Wóón unusen fénúfan, a sókkopat án aramas ekiek usun ewe mettóch sakaw. a Ekkóch ra sani le ún sakaw atun ra kunoufengen me chiener kewe. Nge ekkóch ra filatá ar resap fókkun ún sakaw. Nge pwal ekkóch ra ún sakaw tori ar ra wesen sakawoló. Met Paipel a apasa usun sakaw?

1. Mi ngaw án emén epwe ún sakaw?

Ewe Paipel ese erá pwe mi ngaw ún sakaw. Atun a fós usun ekkewe chómmóng liffang Kot a fang ngeni aramas, a pwal apachaalong “wain pwe aramas repwe ün o pwapwa.” (Kölfel 104:14, 15) Ewe Paipel a fós usun ekkóch mwán me fefin mi tuppwél iir mi ún sakaw.​—1 Timoty 5:23.

2. Ifa án Paipel kapasen emmwen ngeni chókkewe mi filatá le ún sakaw?

Jiowa a oput án emén epwe únnúmmóng sakaw me únnúpuch. (Kalatia 5:21) Iei met an we Kapas a apasa: “Kosap chiechi ngeni ekewe mi ünümong wain.” (Än Salomon Fos 23:20) Iwe, ika sia filatá le ún sakaw, ese lifilifil ika wóón pwisin ach, are fiti ekkewe ekkóch le ún, sisap únnúmmóng pwe ete fataffatangaw ekiekich, iwe sise chúen tongeni nemeni ach fós me féffér, me ete angealó péchékkúlen inisich. Ika sise tongeni nemeni úkúkún únúmach sakaw, iwe epwe fen éch ach sipwe úkú seni.

3. Ifa usun sipwe súféliti án ekkewe ekkóch kefil wóón sakaw?

A lamot án emén me emén epwe pwisin filatá ika epwe ún sakaw are esap. Sisap apwúngú emén ika a filatá an epwe chék aúkúkú únúman, me sisap pwal oumwesi emén an epwe ún ika ese mochen ún. (Rom 14:10) Sia filatá ach sisap ún sakaw ika epwe aosukosuka ekkewe ekkóch. (Álleani Rom 14:21.) Sisap ‘chök kütta püsin ach feiöch, nge sipwe pwal kütta feiöchün chiechiach.’​—Álleani 1 Korint 10:23, 24.

 KÚTTAFICHI

4. Apwúngaló ika kopwe ún sakaw are kosap

Ifa ekiekin Jesus usun ún sakaw? Ren ach sipwe silei, sipwe etittina ewe áeúin manaman a féri. Álleani Johannes 2:1-11, me mwirin pwóróusfengen wóón ekkeei kapas eis:

• Seni ewe manaman Jesus a féri, met sia tongeni káé usun an ekiek usun sakaw me chókkewe mi ún sakaw?

• Pokiten Jesus ese apwúngú chókkewe mi ún sakaw, iwe itá epwe ifa ekiekin emén Chón Kraist atun emén a filatá le ún sakaw?

Iwe nge, inaamwo ika emén Chón Kraist a tongeni filatá le ún sakaw, esap weween pwe ina eú alen tipachem an epwe féri ena. Álleani Än Salomon Fos 22:3, me mwirin ppii ika kopwe ún sakaw are kosap lón eú me eú ekkeei mettóch:

• Kopwe uwou tarakú are pwal och sókkun waa.

• Ka pwopwo.

• Emén tokter a erenuk pwe kosap ún.

• A weires ngonuk óm kopwe aúkúkú únúmom.

• Ese mumutá me ren mwú óm kopwe ún.

• Ka fiti emén mi filatá an esap ún sakaw pokiten a weires ren me lóóm.

Kopwe awora sakaw lón óm apwúpwúlú are lón pwal eú pari? Ren óm kopwe silei met kopwe féri, fichi ei VIDEO.

Álleani Rom 13:13 me 1 Korint 10:31, 32. Mwirin álleaan eú me eú wokisin, pwóróusfengen wóón ei kapas eis:

• Ifa usun ena kapasen emmwen a tongeni álisuk le eáni eú kefil epwe apwapwaai Jiowa?

 5. Filatá úkúkún únúmom sakaw

Ika ka filatá le ún sakaw, chemeni ei: Jiowa ese apwúngú emén mi ún sakaw, nge a oput án emén únnúmmóng. Pwata? Álleani Osea 4:11, 18, me mwirin pwóróusfengen wóón ei kapas eis:

• Met a tongeni fis ika emén a únnúmmóng sakaw?

Ifa usun sipwe túmúnúkich pwe site únnúmmóng sakaw? A lamot ach sipwe aúkúkú únúmach me silei úkúkún met sipwe únúmi. Álleani Än Salomon Fos 11:2, me mwirin pwóróusfengen wóón ei kapas eis:

• Pwata a lamot ach sipwe apwúngaló úkúkún sakaw sipwe únúmi?

6. Met a tongeni álisi emén le úkú seni an únnúmmóng sakaw?

 MENLAPAN

Jiowa a awora sakaw pwe sipwe pwapwa, nge a oput ach sipwe únnúmmóng me únnúpuch.

Enniwili

• Met ewe Paipel a erá usun sakaw?

• Ifa efeiengawen án emén únnúmmóng sakaw?

• Ifa usun sia tongeni súféliti chókkewe mi filatá ar resap ún sakaw are chókkewe mi filatá ar repwe ún sakaw?