BAG I 43

Ke ze Ñwaʼni Nsi tshwèt ntshob mfà num nenu nduʼ à?

Ntùm njù, benntùn ghù nkwade nzenze mfà num nduʼ. Tsemoʼ num nkô nenu me nduʼ ngelañ bo be bo shun tshob là. Tsemoʼ gha nenu mba ndaʼ metsili. Tsemoʼ nu kà mbume. Ke ze Ñwaʼni Nsi tshwèt ntshob mfà num nenu nduʼ à?

1. A bag nenu nduʼ ké?

Ñwaʼni Nsi keʼ be tshùʼ nenu nduʼ. Là, ngelañ a num ntunde ba ndaʼ tse Nsi fà ben nà, a tshob mfà num “nduʼ mi a be mfà tsiañde ntù mènntùn nà.” (Yobkwi 104:14, 15) Tsemoʼ bandum mba bènnzwi bamntù tse bo tunde ntùm Ñwaʼni Nsi là naʼ nke nu nduʼ.—1 Timôtio 5:23.

2. Zit ntag Ñwaʼni Nsi tshwèt mfà ben bo tshoʼ nenu nduʼ à?

Yaweh Nsi bàn nenu nduʼ yàm mba nebume. (Galatia 5:21) Ntshob mi mbe: “kà tsho shun bin à ghanu nduʼ [yàme].” (Tànkùt 23:20) Ndùlà, a be ze be tshoʼ nenu nduʼ—mba ngelañ be be tùʼ ben nà—a keʼ bwô be nu yàm kà ke bèn nekwade mebwô, nke ntshobte, mba neghù tshu kekàn, ke nenu nduʼ ke nywin num zebe ntswe mebwô lo. O be ke kuʼni netshùb wul o ngelañ o tshwèt nu nduʼ là, mbʼa bètte kʼo bèn nu nduʼ mba ndaʼ metsili.

3. Be bag bin kuʼni mfiʼ ze tsemoʼ loʼ mfà num nenu nduʼ lʼà ndùke?

Mba we lo bèn ngù netshoʼ kuaʼ ze tu a be zʼa nu nduʼ ke nga lo. Be keʼ ghù netshoʼde taʼ mèn zʼa loʼ mfiʼ nenu nduʼ ndaʼ metsili là, ke bèn ngù netènde taʼ mèn zʼa loʼ mfiʼ nebe ke nu là, a nu. (Roma 14:10) Be yen mbe be nu nduʼ mbʼaʼ be ju faʼde mbwe tsemoʼo, mba be kuʼni neloʼ mfiʼ nebe ke nu. (Siañ Roma 14:21.) Be keʼ be ‘diag à ju zʼa bwô ben nà, là ju zʼa bwô moʼ mèn nà.ʼ—Siañ 1 Korintô 10:23, 24, nwt-F.

TSWEʼ NTUN MI

Yen ba tun ntshùʼ Ñwaʼni Nsi tsʼa ywimdʼo nelèn a be zʼo nu nduʼ, mba njoñ a bètte o nu là. Mbèn njen ju zʼo kuʼni neghù a be ze nenu nduʼ bʼa taʼ ywiʼ wù là.

4. Loʼ mfiʼ a be zʼo nu nduʼ kʼo ke nu lo là

Yésu naʼ nke nkwadʼà ke mfà num nenu nduʼ à? Nelèn bùnde, yen mbwe mesim a naʼ ngù là. Siañ Yohané 2:1-11, mbèn mbùnde tshen mbètte li:

Yen mesim ni nke ntswide ben à ke mfà num nkwade Yésu mfà num nduʼ, mba num ben tse bo num nu nduʼ à?
Mba Yésu naʼ mbe ke tshùʼ nduʼ là, a bètte taʼ mènkristô nke njen mèn zʼa tshoʼ nenu nduʼ lʼà ndùke?

A nenùn mbe taʼ mènkristô kuʼni nenu nduʼ, ndaʼndù a keʼ bʼa zenu ne nke nenu nduʼ njoñ ngelañ fa. Siañ Tànkùt 22:3, mbèn njen mba tshen tshu li kuʼni neywimdʼo nelèn a be zʼo nu nduʼ ke nga lo là:

Oaʼ soñ yañbaʼ ke nefaʼ num taʼ loñve lo.
O be jùm.
Ngatshwén tshùʼ o nenu nduʼ
O keʼ kuʼni netshùb wul o ngelañ o num nu nduʼ là.
Ngomnaʼ tshùʼ o nenu nduʼ.
O bʼa bo mènntùn zʼa tshoʼ nebe ke bèn nu nduʼ nummbe a naʼ taa yi netshùb wul i ngelañ a naʼ nke nu nduʼ là.

Oaʼ fà nduʼ benntùn ngelañ taʼ nandà ke moʼ jùa ké? Neyen ju ze bʼa ywimdʼo neloʼ mbwô mfiʼ là,lôde LAʼDE NETSHAÑ.

LAʼDE NETSHAÑ: Devrais-je servir de lʼalcool? (2:41)

Siañ Roma 13:13 bo 1 Korintô 10:31, 32. O miagde nesiañ mba zit nka Ñwaʼni Nsi lo, o bùnde yen bètte li:

O yab yen tun ntshùʼ li ntùm faʼ, mbʼaʼ ywimdʼo netsiañde ntù Yaweh Nsi à ndùke?

Mba zit mènkristô lo bèn nke ntshoʼ kuaʼ ze tu a be zʼa nu nduʼ kʼa ke nu lo là. A be be ndù a num nu nduʼ, mba tsemoʼ ngelañ bʼa tshoʼ nenya ke nu

5. Yab ndù num njoñ nduʼ o nu là

A be zʼo tshoʼ nenu nduʼ là, kwimde yenni: Yaweh Nsi keʼ be tshùʼ nenu nduʼ ndaʼndù, a bàn nenu nduʼ yàme. Numke? Siañ Osé 4:11, 18, mbèn mbùnde yen bètte li:

Ke ze bʼa tum a be ze mènntùn nu nduʼ yàm à?

Ke ze bʼa ywimde ben nenya ke nu nduʼ yàm à? A bwô be lèn tsebe ndù. Siañ Tànkùt 11:2, mbèn mbùnde yen bètte li:

Numke a mbʼa mbwô ju neyab ndù num njoñ nduʼ o nu lʼà?

6. Ju zʼa kuʼni neywimde mènntùn nenya ke nu yàm nà

Yen ju zʼa naʼ njwimde taʼ mandum netsin nenu nduʼ yàm nà. Lôde LAʼDE NETSHAÑ, mbèn mbùnde tshen mbètte li.

LAʼDE NETSHAÑ: “Je ne supportais plus ma façon de vivre” (6:32)

Ntùm laʼde netshañ, Dmitry naʼ nke ngù à ndùke ngelañ a nu nduʼ à?
A naʼ fiag yi netsin nenu nduʼ ké?
Ke zʼa naʼ njwimdʼé netsin nenu nduʼ yàm à?

Siañ 1 Korintô 6:10, 11, mbèn mbùnde tshen mbètte li:

Ke ze Ñwaʼni Nsi tshwèt ntshob mfà num nenu nduʼ mbum à?
Ke zʼa tshwèt ndaʼde mbe mènntùn zʼa num nu nduʼ yàm nà kuʼni nebade à?

Siañ Matio 5:30, mbèn mbùnde yen bètte li:

Nekeb bu nguaʼ nke ndaʼdʼà mbe a bètte be ghù nkagtùn yàm num netsiañde ntù Yaweh Nsi. Ke ze bʼo ghù a be zʼo tshwèt nzwe bo mat nenu nduʼ yàm à? *

Siañ 1 Korintô 15:33, mbèn mbùnde yen bètte li:

O nke ntôg ngelañ bin à shun tse bo num nu nduʼ yàm nà, mba be bo tèndʼo neghù à ke?

BE MÈNNTÙN BÈTTE MBE: “A bag nenu nduʼ ké?”

Oaʼ bùndʼà ndùke?

JU NETSHÙBE

Yaweh Nsi fà nduʼ ben num netsiañde ntù ben, ndaʼndù a num ntshùʼ nenu nduʼ yàm ke nenu nduʼ mbum no.

Mbètte nekwimde

Ke ze Ñwaʼni Nsi tshwèt ntshob mfà num nenu nduʼ à?
Ba ywiʼ tsʼa be njam nenu nduʼ yàm nà bʼa tsile?
Be bag bin kuʼni mfiʼ ze tsemoʼ loʼ mfà num nenu nduʼ lʼà ndùke?

Kide léʼ zʼo miagde là:

Mfiʼ ze bʼo loʼ là

A be zʼo tshoʼ nenu nduʼ là, lôde ba tshu tsʼa bètte o siañde num bwe kà nu là, mbèn njab ndù num njoñ nduʼ zʼa bètte o nu là.

Tsemoʼ mfiʼ:

Your other goal

DIAGE

Ghuan benntùn kuʼni neloʼ mbwô mfiʼ mfà num nduʼ à ndùke?

Kʼo nu kʼo ke nu lo, kwade mfà num ntshoʼfaʼ (2:31)

Yen tshu tse bʼo ghù num neghuaʼ mat nenu nduʼ yàm nà.

“Quelle place lʼalcool a-t-il dans votre vie? ” (La Tour de Garde, 1^er janvier 2010)

Benkristô ghù netsham tshañ nduʼ ke ngrassi lo kà nu nduʼ ké?

“Questions des lecteurs” (La Tour de Garde, 15 février 2007)

Ntùm tshô “Jʼétais une barrique sans fond”, yen ju zʼa naʼ njwimde taʼ mandum neghuaʼ mat nenu nduʼ mbum nà.

“La Bible transforme des vies” (La Tour de Garde, 1^er mai 2012)

^ Tsemoʼ ngelañ, bʼa bètte mbe taʼ ngatshwén ywimde taʼ mèn zʼa num nu nduʼ yàm nà neghuaʼ yen mat là. Bwoñ ghatshwén tshob num benntùn bo ghù ngùtni bo nduʼ là mbe zenu bʼa netsin ke bèn nu mba ndaʼ metsili.

JÙ BIN YÔG MATMAT!—TAʼ NSWADE NTSHOB MFÀ NUM ÑWAʼNI NSI