GURUY NI 42
Mang e Be Yog e Bible u Murung’agen e Ngan Par ni Yib Muchugbil nge Ngan Mabgol?
Ma lemnag e girdi’ u boch e nam ndabiyog ni nge pirieg be’ e felfelan’ ni faanra dabi un ko mabgol. Machane gathi urngin e piin kar uned ko mabgol ni yad ba felfelan’, ma gathi urngin e piin nib muchugbil nib kireban’rad. Bin riyul’ riy e be yog e Bible ni l’agruw e gali n’ey nib tow’ath.
1. Mang boch i angin nra yib riy ni faan yira par ni yib muchugbil?
Be gaar e Bible: “Re moon nra leay e re pin ni ka nog ni ngar mabgolgow e ba fel’ e n’en ni ke rin’, machane cha’ nde leay e re pin ni ka nog ni ngar mabgolgow e kab fel’ e n’en ni ke rin’.” (Mu beeg e 1 Korinth 7:32, 33, 38.) Uw rogon ni “kab fel’” ni faanra par be’ nib muchugbil? Pi Kristiano nib muchugbil e de t’uf ni ngar pied e tin nib t’uf ko en mabgol rorad. Ere kab ga’ e puf rogon rorad. Bod ni bay boch i yad nrayog ni nge yoornag e tin be rin’ ni fan ko machib, ni bod ni nge yan nga yugu reb e nam ni nge machibnag fare thin nib fel’. Ma bin th’abi fel’ riy e rayog ni ngar yoornaged e tayim ni ngar chugurnaged e tha’ u thilrad Jehovah.
2. Mang boch i angin nra yib riy ni faanra ke mabgol l’agruw ni’ nrogon nib puluw ko motochiyel ko nam?
Yira un ko mabgol maku bod ni ngan par ni yib muchugbil, ya ku bay boch i angin nra yib riy. Be yog e Bible ni “l’agruw e ba fel’ ko taareb.” (Eklesiastes 4:9, BT) Ere ra fel’ e mabgol rok l’agruw ni’ ni faan yow ra fol ko pi kenggin e motochiyel u Bible. Piin kar mabgolgad nrogon nib puluw ko motochiyel ko nam e kar micheged ngorad ni gubin ngiyal’ nra ur t’ufeged yad, ma yad be tay farad, ma yad be ayuweged yad. Bochan e re n’ey, mab ga’ ni kab gel e pagan’ rorad ngak boch e girdi’ ni yad be par u taabang ndawor ra mabgolgad. Maku arrogon pi fakrad ni ku rayog ni ngar pared nib pagan’rad.
3. Uw rogon e mabgol u wan’ Jehovah?
Nap’an ni m’ag Jehovah pa’ e gal nsom’on e girdi’, me gaar: “Be’ nib moon e ma pag e chitamangin nge chitiningin nge yan i chag ngak e ppin rok.” (Genesis 2:24) Baadag Jehovah ni nge par l’agruw ni’ ni kar mabgolgow u taabang u n’umngin nap’an e yafos rorow mu ur t’ufegew yow. Fin ngiyal’ nra par bagayow nge be’ ni gathi mabgol rok e ra pagrow ni ngar dargow. Faanra buch ban’en ni aray rogon, ma aram e ke pi’ Jehovah mat’awun e arorow nde kireb e rok ni nge dugliy ko nge par ko en mabgol rok fa ngar dargow. a (Matthew 19:9) De m’agan’ Jehovah ngay ni nge yoor leengin ara figirngin reb e Kristiano.—1 Timothy 3:2.
KUM FIL BOCH BAN’EN U MURUNG’AGEN
Mu fil rogon nrayog ni ngam felfelan’ mu kum felfelan’nag Jehovah ni yugu demtrug ko gab muchugbil ara kam mabgol.
4. Mu rin’ e tin rayog rom u nap’an ni ka gab muchugbil
I yog Jesus ni yira par ni yib muchugbil ma aram reb e tow’ath. (Matthew 19:11, 12) Mu beegew e Matthew 4:23, mi gimew weliy e fulweg ko re deer ni baaray:
-
Uw rogon ni yag rok Jesus ni nge pigpig ngak e Chitamangin me ayuweg yugu boch e girdi’ ni bochan e ba muchugbil?
Pi Kristiano ni yad ba muchugbil e rayog ni ngar felfelan’gad ni bod Jesus. Mu yaliyew e re VIDEO ney, mi gimew weliy e fulweg ko re deer ni baaray.
-
Mang boch ban’en nrayog ni nge rin’ e pi Kristiano ni yad ba muchugbil nra yibnag e felfelan’ ngorad?
Baaray murung’agen ban’en
Der yog e Bible yangaren be’ mfin nrayog ni nge un ko mabgol. Machane be pi’ e athamgil nga laniyan’ be’ ni nge son nge “pag e bin baaram e yangar ni immoy riy nib gel e ar’ar u fithik’ i dow ni ma tay e piin fel’ yangaren,” ya re n’ey e rayog ni nge mo’maw’nag ngak be’ nib fel’ yangaren ni nge dugliy boch ban’en u fithik’ e gonop.—1 Korinth 7:36, NW.
5. Mmel’eg be’ nib fel’ ni ngam mabgolgow
En ga ra mel’eg ni ngam mabgolgow e aram reb e ban’en nrib ga’ fan ni ga ra dugliy u lan e yafos rom. Mu beegew e Matthew 19:4-6, 9, mi gimew weliy e fulweg ko re deer ni baaray:
-
Mang fan nsusun e dabi gurnag reb e Kristiano ir nge un ko mabgol?
Rayog ni nge ayuwegem e Bible ni ngam nang e pi fel’ngin ni ngam yaliy rok be’ ni ga be lemnag ni ngam mabgolgow. Bin th’abi ga’ fan riy e ngam gay be’ nib t’uf Jehovah rok. b Mu beegew e 1 Korinth 7:39 nge 2 Korinth 6:14. Tomuren mi gimew weliy e fulweg ko gal deer ni baaray:
-
Mang fan nreb e Kristiano ni taareb e michan’ rodad e ir e susun e ngad leayed?
-
Ga be lemnag ma uw rogon u wan’ Jehovah ni faan gad ra leay be’ nder ma t’ufeg?
Yira tay l’agruw i gamanman nib thil nga taab mat’ ma yow ra gafgow. Ere ku arrogon ni faanra leay reb e Kristiano be’ nder ma pigpig ngak Jehovah ma boor e magawon nra mada’nag
6. Mu lemnag e mabgol ni bod rogon ni ma lemnag Jehovah
Immoy boch e pumoon u Israel kakrom ni ur n’aged leengirad ni bochan boch ban’en ni yad e nge fel’ ngorad. Mu beegew e Malaki 2:13, 14, 16, mi gimew weliy e fulweg ko re deer ni baaray:
-
Mang fan nib fanenikan Jehovah e mabgol ni ma dar nde puluw fan ko n’en be yog e Bible?
Ra par be’ nge be’ ni gathi mabgol rok ara ra dargow e en mabgol rok ma ra kireban’ e arorow nde kireb e rok nge pi fakrow
Mu yaliyew e re VIDEO ney, mi gimew weliy e fulweg ko re deer ni baaray.
-
Faanra gimew ba mabgol be’ nder ma pigpig ngak Jehovah, ma mang e rayog ni ngam rin’ ya nge yag ni yib e felfelan’ nga lan e mabgol romew?
7. Mu fol ko pi motochiyel rok Jehovah ni fan ko piin mabgol
Sana rayog nib t’uf ni ngari athamgil be’ ya nge yag ni fol ko pi motochiyel rok Jehovah ni fan ko piin mabgol. c Machane ma tow’athnag Jehovah e piin yad ma rin’ e re n’ey. Mu yaliyew e re VIDEO ney.
Mu beegew e Hebrews 13:4, mi gimew weliy e fulweg ko gal deer ni baaray:
-
Ga be lemnag nib puluw e pi motochiyel rok Jehovah ni fan ko piin mabgol, fa? Mang fan ni ka mog ni arrogon?
Baadag Jehovah ni nge ngongliy e piin Kristiano babyoren e mabgol rorad, ma ngkur ngongliyed e babyor u nap’an nra dar e mabgol rorad ni bochan e aray rogon e motochiyel u yooren e nam. Mu beegew e Titus 3:1, mi gimew weliy e fulweg ko re deer ni baaray:
-
Faanra gab mabgol, ma kam ngongliy babyoren nrogon nib puluw ko motochiyel ko am fa dawor?
RAYOG NI NGE GAAR BE’: “Mang fan ni ngan mabgol? Dabiyog ni nga yigi par l’agruw ni’ u taabang?”
-
Uw rogon ni ga ra fulweg?
N’EN KAN FIL
Ngan par ni yib muchugbil nge ngan un ko mabgol e aram l’agruw e tow’ath ni ke yib rok Jehovah. L’agruw nrayog ni nge yibnag e felfelan’ ngodad ni faan gad ra rin’ u reb e kanawo’ nib puluw ko n’en nib m’agan’ Jehovah ngay.
Ngan Sul u Daken
-
Uw rogon nrayog ni nge rin’ be’ e tin rayog rok u nap’an ni kab muchugbil?
-
Mang fan ni be yog e Bible nreb e Kristiano ni taareb e michan’ rodad e ir e susun e ngad leayed?
-
Mingiyal’ e ba puluw ko Bible ni nge dar ba wu’ e mabgol?
MU GAY MURUNG’AGEN
Mang e be yip’ fan ni ngan mabgol “nrogon e mabgol ni ma tay e piin ni girdien Kristus”?
Mu yaliy l’agruw e video nra ayuwegem ni ngam dugliy e n’en nib fel’ ni ngam rin’ ni bay rogon ngak be’ ni nge fel’ e thin romew nge mabgol.
Mu fil fan ni be lemnag reb e walag ni pumoon ni kab ga’ fan e tin ke pi’ Jehovah ngak ko tin ke pag fan.
Mang boch ban’en nsusun e nge lemnag be’ u m’on ni nge dugliy ko ngar dargow e en mabgol rok ara nge bagayow me par rok?
“Ngan Tayfan e N’en ni ‘Got e Ke Chagiy’ Nga Taabang” (Fare Wulyang ko Damit, December 2018)
a Mu guy Yugu Boch e Thin 4 ni be weliy murung’agen ba wu’ e mabgol nra bagayow ma be par rok ni yugu aram rogon ndawori par bagayow nge be’ ni gathi mabgol rok.
b Bay boch e nam ni piin gallabthir e ir e yad ma mel’eg e en nge leay fakrad. Faanra aray rogon ma som’on e nge lemnag fa gallabthir ko ba t’uf Jehovah rok facha’ fa danga’, ma gathi ngar lemnagew urngin e salpiy rok ara rarogon u lan binaw.
c Faanra gimew be par be’ u taabang ndawor mmabgolgow, ma gur e ba milfan ngom ni ngam dugliy ko ngam chuw ara ngam mabgolgow.
