Sɛ ekɔ wiadze yi mu beebiara a, ɔsor adwen a nyimpa pii wɔ wɔ nsa ho. Binom wɔ hɔ a, sɛ wɔnye hɔn anyɛnkofo hyia mu a, ɔyɛ a wɔnom nsa kakra. Binom so dze, wɔmmpɛ dɛ wɔdze nsa ka hɔn ano koraa. Afofor so tum nom nsa araa ma ebɔhwɛ no, nna wɔabow seram. Ntsi ma yembisa dɛ, ebɛn asɛm koraa na Bible no ka fa nsa ho?

1. Sɛ obi nom nsa a, ɔayɛ bɔn a?

Onnyi Bible no ne beebiara dɛ, sɛ obi nom nsa a ɔayɛ bɔn. Mbom no, Bible ma yehu dɛ “wenyin a ɔma ɔdasanyi n’akoma n’enyi gye” ka ndzɛmba a Nyankopɔn dze akyɛ hɛn no ho. (Ndwom 104:​14, 15) Mbarimba na mbaa anokwafo a Bible no ka hɔnho asɛm no, hɔn mu bi noom nsa.​—1 Timothy 5:23.

2. Hɔn a woesi gyinae dɛ wɔbɔnom nsa no, ebɛn afotu na Bible no dze ma hɔn?

Jehovah kyir asabow na nsawe. (Galatiafo 5:​21) N’Asɛm ka dɛ: “Mma mmfa woho mmfora [hɔn a wɔnom nsa pii].” (Mbɛbusɛm 23:​20) Sɛ wankotsee na ehyɛ wo beebi o, sɛ enye afofor na woehyia mu o, sɛ eronom nsa a ɔsɛ dɛ ehwɛ yie paa. Binom wɔ hɔ a, wotum nom nsa araa ma wonntum nndwen asɛm ho yie. Ɔba no dɛm a, wɔka nsɛm biara biara, na wɔyɛ hɔn adze so basabasa. Nyimpa binom mpo dze, wotum we nsa araa ma ɔsɛɛ hɔn apɔwmudzen mpo. Ntsi sɛ yesi gyinae dɛ yɛbɔnom nsa a, ɔsɛ dɛ yɛhwɛ yie na yɛannom ammbor do. Sɛ ihu dɛ irunntum nnhyɛ woho do wɔ nsa ho a, nna ɔno sɛ ɔbɛyɛ yie a, gyaa nom koraa.

3. Sɛ obi si gyinae dɛ ɔbɔnom nsa anaadɛ ɔronnom a, ɔsɛ dɛ yɛyɛ hɛn adze dɛn?

Hɛn mu biara wɔ ho kwan dɛ osi ne gyinae dɛ ɔbɔnom nsa anaadɛ ɔronnom. Sɛ obi si gyinae dɛ ɔbɔnom nsa kakra a, onnyi dɛ yebu no atsɛn. Sɛ obi so si gyinae dɛ ɔronnom nsa koraa a, ɔnnsɛ dɛ yɛhyɛ no. (Romefo 14:​10) Sɛ yɛnom nsa na sɛ ɔbɛhaw afofor a, yebotum esi gyinae dɛ yɛronnom nsa koraa. (Kenkan Romefo 14:​21.) Yɛbɔ mbɔdzen dɛ yɛronnhwehwɛ ‘hɛnankasa hɛndze, na mbom yɛbɔhwehwɛ hɛn nyɛnko so nedze.’​—Kenkan 1 Corinthfo 10:​23, 24.

 PƐNSAPƐNSA MU KƆ EKYIR

4. Si gyinae dɛ ebɔnom nsa anaadɛ eronnom

Nna ebɛn adwen na Jesus wɔ wɔ nsadzen ho? Anwanwadze a odzi kan a Jesus yɛe no bɛma enya dɛm asɛmbisa yi ho mbuae. Ma yɛnkenkan John 2:​1-​11, na yensusu nsɛmbisa yi ho:

• Sɛ ehwɛ anwanwadze a Jesus yɛe yi a, nna ebɛn adwen na ɔwɔ wɔ nsadzen ho? Na hɔn a wɔnom nsadzen no so, ohu hɔn dɛn?

• Jesus annkasa enntsia hɔn a wɔnom nsa. Ntsi sɛ obi si gyinae dɛ ɔbɔnom nsa a, ebɛn adwen na ɔsɛ dɛ Christiannyi bi nya wɔ no ho?

Ɔwɔ mu, Christiannyi biara wɔ ho kwan dɛ ɔnom nsa. Naaso iyi nnkyerɛ dɛ sɛ ɔnom nsa aber nyina a, ɔnnyɛ hwee. Ma yɛnkenkan Mbɛbusɛm 22:3. Yewie a, yebosusu ho ahwɛ dɛ ɔyɛ papa dɛ obi nom nsa wɔ tsebea ahorow a odzidzi do yi mu anaadɛ ɔnnyɛ papa:

• Ber a ɔrekɛka kaar anaa ɔdze efir bi rekɛyɛ edwuma.

• Ber a ɔbaa bi nyinsen.

• Ber a dɔkta aka akyerɛ no dɛ ɔnnsɛ dɛ ɔnom nsa.

• Ber a onntum nnhyɛ noho do wɔ nsa ho.

• Ber a mbra mma kwan dɛ ɔbɔnom nsa no.

• Ber a ɔnye obi a osiandɛ onntum nnhyɛ noho do wɔ nsa ho ntsi oegyaa nom no wɔ beebi.

Sɛ ereyɛ ayefor anaa eroto pon a, aso ɔsɛ dɛ edze nsa ba ase? Ma yɛnhwɛ VIDEO yi, na ɔbɔboa wo ma eetum esi gyinae.

Ma yɛnkenkan Romefo 13:​13 na 1 Corinthfo 10:​31, 32. Sɛ yɛkenkan kyerɛwnsɛm no mu biara wie a, yebosusu asɛmbisa yi ho:

• Kyerɛwsɛm yi besi dɛn aboa wo ma eesi gyinae a Jehovah n’enyi bɛgye ho?

 5. Hu nsa dodow a ɔsɛ dɛ enom

Sɛ isi gyinae dɛ ebɔnom nsa a, mma wo werɛ mmfir dɛm asɛm yi: Ɔwɔ mu dɛ Jehovah nnkasa nntsia nsanom dze, naaso ɔkasa tsia asabow. Ebɛnadze ntsi a? Ma yɛnkenkan Hosea 4:​11, 18, na yensusu asɛmbisa yi ho:

• Sɛ obi nom nsa ma ɔbor do a, ebɛn asɛm na obotum esi?

Ebɛnadze na obotum aboa hɛn amma yaannom nsa ma wɔaammbor do? Ɔsɛ dɛ yehu nsa dodow a sɛ yɛnom a obotum ama yaabow. Ma yɛnkenkan Mbɛbusɛm 11:​2, na yensusu asɛmbisa yi ho:

• Ansaana ebɛyɛ w’adwen dɛ ibotwa kakra no, ebɛnadze ntsi na ɔbɛyɛ papa dɛ idzi kan hu nsa dodow a epɛ dɛ enom?

6. Sɛ enom nsa pii a, gyaa

 DZA ESUA

Jehovah ama hɛn nsa dɛ yɛmfa ngye hɛn enyi wɔ abrabɔ mu. Naaso okyir nsanom pii nye asabow.

Mbobɔdo

• Ebɛnadze na Bible no ka fa nsa ho?

• Sɛ obi nom nsa ma ɔbor do a, ebɛn ɔhaw na obotum efi mu aba?

• Sɛ obi si gyinae dɛ ɔbɔnom nsa anaadɛ ɔronnom a, ɔsɛ dɛ yɛyɛ hɛn adze dɛn?