Tib neeg nyias xav lawm nyias ib yam txog kev haus dej haus cawv. Ib txhia nyiam haus dej caw thaum lawv nrog phooj ywg. Ib txhia caiv hlo tsis haus dej haus cawv li. Hos ib txhia nyiam haus kom qaug. Ua li, phau Vajlugkub hais li cas txog kev haus dej haus cawv?

1. Haus dej caw puas txhaum?

Phau Vajlugkub tsis txwv kev haus dej haus cawv. Phau Vajlugkub qhia tias Vajtswv tsim muaj ntau yam zoo rau tib neeg, ‘Vajtswv tsim kom muaj cawv txiv hmab los haus ua rau neeg zoo siab.’ (Phau Ntawv Nkauj 104:14, 15) Yog li ntawd, haus dej caw tsis txhaum. Yehauvas cov neeg thaum ub los kuj muaj cov haus dej haus cawv thiab.​—1 Timautes 5:23.

2. Phau Vajlugkub hais li cas rau cov uas haus cawv?

Yehauvas ntxub kev quav dej quav cawv thiab qaug cawv. (Kalatias 5:21) Vajtswv Txoj Lus hais tias, ‘Tsis txhob mus koom nrog cov neeg uas nyiam haus cawv los sis noj ntau haus ntau ua ke.’ (Pajlug 23:20) Yog peb haus cawv, txawm yog peb haus peb ib leeg los sis nrog lwm tus haus los yuav tsum haus kom hauj sim xwb. Tsis txhob haus kom qaug, ua rau yus tsis meej pem, thiab tswj tsis tau yus tus kheej los sis ua mob rau yus. Yog tias thaum peb haus cawv, peb pheej haus tsis paub tso tseg ces zoo rau peb tsis txhob haus.

3. Peb yuav saib taus lwm tus li cas thaum lawv tsis ua li peb?

Hais txog kev haus dej haus cawv, nyias yuav tsum txiav txim siab rau nyias tus kheej. Yog muaj tus nyiam haus cawv me ntsis los peb tsis txhob thuam thiab xav tsis zoo rau nws. Hos tus tsis kam haus los peb tsis txhob yuam nws. (Loos 14:10) Yog hais tias peb haus cawv yuav tsim tau teeb meem rau lwm tus ces zoo rau peb tsis txhob haus. (Nyeem Loos 14:21.) Peb yuav tsum “tsis txhob xam pom peb xwb tiam sis xam pom lwm tus thiab.”​—Nyeem 1 Kauleethaus 10:23, 24.

 KAWM NTXIV

4. Txiav txim siab seb koj puas yuav haus

Nyeem Yauhas 2:1-11 txog thawj qho txuj ci uas Yexus ua seb nws xav li cas txog kev haus dej haus cawv thiab tham txog ob lo lus no:

• Raws li qhov txuj ci uas Yexus ua, nws xav li cas txog dej caw thiab cov uas haus dej haus cawv?

• Yog hais tias Yexus twb tsis txwv kev haus dej haus cawv ces zoo rau cov Khixatias xav li cas xwb txog tus uas haus dej haus cawv?

Txawm yog hais tias peb yeej haus tau dej caw los muaj tej thaud kuj tsis zoo rau peb haus. Nyeem Pajlug 22:3 thiab tham seb puas tsim nyog haus cawv yog tias:

• Koj yuav tsav tsheb los sis yuav siv tej tshuab ua hauj lwm.

• Koj suab me nyuam.

• Koj tus kws kho mob tsis pub koj haus.

• Thaum koj haus cawv koj pheej haus tsis paub tso tseg.

• Nom tswv txoj cai txwv tsis pub haus.

• Muaj ib tug nrog koj tsis kam haus vim yav tas los nws quav dej quav cawv.

Koj puas yuav muaj dej caw thaum ua tshoob ua kos los sis thaum muaj noj muaj haus? Saib zaj YEEB YAJ KIAB koj thiaj paub tias koj yuav ua li cas.

Nyeem Loos 13:13 thiab 1 Kauleethaus 10:31, 32. Thaum nyeem ib nqe tag ces tham txog lo lus no:

• Yog koj ua li nqe Vajlugkub no hais, yuav pab tau koj ua haum Yehauvas siab li cas?

 5. Xav seb koj yuav haus npaum li cas xwb

Yog koj yuav haus cawv ces nco ntsoov tias txawm Yehauvas tsis txwv los nws tsis pub haus ntau dhau. Nyeem Hauxeyas 4:11, 18 seb yog vim li cas thiab tham txog lo lus no:

• Yuav muaj li cas yog hais tias ib tug haus cawv ntau dhau lawm?

Yuav ua li cas peb thiaj tsis haus cawv ntau dhau? Peb yuav tsum paub peb tus kheej zoo tias peb tsuas haus taus npaum li cas xwb. Nyeem Pajlug 11:2 thiab tham txog lo lus no:

• Vim li cas thiaj tseem ceeb rau koj paub tias koj yuav haus npaum li cas xwb?

6. Puas muaj dab tsi pab tau cov uas haus cawv ntau dhau?

 KOJ KAWM TAU DAB TSI

Yehauvas tsim kom muaj dej caw rau peb haus kom peb muaj kev zoo siab tiam sis nws tsis pub peb haus ntau dhau thiab tsis pub peb quav cawv.

Rov Tham Dua

• Phau Vajlugkub hais li cas txog cawv?

• Yuav tsim tau teeb meem li cas yog peb haus cawv ntau dhau?

• Peb yuav ua li cas peb thiaj li saib taus cov uas tsis xav li peb txog kev haus dej haus cawv?