FARKARKOR 43
Rosai Refo Ikofen ḇekur Aninem Swan ya?
Snonggaku ḇero supswan ine ḇesiper moḇ smam aninem swan ya naḇesisye. Sia simarisen skain sinem swan kuker bati sesya. Sia wer skinfir fa simewer sinem swan ya kermgun ḇaḇeri. Ḇesesya wer sinem rawo simser. Imboi rosai Refo ikofen ḇekur aninem swan ya?
1. Kinem swan nama nsasar ke?
Raris rosai Refo ikofen ya, kinem swan ima roi ḇesasar ḇa. Rofyor Refo dapḇair roi ḇepyum Manseren Allah byuk ḇe ko na, dap kako ”anggur ḇefrur fa snonggaku sya sisnesna naryaḇ”. (Mazmur 104:14, 15) Oso wer ido, ro Refo kofawi snonggaku ḇeḇeso ḇeyakfarmyan faro Yahwe I sakkinem swan ya.—1 Timotius 5:23.
2. Rosai Refo danun faro snonggaku ḇekara fa ḇeyinem swan ya?
Yahwe imewer kaku myam snonggaku ḇeyinem sambraḇ swan ma ḇemasaser sya. (Galatia 5:21) Refo ya doḇe, ”Kwainus awer snonggaku ḇeyinem sambraḇ anggur sya.” (Amsal 23:20) Inja imbe kinem swan warpu snonggaku ḇese ke, kemir ke, kopok kinem syadi awer. Kinem syadi ido, nari nafnai ra kakara koḇena napyum ḇa, kawos famfnom ma kofrur roi ḇeḇye ḇa, ḇaido kodufe. Komku manggunko ro aninem swan ya ḇa ido, ipyum ya kinem awer bo komnai ḇeri.
3. Snonggaku ḇese skinfir fa sinem swan ido moḇsa komam si rai?
Snonggaku oser-oser na skinfir ro manggunsi imbe sinem swan ke roḇa. Koḇemankara awer snonggaku ḇeyinem kermgun monda, ma kopok kodif awer ḇemewer ḇeyinem sya. (Roma 14:10) Inja kinem swan bo nari nafrur fa snonggaku ḇese skara sasar ido, ipyum ya kinem awer. (Kowasya Roma 14:21.) Kosewar ’fandun manggun [koḇena] ḇardi awer’ ḇape ’fandun snonggaku ḇese kako’.—Kowasya 1 Korintus 10:23, 24.
SWEWAR KAKU WER
Nari kawos farkankin ro Refo ḇefnoḇek Au fa kwinfir imbe winem swan ke roḇa, ma imbe winem ido kwara barbor ḇyena. Ma nari kawos kako rosai nari wafrur rofyor samswen fa wamnai ro aninem swan ya.
4. Kwinfir imbe winem swan ke roḇa
Moḇsa Yesus dakmam aninem swan ya rai? Imbe kofawi na ido, kokara mura ro mujisat ḇerandak Yesus ifrur anya. Kowasya Yohanes 2:1-11, raimnai kawos fakfuken suine:
-
Ro mujisat anine, rosai kofawi ro moḇ Yesus myam aninem swan ya ma snonggaku ḇeyinem na?
-
Snar Yesus myam aninem swan ḇe roi ḇesasar ḇa, inja snonggaku Kristen myam oso dinem swan ido moḇsa na ḇyerai?
Imbude snonggaku oso kyara fa dinem swan insama imarisen, rarirya mboi nane napyum ker faro i ḇa. Kowasya Amsal 22:3, raimnai kawos moḇsa roi nane nafnoḇek Au fa kwinfir imbe winem swan ke roḇa:
-
Ausya wun oto, motor, ḇaido wafrur mesin ya fa imbrane.
-
Ausya wafadores.
-
Dokter ikofen fa winem swan awer.
-
Kwara jadi fa winem kermgun monda ḇa.
-
Sasoser pamarenta ḇero moḇ Beja idwarek farandinem swan ya.
-
Ausya kwain kuker snonggaku ḇeyinem sambraḇ swan ro fyor iwara, mboi fafisu ine isya imnai kwar ro farandinem swan ya.
Fafisu wafrur munara fakawin ḇaido anan kayam kuker snonggaku ḇesesya, bisa fasos swan ya fa sinem ke roḇa? Imbe wafawi rosai nari wafrur ya ido, komam VIDIO.
Kowasya Roma 13:13 ma 1 Korintus 10:31, 32. Raimnai kawos fakfuken ine:
-
Rosai ḇefnai fa waso anun ḇero mnuk-mnuk nane kada nari wafrur fa Yahwe imarisen?
Snonggaku Kristen oso na kyinfir ro manggundi imbe dinem swan ke roḇa. Ro swaf ono dinem, mboi ro swaf ḇese wer dakkinem swan ya ḇa
5. Wap ḇepon barbor ro swan nari winem ya
Kwara imbe winem swan ido, waswarepen roi ine: Yahwe doḇe kinem swan yama sasar oḇa, imboi imewer kaku kinem syadadi. Rosai ḇefnai fa kinem syadadi awer? Kowasya Hosea 4:11, 18, raimnai kawos fakfuken ine:
-
Snonggaku oso dinem swan ya fa nasyadi ido, rosai na ḇejadi ya?
Rosai na kofrur kaku insama kinem syadadi ḇa? Kosasor pyum ko ma kofawi samambraḇ koḇena. Kowasya Amsal 11:2, raimnai kawos fakfuken ine:
-
Rosai ḇefnai fa ipyum ya kwara ḇepon barbor ro swan nari winem ya?
6. Nyan fa snonggaku oso imnai ro farandinem swan ya
Mampan roi ḇefrur fa snon oso imnai ro farandinem swan ya. Komam VIDIO, raimnai kawos fakfuken nane.
-
Ro vidio insanja, moḇsa Dmitry kenem ḇyena nasnai rai snar fyarandinem swan ya?
-
Napyan fa imnai ḇeri ro aninem swan ya ke?
-
Ḇarpur ya, rosai ḇefnoḇek i fa imnai ro farandinem swan ya?
Kowasya 1 Korintus 6:10, 11, raimnai kawos fakfuken suine:
-
Snonggaku ḇefarandinem swan sya sifrur sasar ḇeba ke?
-
Rosai ḇefnai fa kofawi bisa simnai ro farandinem swan ya?
Kowasya Matius 5:30, raimnai kawos fakfuken ine:
-
Manseren Yesus doḇe kokaruk koḇramna, ine ḇyeḇair roi ono naisya fandun fa korir kobur na insama Yahwe imarisen. Swewar kaker fa wamnai ro farandinem swan ya ido, rosai nari wafrur ya? a
Kowasya 1 Korintus 15:33, raimnai kawos fakfuken ine:
-
Bebati kuker ḇefarandinem swan sya ido, rosai nari wakfrur ya?
SIA SOḆE: ”Kinem swan yama sasar oḇa.”
-
Moḇsa na kwarem rai?
FARKARKOR ḆYENA
Manseren Yahwe fyasos swan ya fa kinem insama komarisen, imboi imewer kinem syadadi ma komasaser.
Waswarepen Kaḇer
-
Rosai Refo ikofen ḇekur aninem swan ya?
-
Kinem syadadi swan ya ido, roi ḇeḇye ḇa rosai nari kosmai ya?
-
Snonggaku ḇese skinfir fa sinem swan ido, moḇsa na komam si rai?
SWEWAR NABOR WER
Roma inai babo sya rosai na skara ḇepon rofyor skinfir fa imbe sinem swan ya ke roḇa?
Rosai monda nari wafrur fa wamnai ro aninem syadadi ya?
”Nwa Mamam Ḇemnis faro Aninem Swan ya” (Syap Baryas 1 Januari 2010)
Wawasya fawar ”Ayama Drem Ḇemgir Risaya”. Fawar ine ikofenḇair rariso snon oso randak ya dinem syadi swan ya mboi bisa fyadwer kenem ḇyena.
a Snonggaku ḇewarai kwar ro farandinem swan ya, sfandun fafnoḇek ro dokter ḇefawi kaku sya insama bisa simnai. Dokter ḇebor sya soḇe snonggaku ḇeradine sya, ipyum ya simnai ḇeri ro aninem swan ya kada.
Wamarisen Ido Mam Ine Kako
FAKFUKEN RO KAWASA KAM
Moḇsa Saksi-Saksi Yahwe Sya Farkarkor Refo Sena Isnai Rai?
Bisa bepake Refo rosai monda fa wafarkor Refo ḇeyor ḇaḇyak ḇa kuker Saksi-Saksi Yahwe sya. Wamgak awer fa wor kina karyer Bansya kam ḇaido bati Besya fa sakso.
