Caqueumechi raquiduam nii tati pu che pulcutun dungu mu. Quiñeque che, quiñeque mu müten pulcutuquingün mülele tañi hueni engu. Ca quiñeque pulcutuquelaingün chem no ume. Caquelu che ngollicauquingün. ¿Chem ngütramcai Biblia pulcutun dungu mu? Peabiiñ.

1. ¿Hueya dungungepi mai pulcutol?

Biblia eipilai ñi cümenon pulcutol. Eipi Chau Ngünechen huli tati pulcu ayühulabel piuque (Salmo 104:14, 15). Biblia mu tripai bentren huentru ca domüche huenupüramquebilu Jehová pütucoquelu pulcu (1 Timoteo 5:23).

2. Biblia, ¿chem ngülam huli pulcutun dungu mu?

Jehová ayüquelai pu ngolliquelu ca pu alü pulcutuquelu (Gálatas 5:21). Beimu Biblia eipi: “Deyüconquilnge tati pu pütocoquelu alün pulcu” (Proverbios 23:20). Beimu pulcutuliiñ, cuñiutucuucüleaiñ. Bemnoliiñ, ngünehuelaabüiñ taiñ eipin ca taiñ bemün, cüme raquiduamlaabüiñ ca cutrancületuabüiñ. Beimu quiduleliiñ cam müleliiñ caque che iñchiñ, nehue pulcutulaaiñ. Beimu pepi ngüneunoliiñ pütocoliiñ pulcu, doi cümeabüi taiñ pütocohuenoal pulcu.

3. ¿Chumngechi yamneabüiñ caquelu che ñi ayüquel?

Caque quiñeque iñchiñ ngümintuabüiñ (dulliabüiñ) taiñ pulcutual cam pulcutunoal. Beimu hueya troquilaabiiñ pu che pulcutuquelu quim ngünenehun mu ca iñi no ume altrontuculaabiiñ ñi pulcutual (Romanos 14:10). Cabei doyümabüiñ taiñ pulcutunoal, bemngechi hueya duamel-laabiiñ caque pu che (papiltunge Romanos 14:21). Iñchiñ ayüquelaiñ taiñ quidu duamuhual müten, ayüquiiñ caque che tañi cüme beleal (papiltunge 1 Corintios 10:23, 24).

 DOI CÜME QUIMNGE

4. Ngümintunge tami pulcutual cam pulcutunoal

Jesús, ¿chem raquiduamquebüi pulcutun mu? Taiñ quimal peaiñ Jesús tañi hunen amatun dungu. Papiltoiñ Juan 2:1-11. Papiltungele hula ngütramcaabiiñ tübachi epu ramtun:

• Tañi eipin tübachi huirin tripalu Biblia mu, Jesús ¿chem raquiduamquebüi pulcu mu ca pu che pulcutuquelu?

• Jesús hueya troquiquelabüi pu che pulcutuquebülu, beimu quiñe che pulcutule ¿chumngechi troquiabiiñ?

Pu cristiano pulcutuabüingün, huelu quiñeque mu doi cümeabüi tañi ngünehual. Papiltoiñ Proverbios 22:3. Papiltungele hula ngütramcaabiiñ tañi cümepen mai pulcutual inalechi dungu mu:

• Petu adümbilmi quiñe auto.

• Niepüñeñcülelmi.

• Doctor eipielmu tami pulcutunoal.

• Ngüneneunolmi chumten tami pulcutol.

• Tati ley elunoelmu tami pulcutol.

• Mülelmi quiñe che engu cuibi mu ngollibengebülu.

¿Cümepeabüi mai ñi müleal pulcu ngapituhun (mabün) mu cam caquelu fiesta mu? Taiñ quimal manelbalchi ngülam tübachi dungu mu, quintulbe tati VIDEO.

Papiltoiñ Romanos 13:13 ca 1 Corintios 10:31, 32. Papiltungele hula ngütramcaabiiñ tübachi ramtun:

• Tübachi billque ngülam tripalu Biblia mu, ¿chumngechi quelluabeimu tami ayühulabel Jehová tami ngümintun mu?

 5. Cüme raquiduamnge chumten tami pulcutual

Pulcutulmi, loncontucunge: Jehová hueya troquiquelabi tami pulcutual, huelu hueya troquibi bentren pulcutual, ¿chemu? Papiltoiñ Oseas 4:11, 18. Papiltungele hula ngütramcaabiiñ tübachi ramtun:

• Quiñe che bentren pulcutule, ¿chem upaabüi?

¿Chem quelluabeiñmu taiñ bentren pulcutunoal? Müna cüme quimal chumten pulcutuabüiñ. Papiltoiñ Proverbios 11:2. Papiltungele hula ngütramcaabiiñ tübachi ramtun:

• ¿Chemu cümeabüi tami cüme quimal chumten pulcutual?

6. Ngünencaquenoelmu tati pulcu

 CHEM PEIÑ TÜBAMU

Jehová elcünoi pulcu taiñ ayühulatu, huelu quidu ayüquelai taiñ ngollicahual ca alün pulcutual.

Chem quimeleleiñmu tüba

• Biblia, ¿chem eipi pulcutun dungu mu?

• Alün pulcutuliiñ, ¿chem upaabüiñ taiñ mongen mu?

• ¿Chumngechi yamneabüiñ caquelu che tañi ngümintun pulcutun dungu mu?