XOOK 42
¿Baʼax ku yaʼalik le Biblia yoʼolal le tsʼokaʼan u beeloʼoboʼ bey xan yoʼolal le solteroʼoboʼ?
Yaan tuʼuxoʼobeʼ ku yaʼalaʼaleʼ utiaʼal u yantal kiʼimak óolal tiʼ máakeʼ kʼaʼabéet u tsʼoʼokol u beel. Chéen baʼaleʼ maʼ tsaaj u tsʼoʼokol u beel máak utiaʼal u kiʼimaktal u yóoliʼ. Le Bibliaoʼ ku yaʼalikeʼ u pʼáatal solteroil máak bey xan le tsʼoʼokol beeloʼ junpʼéel regalo ku tsʼáaik Jéeoba.
1. ¿Baʼaxoʼob ku páajtal u beetik le solteroʼoboʼ?
Le Bibliaoʼ ku yaʼalikeʼ «le máax ku tsʼoʼokol u beeleʼ maʼalob baʼax ku beetik, chéen baʼaleʼ le máax maʼ tu tsʼoʼokol u beeleʼ maas maʼalob baʼax ku beetik» (xok 1 Corintios 7:32, 33, 38). ¿Baʼaxten ku yaʼalikeʼ le máax maʼ tu tsʼoʼokol u beeloʼ «maas maʼalob» baʼax ku beetik? Le máaxoʼob meyajtik Jéeoba maʼ tsʼokaʼan u beeloʼoboʼ maʼ tu chiʼichnaktaloʼob utiaʼal u kaxtikoʼob u yutsil u yíicham wa u yatan. Maas yaan tiempo tiʼob utiaʼal u binoʼob áantaj yaanal tuʼux utiaʼal u kaʼanskoʼob u Tʼaan Jéeoba bey xan utiaʼal maas biskubaʼob tu yéetel.
2. ¿Baʼax utsil ku taasik tiʼ máak u tsʼoʼokol u beel tu táan autoridad?
Le tsʼoʼokol beeloʼ ku taasik xan utsiloʼob. Le Bibliaoʼ ku yaʼalikeʼ «maas maʼalob kaʼatúul ke chéen juntúul» (Eclesiastés 4:9). Lelaʼ maases bey u yúuchul ichil le máaxoʼob meyajtik Jéeoba tsʼokaʼan u beeloʼoboʼ. Le máaxoʼob ku tsʼoʼokol u beeloʼob tu táan autoridad wa registro civileʼ maases ku yilik u yaabiltikubaʼob, u respetarkubaʼob yéetel u kanáantkubaʼob. Maʼ tu jáan máan tu tuukuloʼob u pʼatkubaʼob, tsʼoʼoleʼ u paalaloʼobeʼ maas ku yuʼubikoʼob táan u kanáantaʼaloʼob.
3. ¿Bix u yilik Jéeoba le tsʼoʼokol beeloʼ?
Jéeobaeʼ le ka tu tsʼoʼoksaj u beel le yáax xiib yéetel le yáax koʼoleloʼ tu yaʼalaj: «Le xiiboʼ yaan u pʼatik u papá yéetel u maama utiaʼal u pʼáatal yéetel u yatan» (Génesis 2:24). Jéeobaeʼ u kʼáat ka u yaabiltuba le íichamtsil yéetel le atantsiloʼ yéetel maʼ u pʼatkubaʼob. Chéen ku chaʼik u divorciarkubaʼob wa juntúul tiʼ letiʼob ku tusik u núup. Wa ku yúuchul beyoʼ Jéeobaeʼ ku tsʼáaik u derechoil tiʼ le máax tuʼus utiaʼal u yilik wa yaan u divorciarkubaoʼ (Mateo 19:9). a Letiʼeʼ ku yaʼalikeʼ chéen juntúul u yatan wa u yíicham máak unaj u yantal (1 Timoteo 3:2).
UTIAʼAL A MAAS NAʼATIK
Koʼox ilik bix jeʼel u kiʼimaktal k-óoleʼ yéetel bix jeʼel k-kiʼimakkúuntik u yóol Jéeoba kex tsʼokaʼan k-beel bey xan wa maʼeʼ.
4. Aprovechart maʼ tsʼokaʼan a beeliʼ
Jesúseʼ tu yilaj bey junpʼéel siibal le u pʼáatal solteroil máakoʼ (Mateo 19:11, 12). Xokeʼex Mateo 4:23, kéen tsʼoʼokkeʼ ka tsikbaltikeʼex lelaʼ:
-
Tumen maʼ tsʼokaʼan u beel Jesús kaʼacheʼ, ¿bix úuchik u meyajtik u Taata yéetel u yáantik u maasil?
Le máaxoʼob maʼ tsʼokaʼan u beeloʼoboʼ jeʼel u kiʼimaktal u yóoloʼob wa ku beetkoʼob le baʼaxoʼob tu beetaj Jesúsoʼ. Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
-
Jeʼex t-ilil teʼ videooʼ, ¿baʼaxoʼob jeʼel u páajtal u beetik le sukuʼunoʼob yéetel le kiikoʼob maʼ tsʼokaʼan u beeloʼoboʼ?
¿A wojel wa?
Le Bibliaoʼ maʼ tu yaʼalik jaypʼéel años kʼaʼabéet u yantal tiʼ máak utiaʼal u tsʼoʼokol u beel. Baʼax ku yaʼalikeʼ maʼ u tsʼoʼokol u beel máak jach táankelem, tumen teʼ kʼiinoʼob jeʼeloʼ jach ku tsʼíiboltik u yantaltiʼ relaciones sexuales, le oʼolal maʼ tu tuklik tubeel baʼax ken u beete (1 Corintios 7:36).
5. Yéey tubeel máax yéetel kun tsʼoʼokol a beel
Junpʼéel tiʼ le baʼaxoʼob jach kʼaʼabéet u tuklik máak tubeeloʼ letiʼe u yilik máax yéetel kun tsʼoʼokol u beeloʼ. Xokeʼex Mateo 19:4-6, 9, kéen tsʼoʼokkeʼ ka tsikbaltikeʼex lelaʼ:
-
Wa taak u tsʼoʼokol u beel juntúul máax meyajtik Jéeobaeʼ, ¿baʼaxten jach kʼaʼabéet u tuklik tubeel le baʼax ken u beetoʼ?
Le Bibliaoʼ jeʼel u yáantkech a wil baʼax modosil unaj u yantal tiʼ juntúul maʼalob íichamtsil wa juntúul maʼalob atantsileʼ. Pero baʼax maas kʼaʼanaʼaneʼ letiʼe a kaxtik juntúul máax u yaabiltmaj Jéeobaoʼ. b Xokeʼex 1 Corintios 7:39 yéetel 2 Corintios 6:14. Kéen tsʼoʼokkeʼ ka tsikbaltikeʼex lelaʼ:
-
Le máax meyajtik Jéeobaoʼ, ¿baʼaxten kʼaʼabéet u yéeyik juntúul máax u yaabiltmaj xan Jéeoba utiaʼal u tsʼoʼokol u beel tu yéetel?
-
¿Bix ken u yuʼubiluba Jéeoba wa juntúul máax meyajtikeʼ ku tsʼoʼokol u beel yéetel juntúul máax maʼ tu meyajtik?
Wa ku tsʼaʼabal meyaj kaʼatúul baʼalcheʼob maʼ igualoʼobeʼ yaan u sen muʼyajoʼob, wa ku tsʼoʼokol u beel juntúul máax meyajtik Jéeoba yéetel juntúul maʼeʼ yaan xan u yantaltiʼob problemas
6. Ilawil le tsʼoʼokol beel jeʼex u yilik Jéeobaoʼ
Úuchjeakileʼ le israelitaʼoboʼ ku divorciarkubaʼob tiʼ u yatanoʼob chéen yoʼolal jeʼel baʼaxakeʼ. Xokeʼex Malaquías 2:13, 14, 16, kéen tsʼoʼokkeʼ ka tsikbaltikeʼex lelaʼ:
-
¿Baʼaxten Jéeobaeʼ u pʼeek u divorciarkuba máak chéen yoʼolal jeʼel baʼaxakeʼ?
Le núupkʼeban yéetel le divorciooʼ jach ku beetik u sufrir le máax ku tuʼusloʼ bey xan u paalaloʼob
Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
-
Wa tsʼokaʼan a beel yéetel juntúul máax maʼatech u meyajtik Jéeobaeʼ, ¿baʼax jeʼel a beetik utiaʼal a biskabaʼex maʼalobeʼ?
7. Beet baʼax ku yaʼalik Jéeoba yoʼolal le tsʼoʼokol beeloʼ
Yaan máaxoʼobeʼ jach difícil u yilkoʼob u beetkoʼob baʼax ku yaʼalik Jéeoba yoʼolal le tsʼoʼokol beeloʼ. c Chéen baʼaleʼ letiʼeʼ ku bendecirtik le máaxoʼob ku tsʼáaik u yóol u beetoʼoboʼ. Chaʼanteʼex le VIDEOOʼ.
Xokeʼex Hebreos 13:4, kéen tsʼoʼokkeʼ ka tsikbaltikeʼex lelaʼ:
-
Techeʼ bix a wilik, ¿maʼalob wa le baʼax ku yaʼalik Jéeoba yoʼolal le tsʼoʼokol beeloʼ? ¿Baʼaxten bey a tuukuloʼ?
Óoliʼ tiʼ tuláakal yóokʼol kaabeʼ le autoridadoʼoboʼ ku yaʼalikoʼob kʼaʼabéet u registrartik máak wa ku tsʼoʼokol u beel bey xan wa ku divorciarkuba. Le oʼolal Jéeobaeʼ bey u yaʼalik xan ka u beet le máaxoʼob meyajtikoʼ. Xokeʼex Tito 3:1, kéen tsʼoʼokkeʼ ka tsikbaltikeʼex lelaʼ:
-
Wa tsʼokaʼan a beeleʼ, ¿a registrarmaj wa tu táan le autoridadoʼoboʼ?
BAʼAX SUUK U KʼÁATAʼAL: «¿Jach wa tu jaajil kʼaʼabéet u tsʼoʼokol u beel máak? Si maʼ kʼaas chéen u múul kajtal máakiʼ».
-
Techeʼ, ¿baʼax jeʼel a núukikeʼ?
BAʼAX TSOʼOLI
U pʼáatal solteroil máak bey xan le tsʼoʼokol beeloʼ junpʼéel regalo ku tsʼáaik Jéeoba. Wa ku beetik máak baʼax ku yaʼalik Dioseʼ jeʼel u kiʼimaktal u yóol kex tsʼokaʼan u beel bey xan wa maʼeʼ.
Baʼax ta kanaj
-
¿Baʼaxoʼob ku páajtal u sen beetik le máaxoʼob maʼ tsʼokaʼan u beeloʼoboʼ?
-
¿Baʼaxten le Bibliaoʼ ku yaʼalikeʼ le máax meyajtik Jéeobaoʼ chéen unaj u tsʼoʼokol u beel yéetel uláakʼ máax meyajtik Jéeoba?
-
Jeʼex u yaʼalik le Bibliaoʼ, ¿baʼax oʼolal jeʼel u páajtal u divorciarkuba máakeʼ?
KAN U MAASIL
¿Baʼax u kʼáat u yaʼal u tsʼoʼokol u beel máak yéetel «juntúul máax ku meyajtik Yuumtsil»?
Chaʼant kaʼapʼéel videoʼob jeʼel u yáantik máak utiaʼal u yilik baʼaxoʼob kʼaʼabéet u chʼaʼik en cuenta wa taak u tsʼoʼokol u beeleʼ.
Ilawil baʼaxten juntúul sukuʼuneʼ ku yaʼalikeʼ tsʼoʼok u kʼamik yaʼab bendiciónoʼob úuchik u pʼatik jujunpʼéel baʼaloʼob.
¿Baʼax unaj u chʼaʼik en cuenta juntúul máax meyajtik Jéeoba antes tiʼ u divorciarkuba wa u pʼatik u núup?
a Ilawil nota 4, teʼeloʼ ku maas tsoʼolol baʼax oʼolal jeʼel u páajtal u pʼatik u núup máak kex maʼ tuʼus yéetel yaanaliʼ.
b Yaan tuʼuxoʼobeʼ letiʼe taatatsiloʼob yéeyik máax yéetel kun tsʼoʼokol u beel u hijo wa u hijaoʼ. Chéen baʼaleʼ le taatatsiloʼob meyajtik Jéeobaoʼ maʼ tu yilkoʼob wa ayikʼal bey xan wa kaʼanchajaʼan u xook le máax ken u yéeyoʼoboʼ, baʼax ku yilkoʼobeʼ wa u yaabiltmaj Jéeoba.
c Wa chéen múul kajaʼanech yéetel wa máaxeʼ teech ken a wil wa yaan u tsʼoʼokol a beel wa yaan a pʼatik le máax yéetel múul kajaʼanechoʼ.
Maʼ xaaneʼ jeʼel u yutstal xan ta wicheʼ
KʼÁATCHIʼOB SUUK U BEETAʼAL
¿Bix u tsʼáaikoʼob xook u testigoʼob Jéeoba yéetel le Bibliaoʼ?
Le xook ku tsʼáaik u testigoʼob Jéeobaoʼ gratis, jeʼel u páajtal a usartik a Bibliaeʼ yéetel jeʼel u páajtal a invitartik wa máax utiaʼal u láakʼintikech teʼ xookoʼ.
