Diɲɛ fan bɛɛ, mɔgɔw hakilinaw tɛ kelen ye dɔlɔ kan. A ka di dɔw ye ka dɔlɔ min tuma ni tuma ni u teriw ye. Dɔw yɛrɛ tɛ sɔn ka dɔlɔ min fewu. Nka dɔ wɛrɛw bɛ dɔlɔ min fo k’u su. Bibulu bɛ mun fɔ dɔlɔ ko la?

1. Yala ko jugu don ka dɔlɔ min wa?

Bibulu t’a fɔ ko dɔlɔmin ye ko jugu ye. Ni Bibulu yɛrɛ bɛ kuma nilifɛnw ko la Ala bɛ minnu di an ma, a bɛ diwɛn sen don olu la, a b’a fɔ ko “diwɛn bɛ mɔgɔ dusukun ɲagali”. (Zaburu 104:14, 15) Cɛ ni muso kantigi dɔw, minnu kofɔra Bibulu kɔnɔ, olu ye dɔlɔ min.​—1 Timote 5:​23.

2. Mɔgɔ minnu b’a sugandi ka dɔlɔ min, Bibulu bɛ laadilikan jumɛnw di olu ma?

Ka dɔlɔ min fo k’a dama tɛmɛn ani dɔlɔtɔya, Jehova tɛ sɔn o ma. (Galasikaw 5:21) A ka Kuma b’a fɔ ko: “I ni dɔlɔtɔw kana jɛ”. (Ntalenw 23:20) O la, ni an b’a sugandi ka dɔlɔ min, a kɛra ko an ni mɔgɔ wɛrɛw don walima ko an bɛ an kelen na, an man kan ka dɔlɔ caman min, min bɛ se ka an bali ka miiri koɲuman, ka an bali ka se sɔrɔ an ka kumaw ani an ka kɛwalew kan walima ka fiɲɛ bila an ka kɛnɛya la farikolo ta fan fɛ. Ni an tɛ se ka se sɔrɔ an ka dɔlɔminta kan, an ka kan k’a bɔ an yɛrɛ la ka dɔlɔmin dabila pewu-pewu.

3. Minnu b’a latigɛ ka dɔlɔ min, an bɛ se ka bonya da olu ka latigɛli kan cogo di?

Bɛɛ kelen-kelen de b’a latigɛ ni i bɛ dɔlɔ min walima ni i t’a min. Mɔgɔ min b’a sugandi ka dɔlɔ min cogo bɛrɛbɛnnen na, an man kan ka o tigi jalaki. Mɔgɔ min fana t’a fɛ ka dɔlɔ min, an man kan ka o tigi jagoya a k’a min. (Romɛkaw 14:10) Ni an ka dɔlɔmin bɛ kɛ sababu ye ka gɛlɛyaw lase mɔgɔ wɛrɛw ma, an b’a sugandi ka ban ka dɔlɔ min. (Romɛkaw 14:21 kalan.) An tɛ an “yɛrɛ nafa ɲini, fɔ mɔgɔ wɛrɛ nafa.”​—1 Kɔrɛntekaw 10:23, 24 kalan.

 DƆ FARA I KA DƆNNIYA KAN

4. A latigɛ ni i bɛna dɔlɔ min walima ni i tɛna a min

Yesu hakilina tun ye mun ye dɔlɔmin kan. Walasa ka o jaabi dɔn, an k’a lajɛ Yesu ye kabako fɔlɔ min kɛ. A’ye Yuhana 2:1-11 kalan, o kɔ aw ka baro kɛ nin ɲininkaliw kan:

• Nin kabako in bɛ an kalan mun de la Yesu hakilina kan ka ɲɛsin dɔlɔ ani dɔlɔminnaw ma?

• Ikomi Yesu m’a fɔ ko dɔlɔ kana min, o la mɔgɔ min b’a sugandi ka dɔlɔ min, krecɛnw ka kan ka o tigi ye cogo di?

Ikomi krecɛn bɛ se ka dɔlɔ min, o kɔrɔ tɛ ko hakilitigiyako don a ka to ka o kɛ tuma bɛɛ. A’ye Ntalenw 22:3 kalan, o kɔ, i bɛ latigɛli min kɛ dɔlɔmin ta fan fɛ, aw k’a sɛgɛsɛgɛ nin ko ninnu bɛ nɔ bila o latigɛli la cogo min na:

• Ni i bɛna mɔbili boli walima ni i bɛna baara kɛ ni masinimafɛn dɔw ye.

• Ni i kɔnɔman don.

• Ni dɔgɔtɔrɔ ye i laadi ko i kana dɔlɔ min.

• Ni i tɛ se ka dan bila i ka dɔlɔminta hakɛ la.

• Ni sariya tɛ i yamaruya ka dɔlɔ min.

• Ni i bɛ ni mɔgɔ ye min y’a sugandi ka ban ka dɔlɔ min. O tigi y’o kɛ ka d’a kan a delila ka gɛlɛya a ma ka se sɔrɔ a ka dɔlɔminta hakɛ kan waati tɛmɛnnenw na.

Yala i ka kan ka dɔlɔ di mɔgɔw ma furu ɲɛnajɛw walima ɲɛnajɛ wɛrɛw la wa? Walasa k’a dɔn fɛn min bɛ se ka i dɛmɛ ka o latigɛli kɛ, a’ye WIDEYO lajɛ.

Romɛkaw 13:13 ani 1 Kɔrɛntekaw 10:31, 32 kalan. Tɛmɛsira kelen-kelen bɛɛ kalannen kɔ, aw ka baro kɛ nin ɲininkali kan:

• Nin sariyakolo waleyali bɛ se ka i dɛmɛ cogo di i ka latigɛli kɛ min bɛ diya Jehova ye?

 5. A latigɛ i bɛna dɔlɔ hakɛ min min

Ni i y’a sugandi ka dɔlɔ min, i k’i hakili to nin na: Hali ni Jehova tɛ ban dɔlɔmin ma, a tɛ sɔn dɔlɔtɔya ma. Mun na? Ose 4:11, 18 kalan, o kɔ aw ka baro kɛ nin ɲininkali kan:

• Ni mɔgɔ dɔ bɛ dɔlɔ min kojugu, o bɛ se ka na ni mun ye?

Ka dɔlɔ min kojugu, an bɛ se ka an yɛrɛ tanga o ma cogo di? An ka kan ka kɛ mɔgɔ majiginnenw ye walima minnu bɛ u ka ko danyɔrɔw dɔn. Ntalenw 11:2 kalan, o kɔ aw ka baro kɛ nin ɲininkali kan:

• Ka dan kɛrɛnkɛrɛnnen sigi i ka dɔlɔminta hakɛ la, mun na o ye hakilina ɲuman ye?

6. Se sɔrɔ dɔlɔmin kojugu kan

 BAKURUBAFƆLI

Jehova ye dɔlɔ di an ma walasa ka an nisɔndiya nka a tɛ sɔn dɔlɔtɔya ani dɔlɔmin kojugu ma.

Seginnkanni

• Bibulu bɛ mun fɔ dɔlɔ ko la?

• Farati jumɛnw de bɛ dɔlɔmin kojugu la?

• Tɔw bɛ latigɛli minnu kɛ dɔlɔmin ko la, an bɛ se ka bonya da o latigɛliw kan cogo di?