ILUẸMHIN 43
Ẹlo Nela Ọkhẹke Nin Kristiẹn Rẹ Ha Ghe Anyọn?
Bhi otọ agbọn nan rebhe, ẹlo kẹkẹ ẹbho rẹ ghe anyọn nan da. Ẹbho eso izẹwẹ re anyọn so unun hiehie. Eso da ọle ẹgheso. Eso yẹ ribhọ ne wo da anyọn gbe egbe. Be iBaibo tayẹ bhi ẹmhọn anyọn nan da?
1. Emhin ebe be nọn nan rẹ ha da anyọn?
Baibo bha yọle ghe, emhin ebe nọn nan rẹ ha da anyọn. Baibo yọle ghe anyọn deba emhin esili nin Jehova rẹ lu ẹsele nin mhan. Ọ da yẹ yọle: ‘Anyọn re ọkhọle ọsi ọria ghọnghọn.’ (Psalm 104:14, 15) Baibo bhọ tẹmhọn eguọmhandia nesi Osẹnobulua ne da anyọn.—1 Timothy 5:23.
2. Ahamiẹn ọria zẹ nin ọle rẹ da anyọn, adia nela bhi Baibo ọkhẹke nin ọle re obọ rẹkhan?
Jehova bha guanọ nin mhan ha da anyọn gbe egbe. Ọle guanọ nin mhan ha da anyọn ọbhi oleghe. (Galatians 5:21) Baibo yọle: “Hẹi ha deba ẹbho ne da anyọn gbe muobọ.” (Proverbs 23:20) Bhiriọ, mhan ha zẹ nin mhan rẹ da anyọn, ọkhẹke nin mhan da ọle ọbhi oleghe. Mhan ida da ọle sẹbhi eji a ha da miẹn ghe mhan bha yẹ sabọ ria eria nọnsẹn, la mhan bha yẹ sabọ mun egbe mhan la ọta nin mhan ta ọbhi ibẹẹ. Mhan ida yẹ da ọle sẹbhi eji a ha da miẹn ghe, ọ ki kuan mhan la si emianmhẹn ji mhan. Ọkhẹke nin mhan re obọ rẹkhan ọne adia nan, aharẹmiẹn ghe imhan ọkpa ribhi eji mhan da ha da anyọn. Mhan ha lẹn ghe mhan ida sabọ mun egbe mhan ọbhi ibẹẹ bhi ẹmhọn anyọn, ọkhẹke nin mhan wo re obọ sibhi anyọn nan da re sẹsẹsẹ.
3. Be imhan ha rẹ rẹman yẹ ghe, mhan re otọ nin ẹbho ebhebhe rẹ zẹ si ele dẹ da anyọn la ele ida da?
Ọdeọde ha tobọle zẹ si ọle dẹ da anyọn la ọle ida da. Ọ bha khẹke nin mhan ha riale ghe, emhin ebe ọria lu sade ọle da anyọn ọbhi oleghe. Ọ bha yẹ khẹke nin mhan sua ọria ọbhọ rẹ da anyọn sade ọne ọria yọle ọle ida da. (Romans 14:10) Mhan sabọ yẹ rẹban anyọn, ahamiẹn ghe ọ dẹ kiẹn idobolo ji eria ebhebhe. (Tie Romans 14:21.) Mhan guanọ nin mhan ‘ha khu ọbhi ebi ọria ọbhebhe ha rẹ ha mhẹn yẹ, ọ iyi ọsi egbe mhan ọkpa.’—Tie 1 Corinthians 10:23, 24.
MANMAN LẸN OTỌLE NỌNSẸN
Luẹ adia ne ribhi Baibo ne ha rẹkpa uwẹ rẹ lẹn si uwẹ dẹ da anyọn hiehie bi ebi uwẹ ha da ọle sẹ yẹ. Yẹ luẹ ebi uwẹ ha lu yẹ ahamiẹn ghe, uwẹ isabọ mun egbe ọbhi ibẹẹ bhi ẹmhọn anyọn.
4. Tobuwẹ zẹ si uwẹ dẹ da anyọn
Ẹlo nela Jesu rẹ ha ghe anyọn nan da? Nin uwẹ rẹ miẹn ewanniẹn rẹji ọne inọnta nan, fẹ emhin ọhan-ilo ọhẹnhẹn nin Jesu lu ghe. Tie John 2:1-11, bha ha zilo nyan ene inọnta nan:
-
Be ọne emhin ọhan-ilo nan rẹkpa uwẹ rẹ lẹn rẹji ẹlo nin Jesu rẹ ghe anyọn bi ẹbho ne da anyọn?
-
Beji a miẹn Jesu bha yọle ghe, emhin ebe nọn nan rẹ ha da anyọn, ẹlo nela ọkhẹke nin Kristiẹn rẹ ha ghe ọria nọn zẹ nin ọle rẹ da anyọn?
Arẹmiẹn ghe Baibo bha yọle emhin ebe nọn nin mhan rẹ da anyọn, ọnan bha rẹman ghe emhin ẹwanlẹn nọn nin mhan rẹ wo ha da ọle bhi ẹghe nọn hi ki rẹ khin. Tie Proverbs 22:3, bha ha zilo nyan emhin nan gbẹn ọbhi otọle bhi enan, nin uwẹ daghe idia eso nin mhan ha da sabọ rẹban anyọn.
-
Ahamiẹn uwẹ dẹ hẹn imotọ la emhin ọbhebhe nan rẹ khian. Ahamiẹn uwẹ dẹ re ẹjini rẹ wẹnna.
-
Ahamiẹn uwẹ hanmhan.
-
Ahamiẹn dọkitọ yọle nin uwẹ rẹban anyọn.
-
Ahamiẹn uwẹ isabọ da anyọn bhi oleghe.
-
Ahamiẹn uhi nin gọvamẹti gbe bhi ẹmhọn anyọn rẹso uwẹ.
-
Ahamiẹn uwẹ ribhi eji ọria nọn zẹ nin ọle rẹ rẹban anyọn ye, ranmhude ọnọghọ nin ọle ka ha mhọn khẹ bhi ẹmhọn anyọn.
Ọ be khẹke nin uwẹ re anyọn nọn mun kue nin ẹbho sade uwẹ lu iluemhin ibọdọ bi irekhuo la iluemhin ọbhebhe? Nin uwẹ rẹ daghe ebe ha rẹkpa uwẹ zẹ ebi uwẹ ha lu, ghe ọne IVIDIO.
Tie Romans 13:13 bi 1 Corinthians 10:31, 32. Bha ha tie ene iBaibo fo, re ọne inọnta nan rẹ zilo nyan ene iBaibo kẹkẹ:
-
Be ọne adia nan ha rẹ rẹkpa uwẹ yẹ, rẹ zẹ emhin nọn ha ti Jehova bhọ?
Ọdeọde ha tobọle zẹ si ọle dẹ da anyọn la ọle ida da. Aharẹmiẹn ọria zẹ nin ọle rẹ da anyọn, idia eso sabọ ha ribhọ nin ọle ha da rẹban ọlẹn
5. Tobuwẹ lẹn eka anyọn nin uwẹ ha da
Ahamiẹn uwẹ zẹ nin uwẹ rẹ da anyọn, yere ghe, arẹmiẹn Jehova bha yọle emhin ebe nọn nan rẹ da anyọn, ọle bha re obọ bhọ nan rẹ ha da anyọn gbe. Bezẹle? Tie Hosea 4:11, 18, bha ha yẹ zilo nyan ọne inọnta nan:
-
Be ha sabọ sunu sade ọria da anyọn gbe?
Be ha rẹkpa mhan rẹ rẹban idanyọngbegbe? Ọkhẹke nin mhan lẹn eka anyọn nin mhan ha sabọ da sẹ. Tie Proverbs 11:2, bha ha yẹ zilo nyan ọne inọnta nan:
-
Bezẹle nọn da yi emhin esili nin mhan rẹ ha taman egbe mhan eka anyọn nin mhan ha da sẹ?
6. Ebe ha rẹkpa uwẹ rẹ zobọ bhi idanyọngbegbe
Fẹghe ebe rẹkpa okpea ọkpa rẹ zobọ bhi idanyọngbegbe. Ghe ọne IVIDIO, bha ha zilo nyan ene inọnta nan:
-
Beji a rẹman bhi ọne ividio, be iDmitry rẹ ha lu emhin yẹ ranmhude ọle da anyọn gbe egbe?
-
Ọle be sabọ wo re osukpa zobọ bhi idanyọngbegbe?
-
Be rẹkpa ọle rẹ sabọ zobọ bhi anyọn nan da gbe egbe?
Tie 1 Corinthians 6:10, 11, bha ha zilo nyan ene inọnta nan:
-
Be ọ kaka sẹ yẹ nin ọria rẹ ha da anyọn gbe egbe?
-
Be rẹman ghe, ọria nọn da anyọn gbe egbe dẹ sabọ fidenọ?
Tie Matthew 5:30, bha ha zilo nyan ọne inọnta nan:
-
Bhi eji mhan tiele nan, nan rẹ hian obọ mun fia rẹman ghe, mhan dẹ manman dọnmhegbe nin mhan rẹ lu emhin nọn ha ti Jehova bhọ. Be uwẹ ha lu yẹ ahamiẹn ghe ọ nọghọ uwẹ nin uwẹ rẹ zobọ bhi idanyọngbegbe? a
Tie 1 Corinthians 15:33, bha ha zilo nyan ọne inọnta nan:
-
Be uwedẹ nin imọẹ nesẹ rẹ da anyọn ha rẹ sabọ rẹso uwẹ yẹ?
ỌRIA SABỌ NỌỌN UWẸ YỌLE: “Emhin ebe be nọn nan rẹ da anyọn?”
-
Be uwẹ ha rẹ wanniẹn ọlẹn ye?
EBI MHAN LUẸLE
Jehova re anyọn lu ẹsele nin mhan, nin mhan rẹ ha sọnyẹnmhẹn. Ọrẹyiriọ, ọle iguanọ nin mhan ha da anyọn gbe egbe la nin mhan ha da anyọn gbe.
Uwẹ Be Yẹ Yere?
-
Be iBaibo tayẹ bhi ẹmhọn anyọn nan da?
-
Okhẹnan nela ribhọ sade ọria da anyọn gbe?
-
Be imhan ha rẹ rẹman yẹ ghe, mhan re otọ nin ẹbho rẹ tobele zẹ si ele dẹ da anyọn la ele ida da?
FẸ ENE EMHIN NAN GHE
Be ha rẹkpa elasẹre rẹ zẹ si ele dẹ da anyọn la ele ida da?
Luẹ emhin nin uwẹ ha lu ne ha rẹkpa uwẹ rẹ zobọ bhi idanyọngbegbe.
Ọ be khẹke nin Kristiẹn ha mun ukpu okhun rẹ so ukpu ọsi eria ebhebhe sade ele ko da anyọn?
“Ọta Nin Eria Ne Tie Ebe Nesẹmhan Nọọn” (The Watchtower, February 15, 2007)
Bhi okha nọn yọle “Ẹkẹ Ọgọ Mẹn Wo Ha Ye,” fẹ ebe rẹkpa okpea ọkpa rẹ zobọ bhi idanyọngbegbe.
“Ẹmhọanta Nọn Ribhi Baibo Fi Iẹnlẹn ọsi Eria Denọ” (The Watchtower, May 1, 2012)
a Ẹbho eso ne da anyọn gbe egbe ida sabọ tobele zobọ bhọ. Ọ dẹ khẹke nin ele guanọ urẹkpa bhi obọ idọkitọ ne rẹkpa ẹbho ne sẹriọ. Dọkitọ ne bunbun yọle ghe, ọkhẹke nin eria ne sẹriọ hẹi yẹ re anyọn so unun hiehie.
Emhin Ebhebhe Ne Ha Yẹ Ti Uwẹ Bhọ
INỌNTA NIN ẸBHO KẸ NỌỌN
Bebhọ Iluẹmhin IBaibo?
Min ewanniẹn rẹji inọnta rẹji iluẹmhin iBaibo nin man nẹn ẹbho luẹ ọsọhẹ.
