PWONY ME 43
Lukricitayo Myero Gunen Mato Kongo Nining?
I twok lobo-ni ducu, dano gitye ki tam mapatpat ka odok i kom mato kongo. Jo mogo giyero me mato kongo ka gitye ka namo kacel ki luremgi. Jo mukene giyero pe me mato kongo kulu. Jo mukene doki gimato kongo wa i labyel kweri. Baibul mono loko nining i kom mato kongo?
1. Tika rac me mato kongo?
Baibul pe waco ni mato kongo rac. Me ka meno, ka Baibul oryeyo mot mapol ma Lubanga omiyo botwa, keto “kongo vino ma yomo cwiny dano” i kingi. (Jabuli 104:14, 15) Co ki mon mogo ma lugen ma kiloko i komgi i Baibul bene onongo gimato kongo.—1 Temceo 5:23.
2. Tam ango ma Baibul miyo bot jo ma giyero me mato kongo?
Jehovah kwero mato kongo mukato kare woko kacel ki mero. (Jo Galatia 5:21) Lokke waco ni: “Pe ibed i kin jo ma gin lumero ki kongo.” (Carolok 23:20) Dong, ka wayero me mato kongo, kadi bed watye ki jo mukene nyo watye kenwa, pe omyero wamat madwong ma weko pe watamo maber, pe watwero juko lebwa ki jami ma watimo, nyo wabalo yotkomwa woko. Ka pe watwero jukke kenwa ka odok i kom mato kongo, ci omyero wabed atera pe me matone kulu.
3. Watwero nyuto woro nining pi tam ma jo mukene gumoko madok i kom mato kongo?
Ngat acel acel myero oyer ka ebimato kongo nyo pe. Pe omyero wangol kop i kom ngat mo ma oyero me mato kongo i yo mupore, dok pe omyero wadi ngat mo ma pe mito mato kongo ni omati. (Jo Roma 14:10) Watwero yero pe me mato kongo ka man twero kelo peko pi jo mukene. (Kwan Jo Roma 14:21.) Pe myero ‘walub gin ma konyowa keken, ento myero walub gin ma konyo luwotwa bene.’—Kwan 1 Jo Korint 10:23, 24.
NONG NGEC MATUT
Nen kong cik ma igi lac me Baibul ma bikonyi me moko ka ce omyero imat kongo, ki kongo marom mene ma omyero imati. Nen bene gin ma itwero timo ka itye ki peko me mato kongo mukato kare woko.
4. Mok tammi ka ce ibimato kongo
Yecu onongo neno mato kongo nining? Me nongo lagamme, nen kong tango mukwongo ma en otimo. Kwan Jon 2:1-11, ci wunyam lapeny magi:
-
Ki i tango man, gin ango ma watwero pwonyo madok i kom kit ma Yecu onongo neno kwede mato kongo ki dong jo ma gimato kongo?
-
Kit macalo Yecu pe owaco ni mato kongo rac, Lakricitayo myero onen ngat ma oyero me mato kongo nining?
Ento, kadi bed Lakricitayo moni tye agonya me mato kongo, meno pe te lokke ni opore pire me mato kongo kare ducu. Kwan Carolok 22:3, ci wunyam kit ma jami ma kiryeyogi piny-nyi twero gudo ka ce ibimoko tammi me mato kongo nyo pe:
-
Ka ibidwoyo mutoka nyo ibitiyo ki macin mo.
-
Ka ibedo dako ma oyac.
-
Ka daktar omini tam ni omyero pe imat kongo.
-
Ka itye ki peko me jukke ken ka icako matone.
-
Ka cik pa gamente pe ye ni imat kongo.
-
Ka itye kacel ki ngat mo ma oyero pe me mato kongo kulu pien obedo ki peko me mero i kare mukato angec.
Tika omyero iwek kongo obed tye i pati me nyommi nyo i namo mukene? Me neno gin ma romo konyi me moko tammi, tuk VIDIO.
Kwan Jo Roma 13:13 ki 1 Jo Korint 10:31, 32. I nge kwano ginacoya acel acel, wunyam lapeny man:
-
Keto cik ma iye lac man i tic twero konyi nining me moko tam ma biyomo cwiny Jehovah?
Lakricitayo acel acel moko pire kene ka ebimato kongo nyo pe. Kadi bed i kare mogo en mato kongo, i kare mukene en twero yero pe me matone
5. Mok tammi i kom kongo marom mene ma ibimato
Ka iyero me mato kongo, wi myero opo i kom lok man: Kadi bed Jehovah pe kwero mato kongo, ento en waco ni mato kongo mukato kare woko rac. Pingo? Kwan Kocea 4:11, 18, ci wunyam lapeny man:
-
Gin ango ma twero timme ka ngat moni mato kongo wa i labyel kweri?
Ngo ma romo konyowa pe me mato kongo mukato kare woko? Mitte ni wabed mwol nyo wange ka ma kerowa gik iye. Kwan Carolok 11:2, ci wunyam lapeny man:
-
Pingo obedo tam me ryeko me moko ka kwene ma ibigik iye ka odok i kom mato kongo?
6. Ngo ma twero konyo ngat moni me juko mato kongo mukato kare woko?
Nen gin ma okonyo laco mo me juko mato kongo mukato kare woko. Tuk VIDIO, ci wunyam lapeny ma lubo-ni.
-
Ki i vidio man, Dmitry onongo timme nining ka omato kongo?
-
Tika en ojuko mato kongo lawangacel?
-
I agikkine en obedo ki kero me juko mato kongo wa i labyel kweri nining?
Kwan 1 Jo Korint 6:10, 11, ci wunyam lapeny magi:
-
Mero rac lakwene?
-
Ngo ma nyuto ni ngat ma obedo lamero twero lokke?
Kwan Matayo 5:30, ci wunyam lapeny man:
-
I kare ma Yecu otiyo ki labol me nguno cing, en onongo tye ka waco ni twero mitte ni wajal jami mogo wek wayom cwiny Jehovah. Gin ango ma itwero timone ka itye ka tute me juko mato kongo? a
Kwan 1 Jo Korint 15:33, ci wunyam lapeny man:
-
Lurem ma ibedo kwedgi gitwero gudo kit ma imato kwede kongo nining?
NGAT MO ROMO PENYI NI: “Tika mato kongo rac?”
-
In iromo gamone ningo?
WOT WIYE WIYE
Jehovah ominiwa kongo wek wanong yomcwiny, ento en owaco ni mato kongo mukato kare woko ki mero rac.
Ngo ma ipwonyo?
-
Baibul loko ningo i kom mato kongo?
-
Pekki ango ma bino macalo adwogi me mero?
-
Watwero woro tam ma jo mukene gumoko madok i kom mato kongo nining?
TIM KWED
I yo ma nining ma lutino me mwaka apar ki wiye gitwero moko tam mabeco ka odok i kom mato kongo?
Nen kong jami ma itwero timogi me loyo peko me mato kongo mukato kare woko.
Tika omyero Lakricitayo onywak i yoko gilaci?
I pwony ma wiye tye ni “Onongo Amato Kongo Matek Labongo Mer,” nen kit ma laco mo ojuko kwede mato kongo mukato kare woko.
a Twero mitte ni jo ma gimer jwi gunong kony ki bot ludaktar ka gimito juko mato kongo. Pol pa ludaktar giwaco ni jo ma gitye ki peko me mero omyero pe gubil kongo kulu.
