Ịkịka nya odehe wuu, angịnyị la irya ịdatị-ịdatị u-uhye nya ere ọnyọọngịrị. Ọ kaa kpụ angịhyẹ ịpyọ nyọka nwà ere ụka kị tụguru lawụlẹ. Angịkịla cheje nyori ị́ ka kpa ere ọnyọọngịrị ka ọnụ kpong-kpong ka. Ịnyịnyị angịkịla kaa nwà ere gbee kị ka ya. Ẹlịyẹ ịBayịbụụ à tị́ ya u-uhye nya ere ọnyọọngịrị?

1. Ọ tịpyọ nya ọngịnyị ọ-ka nwà ere ọnyọọngịrị?

ỊBayịbụụ-ụ́ ya nyori nyị tịpyọ nya ọngịnyị ọ-ka nwà ere ọnyọọngịrị ka. Ọkọkọ nya ọọwa, ụka kọ wẹẹ ya ẹla u-uhye nya ang āhị ịlẹ ká Ohe Oluhye ya hahị, ịBayịbụụ gu ẹnyị nya ‘ere [ọnyọọngịrị] ọlẹ kọ kaa họ ká ọngịnyị kaa chị ọkẹkẹnị.’ (Eje Ọnyịịla 104:14, 15) Alẹng bala anyang ị-la ọmyịmyị ịhyẹ ịlẹ kị gu ẹnyị ị-ịBayịbụụ kaa nwà ere ọnyọọngịrị.—1 iTimoti 5:23.

2. Ẹlịyẹ ịBayịbụụ à tị́ ya ká angịlẹ kị chụ nyọka nwà ere ka họ?

IJihova pwa ahị nyị nwà ere lụmẹ bala ọ-nwà ere juwa ya ka. (Ala ịGaletiya 5:21) ỊBayịbụụ kọ ri Omyi Ẹla nyamwụ yẹkẹẹ: “A ju ogu ta angị kaa nwà ere kpụ ere . . . koo.” (Etu 23:20) Lẹ, kori kahị chụ nyọka nwà ere, tụ́ ụka kahị juwa i-iwiba, áhị ka nwà lụmẹ gbee kahị ka jẹ́-ẹ kụ irya yẹẹyẹẹ ka lee ọ-jẹ́ gbe ẹlẹlẹ bala abwẹla nyahị ka lẹ ka. Áhị ka họ ọ ka jụ́ụhị ẹdụrụ ka ịnyịnyị. Kori kahị ka jẹ́-ẹ wu ịlọhị kpa ẹ-ẹga nya abwọlẹ áhị kaa nwà ere ka ba ka aalẹ, ọ ka há gụ kori kahị hwabwọ la ọnwànwa gbanggbang.

3. Ányị ahị tị́ ka bwu ju ihi nya eje ọchịchị nya angịkịla ẹ-ẹga nya ere ọnyọọngịrị ọnwànwa?

Ọng myị́ ọng ka cheje ha ịlọmwụ kori kọ ka nwà ere ọnyọọngịrị lee ọ-nwà ka. Áhị ka la ọngọngọhẹ ọlẹ kọ chụ nyọka nwà ere ọnyọọngịrị meme labwọ eje ka, áhị tị ka tụ́ ọngọngọhẹ tutu nyọka nwà ka ịnyịnyị. (Ala iRom 14:10) Ahị ka hwabwọ la ọ-ka nwà ere ọnyọọngịrị kori ká ọọwa á ka kpa akama wẹ angịkịla. (Wa Ala iRom 14:21.) Áhị kaa tịtọ nya “ịlahị ọkaka nya ịlọhị kem ka, ma [ahị kaa tịtọ nya] ịlahị ọkaka nya angịnyị angịkịla ịnyịnyị.”—Wa 1 Ala ịKọrịntị 10:23, 24.

 JẸ́ GỤ ỌỌWA

4. Cheje kori ká ka nwà ere

Ányị iJisọsị à tị́ yẹ ere ọnyọọngịrị ọnwànwa? Nyọka jẹ́ ọwẹwẹ nya ịtọ ẹla ọwẹ, kụ ẹhị yẹ ụkụrwọ ẹbyẹbyị nya iJisọsị ọhọhẹ. Wa ịJọn 2:1-11, kanụ ya ẹla u-uhye nya ịtọ ẹla ịlẹ:

• Bwu ụkụrwọ ẹbyẹbyị ọwẹ, ẹlịyẹ ahị tị́ ka jẹ́ u-uhye nya abwọlẹ ká iJisọsị yẹ ere ọnyọọngịrị ọnwànwa bala angịlẹ kị kaa nwà?

• Nyọlẹ ká iJisọsị yẹ ere ọnyọọngịrị ọnwànwa nya ang ọtịpyọ ka wẹẹ, ányị ahị tị́ ka yẹ Ọngịnyị nya ịKịrayịsị ọlẹ kọ chụ nyọka nwà?

Ma, chajị nyori ọngịnyị la iwe nyọka nwà ere ọnyọọngịrị, á mẹjẹ nyori ọ há nyọka họ ịnyị ụka myị́ ụka ka. Wa Etu 22:3, kanụ ya ẹla u-uhye nya abwọlẹ ká iwe-ahụrụ ileji ịwẹ ka gu eje ọchịchị nyahị kori kahị ka nwà ere lee ọ-nwà ka:

• À wẹẹ ka pá ang ọrụnyẹ lee ọ-kpa imechin ọhẹ họ ụkụrwọ.

• À kpẹnyị juwa.

• Ọngọ họ utoji bying nyori ahụ nyị nwà ere ọnyọọngịrị kaka.

• Kori á dọmwụ nya ere ọnwànwa lẹ, à kaa nwà kpoye lẹ.

• Angịkpeji da ehile nyori ọngọngọhẹ nyị nwà ere ọnyọọngịrị ka.

• À juwa bala ọngọlẹ kọ hwabwọ hi ere ọnyọọngịrị ọnwànwa chajị nyori ọ́ jẹ́-ẹ wu ịlọmwụ kpa myị́ ka.

Ọ há nyọka kpa ere ọnyọọngịrị họ ụga ọ-ọhụhụ nya awụlẹ oyeye lee ọtụguru ịkịla? Nyọka yẹ ang ọlẹ kọ ka dang ụbwọ cheje, yẹ IFIM ọwẹ.

Wa Ala iRom 13:13 bala 1 Ala ịKọrịntị 10:31, 32. Ụka ká wa Ụpwụ Ịgọgọ ọnyọnyọọnyị kpá, anụ ya ẹla u-uhye nya ịtọ ẹla ọlẹ:

• Ányị ọ-kpa ẹla ọmẹjẹ ọla ẹgẹlẹ họ ụkụrwọ à tị́ ka jẹ́-ẹ dang ụbwọ cheje ọlẹ kọ ka kpụ iJihova ịpyọ?

 5. Cheje u-uhye nya abwọlẹ á ka nwà ere ka ba

Kori ká chụ nyọka nwà ere ọnyọọngịrị, kpịtịya nya ẹla ọlẹ: Nanana nyori iJihova á pwa ju ere ọnyọọngịrị ọnwànwa ka, ọ ya nyori nyị tịpyọ nyọka nwà kpoye. Ịyẹ tị́ du? Wa iHoseya 4:11, 18, kanụ ya ẹla u-uhye nya ịtọ ẹla ọlẹ:

• Ịyẹ a tị́ ka jẹ́-ẹ họ myị́ kori ká ọngịnyị á nwà ere kpoye?

Ányị ahị tị́ ka cheji ba hi ọ-ka nwà ere kpoye? Ahị baba nyọka jẹ́ ọdẹwụ-dẹwụ nyịlọhị. Wa Etu 11:2, kanụ ya ẹla u-uhye nya ịtọ ẹla ọlẹ:

• Ịyẹ tị́ du kọ há nyọka cheje neeji u-uhye nya abwọlẹ á ka nwà ere ka ba?

6. Kụrụ ere ọ-nwà kpoye

 ẸLỊYẸ A TỊ́ JẸ́?

IJihova họ ere ọnyọọngịrị kọ ka ya ọkẹkẹnị hahị, ma ọ pwa ahị nyị nwà kpoye bala ọ-nwà juwa ya ka.

Ẹlịyẹ A TỊ́ Yụbwọ Chị?

• Ẹlịyẹ ịBayịbụụ à tị́ ya u-uhye nya ere ọnyọọngịrị ọnwànwa?

• Akama iyina à tị́ juwa ẹ-ẹpwụ nya ere ọ-nwà kpoye?

• Ányị ahị tị́ ka bwu ju eje ọchịchị nya angịkịla u-uhye nya ere ọnyọọngịrị ọnwànwa ihi?