LESN 43
Ou Kristiyan Fi Fiil Bout Lika?
Aal uova di worl piipl fiil difrant bout lika. Som se dem lov fi av wan wan jringk wid dem fren dem, an som no jringk non at aal. An yu av som we jringk til dem jongk. Bot wa di Baibl av fi se bout lika?
1. It rang fi jringk lika ar fi jringk jringks wid lika iina it?
Di Baibl neva se wi no fi jringk lika. Wen it taak bout di sitn dem we Gad gi wi, di Baibl mek wi nuo se im gi wi “wain we mek piipl fiil api.” (Saam 104:14, 15) Di Baibl tel wi bout som man an uman we did a sorv Gad we jringk lika tu.—1 Timoti 5:23.
2. Wa di Baibl av fi se tu di wan dem uu jringk lika?
Jeuova se wi no fi jringk tu moch lika, an wi no fi jringk til wi jongk. (Gyalieshan 5:21) Gad Wod tel wi se: “No kip kompni wid piipl we jringk tu moch wain.” (Pravorbz 23:20) Aal ef a iina wi ous wi de a jringk lika an nobadi naa si wi, wi no fi jringk tu moch dat wi kyaahn tingk chriet an kyaahn kanchuol wa wi a se an wa wi a du, ar jringk til wi sik. Ef wi kyaahn kanchuol umoch lika wi a jringk, it beta ef wi mek op wi main fi no jringk it non at aal.
3. Ou wi kyan shuo se wi rispek di wan dem we mek op dem main fi jringk lika, an di wan dem we no jringk it?
Evribadi fi mek op dem main fi demself ef dem a-go jringk lika ar jringk jringks wid lika iina it. So wi no fi joj nobadi kaa dem a jringk likl lika, ar presha nobadi we se dem naa jringk non fi jringk it. (Ruoman 14:10) An wi naa go jringk no lika ef ada piipl de de we it mait-a bada dem se wi a jringk it. (Riid Ruoman 14:21.) Wi no ‘fi a luk out fi wiself wan, wi fi a luk out fi wi nieba dem tu.’—Riid 1 Korintiyan 10:23, 24.
LORN SOM MUO
Luk pan som tingz we yu lorn iina di Baibl we yu kyan riizn pan fi si ef yu fi jringk lika ar yu no fi jringk it, ar umoch lika yu fi jringk ef yu jringk it. An ef yu a sumadi we aalwiez a jringk tu moch lika, fain out wa kyan elp yu fi tap.
4. Mek op yu main ef yu a-go jringk lika ar yu naa go jringk it
Ou Jiizas did fiil bout lika? Fi fain out ou im did fiil bout it, luk pan di fos mirikl we im did du. Riid Jan 2:1-11, an den wi a-go taak bout dem kwestiyan ya:
-
Wen wi luk pan da mirikl ya, ou Jiizas did fiil bout lika an di wan dem we jringk it?
-
Laik ou Jiizas neva se it rang fi jringk lika, ou wan Kristiyan fi fiil bout sumadi we jringk lika?
No jos kaa it aarait fi wan Kristiyan jringk lika miin se im fi dwi’it. Riid Pravorbz 22:3, an den wi a-go luk pan dem sitn ya we a-go elp yu fi si somtaim wen yu mait-a no jringk no lika:
-
Wen yu a-go jraiv ar wen yu a wok wid wan big mashiin laik we de iina wan fakchri.
-
Yu pregnant.
-
Yu dakta tel yu se yu no fi jringk no lika.
-
Yu kyaahn kanchuol umoch lika yu jringk.
-
Di laa iina di konchri we yu liv se yu no fi jringk lika.
-
Yu de wich paat sumadi de we yuus tu jringk lika an get jongk, an dem mek op dem main fi no jringk no muor lika.
Yu fi av lika de fi di piipl dem wen yu a kip di paati we dem kip afta di wedn don, ar wen yu a kip no ada kain-a paati? Fi elp yu mek op yu main bout wa yu fi du, plie di VIDIYO.
Riid Ruoman 13:13 an 1 Korintiyan 10:31, 32. Afta evri skripcha wi a-go taak bout da kwestiyan ya:
-
Ou da skripcha ya kyan elp yu fi riizn pan wa yu fi du so dat yu kyan du di ting dem we a-go mek Jeuova api?
Evri Kristiyan afi mek op dem main fi demself ef dem a-go jringk lika ar dem naa go jringk it. Aal ef im jringk lika, im mait-a mek op im main fi no jringk it som a di taim
5. Mek op yu main bout umoch lika yu a-go jringk
Ef yu a sumadi we mek op yu main fi jringk lika, memba dis: Aalduo Jeuova no se it rang fi jringk lika, im no waahn wi jringk til wi jongk. Wa mek? Riid Oziya 4:11, 18, an den wi a-go taak bout da kwestiyan ya:
-
Wa kyan apm tu sumadi wen dem jringk tu moch lika?
Wa wi kyan du so dat wi no jringk tu moch? Wi afi nuo umoch wi kyan manij. Riid Pravorbz 11:2, an den wi a-go taak bout da kwestiyan ya:
-
Wa mek a wan gud sitn fi mek op yu main bout umoch yu a-go jringk bifuo yu jringk?
6. Wa kyan elp yu fi tap jringk tu moch lika?
Luk pan wa elp wan man we yuus tu jringk til im jongk fi tap. Plie di VIDIYO, an den wi a-go taak bout di neks kwestiyan dem.
-
Iina di vidiyo, wen Dmitry jringk tu moch lika, ou it did mek im gwaan?
-
It did iizi fi im tap jringk lika sed taim?
-
Wa did elp im fi tap jringk tu moch lika?
Riid 1 Korintiyan 6:10, 11, an den wi a-go taak bout dem kwestiyan ya:
-
Wen sumadi jringk til dem jongk, ou siiros it bi?
-
Wa mek wi nuo se sumadi we jringk lika til dem jongk kyan tap?
Riid Matyu 5:30, an den wi a-go taak bout da kwestiyan ya:
-
Wen di Baibl se wi chap aaf wan a wi an, it a mek wi si umoch wi fi redi fi gi op fi mek Jeuova api. Wa yu kyan du ef yu fain it aad fi tap jringk tu moch lika? a
Riid 1 Korintiyan 15:33, an den wi a-go taak bout da kwestiyan ya:
-
Yu tingk di mount a lika we yu jringk av notn fi du wid di fren dem we yu a kip?
SUMADI MAIT-A AKS: “It rang fi jringk lika?”
-
Wa yu wuda ansa dem se?
DIS A WA YU FI MEMBA
Jeuova mek wi av lika so wi kyan enjai wiself, bot im no waahn wi jringk tu moch ar jringk til wi jongk.
Wa yu did lorn iina da lesn ya?
-
Wa di Baibl av fi se bout lika?
-
Wa a som a di bad sitn dem we kyan apm wen sumadi jringk tu moch lika?
-
Ou wi kyan shuo se wi rispek di wan dem we mek op dem main fi jringk lika an di wan dem we no jringk it?
CHEK OUT SOM MUO SITN
Wa kyan elp di tiinieja dem fi du di rait ting wen it kom aan tu lika?
Fain out som a di ting dem we yu kyan du fi elp yu fi tap jringk tu moch lika.
“Nuo Wa Yu A Du Wen It Kom Aan Tu Lika” (Di Wachtowa, Janiweri 1, 2010)
Wen piipl lik dem glaas tugeda an big op dem wan aneda (we dem kaal tuos), Kristiyan fi a du dat?
Iina di tuori we niem “Mi Did Komiin Laik Wan Baril We Na’av No Batam,” luk wa elp wan man we yuus tu sidong an jringk wol iip a lika fi tap.
“Di Baibl Chienj Piipl Laif Fi Di Beta” (Di Wachtowa, Mie 1, 2012)
a Di wan dem we komiin laik dem kyaahn tap jringk lika, dem mait-a afi go dakta fi get elp fi tap. Nof dakta se ef sumadi kyaahn tap jringk tu moch lika, it beta ef dem no jringk it non at aal.
