamuchisye mundu jwine kuyiwonaga kuti yindu yaŵampele Yehofa yili yakusosekwa mnope kupundana ni yiŵayilesile.
Ana mundu akusosekwa kuganichisya kaje yindu yapi mkanamasye kapena kuwunduka ulombela?
“Kwende Tucimbicisyeje ‘Yindu Yayilumbikenye Mlungu Pampepe’” (Sanja ja Mlonda, Disemba, 2018)
a Alole Maloŵe Gakumbesi 4 pangani ja kuwunduka ulombela naga pangali jwatesile chikululu.
b M’madela gane achinangolo ni ŵakusiŵasagulila ŵanache mundu jwakulombana najo. Naga yili myoyo, achinangolo ŵachinonyelo, ŵangajigalika ni kapate kapena kumanyika kwa mundujo. Nambo chakusalola mnope chili naga mundujo akusamnonyela Yehofa.
c Naga mundu akutama ni jwanganalombana najo, yili ni mundujo kusagula kumleka kapena kumlomba.
You May Also Like
YIWUSYO YAKUSANONYELA ŴANDU KUWUSYA
Ana Ljiganyo lya Baibulo Lyakusatendesya Ŵamboni sya Yehofa Likusatendekwa Mwamtuli?
Muyakambilana ni Ŵamboniyi akwete ufulu ŵakamulichisya masengo Baibulo jawo. Yili yakomboleka kwaŵilanga achimjawo soni ŵamwiŵasa mwawo kuti atende nawo lijiganyoli.
