Lidan sun ubóu, ámuñegueinarügüti hasaminan gürigia luagu latuniwa binu. Añahein gürigia, díseguati hatun ani adüga hamuti dan le hámañanu lan hamadagu. Añahein amu, mátuntiña ni kata le gaganati binu. Añaheinti hagía, hátaguba darí habacharuadun. Ka tariñagubei Bíbülia luagu latuniwa binu?

1. Wuribati san latuniwa uniñein gabacharuadaditi?

Mariñaguntu Bíbülia wuriba lan latuniwa uniñein gabacharuadaditi. Lubaragiñe lira, ariñagatu anuhein lan “diwéin to agundaaragüdübalin libagari” gürigia laganagua saragu idewesei le ru laalibei Heowá woun (Sálumu 104:14, 15). Ayanuhatu giñe Bíbülia hawagu wügüriña hama würiña úaraguatiña ha meha átubaña diwéin (1 Timotéu 5:23).

2. Ka adundehani tíchugubei Bíbülia houn ha anúadirubaña hatun uniñein gabacharuadaditi?

Mámarügüñein lun bacharuaü lamahada Heowá, máhati giñe lun gátadi wamá (Galasiana 5:21). Ariñagatu Bíbülia: “Móundaraguaba hama gátaditiña” (Ariñawagúni 23:20). Ligíati, ánhawa anúadira watun uniñein gabacharuadaditi—wábugua lan yebe o hama amu—moun lumuti watun darí lun libidiñedun woun ka lan wariñagubei o wadügübei o siñá lan wasaminarun kei lubudubu, ni lun wígirun lun ladügün uniñein lun wasandirun. Anhein siñá lubéi wárügüdagun woungua, mátagubei wamá.

3. Ida luba warufudun inebe lan le hanúadirubei amu woun?

Lunti lanúadiruni kada aban wádangiñe anhein látuba lubéi o mátunbei lan. Moun lumuti wíchugun hadurun ha anúadirubaña hatun murusun, mafosurun wagíame ni aban gürigia lun latun anhein mabusenrun lubéi (Rómana 14:10). Ani himei wamuti matun wamá anhein wachugeraguagüdüba lubéi amu gürigia (aliiha huméi Rómana 14:21). Lugundun wagía kristiánugu, “moun lumuti wáluahani le buídubei woungua, lunti wáluahani le buídubei houn amu” (aliiha huméi 1 Korintuna 10:23, 24).

 SIGÍ HUMÁ AFURENDEIRA

4. Anúadira huméi anhein hátuba lubéi o mátunbadün lan

Ka meha lasaminarubei Hesusu luagu uniñein gabacharuadaditi? Lun wasubudiruni óunabagülei, ariha waméi furumiñeti milaguru le ladügübei. Aliiha huméi Huan 2:1-11, ábameti hayanuhan luagu álügüdahani burí le:

• Ka larufudahabei abahüdaguni le woun luagu ligaburi larihini Hesusu átuni hama ha átubaña?

• Kei mariban lubéi larihini Hesusu latuniwa uniñein gabacharuadaditi, ka lunbei lasaminaruni aban kristiánu luagu gürigia le anúadirubei latun?

Lau sun gayara lan latun aban kristiánu, mama súnwandan lun buidu lan ladügüni. Aliiha huméi Ariñawagúni 22:3 ani ariha huméi anhein buídubei lubéi lun hatun lidan sügǘ burí le:

• Habugaha somu ugunei o hahandiliha somu máhina.

• Würi huguya ani dageinañadün.

• Ariñagaali surusia hun lun matun humá uniñein gabacharuadaditi.

• Hénrenguti hun lun hárügüdagun hungua luéi hatun saragu.

• Mígirunti lilurudun hageira lun hatun.

• Lúmañadün aban gürigia le anúadiraali lun mátunbei lan lugundun gaturobulin lan meha luma átaguni.

Lunti san híchaahan uniñein gabacharuadaditi lidan aban fedu lánina maríei o lidan amu fedu? Lun hasubudiruni ka lan lunbei gabaroun humani, ariha huméi BIDÉU.

Aliiha huméi Rómana 13:13 luma 1 Korintuna 10:31, 32. Lárigiñe haliihani kada bérusu, ayanuha humá luagu álügüdahani le:

• Ida luba líderagunün adundehani le lun gunda lan Heowá lau le hanúadirubei?

 5. Anúadira huméi átiribei lan hatun

Anhaün anúadira hatun uniñein gabacharuadaditi, haritagua huméi le: Lau sun mariban lan larihini Heowá átuni, magundanti lau wátagun saragu. Ka uagu? Aliiha huméi Oseasi 4:11, 18, ábameti hayanuhan luagu álügüdahani le:

• Ka gayaraabei lasuseredun lun aban gürigia le átubei saragu?

Ka gayaraabei líderaguniwa lun matun wamá saragu? Mosu wasubudiruni halía lan lébeda le wayaraabei ahandiliha. Aliiha huméi Ariñawagúni 11:2, ábameti hayanuhan luagu álügüdahani le:

• Ka uagu buidu lubéi lun hasubudiruni halíaba lan lébeda hatun?

6. Le gayaraabei líderagunün lun matun humá saragu

 LE HAFURENDEIRUBEI

Íbini aban lan idewesei lúmagiñeti Heowá binu, máhati lun wabacharuadun ni lun wátagun saragu.

Águyuguagüdüni

• Ka tariñagubei Bíbülia luagu uniñein gabacharuadaditi?

• Kaba asusereda anhein hanarime lubéi wátagun?

• Ida liña warufudun inebe lan le hanúadirubei amu woun lidan luáguti uniñein gabacharuadaditi?