Leitung bupah zu tungtang muh dan a tuamtuam om hi. Pawlkhat in a lawmte tawh dawn khawm thei uh hi. A dawn vet lo mi a om mah bangin kham masiaha a dawn zong om uh hi. Zu tawh kisai Lai Siangtho’ muhna in bang a hiam?

1. Zu dawn pen a khial hiam?

Lai Siangtho in zu dawn pen kham lo hi. Tua sangin, Pasian’ hong piak letsongte lakah “mihing lungsim a nuamsak ding leenggahzu” kihel zaw hi. (Late 104:14, 15) Lai Siangtho sunga mi citak pawlkhat in zong zu na dawn uh hi.​—1 Timoti 5:23.

2. Zu a dawn theite adingin Lai Siangtho in bang lamlahna pia a hiam?

Zu tampi dawnna le zukhamna pen Jehovah in kham hi. (Galati 5:21) “Zu nenete tawh kikhawl kei in,” ci-in Lai Siangtho in gen hi. (Paunak 23:20) Tua ahih manin midang tawh i dawn a, khat kia-a i dawn zongin i pilvang zawh loh dong, kampau le gamtatna i kep theih loh zah dong, le i cidamna a siatsak donga dawn ding hi lo hi. Ei le ei kikem zo lo-a tampi i dawn khak zel leh ngawl vet leng hoihzaw ding hi.

3. Zu tawh kisai midangte thu khensatna i zahtaklam koici lak thei ding i hiam?

Zu dawn ding le dawn loh ding pen mi khat ciat ii khensat ding thu ahi hi. A hoih beka a dawnte i gensiat ding ahih loh mah bangin, a dawn nuam lo mite zong dawn dinga i sawl tentan ding hi lo hi. (Rom 14:10) I zu dawnna hangin midangte a puklawh dinga leh i dawn kei zaw ding hi. (Rom 14:21 sim in.) Eite in ‘angsung ding bek zong loin, midangte phattuam nading’ i zong zaw hi.​—1 Korin 10:23, 24 sim in.

 ZON BEH INLA, MUH BEH IN

4. Dawn ding leh dawn loh ding khensat in

Zu dawn pen Jesuh in koici muh a hiam? Hih dotna’ a dawnna pen Jesuh ii nalamdang a bawl masak penah kimu thei hi. Johan 2:1-11 sim in. Tua khit teh hih dotnate kikum un:

• Hih nalamdang bawlna pan, zu le zu a dawn mite tunga Jesuh’ muh dan bang thei i hiam?

• Jesuh in zu dawn kham lo ahih teh Khristiante in zu a dawnte a koici muh ding uh kisam a hiam?

Zu a kidawn theih hangin, bang hun bang hun hita leh kidawn thei cihna hi lo hi. Paunak 22:3 sim in. Tua khit teh a nuai-a dinmunte-ah zu dawn a kilawm leh kilawm loh ngaihsun in:

• Mawtaw le saikel na hawl ding ciang, set vante tawh na na sep ding ciang.

• Nau paii hun ciang.

• Zu dawn lo dinga siavuan in hong gen ciang.

• Zu na dawn khak cianga na khawl theih nawn kei leh.

• Kumpite’n zu dawn a kham ciang.

• Zu a dawn khak ciang a khawl theih loh mana a ngawl vet mi khat tawh na omkhop ciang.

Mopawi ahih kei leh kimuhkhopnate-ah zu na lui ding hiam? Na khensat theih nadingin VIDEO hong in.

Rom 13:13 le 1 Korin 10:31, 32 sim in. Na sim khit ciangin hih dotna kikum un:

• Hih Lai Siangtho thubul in Jehovah a lungkimsak thu khensatna na bawl theih nadingin koi bangin hong huh thei a hiam?

 5. Na dawn zah ding khensat in

Zu na dawn ding leh hih thu phawk in: Zu dawn pen Jehovah in a kham loh hang, tampi dawn pen kham hi. Bang hangin kham a hiam? Hosea 4:11, 18 sim in. Tua khit teh hih dotna kikum un:

• Tampi dawnna in bang piangsak thei a hiam?

Zu tampi dawnna koici pelh thei ding i hiam? A hoihbek i theih ding, ahih kei leh i zawh ciang i theih ding kisam hi. Paunak 11:2 sim in. Tua khit teh hih dotna kikum un:

• Bangzah dawn ding cih ciangtan neih pen bang hangin hoih a hiam?

6. Zu tampi dawn lo dinga i kikep theih dan

 TOMLAKNA

Jehovah in mite lungnop nadingin zu a piak hangin zu tampi dawnna le zu khamna pen kham hi.

Kikupkikna

• Zu tawh kisai-in Lai Siangtho in bang gen a hiam?

• Zu tampi dawnna ii a lauhuainate in bang a hiam?

• Zu tawh kisai-in midangte thu khensatna i zahtaklam koici lak thei i hiam?