Wɔ oyuwadɩ munwala nɩ, ɩsʋnɩ adwɩnɩ mɔɔ mmenii lɛ wɔ nzã nwʋ. Ɩyɛ a, abiyemmɔ nɩɩ bɔ ɔhɔnwʋmmɔ bɔ numɔ nʋ nzã. Abiyemmɔ sʋ̃ bɛánlʋ kʋlaa. Abiyemmɔ sʋ̃ bɔnʋ nkʋ̃ʋ̃ ma benyia po. Mɩnla yɛ Bayɩbʋlʋ ɩkã ɩfalɩ nzã nwʋ a?

1. Asʋ̃ ɩdɩ tanɩ kɛɛ yɛkɔnlʋ nzã a?

Bayɩbʋlʋ yɩ ɩádɩndɛ itiyia nzanlʋnlɛ. Mfomi sɛ Bayɩbʋlʋ ɩkãã akyɛdɩ mɔɔ Nyamɩnlɩ ɩva ɩma yɛ a, itinyia nzã ɩkɩnla nwʋ. Ɩkã kɛɛ ɩva ‘nzã ɩma desanii ma yɩ ahʋnlɩnɩ di fɛlɛkʋ̃.’ (Ndwomi 104:14, 15) Na Bayɩbʋlʋ yɩ bʋbɔ mmenyia nɩɩ mmaalɛ nɔhʋanlɛmaa be po mɔɔ bɔnlʋnlɩ nzã bɛ anlima.—1 Timoti 5:23.

2. Mɩnla fʋlɔdulɛ yɛ Bayɩbʋlʋ ɩfa ɩma bɛzabɛ mɔɔ bɔnʋ nzã a?

Gyehova tɩndɛ tiyia nzã sʋ̃maa mɔɔ abiye kɔnlʋ nɩɩ nzanyianlɛ. (Galatiyiamaa 5:21) Bayɩbʋlʋ ɩkã kɛɛ: “Áma ɔkɔ ɛkɩnla bɛzabɛ mɔɔ bɔnʋ nzã sʋ̃maa nɩ bɔ nwʋ.” (Ɛɣɛlɛwulɛ 23:20) Meti sɛ yesi pɔkɔ kɛɛ yɛkɔnlʋ nzã wɔ yɛ awudo po a, íni kɛɛ yɛnʋ nkʋ̃ʋ̃ ma ɩkã kezimɔ yɛdwɩ̃, ɩma yɛdɩndɛlɛ nɩɩ yɛ nyɛlɩyɛ ɩyɛ bɛsabɛsa, anzɛnyɩɩ ɩma yepila yɛ nwʋ po. Sɛ yɛáhʋla yɛhyɛ yɛ nwʋ zʋ wɔ nzã dʋdʋ mɔɔ ɩsɛ kɛɛ yɛnʋ nwʋ a, nɩ mɛyɩ ɩkɛyɛ baaba kɛɛ yekeyiaki ɩnlʋnlɛ kʋlaa.

3. Sɛ abiye si pɔkɔ kɛɛ ɩkɔnlʋ nzã anzɛnyɩɩ ɩlɔ́nʋ a, mɩnla ti mɔɔ íni kɛɛ yɛtɩndɛ yetiyia yɩ a?

Kɛ abiye kɔnlʋ nzã anzɛnyɩɩ ɩlɔ́nʋ nzã nɩ, ɩdɩ yɩzayɩ yɩ pɔkɔzilɛ. Íni kɛɛ yɛtɩndɛ yetiyia abiye mɔɔ izi pɔkɔ kɛɛ ɩkɔnlʋ nzã ɛgyɩkɩ̃ɩ̃ nɩ. Na ɔzɔ la sʋ̃ yɛ íni kɛɛ yɛhyɛ abiye kɛɛ ɩnlʋ nzã a. (Wulomimaa 14:10) Sɛ yɛnʋ nzã na sɛ ikelile mmenii mvʋlɔ a, mɛyɩ yesi pɔkɔ kɛɛ yɛlɔ́nʋ kʋlaa. (Kɩnga Wulomimaa 14:21.) ‘Yɛádwɩnɩ yɛzayɩ nkʋ̃ yɛ bʋwɔyɛlɛ nwʋ, mfomi yɛdwɩnɩ yɛ ɔhɔnwʋmmɔ sʋ̃ bɔ bʋwɔyɛlɛ nwʋ.’—Kɩnga 1 Kɔlɛntɩmaa 10:23, 24.

 SUMÁ SƲ̃MAA

4. Sí pɔkɔ kɛɛ ɔkɔnlʋ nzã anzɛnyɩɩ ɔlɔ́nʋ

Kɛ nɩ Gyisɛsɩ bu nzanlʋnlɛ ise a? Mɔɔ ɩkɛma ɔkɔnwʋ munwalɩyɛ nɩ, sunzú nnwʋánlɩdɩyɛ mɔɔ ili bɔmʋnlɩ mɔɔ ɩyɛlɩ nɩ nwʋ kila. Kɩnga Dwɔɔnʋ 2:1-11, na akʋ̃ bozunzú ndwokɔɣizialɛ eyimmɔ nwʋ:

• Mɩnla yɛ nnwʋánlɩdɩyɛ eyi ɩma yɛnwʋ yɛfalɩ kezimɔ Gyisɛsɩ bu nzanlʋnlɛ nɩɩ bɛzabɛ mɔɔ bɔnʋ nzã nɩ nwʋ a?

• Kɛmɔ Gyisɛsɩ ɩátɩndɛ itiyia nzanlʋnlɛ nɩ, kɛ ɩsɛ kɛɛ Kilisinyiamaa bobu bɛzabɛ mɔɔ bɔnʋ nzã nɩ bese a?

Naasʋ̃, nwʋmɔ ɔhʋanɩ mɔɔ Kilisinyianii be ɩwɔ kɛɛ ɩkɔnlʋ nzã nɩ iáhile kɛɛ ɩkɔhʋla ɩkɔnlʋ nzã mmɩlɩ bela. Kɩnga Ɛɣɛlɛwulɛ 22:3, na akʋ̃ bozunzú kezimɔ bʋwabɩlɛ eyimmɔ kɔhʋla kɛhã pɔkɔ mɔɔ ekezi kɛɛ ɔkɔnlʋ nzã anzɛnyɩɩ ɔlɔ́nʋ nɩ nwʋ:

• Ɛkɛhãã kaalɩ anzɛnyɩɩ ɛlɛ mahyini be kɛyɛ egyima.

• Mmɩlɩ mɔ ɛɣɩnzɛɛ.

• Dɔkɩta ɩhã ihile wʋ kɛɛ áma ɔnʋ nzã.

• Ɩyɛ sɩ ɩma wʋ kɛɛ ɛkɛhyɛ wʋ nwʋ zʋ wɔ nzã dʋdʋ mɔɔ ɔkɔnlʋ nɩ nwʋ.

• Mmɛla ɩáma ɔhʋanɩ wʋ kɛɛ ɔkɔnlʋ nzã.

• Mmɩlɩ mɔ ɛ nɩɩ abiye mɔɔ iyiaki nzanlʋnlɛ bɔwɔ dɩka be.

Asʋ̃ ɩsɛ kɛɛ ɛkyɛ nzã wɔ wʋ ayɩfʋlɔ anzɛnyɩɩ paati tʋ a? Mɔɔ ɩkɔwʋwa wʋ ma ekezi pɔkɔ nɩ, yɩ́ VIDIYO nɩ.

Kɩnga Wulomimaa 13:13 nɩɩ 1 Kɔlɛntɩmaa 10:31, 32. Sɛ bɛkɩnga ɛhɛlɛlɛ ndwokɔ yɩ numɔ ɔkʋ̃ bela bowie a, bozunzú odwokɔɣizialɛ eyi nwʋ:

• Mɩnla ti mɔɔ sɛ ɛfa egyinalɛzʋ-odwokɔ eyi di egyima a, ɩkɛma Gyehova anyɩ kele a?

 5. Sí nzã dʋdʋ mɔɔ ɔkɔnlʋ nɩ nwʋ pɔkɔ

Sɛ esi pɔkɔ kɛɛ ɔkɔnlʋ nzã a, kakɛ eyi: Ɩwɔ numɔ kɛɛ Gyehova ɩádɩndɛ itiyia nzanlʋnlɛ dɩyɛ, naasʋ̃ ɩtɩndɛ itiyia nzã sʋ̃maa nlʋnlɛ. Mɩnla ti a? Kɩnga Hoziya 4:11, 18, na akʋ̃ bozunzú odwokɔɣizialɛ eyi nwʋ:

• Sɛ abiye nʋ nzã sʋ̃maa a, mɩnla yɛ ɩkɔhʋla ikezi a?

Kɛ ɩkɛyɛ na yɛahwɩ̃ yɛ nwʋ wɔ nzã sʋ̃maa nlʋnlɛ nwʋ a? Ɩsɛ kɛɛ yɛnwʋ dʋdʋ mɔɔ yɛnʋ a ɩkɔhʋla ikelile yɛ. Kɩnga Ɛɣɛlɛwulɛ 11:2, na akʋ̃ bozunzú odwokɔɣizialɛ eyi nwʋ:

• Mɩnla ti mɔɔ ɩsɛ kɛɛ yesi pɔkɔ wɔ nzã dʋdʋ mɔɔ yɛkɔnlʋ nwʋ a?

6. Sɛ ɔnʋ nzã sʋ̃maa a, kɛ ɩkɛyɛ na wʋayiaki a?

 YƖ DƆKƆWƆLƐ

Gyehova ɩva nzã ɩma yɛ kɛɛ yɛva yele yɛ anyɩ, naasʋ̃ ɩtɩndɛ itiyia nzã sʋ̃maa nlʋnlɛ nɩɩ nzanyianlɛ.

Kɛ Okowuwa Ekeze a?

• Mɩnla yɛ Bayɩbʋlʋ ɩkã ɩfalɩ nzã nwʋ a?

• Mɩnla asianɩ yɛ ɩwɔ nzã sʋ̃maa nlʋnlɛ nu a?

• Sɛ abiye isi pɔkɔ kɛɛ ɩkɔnlʋ nzã anzɛnyɩɩ ɩlɔ́nʋ a, mɩnla ti mɔɔ íni kɛɛ yɛtɩndɛ yetiyia yɩ a?