UMBUESÁ 42
Maã Bíblia umbeu mendarisá resé asuí tiwaitá resé ta umendari?
Yepeyepé ta umbeu yepé mira aé surí añhũ umendari ramé. Ma aikué miraitá tiwaá ta umendari ta uviveriwaá surí. Bíblia umbeu Jeová umaã puranga awá umendari asuí awá ti umendari.
1. Maã purangawaá tiwaitá umendari ta upoderi ta urikú?
Bíblia umbeu: ‘Umuñhã puranga kuá umendari, ma kuá tiwaá umendari puranga piri umuñhã.’ (Releri 1 Korintowaraitá 7:32, 33, 38.) Mayé awá ti umendari ‘umuñhã puranga piri’? Yepé cristão tiwaá umendari ti uprecisari uyupreocupari imena u iximirikú resé. Ape, urikú tempo umuñhã piri arama Jeová supé pregação upé, u até upoderi umutirika amú tetama kití upurakí piri arama Jeová supé. Asuí urikú tempo xinga umukirimbá arama iamizade Jeová irum.
2. Maã purangawaá umendariwaitá ta upoderi ta urikú?
Umendariwaitá ta urikú yuíri maã purangawaá. Bíblia umbeu “melhor dois do que um”. (Eclesiaste 4:9) Usasá kuayé awá irum usendú maã Bíblia umbeu imendarisá upé. Mairamé yepé apigá asuí yepé kuñhã ta umendari cartório upé, aintá uprometeri ta uyusaisú, ta uyurespeitari asuí ta uyumuñhakunta. Yawewaá resewara ta uyusaã seguro, asuí ta raíraitá ta usú ta uyusaã puranga asuí surí. Awá ti umendari cartório upé ti usú uyusaã kuayé.
3. Maã Jeová umanduári mendarisá resé?
Mairamé Jeová umendari yepesá apigá yepesá kuñhã irum, aé umbeu: “Apigá uxari kurí ipaya asuí imañha uikú arama ximirikú irum.” (Gênesi 2:24) Jeová uputari mena asuí iximirikú ta uyusaisú asuí ta uikú yepewasú ta upaka rameré aintá. Jeová uxari yepé mira umbawa imendarisá irum añhũ mairamé imena u iximirikú uganani aé amú mira irum. (Mateu 19:9) Ape, kuá mira upoderi uparawaka sá usú uxári imena u iximirikú u usú uperdoari aé. a (Remaã kuá nota.) Jeová uputari yepé cristão umendari añhũ yepé mira irum. — 1 Timóteo 3:2.
REYUMBUÉ PIRI ARAMA
Remaã mayé tiwaitá ta umendari asuí umendariwaitá ta upoderi ta uikú surí asuí ta upoderi ta umusurí Jeová.
4. Mayé tiwaitá ta umendari ta upoderi ta usari puranga ta vida
Jesus umaã puranga ti ramé ta umendari. (Mateu 19:11, 12) Peleri Mateu 4:23. Ariré pekuntari kuá resé:
-
Uikú ramé iwí upé Jesus ti umendari. Mayé aé usari ivida upurakí arama Jeová supé asuí uajudari arama miraitá?
Cristãoitá tiwaá ta umendari ta upoderi ta umuñhã mayé Jesus yawé. Pemaã kuá VÍDEO. Ariré pekuntari kuá resé:
-
Mayé yepé cristão tiwaá umendari upoderi umuñhã piri Jeová supé?
Rekuáwana kuá resé?
Bíblia ti umbeu muíri akayú yepé mira uprecisari urikú umendari arama. Ma aé umbeu usarú arama ‘usasá sangawa’, ñhãsé aé upoderi uparawaka mayentu pisasuré resewara aé, asuí uputari resewara umuñhã maã ipira uputari umuñhã. — 1 Korintowaraitá 7:36.
5. Reparawaka puranga awá irum resú remendari
Yepé maã importante retana yaparawaka awá irum yasú yamendari. Peleri Mateu 19:4-6, 9. Ariré pekuntari kuá resé:
-
Marã yepé cristão uprecisari umanduári puranga umendari rundé?
Bíblia upoderi uajudari rekuá arama mayewaá rikusá puranga yepé mena u ximirikú uprecisari urikú. Importante piri resikari awá usaisú Jeová. b (Pemaã kuá nota.) Peleri 1 Korintowaraitá 7:39 asuí 2 Korintowaraitá 6:14. Ariré pekuntari kuá resé:
-
Marã yarikuté yamendari awá irum umuñhã Jeová vontade?
-
Mayé Jeová uyusaã sá yamendari awá irum ti usaisú aé?
Sá yaxari mukũi suú amurupité ta upurakí yepewasú, aintá ta usú ta upurará. Yaweté yuíri yepé cristão umendariwaá yepé mira irum tiwaá usaisú Jeová usú upurará.
6. Remanduári mayé Jeová yawé mendarisá resé
Kuxiíma kuera, yepeyepé Deus miraitá ta uxari ta rimirikú maãntu. Peleri Malakia 2:13, 14, 16. Ariré pekuntari kuá resé:
-
Marã Jeová umaã ipuxí awá uxari imena u iximirikú ti ramé aé uyumuarixí imena u iximirikú suí?
Mairamé yepé mira umuarixí u uxari imena u iximirikú, awá ti urikú culpa asuí ta raíraitá ta upurará
Pemaã kuá VÍDEO. Ariré pekuntari kuá resé:
-
Sá ne mena u ne rimirikú ti umuñhã Jeová vontade, maã repoderi remuñhã reikú arama surí ne mendarisá upé?
7. Remuñhã maã Jeová umbeu mendarisá resé
Amuramé yepé mira uprecisari usikari kirimbá usendú arama maã Jeová umbeu mendarisá resé. c (Pemaã kuá nota.) Jeová uabençoari awá umuñhã kuayé. Pemaã kuá VÍDEO.
Peleri Ebreoitá 13:4. Ariré pekuntari kuá resé:
-
Será yapoderi yamuñhã maã Jeová umbeu mendarisá resé? Marã?
Siya tetama upé, governo umundú miraitá ta umendari ramé u ta uyuxari ramé ta umuñhã kuayé cartório upé. Jeová uputari cristãoitá ta usendú governo lei. Peleri Tito 3:1. Ariré pekuntari kuá resé:
-
Sá rerikú ne mena u ne rimirikú, resúwana cartório kití remendari arama, mayé lei umunduwaá?
SÁ YEPÉ MIRA UMBEU KUAYÉ: “Ti yaprecisari yamendari. Será ti yapoderi añhũ yaviveri yepewasú?”
-
Mayé resuaxara?
MAÃ REYUMBUÉ
Deus umaã puranga awá umendari asuí awá ti umendari. Aintá upoderi ta uikú surí asuí ta urikú yepé vida purangawaá ta umuñhã ramé maã Jeová umunduwaá.
Remanduári arama
-
Mayé tiwaitá umendari ta upoderi ta usari puranga ta vida?
-
Marã Bíblia umbeu yamendari arama añhũ awá irum umuñhã Jeová vontade?
-
Mairamé Deus uxari yepé mira umbawa imendarisá irum?
REPUTARI SERÁ REKUÁ PIRI?
Maã uputari umbeu “aintá suíwara kuaitá Kristo miraitá”?
“Uleriwaitá ta upurandú” (A Sentinela, 1.º de julho de 2004)
Remaã mukũi vídeo ta upoderiwaá ta uajudari indé reparawaka arama puranga namoro asuí mendarisá resé.
Remaã marã yepé yané imũ umaã puranga piri maã Jeová umeẽwaá ixupé uxariwaá suí.
Sá yepé mira uputari uxari imena u iximirikú, maã resé aé urikuté umanduári?
“Rerespeitari ‘maã Deus uxari aintá uikú aintá pawa’” (A Sentinela, dezembro de 2018)
a Nota: Remaã Rekuá piri arama 4 rekuá arama ta uyuxari resé ti ramé ta umuarixí.
b Nota: Yepeyepé tetama upé payaitá ta uparawaka awá irum ta raíraitá ta usú ta umendari. Usasá ramé kuayé importante aintá uparawaka yepé mira usaisuwaá Jeová, ti importante sá aé urikú dinheiro u sá aé yepé mira importante.
c Nota: Sá indé remorari yepé mira irum tirewaá remendari cartório upé, indé reprecisari reparawaka sá resú rexari aé u resú remendari irum.
