មេរៀនទី៤៣
តើគ្រិស្តសាសនិកគួរមានទស្សនៈយ៉ាងណាអំពីស្រា?
នៅទូទាំងពិភពលោកមនុស្សមានទស្សនៈខុសៗគ្នាអំពីការពិសាស្រាឬគ្រឿងស្រវឹង។ អ្នកខ្លះពិសាស្រាក្នុងឱកាសជួបជុំមិត្តភក្តិ។ ឯអ្នកខ្លះទៀត សម្រេចចិត្តមិនពិសាទាល់តែសោះ។ ចំណែកឯអ្នកខ្លះទៀត ពិសាស្រារហូតដល់ស្រវឹង។ ប៉ុន្តែ តើគម្ពីរចែងយ៉ាងណាអំពីការពិសាស្រា?
១. តើការពិសាស្រាខុសឬ?
គម្ពីរមិនបានប្រាប់ថា ការពិសាស្រាគឺខុសទេ។ ផ្ទុយទៅវិញ ពេលគម្ពីររៀបរាប់អំពីអំណោយជាច្រើនដែលព្រះផ្ដល់ឲ្យយើង នោះក៏រួមបញ្ចូលស្រាដែរ គឺព្រះបានផ្ដល់«ស្រាទំពាំងបាយជូរដើម្បីធ្វើឲ្យចិត្តមនុស្សសប្បាយរីករាយ»។ (ចម្រៀងសរសើរព្រះ ១០៤:១៤, ១៥) បុរសនិងស្ត្រីស្មោះត្រង់មួយចំនួនក្នុងគម្ពីរ ក៏បានពិសាស្រាដែរ។—ធីម៉ូថេទី១ ៥:២៣
២. តើគម្ពីរផ្ដល់យោបល់អ្វីខ្លះសម្រាប់អ្នកដែលសម្រេចចិត្តពិសាស្រា?
ព្រះយេហូវ៉ាផ្ដន្ទាទោសការពិសាស្រាច្រើនហួសប្រមាណ និងការពិសាស្រារហូតដល់ស្រវឹង។ (កាឡាទី ៥:២១) បណ្ដាំរបស់លោកចែងថា៖ «កុំធ្វើជាមនុស្សល្មោភស្រា»។ (សុភាសិត ២៣:២០) ទោះជាយើងសម្រេចចិត្តពិសាស្រាតែម្នាក់ឯង ឬជាមួយអ្នកឯទៀតក៏ដោយ យើងមិនគួរពិសាស្រាច្រើនពេក រហូតដល់មិនអាចគិតពិចារណាត្រឹមត្រូវ ឬមិនអាចគ្រប់គ្រងពាក្យសម្ដីនិងការប្រព្រឹត្តរបស់ខ្លួននោះទេ។ ម្យ៉ាងទៀត យើងមិនគួរពិសាស្រាច្រើនពេករហូតដល់ខូចសុខភាពឡើយ។ ដូច្នេះ បើយើងមិនអាចប្រមាណចំនួនស្រាដែលខ្លួនពិសាទេ នោះយើងគួរឈប់ពិសាស្រា។
៣. ស្ដីអំពីស្រា តើយើងអាចគោរពការសម្រេចចិត្តរបស់អ្នកឯទៀតយ៉ាងដូចម្ដេច?
មនុស្សម្នាក់ៗត្រូវសម្រេចចិត្តថាពិសាស្រាឬមិនពិសា។ យើងមិនគួរវិនិច្ឆ័យអ្នកណាម្នាក់ដែលសម្រេចចិត្តពិសាស្រាដោយចេះប្រមាណទេ ហើយយើងក៏មិនគួរបង្ខំអ្នកណាម្នាក់ដែលមិនចង់ពិសាស្រាដែរ។ (រ៉ូម ១៤:១០) យើងសម្រេចចិត្តមិនពិសាស្រា បើយើងនាំឲ្យមានបញ្ហាដល់អ្នកឯទៀត។ (សូមអាន រ៉ូម ១៤:២១) យើង«សុខចិត្តលះបង់ប្រយោជន៍ខ្លួន ដើម្បីប្រយោជន៍អ្នកឯទៀត»។—សូមអាន កូរិនថូសទី១ ១០:២៣, ២៤
បង្កើនចំណេះ
សូមពិចារណាគោលការណ៍ក្នុងគម្ពីរដែលនឹងជួយអ្នកឲ្យសម្រេចចិត្តថាគួរពិសាស្រាឬមិនគួរ ហើយបើសម្រេចចិត្តពិសាស្រា តើគួរពិសាច្រើនប៉ុណ្ណា? ម្យ៉ាងទៀត សូមស្វែងយល់អំពីអ្វីដែលអ្នកអាចធ្វើ បើអ្នកពិបាកយកឈ្នះការពិសាស្រាច្រើនពេក។
៤. ចូរសម្រេចចិត្តថាអ្នកនឹងពិសាស្រាឬមិនពិសា
តើលោកយេស៊ូមានទស្សនៈយ៉ាងណាអំពីការពិសាស្រា? ដើម្បីដឹងចម្លើយ សូមពិចារណាអព្ភូតហេតុដំបូងដែលលោកបានធ្វើ។ សូមអាន យ៉ូហាន ២:១-១១ រួចពិភាក្សាសំណួរដូចតទៅ៖
-
យោងតាមអព្ភូតហេតុនេះ តើយើងអាចរៀនអ្វីពីទស្សនៈរបស់លោកយេស៊ូចំពោះស្រានិងចំពោះអស់អ្នកដែលពិសាស្រា?
-
ដោយសារលោកយេស៊ូមិនផ្ដន្ទាទោសការពិសាស្រា តើគ្រិស្តសាសនិកគួរមានទស្សនៈយ៉ាងណាចំពោះអ្នកណាម្នាក់ដែលសម្រេចចិត្តពិសាស្រា?
ប៉ុន្តែ ទោះជាគ្រិស្តសាសនិកមានសេរីភាពក្នុងការពិសាស្រាក៏ដោយ មិនមានន័យថាគាត់គួរតែពិសាស្រាគ្រប់ពេលនោះទេ។ សូមអាន សុភាសិត ២២:៣ រួចពិចារណាស្ថានភាពដូចតទៅ ដើម្បីដឹងថាអ្នកគួរពិសាស្រាឬមិនគួរ៖
-
ពេលអ្នកហៀបនឹងបើកបរ ឬបញ្ជាគ្រឿងម៉ាស៊ីន។
-
ពេលអ្នកកំពុងមានផ្ទៃពោះ។
-
គ្រូពេទ្យបានឲ្យយោបល់អ្នកថា កុំពិសាស្រា។
-
ពេលពិសាស្រា អ្នកពិបាកឈប់។
-
ច្បាប់មិនអនុញ្ញាតឲ្យអ្នកពិសាស្រា។
-
ពេលអ្នកនៅជាមួយនឹងបុគ្គលដែលសម្រេចចិត្តមិនពិសាស្រា ដោយសារពីមុនគាត់ធ្លាប់ពិសាស្រាច្រើនពេក។
តើអ្នកគួរមានស្រាក្នុងពិធីរៀបការ ឬពិធីជួបជុំទេ? ដើម្បីមើលអ្វីដែលអាចជួយអ្នកឲ្យសម្រេចចិត្តបាន សូមលេងវីដេអូ។
សូមអាន រ៉ូម ១៣:១៣ និងកូរិនថូសទី១ ១០:៣១, ៣២។ បន្ទាប់ពីអានខគម្ពីរនីមួយៗ សូមពិភាក្សាសំណួរនេះ៖
-
តើតាមរបៀបណាការធ្វើតាមគោលការណ៍នេះអាចជួយអ្នកឲ្យធ្វើការសម្រេចចិត្តដែលនឹងនាំឲ្យព្រះយេហូវ៉ាពេញចិត្ត?
៥. ចូរសម្រេចចិត្តថាអ្នកនឹងពិសាស្រាច្រើនប៉ុណ្ណា
បើអ្នកសម្រេចចិត្តពិសាស្រា សូមចាំអំពីរឿងនេះ៖ ព្រះយេហូវ៉ាមិនផ្ដន្ទាទោសការពិសាស្រាទេ តែលោកផ្ដន្ទាទោសការពិសាស្រាហួសប្រមាណ។ ហេតុអ្វី? សូមអាន ហូសេ ៤:១១, ១៨ រួចពិភាក្សាសំណួរនេះ៖
-
ពេលអ្នកពិសាស្រាច្រើនពេក តើអ្វីអាចកើតឡើង?
តើអ្វីអាចជួយយើងកុំឲ្យពិសាស្រាច្រើនពេក? យើងត្រូវមានចិត្តសុភាពឬត្រូវស្គាល់កម្រិតសមត្ថភាពរបស់ខ្លួន។ សូមអាន សុភាសិត ១១:២ រួចពិភាក្សាសំណួរនេះ៖
-
ហេតុអ្វីជាការល្អដែលអ្នកដាក់កម្រិតលើបរិមាណស្រាដែលអ្នកនឹងពិសា?
៦. ចូរយកឈ្នះការពិសាស្រាហួសប្រមាណ
សូមមើលអ្វីដែលបានជួយបុរសម្នាក់ឲ្យឈប់ពិសាស្រាច្រើនហួសប្រមាណ។ លេងវីដេអូ រួចពិភាក្សាសំណួរដូចតទៅ៖
-
ក្នុងវីដេអូ តើស្រាធ្វើឲ្យបុរសឈ្មោះឌីមិទ្រីប្រព្រឹត្តយ៉ាងណា?
-
តើគាត់អាចផ្ដាច់ស្រាភ្លាមៗបានឬទេ?
-
តើតាមរបៀបណាគាត់អាចផ្ដាច់ការញៀនស្រាបានទាំងស្រុង?
សូមអាន កូរិនថូសទី១ ៦:១០, ១១ រួចពិភាក្សាសំណួរដូចតទៅ៖
-
តើគម្ពីរចែងយ៉ាងណាអំពីការប្រមឹកស្រា?
-
តើខគម្ពីរបង្ហាញយ៉ាងណាថាអ្នកដែលពិសាស្រាហួសប្រមាណអាចកែប្រែបាន?
សូមអាន ម៉ាថាយ ៥:៣០ រួចពិភាក្សាសំណួរនេះ៖
-
ពេលលោកយេស៊ូលើកឧទាហរណ៍អំពីការកាត់ដៃ លោកចង់មានន័យថាយើងប្រហែលជាត្រូវលះបង់អ្វីមួយដើម្បីធ្វើឲ្យព្រះយេហូវ៉ាពេញចិត្ត។ បើអ្នកពិបាកយកឈ្នះការពិសាស្រាច្រើនហួសប្រមាណ តើអ្នកអាចធ្វើអ្វីខ្លះ? a
សូមអាន កូរិនថូសទី១ ១៥:៣៣ រួចពិភាក្សាសំណួរនេះ៖
-
បើអ្នកចូលចិត្តសេពគប់មនុស្សដែលចូលចិត្តពិសាស្រាច្រើន តើនោះអាចមានឥទ្ធិពលយ៉ាងណាមកលើអ្នក?
មនុស្សខ្លះប្រហែលជាសួរថា៖ «តើការពិសាស្រាខុសឬ?»។
-
តើអ្នកនឹងឆ្លើយយ៉ាងណា?
សេចក្ដីសង្ខេប
ព្រះយេហូវ៉ាផ្ដល់ស្រាដើម្បីឲ្យយើងសប្បាយរីករាយ តែលោកផ្ដន្ទាទោសការពិសាស្រាហួសប្រមាណនិងការស្រវឹងស្រា។
រៀនសាឡើងវិញ
-
តើគម្ពីរចែងយ៉ាងណាអំពីការពិសាស្រា?
-
តើការពិសាស្រាច្រើនពេកនាំឲ្យមានបញ្ហាអ្វីខ្លះ?
-
ស្ដីអំពីការពិសាស្រា តើយើងអាចគោរពការសម្រេចចិត្តរបស់អ្នកឯទៀតយ៉ាងដូចម្ដេច?
ស្វែងយល់ថែមទៀត
តើតាមរបៀបណាក្មេងជំទង់អាចធ្វើការសម្រេចចិត្តល្អអំពីការពិសាស្រា?
សូមស្វែងយល់ជំហានផ្សេងៗដែលអាចជួយអ្នកឲ្យយកឈ្នះការពិសាស្រាច្រើនពេក។
តើគ្រិស្តសាសនិកគួរជល់កែវឬទេ?
«សំណួរពីអ្នកអាន» (ទស្សនាវដ្ដីប៉មយាម ថ្ងៃទី១ ខែមេសា ឆ្នាំ២០១០)
សូមមើលបទពិសោធន៍របស់បុរសម្នាក់ដែលបានឈប់ពិសាស្រាហួសប្រមាណ ក្នុងអត្ថបទ«ខ្ញុំជាធុងស្រាដែលគ្មានបាត»។
«គម្ពីរជួយមនុស្សឲ្យកែប្រែជីវិត» (ទស្សនាវដ្ដីប៉មយាម ខែតុលា–ធ្នូ ឆ្នាំ២០១២)
a អ្នកដែលញៀនស្រាប្រហែលជាត្រូវការអ្នកជំនាញដើម្បីជួយគាត់ឲ្យផ្ដាច់ស្រា។ គ្រូពេទ្យជាច្រើនប្រាប់ថា អ្នកដែលធ្លាប់ញៀនស្រា មិនគួរពិសាស្រាទាល់តែសោះ។