EHONGWA 43
Ovakriste mave sokuvara vi otjikariha?
Ovandu mouye auhe ve noumune mbwa panguka ohunga notjikariha. Tjiva ve toorora okunwa indu tji ve ri pu nomapanga wawo. Varwe ve toorora okuhinokunwa oparukaze. Nu varwe ve nwa tjinene nga tji va nḓorongo. Hapo Ombeibela i tja vi ohunga notjikariha?
1. Hapo onavi okunwa otjikariha?
Ombeibela kai tja onavi okunwa otjikariha. Nungwari indu tji mai hungire ohunga noviṋa oviwa Mukuru mbye tu pa, oyo wina i tamuna “omavinu nge nyandisa omitima vyovandu.” (Epsalme 104:14, 15) Ovarumendu novakazendu ovaṱakame tjiva mba tamunwa mOmbeibela aave nu otjikariha.—1 Timoteus 5:23.
2. Ombeibela i yandja eronga riṋe ku imba mbe toorora okunwa otjikariha?
Jehova ka vanga kutja ovandu ve purukisiwe i yomavinu omazeu. (Ovagalate 5:21) Embo re ri tja: “O rikutu kuna ovandu mbe nwa omavinu tjinene.” (Omiano 23:20) Ku nao, indu tji twa toorora okunwa pu na varwe poo ku eṱe oveni, katu sokunwa tjinene nga indu tji twe hi nokuripura nawa, okuhinokutjaera omambo wetu novitjitwa vyetu, poo okuhinokurikendera kouveruke wetu. Indu tji tu hi nokuyenena okuritjaera okunwa otjikariha tjinene, tu sokutjesa oparukaze.
3. Matu yenene vi okuraisa ondengero kozondando zavarwe ohunga notjikariha?
Omundu auhe ma sokutoorora kutja ma nu otjikariha poo indee. Katu sokupangura omundu ngu nwa otjikariha momuano omuwa, nu katu sokuṋiṋikiza omundu okunwa ngu ha vanga okunwa otjikariha. (Ovaroma 14:10) Onawa okuhinokunwa indu tji mape ya aku putarisa varwe. (Lesa Ovaroma 14:21.) Eṱe katu ‘ripahere ombwiro yetu porwayo, nungwari tu paha ombwiro ya varwe.’—Lesa 1 Ovakorinte 10:23, 24.
KONḒONONA OUKOTO
Tara komirari vyOmbeibela mbi mavi ku vatere okutoorora kutja mo sokunwa poo indee, nokutja mo nu pu pe ṱa pi. Nu wina tara koviṋa mbi mo yenene okutjita, indu tji u nouzeu wokunwa otjikariha tjinene.
4. Toorora kutja mo nu otjikariha poo indee
Jesus aa vara vi otjikariha? Kutja u mune eziriro, tara kotjihimise otjitenga eye tja tjita. Lesa Johanes 2:1-11, nu okuzambo hungirira komapuriro nga:
-
Otjihimise ho tji tu hongo tjike ohunga noumune wa Jesus ohunga notjikariha, na imba mbe tji nwa?
-
Jesus ka vara okunwa otjikariha otjotjiṋa otjivi, nu hapo Omukriste ma sokuvara vi omundu ngu ma toorora okunwa otjikariha?
Nandarire kutja Omukriste u nouyara wokunwa otjikariha, ihi katji hee kutja onawa okutjinwa aruhe. Lesa Omiano 22:3, nu okuzambo tara kutja omapu ngu maye kongorere mba maye ku vatere vi okutoorora kutja mo nu otjikariha poo indee:
-
Ove mo kahinga ohauto poo mo kaungurisa omahina.
-
Oove omukazendu wezumo.
-
Onganga ye ku raera kutja o nu otjikariha.
-
Ove ko yenene okuritjaera okunwa otjikariha tjinene.
-
Oveta kai ku yandjere kutja u nwe otjikariha.
-
Ove u ri pu nomundu ngwa toorora okuhinokuṱuna kotjikariha, mena rokutja morukapitaveze wa ri nouzeu wokuritjaera kotjikariha.
Hapo ove mo sokuyandja otjikariha pomikandi poo pomeerowapamwe? Okutara kutja ovikwaye mbi mavi ku vatere, nyanda OKAVIDIO.
Lesa Ovaroma 13:13 no 1 Ovakorinte 10:31, 32. Kombunda yokulesa etjangwa arihe, hungirira kepuriro ndi:
-
Okuṱakamisa omurari mbwi maku ku vatere vi okutjita ondando ndji mai yorokisa Jehova?
Omukriste auhe u sokutoorora kutja ma nu otjikariha poo indee. Nandarire kutja povikando tjiva eye u nwa otjikariha, eye mape ya povikando vyarwe a toorora okuhinokunwa otjikariha
5. Toorora kutja mo nu otjikariha tji tji ṱa pi
Indu tji mo toorora okunwa otjikariha, zemburuka kutja Jehova ka tja okunwa otjikariha onavi, posi ya eye ka vanga kutja ovandu ve nwe okukapitisa etota. Omena raye? Lesa Hosea 4:11, 18, nu okuzambo hungirira kepuriro ndi:
-
Pe tjitwa tjike omundu tja nu tjinene?
Ovikwaye mbi mavi tu vatere kutja atu ha nu tjinene? Matu sokurira overisusuparise kutja tu tjiwe pu matu sokuyandera. Lesa Omiano 11:2, nu okuzambo hungirira kepuriro ndi:
-
Ongwaye tje ri otjiṋa otjiwa okutwa po kutja mo nu otjikariha tji tji ṱa pi?
6. Ovikwaye mbi mavi vatere omundu okuisa okunwa otjikariha tjinene?
Tara kutja ovikwaye mbya vatera omurumendu umwe okuisa okunwa otjikariha tjinene. Nyanda OKAVIDIO, nu okuzambo hungirira komapuriro ngu maye kongorere mba.
-
Mokavidio, Dmitry ee ritjindi momuano uṋe indu tja nu otjikariha?
-
Hapo eye wa hakahana okuisa otjikariha?
-
Ovikwaye mbye mu vatera okuisa okunwa tjinene?
Lesa 1 Ovakorinte 6:10, 11, nu okuzambo hungirira komapuriro nga:
-
Okunwa otjikariha nga tji wa nḓorongo otjiṋa otjivi pu pe ṱa pi?
-
Ovikwaye mbi mavi raisa kutja omundu ngu nwa otjikariha tjinene, mape ya a rundurura ongaro ye?
Lesa Mateus 5:30, nu okuzambo hungirira kepuriro ndi:
-
Indu Jesus tja ungurisa otjisasanekero tjokukonda eke, eye aa hee kutja matu sokuisa oviṋa tjiva kutja tu yorokise Jehova. Ovikwaye mbi mo yenene okutjita indu tje ri ouzeu kove okuisa okunwa otjikariha tjinene? a
Lesa 1 Ovakorinte 15:33, nu okuzambo hungirira kepuriro ndi:
-
Omapanga woye maye yenene vi okuṱuna komuano ove mu mo nu otjikariha?
OMUNDU MAPE YA A PURA KUTJA: “Hapo onavi okunwa otjikariha?”
-
Ove otjo tja vi?
OKUYARUKIRA PO OUSUPI
Jehova we tu pa otjikariha kutja tu mune mo ondjoroka, posi ya ka vanga kutja tu nwe otjikariha tjinene poo tu nwe nga tji twa nḓorongo.
Okurizemburukisa
-
Ombeibela i tja vi ohunga notjikariha?
-
Omaumba yeṋe nge za mokunwa otjikariha tjinene?
-
Omomuano uṋe mu matu yenene okuraisa ondengero kozondando zavarwe ohunga notjikariha?
RIHONGA OVINGI
Omomuano uṋe omitanda mu mavi yenene okutoora omikambo omisemba ohunga notjikariha?
Tara komikambo mbi mo yenene okutoora kutja u tuurunge ouzeu wotjikariha.
“Okunwa otjikariha momuano omusemba” (Oruhungu, 1 ku Januari, 2010)
Hapo Omukriste ma sokuyera omaharasa meyuru?
Tara komuano omurumendu ma isa okunwa otjikariha mehungi ndi, “Mba ri omunwe wotjikariha tjinene.”
“Ombeibela i rundurura omiinyo vyovandu” (Oruhungu, 1 ku Mei, 2012)
a Imba mbe ha sora nokuhina okunwa otjikariha mape ya ave hepa ombatero yomapangero kutja ve ise otjikariha. Ozonganga ozengi ze tja imba mba ri nouzeu mbwo kave sokunwa otjikariha oparukaze.
Mo yenene okutara ku imbi wina
OMAPURIRO NGE PURWA i yovandu OVENGI
Ovahongonone va Jehova ve yandja omerihongero wOmbeibela momuano uṋe?
Ove mo yenene okuungurisa Ombeibela ngamwa aihe indu tji mo rihongo Ombeibela otjari pu nOvahongonone va Jehova. Mo yenene okuṋanga eṱunḓu roye arihe poo omapanga woye okukara pomerihongero woye wOmbeibela.
