EISOMO LYA 43
Abakirisito Nibetagwa Kugira Bitekelezoki Ebikwete Amarwa?
Omu nsi yona, abantu baina ebitekelezo ebili kwahurana ebikwete amarwa . Abantu abandi nibashemelerwa kunywa amarwa baina banywanyi babo. Abandi nibaramura nk’okwo tibalinywa marwa nakati. Nabandi nibaganywa kugoba aha kutamira. Ebibulia negambaki ekikwete amarwa?
1. Isi, okunywa amarwa ntambara?
Ebibulia telikutanga kunywa amarwa. Shana, omu bigemuro bingi ebyo Katonda atuhaire, Ebibulia negambaho “n’edivai ey,okushandukya abantu emitima.” (Ezaburi 104:14, 15) Abashaija n’abakazi nanka abali kugambwa omu Bibulia bakaba nibanywa amarwa.—1 Timoteo 5:23.
2. Ebibulia nehanuliraki balinya abali kuramura kunywa amarwa?
Yehova natanga kunywa amarwa kushagulirana n’okutamira. (Abagalasia 5:21) Ekigambokye nikigamba kiti: “Otaligya mukisimba kya ntamizi za divai.” (Emigani 23:20) Kityo, katuraramura kunywa amarwa, n’orwo turaba tulichwenka, titulikwetagwa kunywa kushagulirana kugoba akanya k’okutatabururage, kulemwa kwelinda aha bigambo n’abikorwa byaitu, anga kushanga twashasize emibili yaitu. Katuraba tutalikwebalira orwo tulikunywa amarwa, nitwetaga kugarekelera kimoi.
3. Nitubasa tutai kukunira oburamuzi bw’abantu abandi obukwete amarwa?
Buli muntu nayetaga kweramulira aha kikwete okunywa amarwa. Titulikwetaga kuramura muntu alikuramura kunywa amarwa omu kwebalira, kandi titulikwetagwa kukaka muntu atalikwenda kunywa amarwa. (Abaroma 14:10) Katuraba orwo tulikunywa amarwa niturwana anga nitujuma abantu, nitwetaga kuramura kugalekera. (Shoma Abaroma 14:21.) Ichwe “[titulikwehigira magoba], shana nituhiga amagoba g’abandi.”—Shoma 1 Abakorinto 10:23, 24.
MANYURUZA
Enjuza omanye ekanuni z’Ebibulia ezakukujuna kuramura nk’oranywa amarwa n’okwo wakubasa kwebalira. Kandi oshube, ohenjuze ekintu ekyo wakukora koraba oina emimanyilire ey’okunywa kushagulirana.
4. Ramura kuganywa anga kutaganywa
Yesu akaba aina bitekelezoki ebikwete aha kunywa amarwa? Obase kubona empororo, enjuza omuujiza gwe ogwo yakozire guli gwambere. Shoma Yohana 2:1-11, mushube mfumoreho ebibazo ebi:
-
Omu kuhonderana n’omuujiza ogwo, Yesu aina bitekelezoki ebikwete amarwa na balinya abali kuganywa?
-
Orw’okuba Yesu tiyatangire muntu kunywa amarwa, Omukirisito nayetagwa kubona atai omuntu alikuramura kuganywa?
Kityo, n’orwo omu Kirisito aina obwegerere bw’okunywa amarwa, ekyo tikili kumanyisa nk’okwo ebiro byona nikigasha kukora atyo. Shoma Emigani 22:3, oshube ohenjuze ebintu ebili kuhonderaho okwo byakubasa kukujuna kuramura kunywa amarwa anga kutaganywa:
-
orw’olikubuga emotoka anga orw’olikukora omu mashini.
-
koraba oina enda.
-
ka dakitari araba akutangire kuganywa.
-
koraba otali kwebalira orw’olikunywa.
-
amateka g’eihanga lyawe kagaraba nigatanga kunywa amarwa.
-
Koraba oina omuntu aramwire kutanywa marwa arw’enshonga ebiro by’enyuma akaba nalemwa kwebalira orwo yabaire naganywa.
Isi, omu bugenyi bwawe anga omu tafirija oratekaho amarwa? Obase kubona ekintu ekirakujuna kuramura, yolekya EVIDEO.
Shoma Abaroma 13:13 na 1 Abakorinto 10:31, 32. Orwo muramara kushoma buli ihandiko fumoraho ekibazo eki:
-
Omu kukozesa ekanuni egi nebasa kukujuna etai kukora oburamuzi obuli kushemelera Yehova?
Buli Mukirisito nayetagwa kweramulira nk’aranywa amarwa anga kutaganywa. N’orwo araba nabona tikubi kunywa amarwa, omu kanya akandi nabasa kuramura kutaganywa
5. Ramura kwebalira orw’olikunywa amarwa
Koraramura kunywa amarwa, ijuka ekintu eki: N’orwo Yehova atalikutanga kunywa amarwa, natanga okunywa kushagulirana. Isi kubaki? Shoma Hosea 4:11, 18, mushube mufumoreho ekibazo eki:
-
Nikihai ekyakubasa kubaho orw’omuntu alikunywa amarwa akashagulirana?
Nitubasa tutai kwelinda kunywa amarwa kushagulirana? Nitwetaga kugira engesho y’okwebalira, n’okushobokerwa mbali tulikurekelera. Shoma Emigani 11:2, mushube mufumoreho ekibazo eki:
-
Kubaki kintu kirungi kwebalira orwo tulikunywa amarwa?
6. Okwo wakusinga emimanyilire y’okunywa kushagulirana
Leba ekyajunire omushaija nanka asinge emimanyilire y’okunywa amarwa kushagulirana. Yolekya EVIDEO, mushube mufumoreho ebibazo ebili kuhonderaho.
-
Omu video egi, Dmitry akaba nakora atai orwo yanywaga amarwa?
-
Isi, kikaba kilikyangu omuli wenene kulekera bwangu emimanyilire egyo?
-
Aha nzindo, nikihai ekyamujunire kusinga oburaibu bw’okunywa amarwa?
Shoma 1 Abakorinto 6:10, 11, mushube mufumoreho ebibazo ebi:
-
Kubaki okutamira ntambara esikire?
-
Nikihai ekili kwolekya nk’okwo omuntu aina emimanyilire y’okunywa kushagulirana nabasa kuhinduka?
Shoma Matayo 5:30, mushube mufumoreho ekibazo eki:
-
Okutema omukono nikumanyisa nk’okwo omuntu nayetaga kulekera omuze nanka abase kushemeleza Yehova. Nobasa kukoraki koraba norashana kulekera emimanyilire y’okunywa amarwa kushagulirana? *
Shoma 1 Abakorinto 15:33, mushube mufumoreho ekibazo eki:
-
Banywanyi bawe nibabasa kukukora batai onywe amarwa kushagulirana?
RUNDI OMUNTU YAKUKUBAZA ATI: “Isi, kunywa amarwa kintu kibi?”
-
Iwe, wakuhorora otai ekibazo ekyo?
OMUBIGUFI
Yehova ahaire abantu amarwa babase kushemelerwa. Kyonkai natanga kutamira n’okunywa kushagulirana.
Isi ebi wakubihorora otai?
-
Ebibulia negambaki ekikwete aha kunywa amarwa?
-
Okunywa kushagulirana kwakukuletera rushengoki?
-
Nitubasa tutai kukunira oburamuzi bwa abandi obukwete aha kunywa amarwa?
ENJUZA MUNO
Abasigazi n’abaisiki nibabasa kukora batai oburamuzi obuli burungi obukwete aha kunywa amarwa?
Enjuza omanye ebintu eby’olikwetagwa kukora obase kusinga emimanyilire ey’okunywa kushagulirana.
“Emilebere Elikugasha Ekwete Amarwa” (Mnara wa Mlinzi, Omwezi gwa Mbere 1, 2010)
Isi, omu Kirisito nabasa kwema hamoi n’abandi kutejanyia egirasi omu kushabirana emilembe?
“Ebibazo Kuruga omu Balikushoma” (Mnara wa Mlinzi, Omwezi gwa Kabili 15, 2007)
Omu baruro egi “Nkaba ndi kikeni ky’amarwa ekitalikwijura,” leba okwo omushaija nanka yasingire emimanyilire y’okunywa amarwa kushagulirana
“Ebibulia Ekahindura Emikalire Yange” (Mnara wa Mlinzi, Omwezi gwa Katanu 1, 2012)
^ Balinya abali baraibu b’okunywa amarwa, nibetagwa kuhiga obujuni omu bataalamu babase kulekera emimanyilire egyo. Amadakitari bangi nibapendekeza nk’okwo omuntu ayabaire aina emimanyilire y’okunywa amarwa kushagulirana nayetaga kugalekelera kimoi.
